Yoxuwa

9 Nkama tihosi hinkwatu leti a ti li awuxeni ka Yordani,+ leti tshamaka ka ndhawu ya tintshava aXefela, leti a ti li ka tindhawu hinkwatu leti a ti li kusuhi ni Lwandle Lalikulu*+ ni leti a ti li phambheni ka Lebanoni ku nga Vaheti, Vaamori, Vakanana, Vaperezi, Vahivhi ni Vayebusi,+ ti nga twa leswi nga humelela, 2 ti hlengeletanile swaku ti ya lwa na Yoxuwa ni Vayisrayele.+

3 Lava tshamaka Gibiyoni+ na vona va swi twile leswi Yoxuwa a nga swi yendla aYeriko+ ni le Ayi.+ 4 Se va hamba planu,* va gama va teka swakudla va swi chela ka masaka ya ku hahlukela va swi rhwexa timbongolo ta vona, va tlhela va teka swa ku chela ka swona vhinyu swa khale leswi a swi boxekile swi tlhela swi rhungeteliwa; 5 va tlhela va yambala masandaliya ya ku hahlukela lawa a ma rhungeteliwile, va yambala ni mpahla ya ku davukela, naswona mapawu lawa a va ma tekile a ma womile ma tlhela ma fuhlukela. 6 Va gama va ya ka Yoxuwa lomu a va gwimbe kona matende aJiligali,+ va fika ka yena ni ka vavanuna va Israyele va ku: “Hi ta hi ka tiko la le kule swinene. Yendlani ntwananu na hina swoswi.” 7 Kutani vavanuna va Israyele va byela Vahivhi va ku:+ “Swi nga yendleka mi tshama kolomu kusuhi na hina. Se hi nga wu yendlisa ku yini ntwananu na n’wina ke?”+ 8 Kutani va hlamula Yoxuwa va ku: “Hi swikarawa swa n’wina.”

Kutani Yoxuwa a va hlamula a ku: “Hi n’wina vamani naswona mi ta hi kwini?” 9 Va mu hlamula va ku: “Hina hi ta hi ka tiko la le kule swinene,+ lexi nga hi tisa lani hi mhaka ya leswi hi hloniphaka vito la Yehovha Xikwembu xa wena, hikusa hi yi twile ndhuma ya yena ni hinkwaswu leswi a nga swi yendla aGibita+ 10 ni leswi a nga swi yendla ka tihosi timbirhi ta Vaamori leti a ti tshama ka tlhelo lelin’wani la Yordani, ku nga Hosi Sihoni+ wa le Exiboni na Ogi+ hosi ya le Baxani, lweyi a a li aAxitaroti. 11 Kutani madoda ya hina ni vanhu hinkwavu lava tshamaka ka tiko la hina va hi byele va ku: ‘Tekani swaku mi ta dla hi ndlela mi ya kumana na vona. Mi fika mi ku: “Hi ta mi tirhela,+ se yendlani ntwananu na hina.”’+ 12 Mapawu lawa a ma hisa nkama hi nga suka kaya, kambe swoswi ma ma vona swaku ma womile naswona ma fuhlukelile.+ 13 Leswi hi nga chela ka swona vhinyu nkama hi nga swi teka kaya a swi li nyuwani, kambe swoswi ma swi vona swaku se swi boxekile.+ Mpahla ya hina ni masandaliya ya kona se swi hahlukelile hi mhaka ya ku famba mpfhuka wa ku leha swinene.”

14 Se vavanuna va Israyele va teka swakudla swin’wani swa vona va swi kambela, kambe a va mu vutisanga Yehovha hi mhaka leyi.+ 15 Kutani Yoxuwa a yendla ntwananu wa ku rhula na vona+ wa leswaku a nge va dlayi, ni varhangeli va vanhu va va fungelile.+

16 Loko se ku hundze masiku manharhu na va yendle ntwananu na vona, va tsumbule swaku a va tshama kolomuyani kusuhi. 17 Se Vayisrayele va rhuma vanhu va ya ka madoropa ya vona naswona va fike na se ku hundze masiku manharhu. Madoropa ya vona a ku li: Gibiyoni,+ Kefira, Beroti na Kiriyati-Yerimi.+ 18 Kambe Vayisrayele a va va hlaselanga, hikusa varhangeli va vona a va va fungelile hi Yehovha+ Xikwembu xa Israyele swaku a va nga ta va dlaya. Se vanhu hinkwavu va sungula ku ngurangurela varhangeli. 19 Varhangeli hinkwavu va gama va byela vanhu va ku: “Leswi hi nga va fungela hi Yehovha Xikwembu xa Israyele swaku a hi nga ta va dlaya, a hi pfumeleliwi ku va vavisa. 20 Kutani hi ta yendla leswi: Hi ta va tshika va hanya hi mhaka ya leswi hi nga va fungela swona, swaku Xikwembu xi nga hi kwateli.”+ 21 Varhangeli va tlhela va ku: “Va tshikeni va hanya, kambe va ta rholela tihunyi va tlhela va va khela mati vanhu hinkwavu.” Hi leswo varhangeli va nga va tshembisa swona.

22 Yoxuwa a gama a va vitana a va vutisa a ku: “Hi mhaka muni mi hi kanganyisile mi ku: ‘Hi ta hi kule swinene,’ na kuve mi tshama kola kusuhi na hina?+ 23 Ku sukela swoswi mi rhukiwile+ mi ta va swikarawa, mi tlhela mi rholela tihunyi ni ku kha mati ya yindlo ya Xikwembu xa mina.” 24 Va hlamula Yoxuwa va ku: “Hi yendle leswo hi mhaka leswi hi nga byeliwa kahle swaku Yehovha Xikwembu xa n’wina, a byele Moxe mutirheli wa yena swaku a mi nyika tiko hinkwalu ni ku helisa vanhu hinkwavu lava tshamaka ka lona.+ Hi ze hi yendla leswo+ hi mhaka ku chava+ ku dlayiwa. 25 Swoswi hi hina lava, hi le mavokweni ya n’wina. Yendlani hinkwaswu mi swi lavaka hi hina.” 26 Se a yendle swoleswo; a va ponisile ka mavoko ya Vayisrayele, naswona a va va dlayanga. 27 Kambe ku sukela hi siku lolelo Yoxuwa a va veke swaku va rholela tihunyi ni ku khela xitshungu hinkwaxu mati,+ ni ku tlhela va rholela tihunyi ni ku kha mati ya altari ya Yehovha ka ndhawu leyi a nga yi langa,+ va ha yendla leswo anze namuntlha.+