Mahungu Ya Ku Tsakisa Ya Ku Tsaliwa Hi Marka

6 Se Yesu a suka kolanu a ya ka doropa leli a nga kulela ka lona,+ kutani vadjondzisiwa va yena va mu landza. 2 Nkama ku nga fika siku la Savata, a sungula ku djondzisa ka sinagoga,* kutani va ku tala lava a va mu yingisa va hlamala va ku: “Munhu lweyi a swi kume kwini swilo leswi?+ I mani lweyi a nga mu nyika wutlharhi ni matimba ya ku yendla masingita lawa?+ 3 A hi karpinteru* lweyi,+ n’wana wa Mariya+ naswona vamakwavu va yena a hi Yakobe,+ Yosefa, Yudasi na Simoni?+ Vamakwavu va yena va xisati a hi vona lava nga na hina lani?” Kutani va sungula ku kala va nga ha pfumeli* ka yena hi mhaka ya leswi a nga swi vula ni ku swi yendla. 4 Kambe Yesu a ku: “Vanhu va mu hlonipha muprofeta. Kambe a nga hloniphiwi ka tiko leli a nga kulela ka lona, akaya ka yena ni hi maxaka ya yena.”+ 5 Kutani a hanyise vanhunyana hi ku va tlhateka mavoko. Kambe a nga zanga a yendla singita ni lin’we kolanu. 6 Swi mu hlamalisile ku vona swaku a va nga na lipfumelo. Se a famba a rhendzeleka ka swidoropani na a djondzisa.+

7 Kutani a vitana 12 wa vadjondzisiwa va yena, a sungula ku va rhuma hi vambirhimbirhi,+ a va nyika matimba ya ku hlongola madimoni.+ 8 A tlhela a va byela swaku va nga fambi ni nchumu kambe va teka nhonga ntsena; hambi ku li pawu, hambi ku li nkwama wa swakudla kumbe male*+ 9 kambe va yambala masandaliya naswona va nga teki mpahla ya ku txintxa* hi yona. 10 A tlhela a ku: “Ka munti wun’wani ni wun’wani lowu mi nga ta nghena ka wona, tshamani kona anze mi suka ka doropa lolelo.+ 11 Naswona hinkwaku lomu va kalaka va nga mi yamukeli kumbe va nga mi yingisi, loko mi huma, phuhunani wuthulu ka minenge ya n’wina leswaku swi va wumboni ka vona.”+ 12 Se va famba va ya chumayela, va byela vanhu leswaku va tisola,+ 13 naswona va hlongola madimoni ya manyingi+ va tlhela va tota mafurha vanhu va vanyingi lava vabyaka, va va hanyisa.

14 Kutani Hosi Heroda a twa leswi Yesu a nga swi yendla, hikusa vanhu a va vulavula hi yena va ku: “Yohani Mutsakamisi a pfuxiwile ka lava nga fa, hi yona mhaka leyi a yendlaka masingita.”+ 15 Kambe van’wani a va ku: “I Eliya.” Kuve van’wanyani a va ku: “I mun’wani wa vaprofeta.”+ 16 Kambe nkama Heroda a nga swi twa a ku: “I Yohani lweyi ni nga mu tsema nhloko, a pfuxiwile.” 17 Hikusa Heroda hi yena a nga tshama a khoma Yohani a mu boha hi machini, a mu peta djele hi mhaka ya Herodiya nsati wa Filipi makwavu wa Heroda, lweyi Heroda a nga chada na yena.+ 18 Hikusa na swi nga se yendleka leswo, Yohani a a tshamela ku byela Heroda a ku: “Swa yila ku chada nsati wa makwenu wa wena.”+ 19 Hi mhaka leyo, Herodiya a a mu bedjele hintamu naswona a a lava ku mu dlaya, kambe a a nga na ndlela. 20 Heroda a a mu chava Yohani hileswi a a swi tiva swaku a a li wanuna wa ku lulama lweyi a gandzelaka Xikwembu,+ naswona a a mu vhikelela. A a swi rhandza ku mu yingisela loko a vulavula, naswona loko se a mu yingiselile, a a sala a nga na xa ku xi yendla hi yena.

21 Kambe siku lin’wani Herodiya a kume nkama wa kahle hi siku leli Heroda a nga tlhanganisa malembe,+ nkama a nga hamba fexta a hambela vatirhi va yena va lisima, varhangeli va masonchwa ni vavanuna lava nga ni ndhuma aGalileya.+ 22 Kutani n’wana wa Herodiya wa ntombhi a nghena ka fexta a txina, a tsakisa Heroda ni lava a a li ku dleni* na vona. Se hosi yi ku: “Kombela xin’wani ni xin’wani lexi u xi lavaka, ni ta ku nyika xona.” 23 A funga a ku: “Xin’wani ni xin’wani lexi u nga ta xi kombela ni ta ku nyika xona, hambi ku li hafu ya mfumu wa mina.” 24 Se ntombhi yi ya vutisa mamani wa yona yi ku: “Ni nga kombela yini?” Mamani wa yona a ku: “Kombela nhloko ya Yohani Mutsakamisi.” 25 Kutani yi hantlisa yi ya byela hosi yi ku: “Ni lava u ni nyika nhloko ya Yohani Mutsakamisi na yi li ka bandecha hi xihantla.”+ 26 Hambileswi hosi yi nga tlhaveka mbilu swinene hi mhaka leyi, yi pfumelile xikombelo xa ntombhi leyi hi mhaka ya leswi yi nga swi funga ni hi mhaka ya vapfhumba* va yona. 27 Se hosi yi rhumela murindzi hi xihantla swaku ku ya tsemiwa nhloko ya Yohani a gama a vuya na yona. Kutani murindzi a ya djele a fika a tsema nhloko ya Yohani 28 a yi tisa na yi li ka bandecha a fika a yi nyika ntombhi yoleyo, se yona yi ya nyika mamani wa yona. 29 Nkama vadjondzisiwa va Yohani va nga twa mhaka leyi, va tile va ta teka ntsumbu wa yena va ya wu lahla sirheni.

30 Nkama vapostolo va Yesu va nga vuya, va mu byele hinkwaswu leswi va nga swi yendla ni leswi va nga swi djondzisa.+ 31 Kutani a ku: “Tanani, a hi yeni ka ndhawu leyi kalaka yi nga na vanhu, leswaku mi ta ya humulanyana.”+ Hikusa a ku ni vanhu va vanyingi lava a va ta va tlhela va famba, va za va nga ha kumi nkama wa ku dla. 32 Se va famba hi boti va ya lomu a ku nga na vanhu.+ 33 Kambe vanhu va va vonile nkama va nga famba naswona va ku tala va swi tivile; kutani va huma madoropeni va tsutsuma hi minenge va ya kona naswona va rhanga va fika. 34 Nkama Yesu a nga huma ka boti, a vone xitshungu xaxikulu, kutani a xi twela wusiwana,+ hikusa a xi fana ni tinyempfu ta ku kala ti nga na murisi.+ Kutani a sungula ku xi djondzisa minchumu ya yinyingi.+

35 Kambe leswi dlambu se a li pelile, vadjondzisiwa va yena va mu tshinelela va ku: “Hi le kule ni doropa naswona se li chone hintamu.+ 36 Va byeli swaku va ya ka tindhawu leti nga kusuhi ni ka swidoropani va ya tixavela swakudla.”+ 37 Yesu a va hlamula a ku: “Va nyikeni swakudla n’wina.” Va mu hlamula va ku: “Hi fanele hi ya xava mapawu hi 200 wa tidenari* hi ma nyika vanhu va dla?”+ 38 Yesu a ku ka vona: “Mi ni mapawu mangaki? Fambani mi ya txuvuka!” Kutani va ya txuvuka va gama va ku: “Hi ni 5 wa mapawu ni tihlampfi timbirhi.”+ 39 Se a byela vanhu hinkwavu leswaku va tshama hi mintlawa ka mabyanyi.+ 40 Kutani va tshama hi mintlawa ya 50 ni ya 100. 41 Se a teka 5 wa mapawu ni tihlampfi timbirhi, a txuvuka tilweni a khensa.+ A gama a khemelela mapawu, a sungula ku ma nyika vadjondzisiwa va yena swaku va ma phakela vanhu; a tlhela a teka tihlampfi timbirhi a ti yavela hinkwavu. 42 Hinkwavu va dla va xurha, 43 kutani va hlengeleta leswi nga sala, swi tata 12 wa mindzhava, na ku nga kontiwi ni tihlampfi.+ 44 Lava nga dla mapawu i 5.000 wa vavanuna.

45 Kutani a hantla a byela vadjondzisiwa va yena swaku va pfa va khwela boti va rhanga, va ya ka tlhelo lelin’wani la lwandle, va hundza hi le kusuhi ni Betisayida, yena na a sale a vhalelisana ni xitshungu.+ 46 Nkama xitshungu xi nga famba, a ye ka ntshava a ya khongela.+ 47 Nimadlambu, boti a li li xikarhi ka lwandle, kambe yena a a li yexe antshaveni.+ 48 Loko a vona swaku swa va tikela ku fambisa boti hileswi a ku ba moya wawukulu, a va yela nimpundzu* na a famba henhla ka mati; kambe a yendla ingi o va hundza. 49 Nkama va nga mu vona na a famba henhla ka mati, va ku: “Vonani mihlolo!” Kutani va ba nyandha. 50 Hikusa hinkwavu va mu vonile naswona va dzuke swinene. Kambe hi nkama wolowo a ku: “Tiyani nhlana! Hi mina; mi nga chaveni!”+ 51 Se a nghena ka boti leli a va li ka lona, kutani moya wu nyima. Nkama va nga vona leswo, va hlamalile hintamu, 52 hikusa a va nga yi twisisanga ntlhamuselo ya singita la mapawu; a va nga twisisi nchumu ka timbilu ta vona.

53 Loko se va tsemakanyile lwandle, va fika Jenezareta, lomu vanga fika va boha boti kusuhi ni lwandle.+ 54 Kambe loko va xika ka boti, vanhu va vona Yesu va tlhela va mu tiva. 55 Se va tsutsuma va ya byela vanhu va ndhawu yoleyo, kutani va sungula ku rhwala lava vabyaka va va yisa ka Yesu. 56 Hinkwaku lomu a a nghena kona, ka madoropa kumbe ka swidoropani, a va veka lava vabyaka amabazara, va kombela ku khumba ntsena ponta ya mpahla ya yena.+ Kutani hinkwavu lava nga yi khumba va hanyisiwile.