Mahungu Ya Ku Tsakisa Ya Ku Tsaliwa Hi Luka

12 Hi nkama wolowo, nkama xitshungu xi nga tlhangana xi za xi sungula ku kandzihelana, Yesu a sungule hi ku djondzisa vadjondzisiwa va yena a ku: “Tivoneleni ka fermentu* la Vafarisi, ku nga wukanganyisi.+ 2 A ku na nchumu lexi nga tumbhetiwa kahle lexi nga ta kala xi nga humesiwi handle, naswona a ku na nchumu lexi nga tumbhetiwa lexi nga ta kala xi nga tiviwi.+ 3 Hi mhaka leyo, leswi mi swi vulaka ka munyama, swi ta twiwa ku vonakaleni naswona leswi mi swi hlevetelaka xihundleni, swi ta chumayeliwa hinkwaku lomu ku nga ni vanhu.* 4 Handle ka leswo, na mi byela n’wina vanghanu va mina+ swaku mi nga va chavi lava kotaka ku dlaya muzimbha ntsena kambe va tsandzeka ku yendla swa ku tlula leswo.+ 5 Kambe ni ta mi byela lweyi mi faneleke mi mu chava: Chavani Lweyi a dlayaka a tlhela a va ni matimba ya ku hoxa Gehena.*+ Na mi byela: Chavani Yelweyo.+ 6 A 5 wa swinyanyani* swaswitsongo a swi xavisiwi hi masentavhu* mambirhi ke? Kambe Xikwembu a xi khohlwi ni xin’we xa swona.+ 7 Phela hambi misisi ya tinhloko ta n’wina yi kontiwile hinkwayu.+ Mi nga chaveni; n’wina mi va lisima ku tlula swinyanyani swa swinyingi swaswitsongo.+

8 “Na mi byela: Lweyi a vulaka ka vanhu swaku wa ni tiva,+ N’wana wa munhu na yena a ta vula swaku wa mu tiva ka tintsumi ta Xikwembu.+ 9 Kambe lweyi a ni yalaka ka vanhu, na mina ni ta mu yala ka tintsumi ta Xikwembu.+ 10 Naswona lweyi a vulavulaka ku biha hi N’wana wa munhu a ta rivaleliwa, kambe lweyi a rhukaka moya wa ku kwetsima a nge rivaleliwi.+ 11 Loko va mi yisa ka mintlhanganu,* ka vanhu lava nga vekiwa hi wuhosi ni ka tihosi, mi nga karhatekeni hi leswi mi nga ta swi vula leswaku mi tinyimelela,+ 12 hikusa moya wa ku kwetsima wu ta mi djondzisa hi nkama wolowo leswi mi faneleke mi swi vula.”+

13 Mun’we xikarhi ka xitshungu a byela Yesu a ku: “Mudjondzisi, byela makwerhu leswaku hi yavelana tshomba leli papayi a nga hi siyela lona.” 14 Yesu a mu hlamula a ku: “Wanuna ndziwena, i mani lweyi a nga ni veka ku va muyavanyisi kumbe muyavi wa tshomba la n’wina?” 15 Kutani a byela vanhu a ku: “Tshamani mi pfule matihlo, mi tivonela ka mixaka hinkwayu ya ku navela,*+ hikusa wutomi la munhu a li humi ka minchumu leyi a nga na yona hambiloko yi yo mu talela kandjani.”+ 16 Se a va byela xifaniso a ku: “Nsimu ya wanuna mun’wani wa ku ganya a yi humesa swakudla swa swinyingi. 17 Kutani a sungula ku pimisa a ku: ‘Se ni ta yendla yini leswi ni kalaka ni nga ha na ndhawu ya ku veka leswi ni nga swi tshovela?’ 18 Kutani a ku: ‘Ni ta yendla leswi:+ Ni ta hahlula matshala* ya mina ni yaka yamakulu ni gama ni veka trigu ni swilo swa mina hinkwaswu ka wona, 19 kutani ni ta tibyela leswi: “Ni ni minchumu ya yinyingi yayinene leyi nga ta tshama malembe ya manyingi; swi ngo yini ni humula, ni dla, ni phuza ni tsaka.”’ 20 Kambe Xikwembu xi ku: ‘Xiphunta ndziwena! U ta fa namuntlha niwusiku. I mani lweyi a nga ta sala ni minchumu hinkwayu leyi u nga yi hlengeleta?’+ 21 Ku ta yendleka leswo ka munhu lweyi a tihlengeletelaka tshomba kambe na a li xisiwana ka Xikwembu.”+

22 Kutani a byela vadjondzisiwa va yena a ku: “Tshikani ku vilela hi wutomi la n’wina loko swi ta ka leswi mi nga ta swi dla kumbe ku vilela hi muzimbha wa n’wina leswaku mi ta yambala yini.+ 23 Hikusa wutomi i la lisima ku tlula swakudla naswona muzimbha i wa lisima ku tlula mpahla. 24 Pimisani hi matlhugwani:* A ma byali mbewu kumbe ku tshovela naswona a ma na ndhawu ya ku hlayisa swakudla; kambe Xikwembu xa ma wundla.+ Indjhe n’wina a mi va lisima ku tlula swinyanyani?+ 25 I mani ka n’wina lweyi hi ku vilela a nga yengetelaka hambi 1 minutu ka wutomi la yena? 26 Leswi hambi minchumu yayitsongo mi tsandzekaka ku yi yendla, hi mhaka muni mi vilela hi swilo leswin’wani?+ 27 Pimisani hi leswi swiluva leswi vitaniwaka makhon’wa swi kulisaka xiswona: A swi tirhi naswona a swi rhungi mpahla; kambe na mi byela swaku hambi Solomoni lweyi a a ni minchumu ya yinyingi ya ku saseka, a nga zanga a yambala ku fana ni xin’we xa swona.+ 28 Se leswi Xikwembu xi yambexaka swinsinyani swa nhova hi ndlela leyi, leswi nga kona namuntlha kasi mundzuku swi ta hoxiwa ka ndzilu, indjhe a xi nge mi yambexi ku swi tlula n’wina mi nga ni lipfumelo lalitsongo? 29 Kutani mi nga vileleni hi leswi mi nga ta swi dla ni leswi mi nga ta swi nwa, naswona tshikani ku tshamela ku vilela;+ 30 hikusa hinkwaswu leswi, hi leswi vanhu va misava va waka va pfuka swaku va swi kuma, kambe Papayi wa n’wina wa swi tiva swaku ma swi lava swilo leswi.+ 31 Ku hambana ni leswo, tamani mi lava Mfumu wa yena, se swilo leswi mi ta nyikiwa swona.+

32 “Mi nga chavi n’wina va ntlhambi wawutsongo,+ hikusa Papayi wa n’wina a tsakele ku mi nyika Mfumu.+ 33 Xavisani swilo swa n’wina, mi yendlela swisiwana swilo swaswinene.+ Ti yendleleni swipachi leswi kalaka swi nga hlakali, ku nga tshomba la ku kala li nga heli matilweni,+ lomu muyivi a kalaka a nga tshineli kusuhi na kona ni lomu swipungwani swi kalaka swi nga wonhi. 34 Hikusa lomu tshomba* la n’wina li nga kona ni timbilu ta n’wina ti ta va kolanu.

35 “Tshamani na mi yambalile mi tlhela mi lungheka,+ mi tlhavika ni mimotso* ya n’wina,+ 36 mi fana ni vavanuna lava nyimelaka n’winyi wa vona swaku a vuya+ hi ka fexta la muchadu,+ kutani loko a fika a gongondza va hantla va mu pfulela. 37 Va ta tsaka vatirhi lava n’winyi wa vona a nga ta va kuma na va rindzile! Ni mi byela ntiyiso: A ta tilulamisa,* a byela vatirhi volawo swaku va tshama mezeni a gama a va phamela. 38 Naswona va ta tsaka loko a fika niwusiku* kumbe nimpundzu* a va kuma na va rindzile! 39 Kambe tivani leswi, loko n’winyi wa munti a wo tiva nkama lowu muyivi a a ta fika hi wona, a a nga ta tshika munti wa yena wu tlhanyiwa.+ 40 Na n’wina, tshamani mi lunghile, hikusa N’wana wa munhu a ta fika+ hi nkama lowu mi kalaka mi nga wu pimisi.”

41 Kutani Pedru a ku: “Hosi, u byela hina ntsena xifaniso lexi kumbe u byela ni lavan’wani?” 42 Se Hosi yi ku: “Kasi i mani mutirhi* wa ku tshembeka ni wa ku tlhariha, lweyi n’winyi wa yena a nga ta mu langa swaku a hlayisa vatirhi va yena, a va phamela swakudla swa ku yenela hi nkama wa kona?+ 43 Wa tsaka mutirhi yelweyo loko n’winyi wa yena a fika a mu kuma na a yendla swoleswo! 44 Ni mi byela ntiyiso: N’winyi wa yena a ta mu langa swaku a hlayisa swilo swa yena hinkwaswu. 45 Kambe loko mutirhi yelweyo a tibyela mbilwini ya yena a ku: ‘N’winyi wa mina wa hlwela ku vuya’, kutani a sungula ku ba vatirhi lavan’wani, a dla, a nwa a tlhela a dakwa,+ 46 n’winyi wa mutirhi yelweyo a ta ta hi siku leli a kalaka a nga li pimisi ni hi nkama lowu a kalaka a nga wu tivi, kutani a ta mu khatisa hi ndlela ya ku vava swinene naswona a ta mu txukumetela ka ndhawu yin’we ni lava kalaka va nga tshembeki. 47 Kutani mutirhi yelweyo lweyi a nga twisisa leswi n’winyi wa yena a swi lavaka kambe a nga lungheki kumbe ku yendla leswi a nga kombeliwa swona a ta biwa swinene.+ 48 Kambe lweyi a kalaka a nga swi twisisanga naswona a nga yendla swilo leswi lavaka swaku a khatisiwa, a ta biwa ka kutsongo. Lweyi a nga nyikiwa swa swinyingi ku ta nyimeliwa swa swinyingi ka yena, kasi lweyi a nga langiwa swaku a vonelela swa ku tala, ku ta nyimeliwa swa ku tala swinene ka yena.+

49 “Ni tele ku ta tlhavika ndzilu lani misaveni, se loko wu tlhavikile ni nga ha yendla yini swin’wani? 50 Ku ni ku tsakamisiwa loku ni faneleke ni tsakamisiwa hi kona, naswona na ha ta karhateka anze ku hetiseka!+ 51 Mi pimisa swaku ni tise ku rhula lani misaveni? Ihim! Ni tise ku yavana.+ 52 Hikusa ku sukela swoswi ku ta holoviwa andjangwini. Loko ku ni 5 wa vanhu, vanharhu va ta holova ni vambirhi naswona vambirhi a va nge twani ni lavanharhu. 53 Papayi a ta holova ni n’wana wa yena wa djaha, ni n’wana wa djaha a ta holova ni papayi wa yena, mamani a ta holova ni n’wana wa yena wa ntombhi, ni n’wana wa ntombhi a ta holova ni mamani wa yena, n’wingi a ta holova ni mamanyani* wa yena, na yena mamanyani a ta holova ni n’wingi wa yena; a va nge twani.”+

54 A tlhela a byela xitshungu a ku: “Loko mi vona rhefu li huma awupeladlambu, mi li: ‘Ku ta na mpfula yayikulu swinene’, kutani swi yendleka, 55 naswona loko mi vona moya wu ta hi le sul,* mi li: ‘Ku ta hisa’, kutani swi yendleka. 56 Vakanganyisi ndzin’wina! Ma swi tiva ku tlhamusela maxelo, se hi mhaka muni mi tsandzeka ku twisisa leswi yendlekaka hi nkama lowu?+ 57 Hi mhaka muni mi nga swi twisisi leswi mi faneleke mi swi yendla? 58 Hi xikombiso, loko u ya wuhosini ni lweyi a ku mangalelaka, ringisa ku lunghisa timhaka na yena na ma ha li ndleleni, leswaku a nga ku yisi ka muyavanyisi, se muyavanyisi a ku nyikela ka mutirhi wa tribunali, kutani mutirhi yelweyo a ku peta djele.+ 59 Na ku byela: A wu nge humi kolanu na u nge se hakela ni sentavhu* la wena la wugamu.”