Tikronika Ta Wumbirhi
35 Yosiya a yendlela Yehovha Paxkwa+ aYerusalema naswona va dlaye swifuyu swa ku yendla magandzelo ya Paxkwa+ hi siku la wu 14 la wheti ya ku sungula.+ 2 A yavela vaprista mintirho leyi va faneleke va yi yendla a tlhela a va tiyisa swaku va yendla mintirho ya vona ka yindlo ya Yehovha.+ 3 Kutani a byela Valevhi, lava a va djondzisa tiko hinkwalu la Israyele,+ lava a va kwetsima ka Yehovha a ku: “Vekani Areka ya ku kwetsima ka yindlo leyi Solomoni n’wana wa Davhida hosi ya Israyele a nga yi yaka;+ a ma ha fanelanga mi yi pakatsa hi makatla ya n’wina.+ Swoswi tirhelani Yehovha Xikwembu xa n’wina ni vanhu va yena ku nga Vayisrayele. 4 Tilulamiseni hi ku ya hi varhangeli va mindjangu ya n’wina mi va mintlawa hi ku ya hi leswi nga tsaliwa hi Davhida hosi+ ya Israyele ni leswi nga tsaliwa hi Solomoni n’wana wa yena.+ 5 Fambani ka ndhawu ya ku kwetsima mi fika mi nyima hi ku ya hi mintlawa ya n’wina kuva mi ta tirhela vanhu mi tlhela mi yendla ntirho lowu n’wina Valevhi mi nga nyikiwa wona swaku mi wu yendla hi ku ya hi mindjangu ya vapapayi va n’wina. 6 Dlayani swifuyu swa ku yendla magandzelo ya Paxkwa+ mi tlhela mi tibasisa, mi pfuna vamakwenu va n’wina kuva va yendla leswi Yehovha a nga swi hlaya hi ku tirhisa Moxe.”
7 Yosiya a nyikela ka vanhu 30.000 wa swinyempfani swa xinuna ni swiphongo swaswitsongo ni 3.000 wa tihomu swaku vanhu hinkwavu lava a va li kona va yendla magandzelo ya Paxkwa hi swona. Hinkwaswu ka swona a swi ta hi ka hosi.+ 8 Varhangeli lava a nga va veka na vona va humese minyikelo ya ku tirhandzela, va humesela vanhu, vaprista ni Valevhi swaku yi tirhiseliwa ku yendla gandzelo. Hilikiya,+ Zakariya na Yehiyele lava nga varhangeli ka yindlo ya Xikwembu xa ntiyiso, va nyike vaprista 2.600 wa swifuyu swa ku yendla magandzelo ya Paxkwa ni 300 wa tihomu. 9 Konaniya ni vamakwavu va yena, ku nga Xemaya na Nataneli ku patsa na Axabiya, Yeyiyele na Yozabadi lava nga varhangeli va Valevhi, va humesele Valevhi 5.000 wa swifuyu swa ku yendla magandzelo ya Paxkwa hi swona ni 500 wa tihomu.
10 Se va tilulamisela ku yendla ntirho, kutani vaprista ni Valevhi va nyima lani va nga yaveliwa ku nyima kona hi ku ya hi mintlawa ya vona+ hi ku ya hi leswi hosi yi nga swi hlaya. 11 Va dlaye swifuyu swa ku yendla magandzelo ya Paxkwa+ hi swona kutani vaprista va n’wan’wasela ngati leyi a va nyiketiwa hi Valevhi;+ Valevhi a va susa xikhumba xa swifuyu.+ 12 Va gama va teka magandzelo ya ku hisiwa va ma veka tlhelweni swaku va ta ma nyika vanhu hinkwavu, lava a va yaviwe hi ku ya hi varhangeli va mindjangu ya vona, swaku va ma nyikela ka Yehovha hi ku ya hi leswi nga tsaliwa ka buku la Moxe; va tlhele va yendla swoleswo ni ka tihomu. 13 Va sweka nyama ya Paxkwa ka ndzilu hi ku ya hi leswi a swi yendlisiwa swona,+ va tlhela va sweka* magandzelo ya ku kwetsima ka mabota ni ka tipanela va gama va ma yisa ka vanhu hinkwavu hi ku kahlula. 14 Se va lulamisa swakudla swa vona ni swa vaprista, hikusa vaprista, ku nga vatukulu va Aroni a va li ku nyikeleni ka magandzelo ya ku hisiwa ni mafurha ya swiharhi anze ku va wusiku; kutani Valevhi va lulamisa swakudla swa vona ni vaprista lava nga vatukulu va Aroni.
15 Lava a va yimbelela, ku nga vana va Azafi,+ a va yendla mintirho ya vona hi ku ya hi nawu wa Davhida,+ Azafi,+ Hemani na Yedutani+ lweyi a a vona minchumu ya ku hlamalisa hi ndlela ya singita* a gama a yi byela hosi; funtshi lava a va vonelela tinyanghwa a va li ka tinyanghwa ta ku hambanahambana.+ A swi nga bohi swaku va tshika mintirho ya vona hikusa vamakwavu va vona, lava nga Valevhi a va va lulamisele swakudla swa Paxkwa. 16 Ntirho hinkwawu lowu yendleliwaka Yehovha a wu lulamisiwile hi siku lolelo swaku ku ta yendliwa Paxkwa+ ni magandzelo ya ku hisiwa henhla ka altari ya Yehovha, hi ku landza nawu wa Hosi Yosiya.+
17 Vayisrayele lava a va li kona va yendle Paxkwa hi nkama wolowo va tlhela va heta 7 wa masiku na va hamba Fexta la Mapawu ya Ku Kala Fermentu.+ 18 A ku nga se tshama ku yendliwa Paxkwa la ku fana na lona aIsrayele ku sukela ka nkama wa muprofeta Samuwele, funtshi a yi kona hosi ya Israyele leyi nga tshama yi yendla Paxkwa la ku fana ni leli nga yendliwa hi Yosiya,+ vaprista, Valevhi, tiko hinkwalu la Yuda ni tiko hinkwalu la Israyele lava a va li kona ni vanhu va le Yerusalema. 19 Paxkwa leli li yendliwe hi lembe la wu 18 la ku fuma ka Yosiya.
20 Loko swilo leswi hinkwaswu se swi yendlekile, na Yosiya se a hete ku lunghisa tempele, Neko+ hosi ya Gibita a tilunghiselele ku ya lwa aKarkemixi akusuhi ni Ewufrata. Se Yosiya a huma swaku a ya lwa na yena.+ 21 Kutani hosi Neko a rhuma vatirhi va ya ka Yosiya va fika va ku: “Hi mhaka muni u tile swaku u ta lwa na mina, wena hosi ya Yuda? Phela namuntlha a ni telanga ku ta lwa na wena kambe ni tele ku ta lwa ni mfumu wun’wani funtshi Xikwembu xi vule swaku ni fanele ni swi yendla hi xihantla. Se leswaku u pona, tshika ku lwa ni Xikwembu lexi nga na mina leswaku xi nga ku helisi.” 22 Kambe, Yosiya a nga tlhelanga, a tiyendle swaku va nga mu tivi,+ a nga ma yingisanga marito ya Neko lawa a ma ta hi ka Xikwembu. A game a famba a ya lwa na yena aMejido ka ndhawu ya ku kala yi nga na maganga ni tintshava.+
23 Se lava ku txopa va txope Hosi Yosiya, kutani a byela vatirhi va yena a ku: “Ni suseni lani hikusa ni vavisiwile hintamu.” 24 Kutani vatirhi ya yena va mu xikisa ka nyolo,* va mu khwelisa ka nyolo ya yena ya wumbirhi ya nyimpi va mu yisa aYerusalema. Se a fa a gama a lahliwa ka sirha la vavhovho va yena.+ Vanhu hinkwavu va Yuda ni Yerusalema va rila Yosiya. 25 Yeremiya+ a sungula ku yimbelelela Yosiya lisimu la xirilo kutani vayimbeleli hinkwavu va xinuna ni va xisati+ va tama va yimbelela hi Yosiya ka tinsimu ta vona ta xirilo anze namuntlha; ku humesiwe nawu wa leswaku tinsimu toleto ti yimbeleliwa aIsrayele funtshi ti tsaliwile ka tinsimu ta xirilo.
26 Timhaka hinkwatu ta wutomi la Yosiya ni mintirho leyi a nga yi yendla hi lirhandzu, swaku a yingisa leswi nga tsaliwa ka Nawu wa Yehovha 27 ni leswi a nga swi yendla, ku sukela a ku sunguleni anze magamu, swi tsaliwile ka Buku leli vulavulaka hi Tihosi ta Israyele ni ta Yuda.+