Mintirho Ya Vapostolo

2 Hi siku la Fexta la Pentekoxta,+ vadjondzisiwa va tlhanganile ka ndhawu yin’we. 2 Se ku twala guwa leli taka hi le tilweni leli fanaka ni moya wawukulu li tata yindlo hinkwayu leyi a va tshame ka yona.+ 3 Kutani va sungula ku vona swa ku fana ni tirimi ta ndzilu, ti yavana, ti tshama henhla ka mun’wani ni mun’wani wa vona, 4 se hinkwavu va tala hi moya wa ku kwetsima,+ va sungula ku vulavula tirimi ta ku hambanahambana, hi ku ya hi leswi moya wa ku kwetsima a wu va pfumelela swona.+

5 Hi nkama wolowo, aYerusalema a ku ni Vayuda lava xi hloniphaka hintamu Xikwembu lava a va ta hi ka matiko ya ku hambanahambana.+ 6 Nkama ku nga twala guwa lolelo, xitshungu xi sungule ku tlhangana, kutani xi dungeka nhloko, hikusa mun’wani ni mun’wani a sungule ku twa vadjondzisiwa na va vulavula hi lirimi la yena. 7 Phela xi hlamale hintamu kutani xi ku: “Vanhu hinkwavu lava va vulavulaka a hi Vagalileya+ ke? 8 Se swi kotekisa ku yini swaku mun’wani ni mun’wani wa hina a twa lirimi la yena?* 9 A xikarhi ka hina ku ni Vaparta, Vameda,+ Vaelamu,+ van’wani va ta hi Mezopotamiya, Yudiya, Kapadokiya, Ponto ni le ka provhinsiya la Aziya,+ 10 Frijiya, Pamfiliya, Gibita ni le ka tindhawu ta Libiya, kusuhi ni le Kirene, vayendzi lava taka hi Roma, ku nga Vayuda ni vaprozelita,*+ 11 Vakreta ni Vaarabiya; hi va twa na va vulavula hi mintirho ya matimba ya Xikwembu hi tirimi ta hina.” 12 Hinkwavu a va hlamalile va tlhela va dungeka tinhloko, se va vutisana va ku: “Swi vula yini leswi?” 13 Kambe van’wani va va hleka va ku: “Vanhu lava va dakwile.”

14 Kutani Pedru a sekeleka ni lava 11+ a tlakusa rito a vulavula na vona a ku: “Vavanuna va le Yudiya na n’wina lava tshamaka Yerusalema, ni yingiseni mi twa leswi ni swi vulaka. 15 Phela vanhu lava a va dakwanga, hi ku ya hi leswi mi swi pimisaka hikusa ka ha li mpundzu.* 16 Kambe mhaka leyi hi leyi nga vuliwa hi muprofeta Yuwele nkama a nga ku: 17 Xikwembu xi li: ‘“Ka masiku ya wugamu, ni ta nyika vanhu hinkwavu moya wa mina wa ku kwetsima; vana va n’wina va madjaha ni va tintombhi va ta profeta, madjaha ya n’wina ma ta vona minchumu ya ku hlamalisa hi ndlela ya singita* naswona vavanuna lava nga guga va ta lorha swa ku hlamalisa,+ 18 naswona ka masiku wolawo, vatirhi va mina va xinuna ni va xisati ni ta va nyika moya wa mina wa ku kwetsima, kutani va ta profeta.+ 19 Ni ta yendla minchumu ya ku hlamalisa atilweni ni masingita amisaveni, ngati, ndzilu ni marhefu ya ximusi. 20 Dlambu li ta txintxiwa li va munyama, n’weti wu ta pshuka ku fana ni ngati na ku nga se fika siku lalikulu ni leli hlamalisaka la Yehovha.* 21 Kutani lweyi a vitanaka vito la Yehovha* a ta ponisiwa.”’+

22 “Vavanuna va le Israyele, twanani marito lawa: Yesu wa le Nazareta, a a li munhu lweyi Xikwembu xi nga mi komba yena hi ku tirhisa mintirho ya matimba ni masingita ni swikombiso leswi xi nga swi yendla xikarhi ka n’wina hi ku tirhisa yena,+ hi ku ya hi leswi mi swi tivaka. 23 Wanuna lweyi, a nga nyikeliwa swaku a hetisisa leswi se a swi bohiwile ni leswi Xikwembu se a xi swi tiva,+ mi mu gongondzelile ka mhandzi hi ku tirhisa vanhu lava kalaka va nga tivi nawu mi gama mi mu dlaya.+ 24 Kambe Xikwembu xi mu pfuxile+ xi mu chunsa ka matimba* ya lifu, hikusa a swi nga ta koteka swaku lifu li va ni matimba ya ku tshama li mu khomile.+ 25 Hikusa Davhida a vula leswi hi yena: ‘Ni tshamela ku pimisa hi Yehovha,* hikusa a le ka voko la mina la xinene swaku ni nga tshuki ni tsekatsekisiwa. 26 Hi mhaka leyo, mbilu ya mina ya tsaka ni lirimi la mina li tsakile swinene. Ni ta tshama ni ni ntshembo; 27 hikusa a wu nge ni tshiki aSirheni* naswona a wu nge pfumeli swaku muzimbha wa lweyi a nga tshembeka ka wena wu bola.+ 28 U ni djondzise tindlela ta wutomi; u ta yendla swaku ni tsaka swinene lani u nga kona.’+

29 “Vavanuna, vamakwerhu, ni vulavula na n’wina hi ta Davhida vhovho wa hina na ni nga chavi nchumu, swaku a file a tlhela a lahliwa+ naswona sirha la yena la ha li kona ni namuntlha. 30 Hikusa a a li muprofeta naswona a a swi tiva swaku Xikwembu xi fungile swaku xi ta nyika mun’wani wa vana* va yena wuhosi la yena.+ 31 A ku vonile ku pfuxiwa ka Kreste na ku nge se yendleka naswona a tlhele a vula swaku Kreste a a nga ta tshikiwa aSirheni,* ni muzimbha wa yena a wu nga ta bola.+ 32 Yesu lweyi, a pfuxiwile hi Xikwembu funtshi hinkwerhu ka hina ha swi fakazela leswo.+ 33 Leswi se a nga tlakusiwa a vekiwa ka voko la xinene la Xikwembu+ ni ku tlhela a yamukela moya wa ku kwetsima lowu taka hi ka Papayi+ hi ku landza leswi a nga mu tshembisa swona, Yesu a chulule leswi mi swi vonaka ni ku swi twa ka hina. 34 Davhida a nga tlhatukelanga tilweni, kambe a te: ‘Yehovha* a byela Hosi ya mina a ku: “Tshama ka voko la mina la xinene 35 anze ni veka valala va wena hansi ka minkondzo ya wena.”’+ 36 Hi mhaka leyo, Vayisrayele hinkwavu a va tiyiseki swaku Yesu lweyi mi nga mu dlaya ka mhandzi,+ Xikwembu xi mu yendle Hosi+ ni Kreste.”

37 Se nkama va nga twa leswo, va khumbeka timbilu kutani va byela Pedru ni vapostolo lavan’wani hinkwavu va ku: “Vavanuna, vamakwerhu, hi fanele hi yendla yini ke?” 38 Se Pedru a va hlamula a ku: “Tisoleni,+ mi tsakamisiwa+ hi vito la Yesu Kreste leswaku mi rivaleliwa swidjoho swa n’wina,+ kutani mi ta kuma nyiko ya mahala ya moya wa ku kwetsima. 39 Hikusa Yehovha* Xikwembu xa hina a tshembise+ n’wina ni vana va n’wina ni hinkwavu lava nga kule swinene ni hinkwavu lava a nga ta va vitana+ swaku a mi nyika moya wa ku kwetsima.” 40 A va byele swilo swa swinyingi ni ku fakaza hi ku helela a tlhela a va tiyisa a ku: “Tihambaniseni ni vanhu va ku biha lava mi hanyaka na vona.”+ 41 Se lava nga yamukela marito ya yena hi mbilu hinkwayu va tsakamisiwa,+ naswona kolomuyani ka 3.000 wa vanhu va tipatse na vona.+ 42 Kutani va tame va tinyiketela ka leswi vapostolo a va swi djondzisa; va hanyisana,* va dla xikan’we+ ni ku khongela xikan’we.+

43 Phela vapostolo va sungule ku yendla masingita ya manyingi ni swikombiso, kutani vanhu va sungula ku chava Xikwembu.+ 44 Hinkwavu lava nga pfumela va hlengeletanile va yavelana hinkwaswu leswi a va li na swona, 45 a va xavisa minchumu ya vona+ va gama va phakelana male ya kona hi ku ya hi ku pfumala ka munhu.+ 46 Siku ni siku a va tshama tempeleni hi xikongomelo xin’we; a va dla kaya ka mun’wani ni mun’wani, naswona a va yavelana swakudla na va tsakile swinene hi mbilu ya ku basa, 47 a va dzunisa Xikwembu naswona a va rhandziwa hi vanhu. Siku ni siku Yehovha* a tame a va tisela vanhu lava a a ta va ponisa swaku va va vadjondzisiwa.+