Vakorinto Va Ku Sungula
2 Vamakwerhu, nkama ni nga ta ka n’wina swaku ni ta vulavula hi xihundla xa ku kwetsima+ xa Xikwembu, a ni tirhisanga marito ya ku karhata ku ma twisisa+ kumbe wutlharhi la ku hlamalisa. 2 Hikusa ni yendle xiboho xa ku vulavula na n’wina ntsena hi ta Yesu Kreste ni ku dlayiwa ka yena mhandzini.+ 3 Loko ni ta ka n’wina a ni hele ntamu, ni chava ni tlhela ni rhurhumela. 4 A ni tirhisanga marito lama kholwisaka ya wutlharhi la vanhu ka leswi ni nga swi vula ni leswi ni nga swi chumayela, kambe marito ya mina a ma kombisa matimba ya moya wa ku kwetsima,+ 5 leswaku lipfumelo la n’wina li nga seketeliwi ka wutlharhi la vanhu kambe li seketeliwa ka matimba ya Xikwembu.
6 Swoswi hi vulavula hi wutlharhi xikarhi ka lava nga wupfa,+ kambe a hi vulavuli hi wutlharhi la misava leyi kumbe la tihosi ta misava leyi, leti nga ta helisiwa.+ 7 Kambe hi vulavula hi wutlharhi la Xikwembu la xihundla xa ku kwetsima,+ ku nga wutlharhi leli nga fihliwa, leli a li li xikongomelo xa Xikwembu na misava leyi ya ku biha yi nga se va kona. Xi yendle leswo swaku hi ta dzunisiwa. 8 Tihosi ta misava leyi a ti li tivi wutlharhi leli,+ hikusa loko a ti li tivile ina ti nga yi dlayanga* Hosi ya ku hlonipheka. 9 Kambe hilaha swi nga tsalisiwa xiswona: “Tihlo a li swi vonanga ni ndleve a yi swi twanga, naswona mbilu ya munhu a yi swi pimisanga swilo leswi Xikwembu xi nga swi lunghiselela lava xi rhandzaka.”+ 10 Hikusa Xikwembu xi swi byele hina+ hi ku tirhisa moya wa xona wa ku kwetsima,+ hikusa moya wa ku kwetsima wu kambela swilo hinkwaswu, hambi swilo swa ku yenta swa Xikwembu.+
11 Hikusa i mani xikarhi ka vanhu lweyi a kotaka ku tiva mimpimiso ya munhu loku ku nga li mbilu* ya munhu yelweyo ke? A nga kona lweyi a tivaka mimpimiso ya Xikwembu kambe i moya wa xona wa ku kwetsima ntsena. 12 Kutani a hi yamukelanga moya wa misava leyi kambe hi yamukele moya wa ku kwetsima wa Xikwembu,+ leswaku hi ta tiva swilo leswi Xikwembu xi nga hi nyika swona hi timpsalu. 13 Naswona swilo leswi a hi swi vulavuli hi marito lawa hi nga djondzisiwa hi wutlharhi la munhu,+ kambe hi swi vula hi marito lawa hi nga djondzisiwa hi moya wa ku kwetsima,+ loko hi tirhisa marito lama humaka ka moya wa ku kwetsima swaku hi tlhamusela timhaka ta Xikwembu.
14 Kambe munhu wa nyama a nga swi yamukeli swilo leswi vuliwaka hi moya wa ku kwetsima wa Xikwembu hikusa ka yena i wuphunta; naswona a nge swi tivi hikusa a fanele a swi kambela hi ku pfuniwa hi moya wa ku kwetsima. 15 Kambe munhu lweyi a kongomisiwaka hi moya wa ku kwetsima wa Xikwembu a kambela swilo hinkwaswu,+ kambe yena a nga kambeliwi hi munhu. 16 Hikusa “i mani lweyi a tivaka mimpimiso ya Yehovha* swaku a mu djondzisa?”+ Kambe hina hi pimisa ku fana na Kreste.+