Mareferensiya Ya Xibukwana Xa Mintlhanganu Ya Mahanyelo Ni Ntirho
© 2023 Watch Tower Bible and Tract Society of Pennsylvania
1 KU YA KA 7 KA MAIO
XUMA XI NGA KA RITO LA XIKWEMBU | 2 TIKRONIKA 17-19
“Vona Van’wani Hilani Yehovha A Va Vonaka Hi Kona”
Murindzi 03/17 paj. 24 par. 7
Djondza Ka Xikombiso Xa Vanhu Va Khale
7 Swoswi a hi buleni hi xikombiso xa Yehoxafati n’wana wa Asa. Yena a a yendla minchumu yayinene, a a li munhu wamunene naswona a a tshemba Yehovha, kambe minkama yin’wani a yendle swiboho swa ku kala swi nga li swinene. Hi xikombiso, yena a yendle ntwananu ni hosi ya Norti ya ku biha, ku nga Hosi Akabu, a tlhela a pfumelela swaku n’wana wa yena a chada ni n’wana wa xisati wa Akabu. Hi ku famba ka nkama, Yehoxafati a tlhele a pfuna Hosi Akabu swaku va lwa ni tiko la Siriya, kambe muprofeta Mikaya a a mu byele swaku a a nga fanelanga a swi yendla leswo. Phela a ku yo sala katsongo swaku Yehoxafati a dlayiwa koseniyani nyimpini. (2 Tikro. 18:1-32) Nkama a nga tlhelela Yerusalema, muprofeta Yewu a mu vutisile a ku: “U swi vona swi li swinene ku pfuna vanhu lava rhandzaka swilo swa ku biha, u tlhela u rhandza lava nyenyaka Yehovha ke?” — Lerha 2 Tikronika 19:1-3.
Murindzi 15/08/15 paj. 6 mapar. 8-9
Pimisa Hi Lirhandzu Leli Yehovha A Nga Na Lona
8 Yehovha a lava leswaku hina hi swi tiva swaku yena a nga veketeli tihlo ka swihoxo swa hina, kambe a zama ku vona minchumu yayinene leyi hina hi yi yendlaka. (2 Tikro. 16:9) Hi nga swi vona leswo ka leswi a nga swi yendla ka hosi ya Yuda, ku nga Hosi Yehoxafati. Ka khambi lin’wani, Yehoxafati a pfumele ku famba na Akabu leswaku va ya lwa ni Vasiriya. 400 wa vaprofeta va mavunhwa a va vula swaku Yehoxafati a a ta ganya, kambe muprofeta wa Yehovha Mikaya a vulile swaku a va nga ta hlula. Vhela leswi muprofeta wa Yehovha a nga swi vula swi yendlekile, hikusa Akabu a file ka nyimpi liyani funtshi Yehoxafati a ku yo sala kutsongo swaku a dlayiwa. Nkama a nga tlhela Yerusalema, Yehoxafati a layiwile hi mhaka leswi a nga swi yendla. Hambileswo, Yewu a byele Yehoxafati a ku: “Xikwembu xi vone minchumu yayinene ka wena.” — 2 Tikro. 18:4, 5, 18-22, 33, 34; 19:1-3.
9 I ntiyiso swaku leswi Yehoxafati a nga swi yendla a swi hoxile. Kambe hilani se hi nga swi vona hi kona, Yehovha a a nga veki tihlo ka swihoxo swa yena kambe a a veka tihlo ka swilo swaswinene leswi a nga tshama a swi yendla. Hi xikombiso, nkama a nga sungula ku fuma, Yehoxafati a rhume vaprista, varhangeli ni Valevhi swaku va famba ka madoropa hinkwawu ya Yuda va djondzisa vanhu Nawu wa Yehovha. Leswo swi yendle swaku vanhu va vanyingi hambi hi va matiko lawa a ma li kusuhi ni Yuda va sungula ku dzunisa Yehovha. (2 Tikro. 17:3-10) Se hinkwaswu leswi swi hi djondzisa yini? Swi hi djondzisa swaku hambiloko hi pfana hi phazama, loko hi yendla hinkwaswu leswi hi nga swi kotaka hi timbilu ta hina hinkwatu swaku hi tsakisa Yehovha, Yehovha a ta hi rhandza hikusa yena a nga veki tihlo ka swihoxo leswi hi mu yendlelaka swona.
Lavetela Xuma Ka Rito La Xikwembu
Murindzi 03/17 paj. 20 mapar. 10-11
Tirhela Yehovha Hi Mbilu Ya Wena Hinkwayu!
10 Mun’wani lweyi a nga lavetela Yehovha hi mbilu ya yena hinkwayu i Hosi Yehoxafati hikusa yena a a tikarhatela ku tsakisa mbilu ya Yehovha. (2 Tikro. 20:31, 32; 2 Tikro. 22:9) A mu tekelele kahle papayi wa yena Asa hikusa ku fana ni papayi wa yena, yena a a lava swaku hinkwavu lava a a va fuma va tirhela Yehovha. Hi xikombiso, a rhume vanhu swaku va famba ka doropa hinkwalu la Yuda va ya va djondzisa Nawu wa Yehovha. (2 Tikro. 17:7-10) Yena hi yexe a yile ka ndhawu ya tintshava ya Efrayimi ku nga ndhawu leyi a yi lumba mfumu wa 10 wa tinxaka ta Israyele a ya va pfuna swaku va tlhela va tirhela Yehovha. — 2 Tikro. 19:4.
11 U nga mu tekelelisa ku yini Yehoxafati? Phela namuntlha Yehovha a karhi a djondzisa vanhu naswona hinkwerhu hi nga tirhisana na yena. Hi nga kombisa swaku hi tirhisana na yena hi ku kala hi nga pfumeleli swaku wheti yi hela na hi nga yanga nsin’wini. Hi nga tlhela hi zama ku djondzisa vanhu ni ku khumba timbilu ta vona hilani hi nga kotaka hi kona. Hi nga tlhela hi khongela, hi kombela Yehovha swaku a hi pfuna, a katekisa minzamu ya hina leswaku hi swi kota ku fambisa hambi ko va xidjondzo xin’we ntsena xa Bibele. Hi nga tlhela hi tinyimisela ku djondza ni vanhu hambi hi ka nkama wa hina wa ku humula. Swin’wani leswi hi nga swi yendlaka i ku pfuna lava nga hola. Loko hi yendla leswo, hi ta va hi tekelela Yehoxafati lweyi a nga famba ka ndhawu hinkwayu ya Efrayimi swaku a ya pfuna vanhu kuva va tlhelela ka Yehovha. Madoda na wona ma nga tlhela ma pfuxela lava nga susiwa bandleni ma tlhela ma pfuna vanhu lava kombisaka swaku va tisolile ka swidjoho swa vona.
8 KU YA KA 14 KA MAIO
XUMA XI NGA KA RITO LA XIKWEMBU | 2 TIKRONIKA 20-21
“Vana Ni Lipfumelo Ka Yehovha”
Murindzi 15/12/14 mapaj. 23-24 par. 8
Swi Lava Hi Twanana Swaku Hi Hlula Swikarhatu Ka Masiku Lawa Ya Wugamu
8 A nkama a ku fuma Hosi Yehoxafati, vanhu va Yehovha va kumane ni xikarhatu xaxikulu hintamu swinene. Masonchwa ya manyingi ya ku ta hi ka tindhawu tin’wani ta le kusuhi ma tile swaku ma ta va dumela. (2 Tikro. 20:1, 2) Se i mpsini leswi vanhu va Yehovha va nga swi yendla? A va zamanga ku lwa ni xikarhatu lexiyani hi ku tirhisa matimba ya vona, kambe vona va tsutsumele ka Yehovha va mu kombela swaku a va pfuna. (Lerha 2 Tikronika 20:3, 4.) Funtshi va yendle leswo hi ku twanana, a hi swaku munhu ni munhu a wo yendla leswi yena a a swi lava. Ha swi vona leswo hikusa Bibele li hlaya leswi: “Vanhu hinkwavu va Yuda a va nyime phambheni ka Yehovha, na va ni vasati va vona ku patsa ni vana va vona vavatsongo ni vavakulu.” (2 Tikro. 20:13) Se leswo swi kombisa swaku hinkwavu; majovhem ni lava nga kula va landzele leswi Yehovha a nga va byela swona. Leswo hi swona swi nga yendla leswaku va pona. (2 Tikro. 20:20-27) Lexi i xikombiso xa lisima lexi na hina hi nga xi tekelelaka loko hi kumana ni swikarhatu.
N’wina Ma Ha Ku Chadaka: Ku Tirhela Yehovha A Swi Ve Swa Lisima Ka Wutomi La N’wina
7 Yehovha a hlamule Yehoxafati hi ku tirhisa Yahaziyele lweyi a a li Mulevhi. Yehovha a te: “Nyimani mi nga tsekatseki, mi vona loko Yehovha a mi lwela.” (2 Tikro. 20:13-17) Phela ku yentxa leswo, a swi nga tolovelekanga loko ku yiwa nyimpini. Hambileswo, lweyi a nga vula marito lawa a hi munhu, kambe i Yehovha. Se leswi Yehoxafati a a mu tshemba Yehovha, a tekele ku yentxa hinkwaswu leswi a nga byeliwa swona. Nkama lowu Yehoxafati ni masonchwa ya yena va nga ya tlhangana ni vanhu lava a va ta lwa na vona, handle ka ku a veka masonchwa lawa a ma ni matimba ma tlhela ma yi lwa kahle nyimpi phambheni, a veke vanhu lava a va yimbelela. Phela Yehovha a nga mu danisanga Yehoxafati, hikusa Yehoxafati a swi kotile ku hlula ka nyimpi yoleyo. — 2 Tikro. 20:18-23.
Lavetela Xuma Ka Rito La Xikwembu
Perspicaz vol. 2 paj. 35 mapar. 3-4
Yehorama
Yehorama a nga mu tekelelanga papayi wa yena Yehoxafati. Yena a a yendla swilo swa ku biha hi ku xengeteliwa hi nsati wa yena Ataliya. (2Th 8:18) A dlaye 6 wa vamakwavu va yena, a dlaya tihosi tin’wani ta Yuda a tlhela a xengetela vanhu swaku va tshika ku gandzela Yehovha va ya gandzela swikwembu swa mavunhwa. (2Tk 21:1-6, 11-14) Hi mhaka leyo, ka mfumu wa yena a ku tale hi swikarhatu funtshi tinyimpi a ti yo yendla hi ku vuya. Hi xikombiso, Edomu na Libina va mu djikelile. (2Th 8:20-22) Muprofeta Eliya a mu byele leswi Yehorama ka papela leli a nga mu tsalela lona: “Yehovha a ta khatisa vanhu va wena, vana va wena, vasati va wena ni hinkwaswu leswi u nga na swona. U ta va ni mavabyi ya manyingi ku patsa ni mavabyi ya marhumbu anze marhumbu ya wena ma huma hi mhaka ya ku vabya, siku ni siku.” — 2Tk 21:12-15.
Swilo hinkwaswu swi yendleke hilani Yehovha a nga vulavula hi kona. A pfumelele swaku Vaarabiya ni Vafilista va dumela Yuda va tlhela va teka vana ni vasati va Yehorama. A yo yendla ntsena swaku ku pona Yehowaxi xigumandzeni xa Yehorama hi mhaka ya ntwananu wa Mfumu lowu a nga wu yendla na Davhida. Naswona hi ku famba ka nkama Yehovha a mu khatise hi mavabyi ya marhumbu ya ku kala ma nga daheki, naswona loko se ku hundze malembe mambirhi, marhumbu ya yena ma sungule ku huma hi mhaka ya mavabyi lawa a a li na wona funtshi hi wugamu a file. A wutomi la wanuna lweyi wa ku biha li gamise swoleswo funtshi a nga kona lweyi a nga rila nkama a nga fa. A lahliwe ka Doropa la Davhida kambe a nga lahliwanga lani a ku lahliwa tihosi. Se Akaziya n’wana wa yena a sungula ku fuma ka ndhawu ya yena. — 2Tk 21:7, 16-20; 22:1; 1Tk 3:10, 11.
15 KU YA KA 21 KA MAIO
XUMA XI NGA KA RITO LA XIKWEMBU | 2 TIKRONIKA 22-24
“Yehovha A Katekisa Lava Kalaka Va Nga Chavi Ku Nyima Na Yena”
Murindzi 01/04/09 paj. 24 mapar. 1-2
Yehowaxi A Tshike Yehovha Hi Mhaka Vanghanu Va Ku Biha
A KU LI nkama wa ku karhata aYerusalema lana a ku tshama tempele ya Xikwembu. A ka ha li ku dlayiwa Hosi Akaziya. Ataliya mamani wa yena a game a dlaya vana va Akaziya, ku nga vatukulu va yena. Wa swi tiva swaku hi mhaka muni a yendle leswo? Hi mhaka a a lava ku sala a fuma ka ndhawu ya vona.
Kambe mun’we wa vatukulu va yena lweyi a vitaniwaka Yehowaxi a ponisiwile naswona vhovho wa yena a nga tivanga nchumu. Wa swi tiva swaku a ponise ku yini? Titiya wa Yehowaxi lweyi a vitaniwaka Yehoxabeti a mu fihle ka tempele ya Xikwembu. Yena a yendle leswo hikusa nuna wa yena Yoyada a a li Muprista Wa Mukulu. Se hi wumbirhi ka vona va mu hlayise kahle Yehowaxi swaku a nga kumiwi hi munhu.
Murindzi 01/04/09 paj. 24 mapar. 3-5
Yehowaxi A Tshike Yehovha Hi Mhaka Vanghanu Va Ku Biha
Yehowaxi a fihliwile atempeleni ku ringana 6 wa malembe. Seniyani va mu djondzise hi Yehovha ni minawu ya Yena. Loko se a tlhanganise 7 wa malembe Yoyada a yendle xa ku karhi swaku a veka Yehowaxi swaku a va hosi. Wa swi lava ku swi tiva swaku a swi yendlise ku yini, ni swaku ku yendleke yini hi vhovho wa yena Ataliya? —
Na swi nga tiviwi hi munhu, Yoyada a vitane vagwardu va tihosi ya Israyele va nkama lowuyani, a va byela hinkwaswu leswi yena ni nsati wa yena va nga swi yendla swaku va ponisa wutomi la n’wana wa hosi Akaziya. Yoyada a game a va komba Yehowaxi lweyi va nga gama va tiyiseka swaku hikakunene a ni mfanelo ya ku va hosi. Se loko va gamile lanu, va hambe planu.
Yoyada a humese Yehowaxi handle, a gama a mu tlhanteka harhi a mu veka swaku a va hosi. Se xitshungu xi sungula ku ba mavoko xi huwelela xi ku: “Hanya hi masiku hosi.” Vagwardu lava a va vonelela tihosi ta Yerusalema va mu rhendzelile swaku va mu vhikela. Nkama Ataliya a nga twa guwa la ku tsaka, a tsutsuma a huma handle a vula hi rito la ku tlakuka swaku leswi a va swi yendla swi bihile, kambe Yoyada a rhuma vagwardu swaku va mu dlaya. — 2 Tihosi11:1-16.
Perspicaz vol. 1 paj. 818 par. 9
Ku Lahla, Ndhawu Ya Ku Lahla Ka Yona
Muprista Wa Mukulu Yoyada munhu wa ku lulama, a ve ni lunghelo la ku lahliwa ka Doropa la Davhida lani tihosi a ti lahliwa kona, naswona ko va yena ntsena a nga lahliwa lani tihosi ti nga lahliwa kona na a nga li wa lixaka la le wuhosini. — 2Tk 24:15, 16.
Lavetela Xuma Ka Rito La Xikwembu
Perspicaz vol. 2 paj. 1221 par. 13
Zakariya
12. N’wana wa Muprista Wa Mukulu Yoyada. Loko Yoyada se a file, Hosi Yehowaxi a tshike ku gandzela Yehovha a yingisela vanhu va ku biha a tshika ku yingisa vaprofeta va Yehovha. Zakariya primu wa Yehowaxi (2Tk 22:11), a xi layile xitshungu hi mhaka leyi, kambe handle ka ku xi tisola xi mu be hi maribye ka kintari wa tempele. Zakariya a vule leswi nkama a a li kusuhi ni ku fa: “Yehovha a a ku khatisi hi mhaka ya leswi.” Marito lawa Zakariya a nga ma vula ma hetisekile, hikusa Siriya a game a hlupha doropa la Yuda naswona Yehowaxi a dlayiwile hi vatirhi va yena vavambirhi hi mhaka leswi a nga dlaya vana va muprista Yoyada. A Bibele la Septuaginta Grega ni Vulgata Latina ma vula swaku Yehowaxi a dlayiwile swaku ku hakelisiwa ngati “ya n’wana wa Yoyada.” A Matsalwa man’wani (ku nga o texto Massorético ni Pesito siríaca) ma tirhisa rito leli nge “vana” swaku ma kombisa ku hlonipheka ni lisima la Zakariya n’wana wa Yoyada lweyi a a li muprofeta tlhelo muprista. — 2Tk 24:17-22, 25.
22 KU YA KA 28 KA MAIO
XUMA XI NGA KA RITO LA XIKWEMBU | 2 TIKRONIKA 25-27
“Yehovha A Nga Swi Kota Ku Ku Nyika Swa Swinyingi Ku Tlula Leswo”
Perspicaz vol. 2 paj. 32 par. 1
Yehowaxi
A hosi ya Yuda yi fihle 100.000 wa masonchwa ya hosi Yehowaxi swaku ma ya lwa ni Vaedomu. Kambe hi ku landza nkongomiso wa mutirheli wa Xikwembu xa ntiyiso, a hosi yi game yi ma mukisa kaya hambileswi se a yi ma hakelile 3.420 wa makilu ya prata. Masonchwa lawayani ma kwate hintamu hileswi ma nga mukisiwa hikusa a ma ta luza leswi a ma ta swi teketela nyimpini, hi mhaka leyo loko se ma tlhelile ma ya Norti ma dumelile swidoropana swaswitsongo ku sukela aSamariya (swi nga yendleka a ku li lani a va tilulamisela kona loko va lava ku suka va ya nyimpini) anze Beti-horoni. — 2Tk 25:6-10, 13.
Murindzi 08/21 paj. 30 par. 16
Hi Nga Swi Tivisa Ku Yini Swaku Yehovha I Munene?
16 Tama u yentxela Yehovha leswi u nga swi kotaka ka wutomi la wena. I ntiyiso swaku a swi zi swi lava hi tshika swilo hinkwaswu leswi hi swi rhandzaka swaku hi tsakisa Yehovha. (Ekl. 5:19, 20) Kambe a hi fanelanga hi swi rhandza hintamu swilo leswi hi nga na swona lakakuva swi hi sivela ku yengesela ntirho wa hina ka Yehovha. Loko ho yentxa leswo hi nga fana ni wanuna wa xifaniso xa Yesu, lweyi a nga yala ku tirhela Xikwembu hi mhaka ya swilo leswi a a li na swona. (Lerha Luka 12:16-21.) Makwerhu Christian, lweyi a tshamaka França a li: “A ni nga wu tirhisi kahle nkama ni ntamu wa mina swaku ni tirhela Yehovha ni ku pfuna ndjangu wa mina.” Makwerhu Christian ni nsati wa yena va yentxe xiboho xa ku va vapfuli va ndlela va nkama hinkwawu, kambe leswaku va yentxa leswo a va fanele va tshika mintirho ya vona. Leswaku va tihlayisa, va sungule ku yentxa ntirho wa wutsongo wa ku hamba malimpeza naswona va swi vonile swaku va nga tsaka hambiloko va ni male ya yitsongo. Phela va tsake hintamu hileswi va nga tshika swilo swin’wana swaku va ta kota ku va vapfuli va ndlela va nkama hinkwawu. Makwerhu Christian a li: “Leswi hi nga vapfuli va ndlela, hi tsaka hintamu loko hi vona lava hi djondzaka na vona Bibele ni marevhizita ya hina va rhandza ku djondza hi Yehovha.”
Lavetela Xuma Ka Rito La Xikwembu
Murindzi 15/12/07 paj. 10 mapar. 1-2
Indjhe U Ni Munhu Lweyi A Nga Ta Ku Pfuna Ku Yendla Swiboho Swaswinene?
UZIYA a vekiwe swaku a va hosi ya mfumu wa Yuda na a ni 16 wa malembe naswona a fume hi kolomuyani ka lembe la wu 800 A.E.C. A fume 52 wa malembe aYuda. Ku sukela loko a ha li mutsongo, ‘Uziya a a yendlela Yehovha minchumu yayinene’. I ntxini xi nga mu pfuna swaku a va munhu wa ku tshamisa xileswo? Bibele la hlamula, li vula leswi: “A tame a lava Xikwembu hi nkama wa Zakariya, lweyi a nga mu djondzisa ku hlonipha Xikwembu xa ntiyiso. Nkama a a lava Yehovha, Xikwembu xa ntiyiso a xi mu katekisa.” — 2 Tikronika 26:1, 4, 5.
Handle ka leswi nga ka ndzimana leyi a hi tivi swin’wani hi Zakariya mutsundzuxi wa hosi kambe leswi Zakariya a nga djondzisa Uziya ku “hlonipha Xikwembu xa ntiyiso” hi nga vula swaku a xi pfune hintamu xidjahatani lexi nga va hosi na xa ha li xitsongo. Buku lin’wana leli vitaniwa Bíblia do Expositor li tlhamusela swaku Zakariya a a ma tiva kahle Matsalwa, a a ni wunghanu lalikulu ni Xikwembu naswona a a swi kota kahle ku hundzisela van’wani leswi a a swi tiva. Ntivi yin’wani ya Bibele na yona yi vule leswi hi Zakariya: “A a li munhu wa ku tiva kahle wuprofeta, wanuna wa wutivi, wamunene ni wa ku hiseka naswona swi nga yendleka a mu pfune hintamu Uziya.”
29 KA MAIO KU YA KA 4 KA JUNHO
XUMA XI NGA KA RITO LA XIKWEMBU | 2 TIKRONIKA 28-29
“U Nga Swi Kota Ku Tirhela Yehovha Hambiloko Vapsali Va Wena Va Nga Vanga Xikombiso Xaxinene”
Murindzi 02/16 paj. 14 par. 8
Tekelela Vanghanu Va Yehovha
8 Ku hambana na Ruti, Hezekiya a psaliwe ka tiko leli a li lumba Yehovha. Kambe a hi Vayisrayele hinkwavu lava va nga tshembeka, hambi hi papayi wa Hezekiya, hosi Akazi a a li xikombiso xa swona leswo. Yena a a li wanuna wa ku biha lweyi a nga yendla swaku tiko li gandzela swikwembu swa mavunhwa. Hambi hi tempele ya Yehovha leyi a yi li Yerusalema a nga yi hloniphanga. phela ku kula ka ndhawu liyani a swi mu vevukelanga Hezekiya! Leswaku hi swi twisisa kahle leswo, vamakwavu va yena va ve ni lifu la ku chavisa swinene. Papayi wa vona a va hise na va hanya ka xikwembu xa mavunhwa! — 2 Tiho. 16:2-4, 10-17; 2 Tikro. 28:1-3.
Murindzi 02/16 paj. 14 mapar. 9-11
Tekelela Vanghanu Va Yehovha
9 Phela leswi Hezekiya a nga kulisa xiswona ina swi mu yendle a va munhu wa ku karhata a tlhela a kwatela Xikwembu. Namuntlha hambi hi vanhu va ku a va na swikarhatu swa ku yini, va mu kwatela Yehovha. (Swi. 19:3) Van’wani va kwatela nhlengeletanu ya yena, van’wani va pimisa swaku wutomi la vona a li fambi hikusa ni la vapapayi va vona a li nga fambi. Va pimisa swaku wutomi la vona li ta tshamisa xiswoleswo, va hanyela ku hlupheka, va nga tsaki va tlhela va phindha swihoxo swa vapapayi va vona, ntsena hi mhaka leswi va nga kula ka ndhawu ya ku a yi nga li yinene. (Ezek. 18:2, 3) Indjhe leswi va swi pimisaka hi swona? I ntiyiso hikakunene?
10 Nada! Leswo swa tikomba ka wutomi la Hezekiya. A ku na xivangelo xa ku kwatela Xikwembu hikusa a hi xona xi hi vangelaka swikarhatu. (Yobo 34:10) I ntiyiso swaku ndlela leyi vapsali va hanyaka hi yona, vana va vona va nga yi tekelela. (Swi. 22:6; Kol. 3:21) Kambe leswo a swi lavi ku hlaya swaku xikolokolo va ta va ni wutomi la ku fana ni leli vapsali va vona a va li na lona. Hi vula leswo hikusa Yehovha a yendle munhu na a ni nchunseko wa ku tilangela leswi a lavaka ku swi yendla ni swaku a lava ku va munhu wa ku tshamisa ku yini. (Det. 30:19) Se, Ezekiya a wu tirhisise ku yini nchunseko wolowo?
11 Hezekiya a ve hosi yayinene ku fana ni tihosi letin’wani leti nga fuma Yuda. (Lerha 2 Tihosi 18:5, 6.) I ntiyiso swaku papayi wa yena a a nga li xikombiso xaxinene, kambe yena a nga xi tekelelanga xikombiso xa ku biha xa papayi wa yena. A tekelele xikombiso xaxinene xa vanhu va ku fana na Esaya, Mikiya na Hosiya. Minkama yin’wani a a pimisa hi leswi vaprofeta lava va nga swi vula, naswona leswo a swi ku pfuna kuva a kombela ku pfuniwa hi Yehovha a tlhela a pfumela loko Yehovha a mu laya ni ku mu djondzisa. A tlhele a suselela minchumu ya ku biha leyi papayi wa yena a a yi yendlile, a basisa tempele, a yendla magandzelo swaku vanhu va rivaleliwa swidjoho a tlhela a dilizela swikwembu swa mavunhwa. (2 Tikro. 29:1-11, 18-24; 31:1) Hezekiya a tlhele a kombisa swaku a a nga chavi naswona a a ni lipfumelo nkama lowu Senakeribi hosi ya Siriya a nga chavisela Yerusalema. Hambileswi a a nga swi tivi swaku a ta yendla yini, a tshembe Yehovha a tlhela a tiyisa vanhu ni ku va vekela xikombiso xaxinene. (2 Tikro. 32:7, 8) Hi ku famba k nkama Hezekiya a sungule ku tibyela, kambe nkama a nga layiwa a tiveke hansi a tlhela a tisola. (2 Tikro. 32:24-26) A nga pfumelelanga swaku leswi a nga kulisa xiswona swi wonhetela wutomi la yena, kambe a tame a va munghanu wa Yehovha a tlhela a hi vekela xikombiso xaxinene.
Lavetela Xuma Ka Rito La Xikwembu
Murindzi 15/02/12 mapaj. 24-25
Natani A Nyimelele Wugandzeli La Ntiyiso Hi Ku Tshembeka
Leswi Natani a a tirhela Yehovha hi ku tshembeka a mu seketelile Davhida nkama na a lava ku yaka tempele leyi a ku ta gandzeliwa ka yona Yehovha. Swi tikomba hi nkama wolowo Natani o yo hlaya leswi yena a a titwisa xiswona kambe a nga rhanganga hi ku lava ku tiva leswi Yehovha a a titwisa xiswona. Hi mhaka leyo, hi wusiku lolelo Yehovha a byele muprofeta Natani swaku a ya byela Davhida swaku a ku nga ta va yena lweyi a a ta yaka tempele ya Yehovha, kambe lweyi a a ta yi yaka a ku li n’wana wa yena. Natani a tlhele a byela Davhida swaku Yehovha a a yendla ntwananu na yena, wa leswaku a wuhosi a li nga ta suka ka ndjangu wa yena funtshi xitshamu xa yena xa wuhosi a “xi ta tshama na xi tiyile minkama hinkwayu.” — 2 Sam. 7:4-16.
Hambileswi vonelo la Natani a li hambanile ni vonelo la Yehovha, a nkama lowu Yehovha a nga lulamisa mapimiselo ya Natani, yena a nga nguranguranga kambe a seketele Yehovha a tlhela a nyima na yena. Phela Natani i xikombiso xaxinene lexi na hina hi nga xi tekelelaka loko Yehovha a tshuka a lulamisa mapimiselo ya hina. Leswi swi nga yendleka ku sukela kolanu swi kombisa swaku Natani a a li muprofeta lweyi a a tsakeliwa hi Yehovha. Swi tikomba Yehovha a tirhise Natani na Gadi swaku va kongomisa Davhida nkama na a lunghiselela 4.000 wa vayimbeleli lava a va tirha tempeleni. — 1 Tikro. 23:1-5; 2 Tikro. 29:25.
5 KU YA KA 11 KA JUNHO
XUMA XI NGA KA RITO LA XIKWEMBU | 2 TIKRONIKA 30-31
“Mintlhanganu Ya Hi Pfuna”
Perspicaz vol. 1 paj. 920 par. 2
Hezekiya
A hisekele ntirho wa Yehovha. Hezekiya a kombise swaku a hisekela ntirho wa Yehovha nkama a nga sungula ku fuma na a ni 25 wa malembe. Xa ku sungula lexi a nga xi yendla ku ve ku lunghisa tempele yi tlhela yi sungula ku tirhisiwa. A game a hlengeleta vaprista ni Valevhi a va byela leswi: “Swoswi ni lava ku yendla ntwananu na Yehovha Xikwembu xa Israyele.” Ka ntwananu lowu, a va tshembisa ku tshembeka ka Yehovha ku nga xitshembiso lexi va nga xi yendla ka ntwananu wa Nawu lowu a wa ha tirha hi nkama wolowo kambe a va nga ha na mhaka na wona, se swoswi a swi yendla ingaku vo tlhela va pfuxeta ntwananu lowuyani wa Nawu. Hi ku hiseka, Hezekiya a sungule ku nyika mintirho Valevhi a tlhela a lunghiselela vanhu lava a va ta chaya ni lava a va ta yimbelela. A ku li hi Nisani, ku nga wheti leyi ku yendliwaka Paxkwa hi yona, kambe hi nkama wolowo tempele, Valevhi ni vaprista a va nga basanga. Hambileswo, anze diya 16 ka Nisani se a ku basisiwe tempele ku tlhela ku lunghisiwa minchumu hinkwayu leyi a yi li tempeleni. Ku lave leswaku ku hambiwa xikombelo xa ku hlawuleka xa leswaku Yehovha a rivalela tiko hinkwalu la Israyele. Ku rhange hi varhangeli va doropa va nyikela magandzelo, va tlhela va nyikela gandzelo la xidjoho la hinkwavu va le wuhosini, gandzelo la ndhawu ya ku kwetsima, se ni gandzelo la tiko hinkwalu la le Yuda. Loko se va gamile ku game ku landzela xitshungu lexi hinkwaxu ka xona xi nga nyikela magandzelo ya xona. — 2Tk 29:1-36.
Perspicaz vol. 1 paj. 920 par. 3
Hezekiya
Leswi xitshungu a xi nga basanga a swi kotekanga swaku a Paxkwa li yendliwa hi wheti leyi nga toloveleka. Kambe a tirhise Nawu lowu a wu va pfumelela swaku Paxkwa li yendliwa hi wheti leyi nga landzela. Ka Paxkwa leli a ku yo rhambiwa Vayuda ntsena kambe ku tlhele ku rhambiwa ni Vayisrayele. Ku tirhisiwe makarta leswaku tiko hinkwalu li kota ku rhambiwa, ku sukela Berseba anze Dani. Lava a va rhumela makarta lawa a va poyiliwa ka tindhawu tin’wani, kambe tinxaka letin’wani ta ku fana na Aseri, Manasi na Zebuloni ti tiveke hansi ti tlhela ti va kona ka Paxkwa leli, ku patsa ni van’wani lava lumbaka lixaka la Efrayimi na Isakara. Handle ka volavo ku tlhele ku va ni vanhu va vanyingi lava a va gandzela Yehovha kambe a va nga li Vayisrayele. Swi nga yendleka swi va karhatelile vanhu lava swaku va va kona ka Paxkwa hikusa lani a va tshama kona a ku tale hi vanhu lava a va gandzela swikwembu swa mavunhwa. Ku fana ni vanhu lava a va heleketa makarta, swi nga yendleka vanhu lava na vona a va poyileliwa va tlhela va hlekiwa hikusa vanhu lava a va kumeka ka 10 wa tinxaka a va pele hi nhloko ka wugandzeli la mavunhwa naswona a va chaviseliwa hi Vasiriya. — 2Tk 30:1-20; Tin 9:10-13.
Perspicaz vol. 1 paj. 920 mapar. 4-5
Hezekiya
Loko Paxkwa se li hundzile, ku game ku yendliwa Fexta La Mapawu Ya Ku Kala Fermentu ku ringana 7 wa masiku. Ka fexta lolelo ku tsakiwe hintamu swinene lakakuva ku tlhele ku yengeteliwa 7 wa masiku man’wani hi mhaka ku tsakisa ka lona. Hambileswi minkama yoleyo a yi li minkama ya ku karhata, Yehovha a va katekisile swinene “se vanhu va tsaka hintamu aYerusalema, hikusa ku sukela ka nkama lowu a ku fuma Solomoni n’wana wa Davhida hosi ya Israyele, a ku nge se tshama ku yendleka nchumu wa ku fana ni lowuyani aYerusalema.” — 2Tk 30:21-27.
Lexi kombisaka swaku xikongomelo xa fexta leliyani a ku nga li ku titsakisa ntsena, kambe a ku li leswaku va pfuxeta wugandzeli la ntiyiso hileswaku nkama lowu fexta li nga hela, na va nga se muka va ya kaya, va ye ka madoropa ya Yuda, Benjamini, Efrayimi na Manasi va fika va dilizela mapilari lawa a va ma yendle swikwembu, va tsema timhandzi ta swikwembu swa mavunhwa, va dilizela tindhawu ta ku tlakuka leti a va gandzela ka tona ni ma altari ya kona. (2Tk 31:1) Hezekiya a va vekele xikombiso xaxinene hi ku fayetela xifaniso xa nyoka ya kobri lexi a xi yendliwe hi Moxe, hikusa hi nkama wolowo Vayisrayele a va gandzela xifaniso xolexo. (2Th 18:4) A loko se fexta li helile, Hezekiya a tame a seketela wugandzeli la ntiyiso swaku li tama li va kona hi ku lunghiselela ntlawa wa vaprista ni ku tlhela a tiyiseka swaku va swi kuma leswi va swi lavaka swaku va tama va tirha tempeleni. A byele vanhu swaku va yingisa Nawu lowu a wu vula swaku va fanele va nyikela hi swa wukhume ni swilo swa ku sungula leswi a va swi tshovela masin’wini swaku ku pfuniwa Valevhi ni vaprista. Vanhu va swi yingisile hinkwaswu leswi Hezekiya a nga va byela swona hi mbilu ya vona hinkwayu. — 2Tk 31:2-12.
Lavetela Xuma Ka Rito La Xikwembu
Murindzi 09/18 paj. 6 mapar. 14-15
‘Ma Tsaka Loko Mi Yendla Swilo Leswi’
14 Ndlela yin’wana leyi hinga kombisaka kutisongohata ha yona i kuva vayingiseli lavanene. Yakobo 1:19 yi li: ‘Hantlisa kutwa kumbe kuyingisela’. Yehovha i xikombiso lexikulu amhakeni ya kuyingisela. (Genesa 18:32; Yoxuwa 10:14) Hi xikombiso, vona bulu leli a veke na lona na Moxe leli kumekaka ka Eksoda 32:11-14. (Lerha.) Hambileswi aswinga bohi kutwa mavonelo ya yena, Yehovha amu yingiselile loko ati phofula. Xana awuta nyikela yingiso ka munhu lweyi a tshameke aku hoxela? Xana awuta landza mavonelo ya yena ka mhaka yokarhi? Kuhambana ni vanhu votala, hi kulehisa mbilu, Yehovha a yingisela swikhongelo swa hinkwavo lava khongelaka ka yena hi lipfumelo.
15 Se tivutise: ‘Leswi hambi Yehovha anga munhu wa kutitsongohata hintamu la kakuva a yingisela vanhu hilaha a yingiseleke ha kona Abrahama, Rahele, Moxe, Yoxuwa, Manowa, Eliya na Hezekiya, no va mani mina leswaku ninga titsongohati? Xana ninga kombisa leswaku nava xixima vamakwerhu hinkwavo hi kuyingisela mavonelo ya vona ni kuma tirhisa loko swi koteka? Xana a kona munhu bandleni kumbe akaya lweyi ninga nyikelaka yingiso ka yena? Ninga yendla yini akuva ni kombisa leswaku na nyikela yingiso ka yena?’ — Genesa 30:6; Vaavanyisi 13:9; 1 Tihosi 17:22; 2 Tikronika 30:20.
12 KU YA KA 18 KA JUNHO
XUMA XI NGA KA RITO LA XIKWEMBU | 2 TIKRONIKA 32-33
“Tiyisa Vamakwerhu Ka Minkama Ya Ku Karhata”
Perspicaz vol. 1 paj. 241 par. 3
Asiriya
Senakeribi. Senakeribi n’wana wa Sargoni II a dumele Yuda hi lembe la wu 14 la ku fuma ka Hezekiya (732 A.E.C.). (2Th 18:13; Esa 36:1) Ku hambana ni papayi wa yena Akazi, Hezekiya a djikele hosi ya Asiriya a yala ku yi tirhela. (2Th 18:7) Senakeribi a game a hlasela 46 wa madoropa ya Yuda (vona ni Esa 36:1, 2), naswona nkama na va li Lakixi a rhume masonchwa ya yena swaku ma sindzisa Hezekiya swaku a hakela 10.260 wa makilu ya prata ni 1.026 ma makilu ya woru. (2Th 18:14-16; 2Tk 32:1; vona ni Esa 8:5-8.) Hambileswi male leyo yi nga hakeliwa, Senakeribi a tlhele a rhumela vanhu swaku va ya sindzisa vanhu lava a va tshama Yerusalema leswaku va tinyikela. (2Th 18:17–19:34; 2Tk 32:2-20) Kambe Yehovha a va ponisile hi ku dlaya 185.000 wa masonchwa ya Vasiriya hi wusiku lin’we ntsena. Leswo swi yendle swaku Senakeribi a tlhela a ya Ninivha. (2Th 19:35, 36) Loko a fikile Ninivha, hi ku famba ka nkama a game a dlayiwa hi vana va yena vambirhi. Se Ezaradoni n’wana wa yena lweyi mun’wani a sala a fuma ka ndhawu ya yena. (2Th 19:37; 2Tk 32:21, 22; Esa 37:36-38) Timhaka leti, na hi nga konti ni ku helisiwa ka masonchwa ya Asiriya, ti tsaliwile ka ndhawu leyi Senakeribi a nga tsala hi tinyimpi leti a nga ti lwa ni lani Ezaradoni a nga tsala hi tinyimpi leti a nga ti lwa. — MAFOTO, Vol. 2, paj. 237.
Murindzi 15/11/13 paj. 19 par. 12
7 Wa Varisi Ni 8 Wa Varhangeli, Va Fanekisela Yini?
12 Minkama hinkwayu Yehovha a hi pfuna ku yendla swilo swa ku hina a hi nge swi koti ku swi yendla. Kambe leswo a swi hlayi swona swaku hi to nyima hi ku ntse hi nga yendli nchumu. Phela Hezekiya a a tshemba Yehovha kambe a nga khondlanga mavoko, “a vulavule ni varhangeli ni masonchwa ya yena a gama a yendla xiboho xa ku seletela swihlovo leswi a swi li handle ka doropa . . . a yake muru hinkwawu lowu a wu diliziwile, a yaka ni maprediyu a henhla ka wona, a tlhela a yaka ni muru wun’wanyani hi handle, . . . a yendla ni matlharhi ni swivhikelo swa swinyingi.” (2 Tikro. 32:3-5) Yehovha a tlhele a tiyisa xitshungu swaku xi nga chavi hi ku tirhisa vanhu lava kalaka va nga chavi ni lava nga ni wunghanu lalinene na Yena va ku fana na Hezekiya, vaprofeta ni vanhu van’wani.
Murindzi 15/11/13 paj. 19 par. 13
7 Wa Varisi Ni 8 Wa Varhangeli, Va Fanekisela Yini?
13 Ku ni swin’wani leswi Hezekiya a nga swi yendla handle ka ku seletela swihlovo ni ku tiyisa mimuru ya doropa. A a li murisi wa kahle, a tlhanganise vanhu a tlhela a va tiyisa hi ku va byela leswi: “Mi nga chavisiwi hi hosi ya Asiriya ni xitshungu hinkwaxu lexi nga na yona, hikusa i vanyingi lava nga na hina ku tlula lava nga na yona. Yona yi tshemba vanhu, kasi hina hi tshemba Yehovha Xikwembu xa hina lweyi a hi pfunaka a tlhela a hi lwela tinyimpi ta hina.” Ku tiva swaku Yehovha a a ta va lwela swi va tiyisile Vayuda funtshi ku va Hezekiya a sekelekile a va tiyisa vanhu lavaya swi va pfunile ku kala va nga chavi. Leswo swi kombisa swaku Hezekiya ni vaprofeta lavan’wani va ku fana na Mikiya na Esaya va ve varisi vavanene naswona leswo a swi hetisisa leswi Yehovha se a a swi vulile. — 2 Tikro. 32:7, 8; lerha Mikiya 5:5, 6.
Lavetela Xuma Ka Rito La Xikwembu
Murindzi 10/21 mapaj. 4-5 mapar. 11-12
I Yini Ku Tisola Ka Ntiyiso?
11 Hi ku famba ka nkama Yehovha a hlamule xikhongelo xa Manasi. Yehovha a swi vonile swaku Manasi a txintxile naswona swikhongelo swa yena a swi huma mbilwini. Leswi Yehovha a nga vona swaku Manasi a tisolile hikakunene, a pfumelile swaku a tlhela a va hosi. Naswona Manasi a yentxe hinkwaswu leswi a nga swi kota leswaku a kombisa swaku a tisolile hikakunene. Phela leswi Manasi a nga swi yentxa swi hambanile ni leswi nga yentxiwa hi Akabu, hikusa Manasi a helise wukhongeli la mavunhwa a tlhela a pfuna vanhu swaku va gandzela Yehovha. (Lerha 2 Tikronika 33:15, 16.) Kuva Manasi a yentxe leswo a swi lava lipfumelo a tlhela a nga chavi, hikusa na a nge se tisola a ve xikombiso xa ku biha ka ndjangu wa yena, ka vanhu lava a a fuma na vona, ni ka tiko hinkwalu la Israyele. Kambe, ka malembe ya wugamu lawa Manasi a nga fuma, a zame ku helisa swilo hinkwaswu swa ku biha leswi a nga swi yentxa. Swi nga yentxeka a ve xikombiso xa xinene ka ntukulu wa yena Yosiya, lweyi a nga ve hosi ya yinene. — 2 Tiho. 22:1, 2.
12 Hi nga djondza yini ka xikombiso xa Manasi? Phela Manasi a tiveke hansi mahlweni ka Xikwembu. Ku nga li leswo ntsena, a tlhele a kombela Yehovha swaku a mu komba timpsalu. Phela Manasi a txintxile a yentxa minchumu ya yinene hikusa a tikarhatele ku helisa wubihi hinkwalu leli a nga li yentxa. A yentxe hinkwaswu leswi a nga swi kota swaku a gandzela Yehovha a tlhela a pfuna vanhu swaku na vona va gandzela Yehovha. Xikombiso xa Manasi xi kombisa swaku hambi lava va nga yentxa swidjoho swa swikulu hintamu va nga swi kota ku tlhela va va ni wunghanu la linene ni Xikwembu. Xi tlhela xi kombisa swaku Yehovha i Xikwembu xa xinene lexi tinyimiseleke ku rivalela. (Pis. 86:5) Yehovha wa rivalela! Kambe a rivalela ntsena lava tisolaka hikakunene.
19 KU YA KA 25 KA JUNHO
XUMA XI NGA KA RITO LA XIKWEMBU | 2 TIKRONIKA 34-36
“Indjhe Wa Swi Tirhisa Leswi U Swi Djondzaka Ka Bibele?”
Perspicaz vol. 1 mapaj. 1178-1179
Ulda
Nkama hosi Yosiya yi nga twa leswi nga tsaliwa ka “buku la Nawu” leli nga kumiwa hi muprista wamukulu Hilikiya, nkama na ku lunghisiwa tempele a rhumele vanhu leswaku va ya vutisa Yehovha swaku leswi nga tsaliwa a swi vula yini. Va ye ka Ulda, lweyi a nga gama a va byela leswi Yehovha a a swi vula ka marito lawa a ma tsaliwe ka buku la Nawu. Yena a vule swaku a va ta weliwa hi khombo hileswi va kalaka va nga yingisanga hi ku gandzela swikwembu swa mavunhwa. Kambe Ulda a tlhele a vula swaku leswi Yosiya a a tiveke hansi a a nge te weliwa hi khombo leli, kambe a a ta gama a lahliwa ni vavhovho va yena hi ku rhula. — 2Th 22:8-20; 2Tk 34:14-28.
Murindzi 15/06/09 paj. 10 par. 20
Hisekela Wugandzeli La Ntiyiso!
20 Nkama a ku lunghisiwa tempele, Muprista Wamukulu Hilikiya a kume buku la Nawu leli a li tsaliwe hi Moxe. Yena a li tekile a ya li nyiketa Xafani lweyi a a li sekretariyu, se yena a gama a li lerhela hosi. (Lerha 2 Tikronika 34:14-18.) Nkama hosi yi nga twa leswi nga tsaliwa ka buku la Nawu yi handzule timpahla ta yona yi tlhela yi tisola, yi game yi rhumela vanhu swaku va ya vutisa Yehovha swaku leswi a swi tsaliwile a swi vula yini. Hi ku tirhisa Ulda Xikwembu xi vule swaku a xi va kwatelile vanhu lavaya hileswi va kalaka va nga yingisanga Nawu ni leswi a va gandzela swikwembu swa mavunhwa. Se, a xi ta va khatisa hi leswi a va swi yendla kambe leswi Yosiya a nga gama a suselela swikwembu atikweni a tlhela a zama ku pfuna tiko leswaku li yendla swilo swaswinene Yehovha a vule swaku yena a a nge te ma vona makhombo lawa a a ta ma tisa tikweni. (2 Tikro. 34:19-28) Hi djondza yini ka mhaka leyi? Ku fana na Yosiya, hi djondza swaku hi fanele hi tinyimisela ku yingisa nkongomiso lowu taka hi ka Yehovha ni ku tlhela hi nga pfumeleli swaku tidjondzo ta mavunhwa ni ku kala ku tshembeka swi chimisa wugandzeli la hina. Se, hi nga tiyiseka swaku ku fana ni leswi Yehovha a nga yamukela Yosiya, na hina a ta hi yamukela loko hi hisekela wugandzeli la ntiyiso.
Lavetela Xuma Ka Rito La Xikwembu
Murindzi 03/17 paj. 27 mapar. 15-17
Djondza Ka Swikombiso Swa Khale
15 Swoswi hi ta vona xikombiso xa Hosi Yosiya. Hambileswi a a li hosi yayinene Yehovha a tshike ku mu sirhelela hi wugamu a ya fa nyimpini. A hi voneni swaku hi mhaka muni leswo swi yendlekile. (Lerha 2 Tikronika 35:20-22.) Yosiya a ye a ya lwa na Neko hosi ya Gibita kambe yena a a nga na xivangelo xa ku yendla leswo. Neko a yalile ku lwa na Yosiya naswona Bibele li vula swaku marito lawa Neko a nga ma vula a ma ta hi ka Yehovha. Hambileswo Bibele a li hi byeli swaku hi mhaka muni Yosiya a sindzise ku lwa na yena.
16 Yosiya a a ta swi tivisa ku yini swaku leswi Neko a a swi vula a swi ta hi ka Xikwembu? A a ta swi tiva hi ku vutisa mun’wani wa vaprofeta va Yehovha va ku fana na Yeremiya. (2 Tikro. 35:23, 25) Kambe Bibele a li vuli swaku a swi yendlile swoleswo, naswona Neko a a ya ka doropa lin’wani leli vuliwaka Karkemixi leswaku a lwa ni tiko lin’wani, ku nga li Yerusalema. Funtshi nyimpi leyi a yi nga khumbi vito la Yehovha kumbe tiko la yena. Se, a ku va Yosiya a lave ku lwa na Neko ku ve xiboho xa ku kala xi nga li xinene. Leswi swi hi djondzisa swaku loko ku ni mhaka leyi hi lavaka ku yi lulamisa, a xa ku sungula lexi hi faneleke hi xi yendla i ku zama ku tiva swaku Yehovha a titwisa ku yini.
17 Loko hi nge se teka xiboho swi nga ha va swi li swinene ku pimisa hi tindzimana ta Bibele leti nga hi pfunaka ka xiyimu xa hina. Swi nga ha lava hi rhanga hi ku yendla mapexkiza ka mabuku ya hina ya nhlengeletanu kumbe ku kombela ku pfuniwa hi madoda. Madoda ma nga hi pfuna hi ku hi khumbukisa tindzimana leti nga hi pfunaka ka xiyimu xa hina. Pimisa hi xikombiso lexi: Makwerhu wa xisati a nga ha va a tivekisele ku ya nsin’wini siku la ku karhi kambe nuna wa yena lweyi a kalaka a nga li mboni ya Yehovha a nga ha mu kombela swaku a nga yi siku lolelo leswaku va va xikan’we hileswi ku hundzaka nkama wa wunyingi na va nga heti nkama xikan’we. Makwerhu lweyi wa swi tiva leswaku swi lava a chumayela. (Mint. 4:20) Kambe na a nge se teka xiboho a nga ha pimisa hi tindzimana leti mu khumbukisaka swaku a fanele a yingisa Xikwembu ni tindzimana leti vulavulaka hi ku yendla vadjondzisiwa. (Mat. 28:19, 20; Mint. 5:29) A nga ha tlhela a khumbuka tindzimana leti vulaka swaku a fanele a hlonipha nuna wa yena ni ku kala a nga sindzisi mavonelo ya yena. (Efe. 5:22-24; Filp. 4:5) Se ka xiyimu lexo swi nga va kahle a tivutisa leswi: ‘Ku nga va swaku nuna wa mina a nga swi lavi swaku ni ya nsin’wini kumbe swo va swa namuntlha ntsena?’ I ntiyiso swaku hi lava ku yendla ku rhandza ka Yehovha hi tlhela hi va ni lipfalu la ku basa, kambe nkama hi yendlaka leswo i swa lisima swaku hi ringanisela.
26 KA JUNHO KU YA KA 2 KA JULHO
XUMA XI NGA KA RITO LA XIKWEMBU | EZRA 1-3
“Pfumelela Yehovha Swaku A Ku Tirhisa”
Wa Swi Vona Leswi Zakariya A Nga Swi Vona?
VAYUDA a va tsake hintamu hikusa Yehovha a yentxe swaku “Korexe, hosi ya Persiya” a chunsa Vayisrayele lava va nga heta nkama wa wunyingi na va li swikarawa aBabilona. Korexe a byele Vayuda swaku a va fanele va tlhela va ya Jerusalema va ya “pfuxeta yindlo ya Yehovha Xikwembu xa Israyele.” (Ezra 1:1, 3) Phela lawo a ku li mahungu ya ku tsakisa ka Vayuda, hikusa a va ta tlhela va tirhela Yehovha Xikwembu xa ntiyiso ka ndhawu leyi a a va nyike yona.
Murindzi 10/17 paj. 26 par. 2
Tinyolo Ta Nyimpi Ni Harhi Swi Nga Ku Vhikelelisa Ku Yini
2 Zakariya a a swi tiva swaku a Vayuda lava a va tlhele va ya Yerusalema a va ni lipfumelo ka Yehovha. Yehovha a a khumbe timbilu ta vona lakakuva va siya miminti ni manegosiyu ya vona. (Ezra 1:2, 3, 5) Hambileswi Babilona a ku li kaya ka vona, vanyingi ka vona va siye ndhawu liyani va ya ka tiko leli a va nge se tshama va li vona, va yendle leswo hikusa a va lava ku pfunisa ku yaka tempele. Ha swi tiva swaku a ku yaka tempele a swi li swa lisima ka vona, hikusa loko a swi nga li swa lisima ina va nga yendlanga liyendzo leliya la ku karhata leli a li teka 1.600 kilometru ku sukela aBabilona ku ya Yerusalema.
Lavetela Xuma Ka Rito La Xikwembu
Murindzi 15/01/06 paj. 19 par. 1
Tipontu Ta Lisima Ta Buku La Ezra
1:3-6. Ku fana ni Vayisrayele lava va kalaka va nga swi kotanga ku tlhelela aYerusalema, a hi Timboni ta Yehovha hinkwatu ti swi kotaka ku nghenela a ntirho wa nkama hinkwawu kumbe ku pfunisa lani ku nga ni xilaveko. Kambe va seketela lava swi kotaka va tlhela va peta male ka kaxa la minyikelo swaku va seketela ntirho wa ku chumayela ni wa ku yendla vadjondzisiwa