Mintirho Ya Vapostolo
4 Nkama Pedru na Yohani a va ha khuluma ni vanhu, va teliwe hi vaprista, murhangeli wa vavoneleli va tempele ni Vasaduki.+ 2 A va nyenyentsekile hikusa vapostolo a va djondzisa vanhu ni ku vulavula hi ku pfuxiwa ka Yesu ku feni.+ 3 Se va va khoma va va peta djele,+ kutani va tshama kona wusiku hinkwalu hikusa se a li pelile. 4 Kambe vanhu va vanyingi lava a va va yingisile nkama na va djondzisa va kholwile, kutani numeru ya vavanuna yi fika kolomuyani ka 5.000.+
5 Hi mundzuku ka kona, varhangeli, madoda ni vatsali va tlhangana aYerusalema, 6 a va na Anasi+ lweyi a a li muprista wamukulu, Kayafasi,+ Yohani, Alexandri ni maxaka hinkwawu ya muprista wamukulu. 7 Se va nyimisa Pedru na Yohani xikarhi ka vona va va vutisisa va ku: “Mi yi yendla hi matimba ya mani minchumu leyi kumbe hi vito la mani ke?” 8 Se Pedru a tala hi moya wa ku kwetsima+ a ku:
“N’wina tihosi ni madoda, 9 loko namuntlha hi thethisiwa hi mhaka ya leswi hi nga komba timpsalu wanuna wa ku limala+ naswona mi lava ku tiva swaku i mani lweyi a nga mu hanyisa, 10 swi tiveni n’wina hinkwenu ni vanhu hinkwavu va le Israyele swaku munhu lweyi a nga nyima lani phambheni ka n’wina a hanyisiwe hi vito la Yesu Kreste wa le Nazareta,+ lweyi n’wina mi nga mu dlaya ka mhandzi+ kambe Xikwembu xi nga mu pfuxa ka lava nga fa.+ 11 Leli i ‘ribye leli n’wina vayaki mi nga li vona na li nga pfuni nchumu leli nga va ribye la lisima hintamu.’+ 12 Naswona a ku na lweyi a nga ta hi ponisa loko ku nga li yena hikusa a ku na vito lin’wani+ hansi ka tilo leli nga nyikiwa vanhu leli hi faneleke ku ponisiwa hi lona.”+
13 Nkama va nga vona swaku Pedru na Yohani a va nga chavi nchumu ni leswaku a va nga djondzanga hintamu naswona a va li vanhu va ku toloveleka ntsena,+ va hlamalile. Se va swi twisisa swaku a va tshama na Yesu.+ 14 Nkama va nga vona munhu lweyi a nga hanyisiwa na a nyime na vona,+ a va swi kotanga ku va hlamula.+ 15 Se va va byela swaku va huma Tribunali,* nkama va nga huma, va sungule ku vutisana 16 va ku: “Se hi ta yendla yini hi vavanuna lava ke?+ Hikusa swa tiveka hinkwaku aYerusalema+ swaku hi vona va nga yendla singita leli, naswona a hi nge li pfaleteli. 17 Leswaku mhaka leyi yi nga hangalaki yi tiviwa hi vanhu va vanyingi, a hi va chaviseleni, hi va byela swaku va nga ha tshuki va khuluma ni vanhu hi vito leli.”+
18 Se va va vitana kutani va va byela swaku va nga ha tshuki va vulavula ni vanhu kumbe ku djondzisa hi vito la Yesu. 19 Kambe Pedru na Yohani va ku: “Loko mi pimisa swaku Xikwembu xi swi vona na swi lulamile swaku hi yingisa n’wina ku tlula ku yingisa xona, swi li n’wina leswo. 20 Kambe hina a hi nge tshiki ku vulavula hi leswi hi nga swi vona ni leswi hi nga swi twa.”+ 21 Va tlhele va va chavisela kambe loko se va gamile va va chunsile hileswi va kalaka va nga kumanga nchumu xa ku va khatisa hi xona ni hi mhaka ya leswi a va chava vanhu+ hikusa vanhu a va dzunisa Xikwembu hi leswi nga humelela. 22 Phela munhu lweyi a nga hanyisiwa hi singita a a ni malembe ya ku tlula 40.
23 Nkama va nga va chunsa va ye ka vadjondzisiwa lavan’wani va fika va va byela leswi vaprista vavakulu ni madoda va nga va byela swona. 24 Nkama va nga twa leswo, va khongele ka Xikwembu va ku:
“Hosi Leyikulu, hi Wena u nga yendla tilo ni misava ni lwandle ni minchumu hinkwayu leyi nga ka swona,+ 25 ni lweyi hi moya wa ku kwetsima a nga tirhisa vhovho wa hina Davhida+ mutirheli wa wena ku vula u ku: ‘Hi mhaka muni matiko ma kwatile naswona vanhu va pimisa* hi swilo swa ku kala swi nga pfuni nchumu? 26 Tihosi ta misava ti lunghekile ni lava fumaka va hlengeletanile va nyima xikan’we swaku va lwa na Yehovha* ni lweyi a nga mu langa.’*+ 27 Heroda, Pontiyo Pilatu,+ vanhu vamatiko ni vanhu va le Israyele a va tlhanganile ka doropa leli swaku va lwa na Yesu mutirheli wa wena wa ku kwetsima, lweyi u nga mu langa,+ 28 va tlhanganile swaku va yendla leswi u nga swi profeta. Leswo swi yendleke hi mhaka ya matimba ya wena naswona a ku li ku rhandza ka wena.+ 29 Yehovha,* vona leswi va hi chaviselisaka xiswona, u tiyisa* vatirhi va wena swaku va tama va khuluma hi rito la wena na va nga chavi nchumu, 30 na u tlakusa voko la wena swaku u hanyisa, u yendla masingita ni minchumu ya ku hlamalisa+ hi vito la mutirheli wa wena wa ku kwetsima Yesu.”+
31 Nkama va nga gama ku khongela hi timbilu ta vona hinkwatu, ndhawu leyi a va tlhanganile ka yona yi sungule ku tsekatseka se hinkwavu va tala hi moya wa ku kwetsima,+ va vula rito la Xikwembu na va nga chavi nchumu.+
32 Ntlawa wa lava nga pfumela a wu twana, a ku nga na lweyi a a vula swaku leswi a nga na swona i swa yena ntsena; a va yavelana hinkwaswu leswi a va li na swona.+ 33 Vapostolo va tame va vulavula hi ku hiseka hi ta ku pfuxiwa ka Hosi Yesu a ku feni,+ naswona Xikwembu xi va katekisile swinene. 34 Phela a nga kona lweyi a a pfumala xikarhi ka vona+ hikusa hinkwavu lava a va ni masimu kumbe tiyindlo a va swi xavisa va tisa male ya kona, 35 va fika va yi nyika vapostolo,+ se yi yaveliwa mun’wani ni mun’wani hi ku ya hi leswi a swi pfumalaka.+ 36 Kutani Yosefa, lweyi vapostolo a va mu vitana Barnaba+ (ku nga vito la ku loko li hundzuluxeliwa li vulaka “lweyi a tiyisaka van’wani”*), lweyi a a li Mulevhi wa ku psaliwa Kipra, 37 a a ni nsimu kutani a yi xavisa, se male ya kona a yi heleketa ka vapostolo.+