Mahungu Ya Ku Tsakisa Ya Ku Tsaliwa Hi Matewu

12 Hi nkama wolowo, Yesu a hundza hi ka masimu ya trigu hi Savata. Vadjondzisiwa va yena va twa ndlala kutani va sungula ku khaya swichocho* swa trigu va dla.+ 2 Nkama Vafarisi va nga va vona, va te: “Txuvuka! Vadjondzisiwa va wena va yendla leswi tsimbisiwaka hi Savata.”+ 3 A va hlamula a ku: “A mi lerhanga leswi Davhida a nga swi yendla nkama yena ni vavanuna lava a va li na yena va nga twa ndlala?+ 4 Swaku a nghene ka yindlo ya Xikwembu a teka mapawu ya ku kwetsima+ kutani va dla, hambileswi yena ni lava a a li na vona a va nga pfumeleliwi ku ma dla, hikusa a ma fanele ma dliwa hi vaprista ntsena?+ 5 Kumbe a mi lerhanga ka Nawu wa Moxe swaku vaprista va tirha ka tempele hi Savata kambe a va kumi nandzu ke?+ 6 Kambe na mi byela swaku lani mi nga kona, ku ni munhu wa lisima hintamu ku tlula tempele.+ 7 Loko a mi wu twisise kahle ntlhamuselo wa marito lama nge: ‘Ni lava timpsalu,+ ku nga li magandzelo’,+ a mi ta va mi nga va yavanyisanga lava kalaka va nga na nandzu. 8 Hikusa N’wana wa munhu i Hosi ya Savata.”+

9 Nkama a nga suka kolanu, a ye ka sinagoga* ya vona, 10 lomu a ku ni wanuna wa ku limala voko!+ Se leswi a va lava xa ku mu lumbeta hi xona, va mu vutisa va ku: “Swa pfumeleliwa ku hanyisa munhu hi Savata ke?”+ 11 A ku: “I mani ka n’wina lweyi loko nyempfu ya yena yi pela xikheleni hi Savata, a nga ta kala a nga yi humesi?+ 12 Munhu a hi wa lisima hintamu ku tlula nyempfu ke? Hi mhaka leyo, swa pfumeleliwa ku yendla nchumu xaxinene hi Savata.” 13 Kutani a byela wanuna yelweyo a ku: “Tshandzavuta voko la wena.” Se a li tshandzavuta, kutani li wololoka li fana ni lelin’wani. 14 Kambe Vafarisi va huma kutani va yendla planu* la ku mu dlaya. 15 Se nkama Yesu a nga swi tiva swaku va lava ku mu dlaya, a suke kolanu, kutani vanyingi va mu landzela,+ se a va hanyisa hinkwavu. 16 Kambe a va kawuka leswaku va nga byeli vanhu swaku hi yena mani,+ 17 leswaku ku hetiseka leswi nga vuliwa hi muprofeta Esaya loko a ku:

18 “Phela lweyi i mutirheli wa mina+ lweyi ni nga mu langa. Hi yena lweyi ni mu rhandzaka naswona ni mu tsakelaka swinene.+ Ni ta mu nyika matimba ya mina,+ naswona a ta komba matiko ndlela yayinene ya ku yendla swilo. 19 A nge holovi+ ni munhu, a nge bi huwa naswona a nga kona lweyi a nga ta twa rito la yena tindleleni. 20 A ku na lihlanga leli nga khotseka leli a nga ta li pfotlosa,+ naswona a nge yi timi ngoti ya motso leyi tuvikaka anze a tisa ku lulama. 21 Matiko ma ta tshemba vito la yena.”+

22 Kutani va mu tisela wanuna lweyi a a ni dimoni, wa ku fa matihlo a tlhela a va mbheveve; se Yesu a mu hanyisa, kutani wanuna lweyi a sungula ku vulavula a tlhela a vona. 23 Vanhu hinkwavu va hlamala, se va sungula ku vutisana va ku: “Indjhe lweyi a hi N’wana wa Davhida?” 24 Loko Vafarisi va twa leswo, va ku: “Wanuna lweyi a hlongola madimoni hi Belzebule* hosi ya madimoni.”+ 25 Hi ku tiva leswi a va swi pimisa, a va byela a ku: “Mfumu wun’wani ni wun’wani lowu nga yavana, wu ta wa, naswona doropa kumbe ndjangu lowu nga yavana, a wu nge tiyi. 26 Hi ku fana, loko Sathana a hlongola Sathana, swi vula swaku na yena a yavanile; se mfumu wa yena wu nga tiyisa ku yini ke? 27 Handle ka leswo, loko mina ni hlongola madimoni hi Belzebule, se vadjondzisiwa va n’wina ke, va ma hlongola hi mani? Hi leswo swi nga ta yendlaka va mi yavanyisa. 28 Kambe loko swi ku ni hlongola madimoni hi matimba ya Xikwembu, impela Mfumu wa Xikwembu se wu mi hundzile.+ 29 Kumbe munhu a nga nghenisa ku yini ka yindlo ya wanuna wa matimba kutani a teka tshomba la yena, na a nga rhanganga hi ku mu boha, se hi kona a nga kotaka ku teka leswi nga ka yindlo ya yena ke? 30 Lweyi a kalaka a nga nyimi na mina, a lwa na mina naswona lweyi a kalaka a nga hlengeleti na mina wa hangalasa.+

31 “Hi mhaka leyo na mi byela: Vanhu va ta rivaleliwa mixaka hinkwayu ya xidjoho ni xirhuku, kambe lweyi a rhukaka moya wa ku kwetsima a nga ta rivaleliwa.+ 32 Hi xikombiso, lweyi a solaka N’wana wa munhu, a ta rivaleliwa;+ kambe lweyi a solaka moya wa ku kwetsima, a nge rivaleliwi, hambi swoswi hambi ka nkama lowu taka.+

33 “Loko mi li nsinya wawunene, mi ta psala mihandzu yayinene, kambe loko mi li nsinya wa ku bola, ni mihandzu ya kona yi ta va ya ku bola; hikusa nsinya wu tiviwa hi mihandzu ya wona.+ 34 N’wina vana va tinyoka,*+ mi nga vulavulisa ku yini swilo swaswinene kuve mi vanhu va ku biha? Hikusa nomo wu vulavula leswi nga tala ka mbilu.+ 35 Munhu wamunene a humesa swilo swaswinene ka xuma xa yena xaxinene, kasi munhu wa ku biha a humesa swilo swa ku biha ka xuma xa yena xa ku biha.+ 36 Ni mi byela ntiyiso: Vanhu va ta tihlamulela+ hi Siku la Ku Yavanyisa, hi mhaka ya minchumu hinkwayu leyi va yi vulavulaka leyi kalaka yi nga pfuni nchumu; 37 hikusa mi ta vuliwa va ku lulama hi marito ya n’wina, naswona marito ya n’wina hi wona ma nga ta yendla swaku mi va ni nandzu.”

38 Kutani vatsali ni Vafarisi van’wani va mu hlamula va ku: “Mudjondzisi, hi lava ku ku vona u yendla singita.”+ 39 A va hlamula a ku: “N’wina vanhu* va ku biha ni lava kalaka va nga tshembeki ka Xikwembu, mi lava ku vona singita? A ku na singita mi nga ta li vona lani, loko ku nga li singita la Yonasi.+ 40 Ku fana ni leswi Yonasi a nga heta masiku manharhu ni wusiku la kona ndzeni ka khwirhi la hlampfi yayikulu,+ na yena N’wana wa munhu a ta heta masiku manharhu ni wusiku la kona hansi ka misava.+ 41 Nkama Xikwembu xi nga ta yavanyisa vanhu hinkwavu, vanhu va le Ninivha va ta pfuxiwa xikan’we ni vanhu va nkama lowu, naswona Vaninivha va ta va komba swaku va ni nandzu hikusa va tisolile nkama Yonasi a nga va chumayela.+ Kambe ku ni munhu wa lisima lani ku tlula Yonasi.+ 42 Nkama Xikwembu xi nga ta yavanyisa vanhu hinkwavu, hosi ya xisati ya le sul* yi ta pfuxiwa xikan’we ni vanhu va nkama lowu* naswona yi ta va komba swaku va ni nandzu; hikusa yi suke hi ka ndhawu ya le kule swinene ya misava ku ta yingisela wutlharhi la Solomoni.+ Kambe lani ku ni munhu wa lisima ku tlula Solomoni.+

43 “Loko dimoni* li suka ka munhu, li hundza hi le mananga na li lavetela ndhawu ya ku humula ka yona, kambe li nga yi kumi,+ 44 se li tibyela leswi: ‘Ni ta tlhelela kaya ka mina lomu ni taka hi kona’; se loko li fika, li kuma ku nga ha na nchumu naswona ku kukuliwile ku basa ku tlhela ku sasekisiwa. 45 Se li famba li ya teka 7 wa madimoni ya ku biha hintamu ku tlula lona, loko se ma nghenile, ma tshama kolanu; kutani xiyimu xa munhu yelweyo xi biha hintamu ku tlula xa ku sungula.+ Swi ta va xiswoswo ni le ka vanhu va ku biha va nkama lowu.”*

46 Na a ha vulavula ni xitshungu, ku ta mamani wa yena ni vamakwavu.+ A va nyime hala handle va lava ku vulavula na yena.+ 47 Kutani mun’wani a ku: “Mamani wa wena ni vamakwenu va nyime hala handle, va lava ku khuluma na wena.” 48 Kambe a mu hlamula a ku: “I mani mamani wa mina, naswona i vamani vamakwerhu?” 49 Kutani a tlakusa voko a kombeta vadjondzisiwa va yena, a ku: “Vonani! Mamani wa mina ni vamakwerhu hi lava!+ 50 Hikusa lweyi a yendlaka ku rhandza ka Papayi wa mina lweyi a nga tilweni, hi yena a nga makwerhu wa xinuna, wa xisati ni mamani ka mina.”+