Lirhandzu la N’wina ali Tame li Kula

 1. I vamani lavanga pfuneta kusimeka bandla la le Filipiya?

LOKO mupostola Pawulo, Silasi, Luka na Timotiya va fika a Filipiya tiku leli ali fumiwa hi Varhoma va kume vanhu votala lava ava lava kutiva swotala hi mahungu yotsakisa. Vamakwerhu lava, lava hisekaka vapfunete kusimeka bandla naswona swingaha yendleka vadjondzisiwa hinkwavu vasungule kuhlangamela a kaya ka makwerhu wa xisati lweyi a avitaniwa Lidiya lweyi a arhandza kuyamukela vayendzi. — Mint. 16:40.

 2. Hi swihi swikarhatu leswi bandla leli li kumaneke na swona?

² Bandla leli la nyiwani li sungule kuvani swikarhatu. Sathana a yendle vanhu lava ava nyenya ntiyiso leswaku valwisana ni ntirho wochumayela lowu awu yendliwa hi Vamakwerhu lava votshembeka. Pawulo na Silasi va khomiwile, va biwa hi tindhuku va tlhela va petiwa djele. Loko se va humesiwile va yendzele vadjondzisiwa lava avaha kudjondza a ntiyiso leswaku vatava khutaza. Kutani Pawulo, Silasi na Timotiya va sukile ka doropa la Filipiya, kambe switikomba onge Luka a salile. Bandla leli la nyiwani alita sala li kuyini? Yehovha ava pfunile hi kutirhisa moya wa yena lowokwetsima leswaku va tama vamu tirhela hi kuhiseka. (Filp. 2:12) Pawulo a ani xivangelo xa kutwisiseka xa kutibuma hi vona!

 3. Hi kuya hi Vafilipiya 1:9-11, i mpsini leswi Pawulo a khongeleke ha swona?

³ Loko se kuhundze kolomo ka 10 wa malembe, Pawulo a tsalele bandla la Filipiya a papila. Loko hi djondza papila lelo hivona leswi Pawulo a ava rhandzisa xiswona vamakwerhu. Ava tsalele leswi: “Nilava ngopfu kuva na n’wina hinkwenu, hi kunavela loku kuhumaka ka Kriste Yesu”. (Filp. 1:8) Ava byele swaku a khongelile a kombela Yehovha leswaku ava pfuna kukulisa lirhandzu la vona, va tiyiseka hi swilo leswinga swa lisima ngopfu, vava lava tengeke, vanga tsanisi lipfumelo la van’wani ni kutala hi mihandzu ya leswa kululama. Handle ka kukanakana, na wena wa pfumela leswaku hinga djondza swotala ka marito ya Pawulo nyamutlha. Kutani ahi lerheni leswi Pawulo aswi tsaleleke Vafilipiya. (Lerha Vafilipiya 1:9-11.) Hitagama hi bula hi swilo swingali swingani leswi a vulavuleke ha swona ni kuvona leswaku hingaswi tirhisisa kuyini.

 4. a) Hi kuya hi 1 Yohane 4:9, 10, Yehovha aswi kombisise kuyini leswaku wahi rhandza? b) Hi fanele hixi rhandza kufikela kwihi Xikwembu?

⁴ Yehovha a kombise leswaku wahi rhandza hi kurhumela n’wana wa yena leswaku ata hi fela. (Lerha 1 Yohane 4:9, 10.) Lirhandzu la ntiyiso leli Yehovha ahi kombiseke lona lihi susumetela kumu rhandza. (Rhom. 5:8) Hi fanele hixi rhandza kufikela kwihi Xikwembu? Yesu a hlamule xivutiso xolexo loko a byela mufarisi mun’wani a ku: “Rhandza Hosi [Yehovha, NM] Xikwembu xa wena, hi mbilu ya wena hinkwayu, ni moya wa wena hinkwawu, ni kuyanakanya ka wena hinkwaku.” (Mat. 22:36, 37) Hilava kurhandza Xikwembu hi timbilu ta hina hinkwatu naswona hi lava swaku lirhandzu lelo li kula siku lin’wani ni lin’wani. Pawulo a byele Vafilipiya swaku lirhandzu la vona li fanele “riya mahlweni rikula masiku hinkwawu”. Kambe, i mpsini leswi hi faneleke hiswi yendla leswaku hi tiyisa lirhandzu leli hingana lona hi Xikwembu?

 5. Hingali tiyisisa kuyini lirhandzu la hina hi Yehovha?

⁵ Leswaku hi kota kurhandza Xikwembu hi fanele hixi tiva kahle. Bibele li li: “Lweyi angaliki na rirhandzu, angaxitivi Xikwembu, hikuva Xikwembu i rirhandzu.” (1 Yohane 4:8) Mupostola Pawulo a hlamusele swaku hitaya himu rhandza ngopfu Yehovha loko hi tiva ntiyiso hi yena ni kutwisisa mavonelo ya yena. (Filp. 1:9) Loko hi sungule kudjondza Bibele hi sungule kurhandza Yehovha hambi leswi ahingamu tivi hi kuhelela. Kutani loko hiya hi djondza hi Yehovha hiya himu rhandza ngopfu. Hi mhaka leyo, i swa lisima kudjondza Bibele siku ni siku ni kuyanakanyisisa hileswi hiswi djondzaka. — Filp. 2:16.

 6. Hi kuya hi 1 Yohane 4:11, 20, 21, hingali kulisisa kuyini lirhandzu la hina?

⁶ Kuva Xikwembu xihi komba lirhandzu la likulu swihi susumetela kuva na hina hi rhandza vamakwerhu. (Lerha 1 Yohane 4:11, 20, 21.) Swinga yendleka hi pimisa swaku kurhandza vamakwerhu switahi vevukela. Leswihi yendlaka hi pimisisa xileswi, hileswi hinga vagandzeli va Yehovha naswona hi zamaka kufana na yena. Hi landzela xikombiso xa Yesu, lweyi ahi rhandzeke la kakuva a nyikela hi wutomi la yena hikolaho ka hina. Hambileswo, minkama yin’wani swingahahi tikela kuyingisa nawu lowu wa kurhandza van’wani. Ahi kambisiseni a xikombiso xa bandla la le Filipiya.

 7. I mpsini leswi hingaswi djondzaka loko Pawulo a laya Evhodiya na Sintika?

⁷ Evhodiya na Sintika avali vamakwerhu vambirhi va xisati lava ava seketela Mupostola Pawulo. Kambe swingayendleka vatshame va holova naswona avangahali vanghanu. Loko Pawulo a tsala a papila leli aliya ka bandla leli ava hlangamela ka lona, a tsale mavito ya vona hi kukongoma ava byela leswaku “vafanele kutwanana.” (Filp. 4:2, 3) Pawulo a vone swaku aswi fanela kubyela bandla hinkwalu aku: ‘Yendlani swilo hinkwaswu handle ka kuvulavulela matlhelweni ni kuphikizana’. (Filp. 2:14) Kulayiwa loku, loku twisisekaka switikomba kupfune vamakwerhu lava ni van’wani abandleni kutama varhandzana ngopfu.

 8. I ncini lixinga yendlaka swihi tikela kurhandza vamakwerhu naswona i yini leswingahi pfunaka?

⁸ Minkama yin’wani swingahahi tikela kurhandza vamakwerhu, hikusa hingaha tikuma hili ka xiyimu xa kufana nixa Evhodiya na Sintika, xa kucuvuka ntsena swihoxo ka vamakwerhu. Hinkwerhu ha phazama siku ni siku. Loko hi tshamela kupimisa hi swihoxo swa vanhu van’wani switahi karhatela kuva rhandza. Hi xikombiso, loko makwerhu wokarhi o tshika a khohlwa kuhi pfuna kubasisa Yindlo ya Wugandzeli kumbe Salão do Reino hingaha nyenyetseka. Loko ho tshamela kupimisa hi swihoxo hinkwaswu swa makwerhu yelweyo, hitaya hi nyenyentseka ngopfu naswona a hingahata murhandza. Loko kuni makwerhu wokarhi lweyi umu nyenyaka abandleni la wena swingava kahle kupimisa hi leswi: Yehovha waswi tiva swihoxo swa hina ni swa vamakwerhu kambe wahi rhandza hinkwerhu. Hi mhaka leyo, hi fanele hi tekelela lirhandzu la Yehovha naswona hitshamela kupimisa hi wumunhu la kahle la vamakwerhu. Loko hiti karhatela kurhandza vamakwerhu swisuka ambilwini hita tiyisa a wun’we la hina. — Filp. 2:1, 2.

 9. Kukatseka yini ka swilo swa lisima leswi Pawulo angaswi tsalela Vafilipiya?

⁹ Yehovha a kongomise Pawulo kubyela Vakreste va le Filipiya leswaku va tiyiseka swaku ‘va hlawula leswinga swinene kutlula swin’wana’. Na hina hi fanele hi yendla swoleswo nyamutlha. (Filp. 1:10) Swilo swa kona leswingaswa lisima swi katsa kuvangamisa vito la Yehovha, kuhetiseka ka switshembiso swa yena, kurhula ni wun’we a bandleni. (Mat. 6:9, 10; Yoh. 13:35) Loko hi teka swilo leswi na swili swa lisima ka hina hitava hi kombisa swaku hamu rhandza Yehovha.

10. Hi fanele hi yendla yini swaku hiva lava tengeke?

¹⁰ Pawulo a tlhele a vula swaku hi fanele ‘hiva lava tengeke.’ Leswo aswivuli swona swaku hi fanele hiva lava hetisekeke. Ahingeswi koti kuva lava tengeke kufana na Yehovha. Kambe Yehovha angahi vona nahi tengile loko hi yendla hikwaswu leswi hingaswi kotaka leswaku hi kulisa lirhandzu la hina ni kutiyiseka hi swilo leswinga swa lisima. Hinga kombisa lirhandzu la hina hi kuyendla hinkwaswu leswi hingaswi kotaka leswaku hinga tsanisi lipfumelo la vanhu van’wani.

11. Hi mhaka muni hinga fanelanga hi tsanisa lipfumelo la van’wani?

¹¹ Mhaka ya kukala hinga tsanisi lipfumelo la vanhu van’wani hi fanele hiyi tekela nhlokweni. I mpsini leswingahi yendlaka hi tsanisa lipfumelo la van’wani? Kunghava swilo leswi hi hungataka hi swona, mayambalelo ya hina kumbe ntirho lowu hi tihanyisaka hi wona. Swingaha yendleka leswi hiswi yendlaka swinga bihanga hi kukongoma, kambe loko swi tsanisa lipfumelo la van’wani kumbe kuchakisa lipfalu la vona hi fanele hiswi tekela nhlokweni. Yesu a te lweyi angata yendla makwerhu wokarhi a lahlekeliwa hi wuxaka la yena na Yehovha swayampsa a boheleliwa ribye la kusilela ka lona a nhan’wini yakwe, ivi ahoxiwa xiziveni xa lwandle. — Mat. 18:6.

12. I mpsini leswi hingaswi djondzaka ka xikombiso xa vatekani lavanga maphayona?

¹² Vatekani vokarhi lava avali maphayona vama tirhisise kuyini marito lawa ya Yesu? Vona ava tirha ka bandla leli akuni vatekani van’wana lava ava huma ka ndhavuko lowu swilo swotala aswinga pfumeleliwi naswona avaha kutsakamisiwa. Vatekani lava, ava tiva swaku Vakreste ava fanelanga vaya ka tindhawu ta kub’ukela mafilimi hambi loko mali kahle. Va khunguvanyeke ngopfu loko vatwa swaku vatekani lavanga maphayona vaya, vaya b’ukela mafilimi. Kutani, vatekani lavanga maphayona loko vatwe leswo a vaha yanga vaya hlalela mafilimi kufikela loko vatekani lava avahaku tsakamisiwa, va letele lipfalu la vona ni kutlhela vaswikota kuhambanisa swa swinene ni swa kubiha. (Hev. 5:14) Hi kuyendla leswo, va kombise swaku a avava rhandza vamakwerhu lava avaha kutsakamisiwa, kungali hi marito kambe hi mintirho. — Rhom. 14:19-21; 1 Yoh. 3:18.

13. I ncini lexingahi yendlaka hi djohisa makwerhu?

¹³ Ndlela yin’wani leyi hinga khunguvanyisaka makwerhu ha yona i kumu yendla a wela ka xidjoho. Swinga yendlekisa kiyini leswo? Pimisa hi xiyimu lexi, munhu wokarhi lweyi a djondzeliwa Bibele a hete nkama wa kuleha na alwa ni vhisiyu la byala, ivi hi wugamu aswi kota kutilawula. Yena a vone leswaku angaha fanelaga a phuza byala. Hi nkamanyana a yendle kucinca ka kukulu ivi a tsakamisiwa. Siku lin’wani, makwerhu mun’wani amu rhambile ivi amu nyika byala, a gama a mu byela leswi: “Swoswi se u Mukreste uni moya wa Yehovha. Kutikhoma i xin’we xa swiyenge swa moya lowukwetsima. Loko u kota kuti khoma, kuphuza nyana aswi bihanga.” Aswita vava ngopfu loko makwerhu lweyi a ayomu yingisa kutani a phuza, ivi a tlhela avani vhisiyu leli a ali na lona la kudakwa!

14. Minhlanganu ya Wukreste yingahi pfunisa kuyini ku landzela nkongomiso lowunga ka Vafilipiya 1:10?

¹⁴ Kuva kona aminhlanganwini ya Wukreste swihi pfuna kutirhisa nkongomiso lowunga ka buku la Vafilipiya 1:10 hi tindlela totala. Ya kusungula, leswi hiswi djondzaka aminhlanganwini swihi pfuna kuvona swaku mavonelo ya Yehovha hi wona manga ya lisima ngopfu. Ya wumbirhi, hi djondza kutirhisa leswi hiswi djondzaka leswaku hiva lava tengeke. Ya wunharhu, hi djondza ‘kukombana rirhandzu ni mintirho leyinene’. (Hev. 10:24, 25) Loko hi khutaziwa hi vamakwerhu hiya himu rhandza ngopfu Yehovha naswona lirhandzu la hina hi vona liya li kula. Loko hi rhandza Yehovha ni vamakwerhu hi mbilu hinkwayu hita yendla hinkwaswu leswi hingaswi kotaka leswaku hinga tsanisi lipfumelo la van’wani.

15. Swi vula yini ‘kutala hi mihandzu ya leswolulama’?

¹⁵ Puwulo a khongele swi suka ambilwini a kombelela Vafilipiya leswaku ‘vatala hi mihandzu ya leswolulama’. (Filp. 1:11) Ahi kanakani swaku ‘mihandzu ya leswolulama’ yi katsa kurhandza Yehovha ni vanhu van’wani. Swoleswo swi katsa kubyela van’wani hi lipfumelo la hina ka Yesu ni ntshembo wa hina wo hlamalisa. Ka Vafilipiya 2:15 kutirhisiwe a marito lamange: “Mifanela kuphatima . . . kufana ni tinyeleti, laha misaveni”. Marito lawa mahi khumbuza leswi Yesu anga byela vadjondzisiwa vakwe loko a ku: “Mi kuvonakala ka misava”. (Mat. 5:14-16) Yesu a rhume vadjondzisiwa vakwe a ku: ‘Fambani . . . miya vayendla vajondzisiwa’ a tlhela a ku: “Mitava timboni  . . . kuyafika magan’wini ya misava.” (Mat. 28:18-20; Mint. 1:8) Hitava hi psala ‘mihandzu ya leswolulama’ loko hi tirha hi ntamu ka ntirho lowu wa lisima.

16. Vafilipiya 1:12-14, yiswi kombisisa kuyini swaku hinga phatima kufana ni tinyeleti hambi loko hi kumana ni swikarhatu? (Vona xifaniso xa tluka lorhanga.)

¹⁶ Hambi loko ho kumana na yini, hingaswi kota kuphatima kufana ni tinyeleti. Minkama yin’wani swilo leswi switikombaka ingi switahi pfalela kuchumayela hi swona swihi pfulelaka mukhandlu wa kuchumayela. Hi xikombiso, mupostola Pawulo a apfaleliwe ka munti wokarhi a Rhoma loko a tsalela Vafilipiya a papila. Hambi leswi a ali djele anga tshikanga kuchumayela varindzi ni vanhu lava a avata vatamu pfuxela. Leswi Pawulo a chumayela hi kuhiseka hambi leswi a ali ka xiyimu lexi, vamakwerhu na vona va kume xivindzi xa ‘kuvula Rito na vangachavi nchumu’. — Lerha Vafilipiya 1:12-14; 4:22.

17. Vamakwerhu van’wani vaswi kotise kuyini kutama va chumayela hambiloko va kumana ni swikarhatu?

¹⁷ Vamakwerhu votala va kombisa xivindzi xa kufana ni xa Pawulo. Vona va tshama ka matiko lawa swi tsimbisiwaka kuchumayela ka tindhawu ta mani na mani kumbe hi munti ni munti, kambe va zama tindlela tin’wani ta kuchumayela mahungu yotsakisa. (Mat. 10:16-20) Ka lin’wani la matiko wolawo, mudjikelezi anyikele xiringanyeto xa leswaku muchumayeli mun’wani ni mun’wani afanele achumayela lava ava tivaka, vayakelani, vanghanu, maxaka, lava a djondzaka na vona axikolweni ni lava a tirhaka na vona. Ndzeni ka malembe mambirhi a numeri ya mabandla yikule ngopfu ka cirkwitu lolelo. Swinga yendleka lomu hi tshamaka kona a ntirho wa kuchumayela a wutsimbisiwi. Hambi leswo hinga kuma djondzo ya lisima ka xikombiso xa vamakwerhu lava. Loko hi yendla hinkwaswu leswi hingaswi kotaka leswaku hi hi chumayela vanhu va’wani, hakunene Yehovha atahi nyika wuswikoti la kutama hi chumayela hambi loko hi kumana ni swikarhatu. — Filp. 2:13.

18. Hi fanele hi tinyimisela kuyendla yini?

¹⁸ Swoswi, hinkwerhu hi fanele hi tinyimisela kulandzela nkongomiso lowu kumekaka ka papila leli Pawulo ali tsaleleke Vafilipiya. Hi fanele hi tiyiseka hi swilo leswinga swa lisima, hiva lava tengeke, hinga tsanisi lipfumelo la van’wani naswona hi psala mihandzu ya leswo lulama. Kutani lirhandzu la hina lita kula naswona hita dzunisa B’ava wa hina Yehovha.