DJONDZO 49
U Nga Yentxa Yini Swaku Ndjangu Wa Wena Wu Tshama Na Wu Tsakile? — Xiyenge 1
Vanhu lava va ha ku chadaka va navela leswaku va tshama na va tsakile wutomi la vona hinkwalu, ku fana ni siku leli va nga chada hi lona funtshi leswo swa koteka. Vakreste lava va nga ni malembe ya manyingi na va chadile va tlhela va tikarhata swaku va tirhisa minawu ya Bibele, va swi tiva swaku leswo swa koteka.
1. Bibele li va pfunisa ku yini vavanuna lava va nga chada?
Yehovha a veke wanuna swaku a va nhloko ya ndjangu. (Lerha Vaefeza 5:23.) Yehovha a lava swaku wanuna a yentxa swiboho leswi swi nga ta pfuna ndjangu. Bibele li byela vavanuna li ku: “Tamani mi rhandza vasati va n’wina”. (Vaefeza 5:25) Swi vula yini leswo? Wanuna lweyi a rhandzaka nsati wa yena a mu khoma kahle loko va li kaya ni loko va li lomu ku nga tala hi vanhu. A yentxa hinkwaswu swaku nsati wa yena a hlayiseka, a tsaka a tlhela a mu nyika leswi lavekaka. (1 Timotiyu 5:8) Kambe xa lisima hintamu a pfuna nsati wa yena swaku a va munghanu wa Yehovha. (Matewu 4:4) Hi xikombiso, wanuna a nga khongela a tlhela lerha Bibele ni nsati wa yena. Wanuna lweyi a hlayisaka nsati wa yena hi lirhandzu, a tshama na a ni wunghanu la linene na Yehovha. — Lerha 1 Pedru 3:7.
2. Bibele li va pfunisa ku yini vavasati lava va nga chada?
Bibele li li wansati “a fanele a mu hlonipha hintamu nuna wa yena.” (Vaefeza 5:33) A nga swi yentxisa ku yini leswo? Wansati a fanele a pimisa hi wumunhu la kahle leli nuna wa yena a nga na lona ni minzamu leyi a yi yentxaka swaku a mu hlayisa yena ni vana va vona. Wansati a nga swi kombisa swaku wa mu hlonipha nuna wa yena, hi ku mu seketela ka swiboho hinkwaswu leswi a swi yentxaka, a vulavula na yena hi ndlela ya xihlonipho, a tlhela a vulavula kahle hi yena hambiloko a nga hanyi hi minawu ya Yehovha.
3. Lava nga chada va nga yentxa yini swaku va tiyisa wukati la vona?
Bibele li hlaya leswi hi lava nga chada: “Ha vambirhi va ta va nyama yin’we.” (Matewu 19:5) Leswo swi vula swaku nuna na nsati va fanele va yentxa minzamu hinkwayu swaku lirhandzu la vona li nga heli. Va yentxa leswo hi ku heta nkama xikan’we va tlhela va bula hi leswi va swi pimisaka ni leswi va titwisaka xiswona hi ndlela ya xihlonipho ni ya lirhandzu. A va pfumeleli nchumu kumbe munhu swaku a va wa lisima hintamu ku tlula lweyi va nga chada na yena loko ku nga li Yehovha ntsena. Va fanele va tivonela swaku va nga tolovelani ku tlula mpimu ni munhu lweyi va kalaka va nga chadanga na yena.
DJONDZA SWIN’WANA
Vona swaku Bibele li nga ku pfunisa ku yini swaku u tiyisa wukati la wena.
4. Vavanuna, rhandzani vasati va n’wina mi tlhela mi va hlayisa
Bibele li vula swaku “vavanuna va fanele va rhandza vasati va vona ku fana ni miri wa vona.” (Vaefeza 5:28, 29) Swi vula yini leswo? Sixtirani VHIDIYO, mi gama mi bula hi xivutiso lexi landzelaka.
Wanuna a nga yentxa yini kuva a kombisa swaku a rhandza nsati wa yena a tlhela a mu hlayisa?
Lerhani Vakolosa 3:12, mi gama mi bula hi xivutiso lexi landzelaka:
Wanuna a nga swi kombisisa ku yini leswi ndzimana leyi yi swi vulaka ka wukati la yena?
5. Vavasati, rhandzani vanuna va n’wina mi tlhela mi va hlonipha
Bibele li byela wansati swaku a hlonipha nuna wa yena hambiloko a nga hanyi hi minawu ya Yehovha. Lerhani 1 Pedru 3:1, 2, mi gama mi bula hi swivutiso leswi landzelaka:
Loko nuna wa wena a nga tirheli Yehovha, ha tshemba swaku wa swi navela swaku a mu tirhela. Hi mavonelo ya wena, leswi swi nga mu pfunaka swaku a tirhela Yehovha i ku mu chumayela nkama ni nkama, kumbe i ku va ni mahanyelo ya kahle u tlhela u mu hlonipha? Hi mhaka muni?
Nuna na nsati va nga yentxa swiboho swa kahle loko va tirhisana. Kambe swi nga yentxeka nsati a nga pfumelelani ni nuna. I ntiyiso swaku nsati a nga vula leswi a swi pimisaka kambe a fanele a yentxa leswo hi xihlonipho na a khumbuka swaku i Yehovha lweyi a nga nyika wanuna a mfanelo ya ku yentxa swiboho leswi nga ta pfuna ndjangu. A wansati a fanele a yentxa hinkwaswu swaku a seketela swiboho swa nuna wa yena. Loko a yentxa leswo a pfuna ndjangu hinkwawu swaku wu tsaka. Lerhani 1 Pedru 3:3-5, mi gama mi bula hi xivutiso lexi landzelaka:
Yehovha a titwisa ku yini loko wansati a hlonipha nuna wa yena?
6. Mi nga swi kota ku hlula swikarhatu ka ndjangu wa n’wina
A ku na ndjangu lowu kalaka wu nga na swikarhatu. Hi mhaka leyo, nuna na nsati va fanele va tirhisana swaku va hlula swikarhatu. Sixtirani VHIDIYO, mi gama mi bula hi swivutiso leswi landzelaka.
Ka vhidiyo, i mpsini swi kombisaka swaku nuna na nsati a va nga ha twanani kahle?
Se va yentxe yini swaku va tiyisa a wukati la vona?
Lerhani 1 Vakorinto 10:24 na Vakolosa 3:13. Loko mi gama ku lerha ndzimana ha yin’we bulani hi xivutiso lexi:
Ku tirhisa ndzimana leyi swi nga va pfunisa ku yini lava va nga chada?
Bibele li vula swaku hi fanele hi hloniphana. Ku hlonipha munhu swi vula ku mu khoma kahle ni ku mu komba swaku i wa lisima. Lerhani Varoma 12:10, mi gama mi bula hi swivutiso leswi landzelaka:
Indje nuna kumbe nsati, a fanele a nyimela swaku lweyi a nga chada na yena a rhanga a mu hlonipha? Hi mhaka muni?
VAN’WANA VA LI: “Mina ni nkatanga a ha ha rhandzani hintamu ku fana ni le kusunguleni.”
U nga mu tlhamuselisa ku yini munhu swaku Bibele li nga mu pfuna?
LESWI HI NGA SWI DJONDZA
Nuna na nsati va nga tsaka loko va rhandzana, va hloniphana va tlhela va tirhisa leswi Bibele li swi djondzisaka.
Ku kambela leswi hi nga swi djondza
Wanuna a nga yentxa yini swaku ndjangu wa yena wu tsaka?
Wansati a nga yentxa yini swaku ndjangu wa yena wu tsaka?
Loko u chadile, hi yihi minawu ya Bibele leyi u nga yi tirhisaka swaku u tiyisa wukati la wena?
LOKO U LAVA KU TIVA SWIN’WANA
Djondza leswi nga ku pfunaka swaku u va ni ndjangu lowu tsakeke.
Sixtira vhidiyo leli kombisaka minkateko leyi u nga yi kumaka loko u tirhisa leswi Bibele li swi vulaka ka wukati la wena.
Kambisisa swaku swi vula yini ku tiveka hansi ka nuna wa wena.
“Vavasati, Ha Yini Mi Titsongahatela Vunhloko?” (Murindzi wa 15 ka Maio wa 2010, hi Xitsonga)
Vona swaku Bibele li nga va pfunisa ku yini lava va nga chada.