Mahungu Ya Ku Tsakisa Ya Ku Tsaliwa Hi Marka

11 Nkama a va li kusuhi ni Yerusalema, va fike ka Ntshava ya Mawolivhera lomu xidoropani xa Betifaje ni xa Betaniya+ a xi kumeka kona. Se Yesu a rhuma vadjondzisiwa va yena vambirhi+ 2 a va byela a ku: “Fambani ka xidoropani lexi vonekaka lahaya, se nkama mi nga ta nghena, mi ta kuma ximbongolwani na xi bohiwile lexi xa ku a ku na munhu lweyi a nga tshama a famba hi xona. Xi tlhantlheni mi ni tisela xona. 3 Loko va mi vutisa va ku: ‘Mi xi yisa kwini?’ Hlamulani mi ku: ‘Xi laviwa hi Hosi, yi ta tlhela yi xi vuyisa.’” 4 Kutani va famba va fika va kuma ximbongolwani na xi bohiwile ka xipfalu xa yindlo leyi a yi li kusuhi ni ndlela; se va xi tlhantlha.+ 5 Kambe van’wani ka lava a va nyimile kolanu va va vutisa va ku: “Mi xi tlhantlhela yini ximbongolwani lexo?” 6 Kutani va va byela leswi Yesu a nga swi vula, se va va tshika va famba.

7 Se va tisa ximbongolwani+ ka Yesu, va xi tlhateka tinguvu ta vona kutani a famba hi xona.+ 8 Van’wani va yandlala tinguvu ta vona ndleleni, kasi van’wani a va tshova swigadjani amasin’wini.+ 9 Lava a va rhangelile ni lava a va ta hi le ndzhaku a va tama va huwelela va ku: “Ha khongela, mu ponisi!+ A katekile lweyi a taka hi vito la Yehovha!*+ 10 Wu katekile Mfumu wa papayi wa hina Davhida lowu taka!+ Ha khongela, mu ponisi, wena lweyi u nga matilweni!” 11 Se a nghena Yerusalema kutani a ya tempeleni, a fika a txuvuka hinkwaswu leswi a swi li tempeleni, kambe leswi se a ku mphumile a ye Betaniya ni lava 12.+

12 Hi siku leli landzelaka, nkama va nga suka aBetaniya, Yesu a twe ndlala.+ 13 Se a vona nsinya wa nkuwa lowu nga ni matluka na a li kulenyana, kutani a wu yela ku ya vona swaku devhi a ta kuma xanchumu. Kambe nkama a nga fika, a nga kumanga nchumu a yo kuma matluka ntsena, hikusa a ku nga li nkama wa makuwa. 14 Kutani a ku: “Ku nga ha tshuki ku va ni lweyi a dlaka mihandzu ya wena ni siku ni lin’we.”+ Vadjondzisiwa va yena a va swi twa.

15 Se va fika Yerusalema. Kutani a nghena tempeleni a sungula ku hlongola hinkwavu lava xavisaka ni lava xavaka tempeleni, a wisetela mimeza ya vatxintxisi va male ni switshamu swa lava xavisaka swituvani,+ 16 a nga pfumelelanga munhu ku tsemakanya tempele na a rhwale xanchumu. 17 Se a va djondzisa a ku: “Kasi a ku tsaliwanga leswaku: ‘Yindlo ya mina yi ta vitaniwa yindlo ya xikhongelo ya matiko hinkwawu’?+ Kambe n’wina mi yi yendla yindlo ya vayivi.”+ 18 Nkama vaprista vavakulu ni vatsali va nga swi twa, va sungule ku lava tindlela ta ku mu dlaya+ hikusa a va mu chava hi mhaka ya leswi xitshungu hinkwaxu a xi tsakisiwa hi madjondzisela ya yena.+

19 Nkama li nga pela, Yesu ni vadjondzisiwa va yena va humile adoropeni. 20 Kambe nkama va nga hundza hi mundzuku ka kona nimixo, va vone nsinya wa nkuwa na wu womile ku sukela ka timintsu.+ 21 Kutani Pedru a khumbuka leswi nga humelela, se a ku: “Rabi, txuvuka nsinya lowu u nga wu rhuka! Se wu womile.”+ 22 Yesu a va hlamula a ku: “Pfumelani ka Xikwembu. 23 Ni mi byela ntiyiso: Loko munhu o byela ntshava leyi a ku: ‘Suka u ya tihoxa lwandle’ na a nga kanakani ka mbilu ya yena, kambe a va ni lipfumelo swaku leswi a swi vulaka swi ta yendleka, hikakunene swi ta yendleka.+ 24 Hi yona mhaka leyi ni mi byelaka ni ku: Hinkwaswu leswi mi swi kombelaka hi xikhongelo na mi kholwa swaku se mi swi kumile, mi ta swi kuma.+ 25 Naswona loko mi khongela, rivalelani van’wani swihoxo swa vona, leswaku Papayi wa n’wina lweyi a nga matilweni na yena a ta mi rivalela swidjoho swa n’wina.”+ 26* ——

27 Se va tlhelela Yerusalema. Kutani loko a fambafamba tempeleni, vaprista vavakulu, vatsali ni madoda va mu tela, 28 va fika va ku: “Ma ta hi kwini matimba lawa u yendlaka hi wona swilo leswi? Kumbe i mani lweyi a nga ku nyika matimba ya ku swi yendla?”+ 29 Yesu a va hlamula a ku: “Na mina ni ta mi vutisa nchumu xin’we. Loko mi ni hlamula, hi kona na mina ni nga ta mi byela swaku ni yendla swilo leswi hi matimba ya mani. 30 Yohani+ a a rhumiwe hi mani ku tsakamisa vanhu? Hi Xikwembu* kumbe hi vanhu?* Ni hlamuleni.”+ 31 Kutani va sungula ku bula hi xivona va ku: “Loko hi ku: ‘A a rhumiwe hi Xikwembu,’ a ta ku: ‘Se hi mhaka muni mi nga pfumelanga ka yena?’ 32 Kambe loko hi ku: ‘A a rhumiwe hi vanhu’ ku ta yendleka yini hi hina?” A va chava xitshungu hikusa hinkwaxu a xi kholwa swaku Yohani a a li muprofeta.+ 33 Kutani va hlamula Yesu va ku: “A hi swi tivi.” Se Yesu a ku ka vona: “Na mina a ni nga ta mi byela lweyi a nga ni nyika matimba ya ku yendla swilo leswi.”