Vafilipiya

1 Mina Pawulo, ni nga na Timotiya, hi nga vatirheli va Kreste Yesu, ni tsalela vakwetsimi hinkwavu lava nga vadjondzisiwa va Kreste Yesu lava nga Filipiya,+ ni madoda ni vapfunisi va bandla:+

2 Timpsalu tatikulu ni ku rhula leswi taka hi ka Xikwembu Papayi wa hina ni le ka Hosi Yesu Kreste a swi ve na n’wina.

3 Minkama hinkwayu ni khensa Xikwembu xa mina loko ni mi khumbuka. 4 Ni yendla leswo nkama wun’wani ni wun’wani loko ni mi khongelela; naswona ni khongela na ni tsakile,+ 5 hikusa ku sukela hi siku la ku sungula ku ta fikela namuntlha mi wu seketelile ntirho wa ku chumayela mahungu ya ku tsakisa. 6 Na tshemba swaku lweyi a nga sungula ntirho lowu wa ku saseka xikarhi ka n’wina, a ta tlhela a wu hetisa+ anze ku fika siku la Kreste Yesu.+ 7 I swinene kuva ni pimisa leswo hi n’wina, hikusa mi le mbilwini ya mina naswona hi tikhorisa xikan’we hi timpsalu tatikulu ta Xikwembu. Naswona mi ni seketelile nkama a ni li djele+ ni nkama ni nga lwela mahungu ya ku tsakisa ni tlhela ni ma tiyisa hi nawu.+

8 Hikusa Xikwembu xa ni fakazela swaku na mi khumbuka swinene hinkwenu ni leswaku na mi rhandza ku fana ni leswi Kreste Yesu a mi rhandzisaka xiswona. 9 Ni tama ni khongelela swaku lirhandzu la n’wina li ya li kula ngopfu+ hi wutivi la ntiyiso+ ni ku twisisa kakukulu swinene;+ 10 leswaku mi ta kota ku langa swa lisima hintamu,+ leswaku mi nga soleki hi nchumu naswona mi nga wisi* van’wani+ anze ku fika siku la Kreste. 11 Ni tlhela ni khongelela swaku mi psala mihandzu ya ku lulama leyi taka hi ka Yesu Kreste+ leswaku Xikwembu xi dzunisiwa xi tlhela xi twalisiwa.

12 Kutani ni lava mi swi tiva vamakwerhu, swaku leswi nga ni humelela swi yendle swaku mahungu ya ku tsakisa ma tama ma ya phambheni, 13 hikusa hinkwavu Vagwardu va Hosi ni lavan’wani hinkwavu va swi twile+ swaku ni le djele+ hi mhaka ya Kreste. 14 Ku khomiwa ka mina ku yendle swaku vamakwerhu va ku tala Hosini va va ni lipfumelo va tlhela va tiya timbilu swaku va chumayela rito la Xikwembu na va nga chavi nchumu.

15 I ntiyiso leswaku van’wani lava chumayelaka hi ta Kreste va swi yendla hi mhaka ya mona ni ku phikizana. Kambe van’wani va swi yendla hi xikongomelo xaxinene. 16 Lava chumayelaka hi mhaka ya xikongomelo xaxinene, va chumayela hi ta Kreste hi mhaka ya lirhandzu, hikusa va swi tiva swaku ni vekiwe leswaku ni lwela mahungu ya ku tsakisa;+ 17 kambe lava chumayelaka hi mhaka ya mona ni ku phikizana, a va swi yendli hi xikongomelo xaxinene hikusa va lava ku ni vangela nhlomulu loko na ha li djele. 18 Se va ganya yini hi swoleswo? Loko va chumayela hi Kreste hi tindlela ta ku hambanahambana, hambi hi ndlela ya wukanganyisi kumbe ya ntiyiso, na tsaka hi swona. Naswona ni ta tama ni tsaka, 19 hikusa na swi tiva swaku leswi swi ta ni yendla ni ponisiwa hi mhaka ya xikombelo xa n’wina+ ni hi ku pfuniwa hi moya wa ku kwetsima lowu Yesu Kreste a nga na wona.+ 20 Ku langutela ka mina ni ku tshemba ka mina kakukulu i ka leswaku ni nga tshuki ni daniseka. Kambe hi mhaka ya leswi ni vulavulaka na ni chunsekile, Kreste a ta dzunisiwa swoswi ku fana ni ka nkama lowu nga hundza; a ta dzunisiwa hi mhaka ya muzimbha wa mina, hambi ni hanya kumbe ni file.+

21 Hikusa loko ni hanya ni hanyela Kreste,+ kasi loko ni fa ni ta pfuneka.+ 22 Loko na ha hanya ka muzimbha lowu, ni ta kota ku yendla swa swinyingi ka ntirho wa Kreste. Kambe a ni nge vuli swaku ni ta langa yini. 23 A ni swi tivi swaku ni ta langa yini ka leswimbirhi, hikusa na swi lava ku chunsiwa ni ku va na Kreste+ hikusa leswo swi yampsa ngopfu.+ 24 Kambe hi mhaka ya n’wina, swi laveka hintamu swaku ni tama ni hanya ka muzimbha lowu. 25 Hi mhaka leyo, na tshemba swaku ni ta tama ni hanya, ni leswaku na ha ta va na n’wina hinkwenu leswaku mi ta tama mi kula ni ku tsaka ka lipfumelo la n’wina, 26 leswaku loko ni tlhela ni mi tela, mi ta tsaka swinene hileswi mi nga vadjondzisiwa va Kreste Yesu hi mhaka ya mina.

27 Lexi lavekaka, tikhomeni hi ndlela leyi fanelaka mahungu ya ku tsakisa ya Kreste+ leswaku hambiloko ni mi yendzela kumbe ni nga ti, ni ta twa hi ta n’wina ni ku twa swaku ma ha khome swi tiya, mi ni mimpimiso yin’we naswona ma twanana+ swaku mi kota ku lwela lipfumelo la n’wina ka mahungu ya ku tsakisa. 28 Mi nga tshuki mi chavisiwa hi vakaneti va n’wina. Ku tiya nhlana ka n’wina ka fakaza swaku va ta helisiwa+ ni leswaku n’wina mi ta ponisiwa.+ Phela mhaka leyi yi ta hi ka Xikwembu. 29 Hikusa mi nyikiwe nkateko hi mhaka ya Kreste, a hi mhaka ya leswi mi nga pfumela ka yena ntsena kambe ni hileswi mi hluphekaka hi mhaka ya yena.+ 30 Hikusa mi lwa nyimpi ya ku fana ni leyi mi nga ni vona+ na ni yi lwa, leyi ni swoswi mi twaka swaku na ha tama ni yi lwa.