Mahungu Ya Ku Tsakisa Ya Ku Tsaliwa Hi Marka

12 Kutani a sungula ku va djondzisa hi ku tirhisa swifaniso a ku: “A ku ni munhu lweyi a nga byala mawuvha+ ka nsimu ya yena, kutani a yaka muru, a txela ndhawu ya ku kamela ka yona mawuvha a tlhela a yaka yindlo ya ku leha;*+ kutani a yendla ntwananu* ni varimi van’wani leswaku va yi hlayisa, a gama a yendza a ya ka tiko la le kule.+ 2 Hi nkama wa ku tshovela, a rhuma mutirhi wa yena ka varimi swaku a ya teka mihandzu yin’wani ka nsimu ya mawuvha. 3 Kambe va khoma mutirhi yelweyo va mu ba, va mu tlhelisa na a nga na nchumu. 4 A tlhela a rhuma mutirhi mun’wani ka vona, na yena va mu betetela ka nhloko va tlhela va mu rhuketela.+ 5 Kutani a tlhela a rhuma mutirhi mun’wani, na yena va mu dlaya. A rhuma ni van’wani va vanyingi na vona va biwa, van’wanyani va dlayiwa. 6 Hi wugamu, n’winyi wa nsimu a rhuma n’wana wa yena lweyi a mu rhandzaka+ ka varimi na a tibyela leswi: ‘N’wana wa mina va ta mu hlonipha.’ 7 Kambe varimi volavo va byelana va ku: ‘Hi lweyi a nga ta sala ni tshomba;+ tanani, a hi mu dlayeni hi ta sala ni nsimu* ya yena.’ 8 Se va mu khoma va mu dlaya, va mu txukumeta handle ka nsimu ya mawuvha.+ 9 Se n’winyi wa nsimu ya mawuvha a ta yendla yini ke? A ta fika a dlaya varimi volavo, a teka nsimu a yi nyikela ka van’wani.+ 10 A mi se tshama mi lerha tsalwa leli nge: ‘Ribye leli vayaki va nga li yala, hi lona leli nga yendliwa ribye la lisima hintamu.*+ 11 Li ta hi ka Yehovha,* naswona la hi hlamalisa’?”+

12 Lava a va mu kaneta a va swi lava ku mu khoma, kambe a va chava xitshungu, hikusa a va swi tiva swaku a a vulavula hi vona ka xifaniso lexi. Se va mu tshika va famba.+

13 Va gama va rhuma Vafarisi van’wani na va li ni vaseketeli va Heroda leswaku va ya zama ku mu phasa hi leswi a a ta swi vula.+ 14 Nkama va nga fika, va mu vutisile va ku: “Mudjondzisi, ha swi tiva swaku u ni ntiyiso ni leswaku a wu xaveleli munhu hikusa a wu txuvuki leswi munhu a nga xiswona kambe u djondzisa ntiyiso hi Xikwembu. Se hi nga hi byela: Swa pfumeleliwa ku hakela rhesa* ka Khezari kumbe a swi pfumeleliwi? 15 Hi fanele hi hakela kumbe a hi fanelanga hi hakela?” Hi ku tiva swaku a va lava ku mu kanganyisa, a va byela a ku: “Hi mhaka muni mi ni ringa? Ni tiseleni denari* ni yi vona.” 16 Va yi tisa, kutani a ku: “Xifaniso lexi ni marito lawa i swa mani ke?” Va ku: “I swa Khezari.” 17 Kutani Yesu a ku: “Tlhelisani swa Khezari ka Khezari,+ kambe swa Xikwembu ka Xikwembu.”+ Se va hlamalisiwa hi marito ya yena.

18 Kutani Vasaduki lava kholwaka swaku vafi a va nga ta pfuxiwa,+ va ta ka Yesu va fika va mu vutisa va ku:+ 19 “Mudjondzisi, Moxe a hi tsalele swaku loko wanuna a fa na a nga na n’wana naswona a siya nsati, makwavu wa mufi a fanele a chada ni wansati yelweyo wa ku feliwa hi nuna, leswaku a pfuxa ndjangu wa makwavu lweyi a nga fa.+ 20 A ku ni 7 wa vamakwavu; wa matevula a chadile, kambe a fa na a nga na vana. 21 Kutani wa wumbirhi a chada ni nsati wa mufi, kambe na yena a fa na a nga na vana, swi yendlekisa xiswoleswo ni ka wa wunharhu. 22 Hinkwavu va 7 a va psalanga vana. Hi wugamu, na yena wansati a fa. 23 Nkama vafi va nga ta pfuxiwa, a ta va nsati wa mani ka vona ke? Hikusa hinkwavu va 7 va mu chadile.” 24 Yesu a va hlamula a ku: “Mi lahleke hintamu, hikusa a mi ma tivi Matsalwa hambi matimba ya Xikwembu.+ 25 Hikusa nkama vafi va nga ta pfuxiwa, vavanuna a va nga ha ta chada naswona vavasati a va nga ha ta chadiwa, kambe va ta fana ni tintsumi ta le tilweni.+ 26 A mi lerhanga hi ta xinsinyani* xa mintwa ka buku la Moxe? Xikwembu a xi vulavula hi ta vafi lava nga ta pfuxiwa nkama xi nga byela Moxe xi ku: ‘Hi mina Xikwembu xa Abrahamu, xa Izaki ni xa Yakobe.’+ 27 A hi Xikwembu xa lava nga fa, kambe i xa lava hanyaka. Mi lahleke hintamu.”+

28 Mun’we wa vatsali lweyi a a li kolanu naswona a nga twa leswi a ku vulavuliwa hi swona a tlhela a twa ni nhlamulu yayinene ya Yesu, a mu vutisa a ku: “Hi wihi nawu wa lisima hintamu ka hinkwayu?”+ 29 Yesu a hlamula a ku: “Wa ku sungula hi lowu nge: ‘Yingisa wena Israyele, Yehovha* Xikwembu xa hina i Yehovha* mun’we, 30 naswona u fanele u rhandza Yehovha* Xikwembu xa wena hi mbilu ya wena hinkwayu, hi wutomi la wena hinkwalu, hi mimpimiso ya wena hinkwayu ni hi matimba ya wena hinkwawu.’+ 31 Wa wumbirhi hi lowu nge: ‘U fanele u rhandza vanhu van’wani ku fana ni leswi u tirhandzisaka xiswona.’+ A wu kona nawu wa ku tlula minawu leyimbirhi.” 32 Mutsali a ku: “Mudjondzisi, u vulavule ntiyiso: ‘Xikwembu i xin’we naswona a ku na Xikwembu xin’wani handle ka xona’+ 33 funtshi ku xi rhandza hi mbilu hinkwayu, hi mimpimiso* hinkwayu, hi matimba hinkwawu ni ku rhandza vanhu van’wani ku fana ni leswi u tirhandzisaka xiswona, hi swona swi nga swa lisima swinene ku tlula minyikelo ya ku hisiwa ni magandzelo.”+ 34 Nkama Yesu a nga vona swaku a hlamule hi wutlharhi, a ku: “A wu le kule ni Mfumu wa Xikwembu.” A ka ha vanga ni mun’we lweyi a nga tiya ku mu vutisa swin’wani.+

35 Kambe nkama Yesu na a djondzisa atempeleni, a vutisa a ku: “Se ina ka, hi mhaka muni vatsali va vula swaku Kreste i n’wana wa Davhida?+ 36 Phela hi ku kongomisiwa hi moya wa ku kwetsima+ Davhida a te: ‘Yehovha a byela Hosi ya mina a ku: “Tshama ka voko la mina la xinene anze ni veka valala va wena hansi ka minkondzo ya wena.”’+ 37 Loko Davhida a mu vitana Hosi, se i n’wana wa yena hi mhaka muni?”+

Xitshungu lexi a xi li kolanu xi tsakisiwe hi leswi a xi swi twa. 38 Nkama na a djondzisa, a tlhele a ku: “Tivoneleni ka vatsali lava rhandzaka ku famba na va yambale timpahla ta ku leha ni ku lava ku xowetiwa mabazara,+ 39 lava rhandzaka switshamu swa lisima ka masinagoga* ni ku tshama ka tindhawu leti nga vekeliwa vanhu va ku hlonipheka lomu mafexteni.+ 40 Va tekela vavasati lava nga feliwa hi vavanuna tiyindlo* ta vona naswona va rhandza ku yendla swikhongelo swa ku leha leswaku va ta voniwa hi vanhu. Va ta khatisiwa hi ndlela ya ku vava swinene.”

41 Kutani a tshama hansi lani a a kota ku vona makaxa ya minyikelo,+ a vona leswi vanhu a va petisa xiswona male ka wona, naswona ku tala ka vanhu va ku ganya a va peta male ya yinyingi.+ 42 Kutani ku ta wansati wa ku feliwa hi nuna lweyi a nga xisiwana a fika a peta masentavhu mambirhi* ya ku kala ma nga pfuni nchumu.+ 43 Se a vitana vadjondzisiwa va yena a ku: “Ni mi byela ntiyiso: Wansati lweyi wa ku feliwa hi nuna a tlhela a va xisiwana a nyikele ku tlula hinkwavu lava nga peta male ka makaxa.+ 44 Hikusa hinkwavu va nyikele leswi va nga swi pambula ka leswi nga va talela, kambe yena a nyikele hinkwaswu leswi a a li na swona,* leswi a a ta tihanyisa hi swona.”+