Mahungu Ya Ku Tsakisa Ya Ku Tsaliwa Hi Matewu
16 Se Vafarisi ni Vasaduki va mu tshinelela swaku va mu ringa, kutani va mu kombela swaku a va yendlela singita leli humaka tilweni.+ 2 A va hlamula a ku: “Loko li pela, mi tolovela ku vula mi ku: ‘Ku ta va ni maxelo yamanene hikusa tilo li pshukile,’ 3 naswona nimixo mi li: ‘Namuntlha ku ta titimela ku tlhela ku na mpfula hikusa tilo li pshukile naswona ku ni marhefu.’ Ma swi kota ku tlhamusela matshamelo ya tilo kambe a mi swi koti ku tlhamusela swikombiso swa minkama. 4 N’wina vanhu* va ku biha ni lava kalaka va nga tshembeki ka Xikwembu, mi lava ku vona singita? A ku na singita mi nga ta li vona lani,+ loko ku nga li singita la Yonasi.”+ Se a famba a va siya.
5 Kutani vadjondzisiwa va tsemakanya va ya ka tlhelo lelin’wani la lwandle kambe va khohlwa ku teka mapawu.+ 6 Se Yesu a ku: “Tivoneleni ka fermentu* la Vafarisi ni la Vasaduki.”+ 7 Se va sungula ku vulavulisana hi xivona va ku: “A hi tekanga mapawu!” 8 Hi ku tiva leswi a va swi vula, Yesu a ku: “N’wina va lipfumelo lalitsongo, hi mhaka muni mi vulavulisana hi mhaka ya leswi mi kalaka mi nga na mapawu? 9 A mi se yi twisisa mhaka? Kumbe mi yo khohlwa swaku ni dlise 5.000 wa vanhu hi 5 wa mapawu, mi tlhela mi tata mindzhava ya yinyingi hi leswi nga sala?+ 10 Ni swaku ni dlise 4.000 wa vanhu hi 7 wa mapawu, mi tlhela mi tata mindzhava yayikulu hi leswi nga sala?+ 11 Hi mhaka muni mi nga swi twisisanga swaku a ni nga mi byeli hi ta mapawu? Kambe tivoneleni ka fermentu la Vafarisi ni Vasaduki.”+ 12 Se hi kona va nga swi twisisa swaku a a nga vulavuli hi ku tivonela ka fermentu la mapawu, kambe a a vulavula hi ku tivonela ka tidjondzo ta Vafarisi ni Vasaduki.
13 Nkama Yesu a nga fika ka doropa la Khezariya wa Filipi, a vutise vadjondzisiwa va yena a ku: “Kasi vanhu va li N’wana wa munhu i mani?”+ 14 Va ku: “Van’wani va li i Yohani Mutsakamisi,+ van’wanyani va li i Eliya,+ kambe van’wani va li i Yeremiya kumbe mun’we wa vaprofeta.” 15 A va vutisa a ku: “Se n’wina ke, mi li hi mina mani?” 16 Simoni Pedru a hlamula a ku: “U Kreste,+ N’wana wa Xikwembu lexi hanyaka.”+ 17 Yesu a mu hlamula a ku: “U katekile Simoni n’wana wa Yonasi, hikusa a wu pfuniwanga hi munhu ku twisisa minchumu leyi, kambe u pfuniwe hi Papayi wa mina lweyi a nga matilweni.+ 18 Na ku byela: Hi wena Pedru,+ naswona ka ribye+ leli ni ta yaka bandla la mina; hambi ku li swipfalu swa Sirha* a swi nga ta li hlula. 19 Ni ta ku nyika makhiya ya Mfumu wa matilo, naswona xin’wani ni xin’wani lexi u nga ta xi khiya* misaveni xi ta va nchumu lexi nga khiyiwa matilweni, naswona xin’wani ni xin’wani lexi u nga ta xi pfula* misaveni xi ta va nchumu lexi nga pfuliwa matilweni.” 20 Kutani a byela vadjondzisiwa va yena swaku va nga tshuki va byela munhu swaku hi yena Kreste.+
21 Ku sukela hi nkama wolowo, Yesu a sungula ku tlhamusela vadjondzisiwa va yena swaku a a fanele a ya Yerusalema a ya xanisiwa hintamu hi madoda, vaprista vavakulu ni vatsali, a gama a dlayiwa, kutani a pfuxiwa hi siku la wunharhu.+ 22 Se Pedru a mu koka va ya tlhelweni a sungula ku mu kawuka, a ku: “Titsetseleli we Hosi; swilo leswo swi nga ta tshuka swi ku humelela.”+ 23 Kambe, a ndzuluka a ku ka Pedru: “Suka la ka mina Sathana! U ni sivela ku yendla ku rhandza ka Xikwembu, hikusa a wu pimisi ku fana ni Xikwembu, kambe u pimisa ku fana ni vanhu.”+
24 Kutani Yesu a byela vadjondzisiwa va yena a ku: “Lweyi a lavaka ku ni landzela, a a titshiki, se a rhwala mhandzi ya yena ya nxaniso* a ni landzela nkama hinkwawu.+ 25 Hikusa lweyi a lavaka ku ponisa wutomi la yena a ta luzekeliwa hi lona; kambe lweyi a luzekeliwaka hi wutomi la yena hi mhaka ya mina, a ta tlhela a li kuma.*+ 26 Hikusa swi siza yini swaku munhu a kuma swilo hinkwaswu swa misava leyi kambe a luzekeliwa hi wutomi la yena ke?+ Kumbe munhu a nga li xava hi yini wutomi la yena?+ 27 Hikusa N’wana wa munhu a ta ta hi ku phatima ka Papayi wa yena na a li ni tintsumi ta yena, kutani hi nkama wolowo a ta nyika mun’wani ni mun’wani hi ku ya hi leswi a swi yendlaka.+ 28 Ni mi byela ntiyiso: Van’wani ka lava nga nyima lani a va nga ta fa na va nga rhanganga hi ku vona N’wana wa munhu na a li ka Mfumu wa yena.”+