Karta Leli Tsaleliwaka Vakolosa
3 Kambe loko mi pfuxiwile xikan’we na Kreste,+ tamani mi lava swilo swa le henhla, lomu Kreste a nga tshama kona ka voko la xinene la Xikwembu.+ 2 Vekani mimpimiso ya n’wina ka swilo swa le tilweni,+ mi nga yi veki ka swilo swa lani misaveni.+ 3 Hikusa mi file, ni wutomi la n’wina li fihliwile na Kreste hikusa swi fambelana ni leswi Xikwembu xi swi lavaka. 4 Loko Kreste lweyi a nga wutomi la hina+ a humelela, na n’wina mi ta humelela na yena ka ku dzuneka ka yena.+
5 Kutani dlayani ku navela ka swirho swa muzimbha wa n’wina,+ ku nga wuntunga la swa masangu,* chaka, ku navela ka masangu ka ku kala ku nga lawuleki,+ ku navela loku vavisaka ni makwanga,* ku nga ku gandzela swikwembu swa mavunhwa. 6 Ku kwata ka Xikwembu ka va tela lava yendlaka minchumu leyo. 7 Khale na n’wina a mi hanyisa swoleswo.+ 8 Kambe swoswi mi fanele mi swi txukumeta kule na n’wina hinkwaswu leswi: Ku karhata, ku kwata, wubihi,+ nhlambha+ ni mavulavulelo ya chaka.+ 9 Mi nga hembelani.+ Hlivilani wumunhu* la khale+ ni mintirho ya lona 10 mi yambala wumunhu la nyuwani,+ leli yendliwaka li va la nyuwani hi wutivi la ntiyiso hi ku ya hi xifaniso xa Lweyi a nga li tumbuluxa.+ 11 Ka yena a ku na Mugriki kumbe Muyuda, munhu wa ku tsema nsuvu* kumbe wa ku kala a nga tsemanga, munhu wa ku ta hi ka tiko lin’wani, munhu wa ku ta hi ntlhaveni,* xikarawa kumbe munhu lweyi a kalaka a nga li xikarawa; kambe Kreste i swilo hinkwaswu ka vanhu hinkwavu.+
12 Se leswi mi nga langiwa hi Xikwembu,+ mi kwetsimaka mi tlhela mi rhandziwa, yambalani timpsalu+ ni lirhandzu, wunene, ku tiveka hansi,*+ ku rhula+ ni ku lehisa mbilu.+ 13 Tamani mi lehiselana mbilu ni ku rivalelana hi ku chunseka+ hambiloko munhu a ni xa ku mu sola hi xona munhu mun’wani.+ Ku fana ni leswi Yehovha a nga mi rivalela hi ku chunseka, na n’wina mi fanele mi yendla swoleswo.+ 14 Kambe ku tlula hinkwaswu leswo, yambalani lirhandzu+ hikusa li yendla swaku vanhu hinkwavu va twanana hi ku helela.+
15 Naswona ku rhula ka Kreste a ku fume timbilu ta n’wina,+ hikusa mi vitaneliwe ka ku rhula koloko leswaku mi ta va muzimbha wun’we. Kutani khensani minkama hinkwayu. 16 Rito la Kreste a li ve ka n’wina hi ku helela li tlhela li mi tlharihisa. Tamani mi djondzisana ni ku tiyisana* hi tipisalema,+ tinsimu ta ku dzunisa Xikwembu, tinsimu ta ku dzunisa leti yimbeleliwaka hi ku tsaka kakukulu, mi yimbelelela Yehovha ka timbilu ta n’wina.+ 17 Xin’wani ni xin’wani lexi mi xi vulaka kumbe mi xi yendlaka, yendlani hinkwaswu hi vito la Hosi Yesu, mi khensa Xikwembu Papayi hi vito la yena.+
18 N’wina vavasati, tivekeni hansi ka vanuna va n’wina,+ ku nga leswi fanelaka vadjondzisiwa va Hosi. 19 N’wina vavanuna, tamani mi rhandza vasati va n’wina+ naswona mi nga va kwateli ku tlula mpimu.+ 20 N’wina vana, yingisani vapsali va n’wina ka swilo hinkwaswu,+ hikusa leswi swi yi tsakisa swinene Hosi. 21 N’wina vapapayi, mi nga va dlisi mbitsi* vana va n’wina,+ leswaku va nga heli mbilu.* 22 N’wina vatirhi,* yingisani vapatrao*+ va n’wina ka xin’wani ni xin’wani, ku nga li loko va mi txuvukile ntsena leswaku mi tsakisa vanhu, kambe hi mbilu hinkwayu, hi ku chava Yehovha. 23 Hinkwaswu leswi mi swi yendlaka, swi yendleni hi mbilu ni hi matimba ya n’wina hinkwawu ingaku mi swi yendlela Yehovha,+ ku nga li vanhu, 24 hikusa ma swi tiva swaku Yehovha a ta mi hakela hi ku mi nyika tshomba.+ Tirhelani N’winyi wa n’wina Kreste. 25 Vhela lweyi a yendlaka swa ku biha a ta khatisiwa hi mhaka ya wubihi la yena,+ hikusa Xikwembu a xi na xikheto.+