Esaya
8 Se Yehovha a ni byela leswi: “Teka xikhemu xaxikulu xa pulangu,+ u tsala henhla ka xona u ku: ‘Maherixalali-Haxibazi.’* 2 Kutani ni ta swi tiyisekisa hi timboni ta ku tshembeka, ku nga muprista Uriya+ na Zakariya n’wana wa Yeberekiya.”
3 Se ni famba masangu ni nsati wa mina, lweyi a nga muprofeta a gama a kuma nyimba, hi ku famba ka nkama a psala n’wana wa mufana.+ Se Yehovha a ni byela a ku: “Mu chule vito la Maherixalali-Haxibazi, 4 hikusa na mufana a nge se swi tiva ku vulavula a ku: ‘Papayi’, na ‘Mamani’, xuma xa Damaxka ni minchumu hinkwayu leyi nga teketeliwa aSamariya swi ta tekiwa swi yisiwa ka hosi ya Asiriya.”+
5 Yehovha a tlhele a vulavula na mina a ku:
6 “Hi mhaka ya leswi vanhu va nga tshika mati ya Xilowa* lawa ma fambaka kahle,+
Va gama va tsakela Rezini ni n’wana wa Remaliya,+
7 Mina Yehovha ni ta va tisela mati ya manyingi
Ya Nambu,* lawa ma tsutsumaka hi matimba,
Hosi ya Asiriya+ ni ku phatima ka yona hinkwaku.
Yona yi ta famba henhla ka minambu hinkwayu ya yona
Yi huma hi ka matlhelo hinkwawu ya nambu
8 Yi ta hlasela tiko la Yuda.
Yi li peta ka mati ma gama hi ka nkolo;+
Yi ta pfula timpapa ta yona ti funengeta tiko la wena,
9 Lunghekani swaku mi ta va hlasela, kambe mi ta fayeteliwa.
Yingisani, n’wina hinkwenu lava va taka hi kule!
Lunghekelani ku lwa nyimpi, kambe mi ta fayeteliwa!+
Lunghekelani ku lwa nyimpi, kambe mi ta fayeteliwa!
10 Hambiloko mo yendla maplanu a ma nge mi pfuni hi nchumu!
11 Yehovha a ni be ndleve hi voko la yena la matimba swaku ni nga landzeli vanhu a ku:
12 “Leswi vanhu va nge i ku xenga, wena u nga hlayi swaku i ku xenga!
U nga chavi leswi va swi chavaka;
Swi nga ku rhurhumelisi.
13 Yehovha murhangeli wa tintsumi hi yena Lweyi mi faneleke mi mu hlonipha hikusa wa kwetsima,+
Mi fanele mi chava yena,
Hi yena Lweyi a faneleke a mi yendla mi rhurhumela.”+
14 Yena a ta va ndhawu ya n’wina ya ku tumbela ka yona,
Kambe a ta tlhela a fana ni ribye leli munhu a tigumulaka ka lona
Ni ribye leli a tigumulaka ka lona+
Ka mindjangu hayimbirhi ya Israyele,
A ta fana ni xikhele ni ntlhamu
Ka vanhu va le Yerusalema.
15 Vanhu va vanyingi va ta tigumula va wa va gama va tshoveka;
Va ta xengiwa va tlhela va phasiwa.
16 Bohelelani wumboni la mina;
Nyikani ntsena vadjondzisiwa va mina nawu!
17 Ni ta tshama na ni nyimele Yehovha,+ lweyi a fihlelaka ndjangu wa Yakobe+ nghohe* ya yena funtshi ni ta tshemba yena.
18 Yingisani! Mina ni vana lava Yehovha a nga ni nyika vona,+ hi fana ni swikombiso+ ni masingita aIsrayele, leswi taka hi ka Yehovha murhangeli wa tintsumi, lweyi a tshamaka ka Ntshava ya Siyoni.
19 Loko vo tshuka va mi byela va ku: “Vutisani tinyanga ni lava vhumbataka na va ringisela swinyanyani loko va vulavula,” indjhe vanhu a va fanelanga va vutisa Xikwembu xa vona ke? Indjhe swa twala ku vutisa lava nga fa timhaka leti ti khumbaka vanhu lava hanyaka ke?+ 20 Ihim, va fanele va kambisisa nawu ni wumboni leli nga tsaliwa!
Loko va nga landzeli leswi nga tsaliwa a va nge voningeliwi.+ 21 Lweyi a nga ta hundza tikweni a ta va na a biwa hi ndlala funtshi na a kwatile;+ hi mhaka ya leswo a ta rhuka hosi ni Xikwembu xa yena na a langute henhla. 22 Se a ta txuvuka misava, a vona ku karhateka ni munyama, mahlomulu ni minkama ya ku tika, ku xukuvala ni munyama wa ku chavisa.