Mintirho Ya Vapostolo
28 Nkama se hi nga fika ka misava na hi hlayisekile, hi tsumbule swaku vito la xihlala* xolexo i Malta.+ 2 Vanhu va kona va hi kombe timpsalu ta ku hlamalisa. Va hi yamukele hi mandla mambirhi, va hi tshivelela ni ndzilu hikusa a ku na mpfula naswona a ku titimela. 3 Kambe nkama Pawulo a a tshivelela ndzilu hi tihunyi leti a nga ti rholela, ku hume nyoka ya vhenenu hileswi a yi twa ku hisa, yi fika yi tsondzihela voko la yena. 4 Nkama vanhu va kolanu va nga vona nyoka na yi lengalenga ka voko la yena, va sungula ku byelana va ku: “Impela wanuna lweyi i mudlayi; hambileswi a nga pona lwandle, Wululami* a nge mu tshiki a hanya.” 5 Kambe Pawulo a dzudza nyoka yoleyo yi wa ka ndzilu naswona hambileswi yi nga mu luma a nga vavisiwanga. 6 A va nyimele swaku a pfimba kumbe a wa, a fa. Kambe loko se ku hundze nkama wa wunyingi, va vona swaku a nga humeleliwi hi nchumu xa ku biha, va txintxa leswi a va swi pimisa, se va sungula ku vula swaku i xikwembu.
7 Kusuhi ni ndhawu yoleyo a ku ni wanuna mun’we lweyi a vitaniwaka Publiyo; a a ni masimu naswona a a li murhangeli wa xihlala* xolexo. A hi yamukelile hi mandla mambirhi hi tshama kaya ka yena masiku manharhu. 8 Kambe ku kumeke swaku papayi wa Publiyo a a yetlele mubedwini hikusa muzimbha wa yena a wu hiseta naswona a a twa ndzeni; se Pawulo a mu yela a fika a mu khongelela, a mu tlhateka mavoko, kutani a mu hanyisa.+ 9 Nkama ku nga humelela mhaka leyo, vanhu va xihlala* lexo lava a va vabya va mu yelile swaku a ta va hanyisa.+ 10 Va hi nyike ni swilo swa swinyingi naswona nkama hi nga khwela ka boti, va tlhele va hi nyika ni swin’wani leswi a hi ta swi lava.
11 Na se ku hundze tiwheti tinharhu, hi khwele boti leli a li tsaliwe marito lama nge: “Vana va Zewusi.” A li ta hi Alexandriya naswona a li tshame wuxika hinkwalu ka xihlala* xolexo. 12 Nkama hi nga fika ka xitichi xa maboti aSirakuza, hi tshame kona masiku manharhu. 13 Nkama hi nga suka lanu, hi fambe hi ya fika Rejiyo. Na se ku hundze siku na hi sukile Rejiyo, ku be moya wawukulu lowu a wu ta hi le sul,* kutani hi famba anze hi ya fika Puteyoli hi siku la wumbirhi. 14 Kona hi fike hi kuma vamakwerhu kutani va kombela swaku hi tshama na vona 7 wa masiku; nkama hi nga suka lanu, hi ye Roma. 15 Nkama vamakwerhu va le Roma va nga twa swaku hi fikile, va tile va ta hi tlhangaveta ka Bazara la Apiyu ni le ka ndhawu leyi a yi vitaniwa Mawotela Manharhu. Nkama Pawulo a nga va vona, a khense Xikwembu, a gama a tiya nhlana.+ 16 Nkama hi nga fika Roma, Pawulo a pfumeleliwe ku tshama yexe na a voneleliwa hi sonchwa.
17 Hi siku la wunharhu, Pawulo a vitane vavanuna va lisima va Vayuda swaku va tlhangana kutani a ku: “Vavanuna, vamakwerhu, ni khomiwile Yerusalema ni gama ni yisiwa ka Varoma+ hambileswi ni kalaka ni nga yendlanga nchumu lexi lwisanaka ni vanhu kumbe swihena swa vavhovho.+ 18 Loko se va ni thethisile,+ va lave ku ni chunsa hikusa a va kumanga xa ku ni yavanyisela lifu hi xona.+ 19 Se nkama Vayuda va nga yala ku pfumela xiboho lexi a xi yendliwile, ni sindziseke ku kombela swaku nandzu wa mina wu ya thethiwa hi Khezari;+ kambe a ku na nchumu lexi ni nga mangalelaka lixaka la ka hina hi xona. 20 Se ni kombele ku mi vona ni vulavula na n’wina hikusa ni bohiwe hi machini hi mhaka ya lweyi Vayisrayele a va mu nyimelile.”+ 21 Va mu hlamula va ku: “A hi yamukelanga makarta lama taka hi le Yudiya lama vulavulaka hi wena naswona lava nga fika lani a va vulavulanga nchumu xa ku biha hi wena. 22 Kambe hi vona swaku swa fanela kuva hi ku nyika nkama wa ku vulavula, hi ta twa mavonelo ya wena hikusa ha swi tiva swaku ka tiko hinkwalu+ va vulavula ku biha hi wukhongeli leli+ la nyuwani.”*
23 Kutani va veka siku leli a va ta tlhangana hi lona; loko siku li fikile, va ye lomu a a tshama kona na va li vanyingi. Ku sukela nimixo ku ya fikela nimadlambu, Pawulo a tirhise Nawu wa Moxe+ ni leswi nga tsaliwa hi Vaprofeta+ swaku a va tlhamusela mhaka hi ku va komba wufakazi leli tiyeke hi Mfumu wa Xikwembu swaku a va kholwisa leswaku va pfumela ka Yesu.+ 24 Van’wani va sungula ku kholwa leswi a a swi vula kambe van’wani a va swi kholwanga. 25 Leswi a va nga twanani, va sungule ku hangalaka; se Pawulo a ku:
“Moya wa ku kwetsima wu byele vavhovho va n’wina hi ku tirhisa Esaya 26 wu ku: ‘Famba u ya byela vanhu lava u ku: “Ku twa mi ta twa kambe a mi nga ta twisisa naswona mi ta txuvuka kambe a mi nga ta vona nchumu,+ 27 hikusa timbilu ta vanhu lava ti tlanyalile; va tipfale tindleve ni matihlo swaku va nga ha voni ni ku yingisa va nga ha yingisi hi tindleve ta vona. Hi mhaka leyo, a va swi twisisi ka timbilu ta vona leswi laviwaka ka vona naswona a va tisoli leswaku ni va hanyisa.”’+ 28 Swi tiveni swaku ndlela leyi Xikwembu xi ponisaka hi yona yi ta yisiwa ka vamatiko+ naswona va ta yi yingisa.”+ 29* ——
30 A tshame malembe mambirhi ka yindlo leyi a nga yi lugara;+ a a yamukela hinkwavu lava a va mu yendzela, 31 a a va chumayela hi ta Mfumu wa Xikwembu ni ku va djondzisa hi ta Hosi Yesu Kreste na a nga chavi nchumu*+ naswona na a nga siveliwi hi nchumu.