Mahungu Ya Ku Tsakisa Ya Ku Tsaliwa Hi Matewu

18 Hi nkama wolowo, vadjondzisiwa va tshinela ka Yesu va ku: “Kasi i mani wamukulu ka Mfumu wa matilo?”+ 2 Se Yesu a vitana xin’wanani a xi nyimisa xikarhi ka vona 3 a gama a ku: “Ni mi byela ntiyiso: Loko mi nga txintxi mi fana ni swivanani,+ a mi nga ta tshuka mi nghena ka Mfumu wa matilo.+ 4 Hi mhaka leyo, lweyi a nga ta tiveka hansi ku fana ni xin’wanani lexi, hi yena wamukulu ka Mfumu wa matilo;+ 5 naswona lweyi a yamukelaka xin’wanani xa ku fana ni lexi hi vito la mina, na mina wa ni yamukela. 6 Kambe lweyi a wisaka mun’we wa lavatsongo, lava nga ni lipfumelo ka mina, swi nga yampsa loko o boheleliwa ribye lalikulu* ka nhamu a txukumeteliwa lwandle la ku yenta.+

7 “Khombo ka vanhu va misava leyi lava wisaka van’wani! Vhela, ku ta va ni vanhu lava nga ta wisaka van’wani, kambe khombo ka vanhu volavo! 8 Kutani, loko voko la wena kumbe nenge wa wena swi ku djohisa,* swi tsemi u swi txukumeta kule na wena;+ swa yampsa u kuma wutomi na u li xilima kumbe na u khwita, ku tlula ku va u helisiwa swa wugamu hi ndzilu na u ni minenge yimbirhi ni mavoko mambirhi.+ 9 Naswona loko tihlo la wena li ku djohisa, li xokoli u li txukumeta kule na wena; swa yampsa u kuma wutomi na u ni tihlo lin’we ku tlula ku hoxiwa Gehena* ya ndzilu+ ni matihlo ya wena mambirhi. 10 Tivoneleni swaku mi nga va voneli hansi vanhu lava va ku fana ni swivanani; hikusa na mi byela swaku tintsumi ta vona leti nga matilweni ta mu vona Papayi* wa mina lweyi a nga tilweni minkama hinkwayu.+ 11* ——

12 “Mi swi vonisa ku yini? Loko munhu a ni 100 wa tinyempfu, ku gama ku lahleka yin’we,+ a nge ti siyi leta 99 atintshaveni a ya lavetela leyi nga lahleka?+ 13 Naswona loko o tshuka a yi kuma, ni mi byela ntiyiso: A tsaka hintamu hi leyi a nga yi kuma ku tlula leta 99 ta ku kala ti nga lahlekanga. 14 Hi ku fanana, Papayi wa mina* lweyi a nga tilweni a nga naveli swaku vanhu lava va ku fana ni swivanani va lahleka.+

15 “Se loko makwenu a ku djohela, famba u ya kombisana na yena ku hoxa* ka yena, na mi li n’wina vambirhi ntsena;+ loko a ku yingisa, u ta va u pfune makwenu ku yendla swaswinene.+ 16 Kambe loko a nga ku yingisi, famba ni munhu mun’we kumbe vambirhi, leswaku mhaka yin’wani ni yin’wani yi ta tiyisiwa hi vafakazi vambirhi kumbe vanharhu.+ 17 Loko a nga va yingisi, byela bandla. Loko a yala ni ku yingisa bandla, mu voni ku fana ni munhu wa matiko+ ni muhakelisi wa rhesa.*+

18 “Ni mi byela ntiyiso: Xin’wani ni xin’wani lexi mi nga ta xi boha misaveni, xi ta va nchumu lexi nga bohiwa matilweni, naswona xin’wani ni xin’wani lexi mi nga ta xi chunsa misaveni xi ta va nchumu lexi nga chunsiwa amatilweni. 19 Naswona ni mi byela ntiyiso: Loko vambirhi va n’wina misaveni va pfumelelana ku khongelela nchumu xa lisima, va ta yendleliwa xona hi Papayi wa mina wa le tilweni.+ 20 Hikusa lomu ku nga ni vambirhi kumbe vanharhu lava nga hlengeletana xikan’we hi vito la mina,+ na mina ni kona xikarhi ka vona.”

21 Se Pedru a ta ka Yesu a fika a mu vutisa a ku: “Hosi, ni fanele ni mu rivalela kangaki makwerhu loko a ni djohela? Ka 7 ke?” 22 Yesu a mu hlamula a ku: “Hayi ka 7, kambe ka 77.+

23 “Hi yona mhaka leyi Mfumu wa matilo wu nga fanisiwaka ni hosi, leyi nga byela swikarawa swa yona swaku swi yi hakela swikweneti. 24 Nkama swi nga sungula ku hakela, ku tisiwe xikarawa lexi a xi yi devha 10.000 wa titalenta.* 25 Kambe leswi a xi nga na xa ku mu hakela hi xona, n‘winyi wa xona a vule swaku xona, nsati, vana va xona ni swilo hinkwaswu leswi a xi li na swona swi xavisiwa swaku ku hakeliwa xikweneti xa xona.+ 26 Kutani xikarawa xi khizama xi mu kombela hi mbilu hinkwayu xi ku: ‘Ni lehiseli mbilu, ni ta ku hakela hinkwaswu leswi ni ku devhaka.’ 27 Se n’winyi wa xona hi ku xi twela wusiwana, a xi tshika kutani a tima xikweneti xa xona.+ 28 Kambe nkama xikarawa xolexo xi nga huma, xi kumana ni xikarawa xin’wani lexi a xi xi devha 100 wa tidenari* se xi xi khoma, xi xi tlimba nkolo xi ku: ‘Hakela male ya mina.’ 29 Kutani xikarawa xolexo xi khizama xi sungula ku kombela xi ku: ‘Ni lehiseli mbilu, ni ta ku hakela.’ 30 Kambe xikarawa lexi devhiwaka xi yala; se xi xi petisa djele xikarawa lexin’wani anze xi hakela male leyi a xi devha. 31 Nkama swikarawa leswin’wani swi nga vona leswi nga humelela, swi vaviseka hintamu, swi gama swi famba swi ya byela n’winyi wa swona swilo hinkwaswu leswi nga humelela. 32 Se n’winyi wa xona a xi vitana a ku: ‘Xikarawa xa ku biha! Ni time xikweneti xa wena hinkwaxu nkama u nga ni kombela. 33 Kutani wena ke, a wu nga fanelanga u xi twela wusiwana xikarawa lexiyani, ku fana ni leswi na mina ni nga ku twela wusiwana?’+ 34 Se n’winyi wa xona a kwata hintamu, kutani a xi peta djele anze xi hakela xikweneti hinkwaxu. 35 Na yena Papayi wa mina lweyi a nga matilweni a ta mi yendla swoleswo na n’wina,+ loko mi nga va rivaleli vamakwenu hi mbilu hinkwayu.”+