Vatesalonika Va Ku Sungula

2 Vamakwerhu, mi swi tiva kahle swaku a hi mi yendzelanga mahala.+ 2 Hikusa hambileswi hi nga rhanga hi ku hlupheka ni ku rhuketeliwa aFilipiya,+ ku nga mhaka leyi mi yi tivaka, Xikwembu xa hina xi hi tiyise nhlana swaku hi kota ku mi chumayela mahungu ya ku tsakisa ya Xikwembu,+ hambiloko hi kanetiwa swinene.* 3 Hikusa xitsundzuxu lexi hi mi nyikaka xona, a hi mi nyiki hi ku phazama, hi ku mi navelela swa ku biha kumbe hi ku lava ku mi kanganyisa. 4 Kambe leswi hi nga langiwa hi Xikwembu swaku hi chumayela mahungu ya ku tsakisa, a hi vulavuli hi ndlela leyi nga ta tsakisa vanhu, kambe leyi nga ta tsakisa Xikwembu lexi kambelaka timbilu ta hina.+

5 Phela ma swi tiva swaku a hi zanga hi tirhisa marito ya ku nandziha kumbe hi tiyendla vanhu vavanene swaku hi ta kuma minchumu ka n’wina;+ Xikwembu xi nga hi fakazela ka mhaka leyi! 6 Naswona a hi nga lavi ku dzunisiwa hi vanhu, hambi hi n’wina kumbe hi van’wani, hambileswi a hi ta va hi mi rhwexe ndzhwalu wa ku hi pfuna hi swa timale hileswi hi nga vapostolo va Kreste.+ 7 Kambe hi ve vanhu vavanene xikarhi ka n’wina ku fana ni mamani lweyi a yan’wisaka ni ku hlayisa kahle vana va yena. 8 Kutani leswi hi mi rhandzaka swinene,+ a hi tinyimisele ku mi chumayela mahungu ya ku tsakisa ya Xikwembu ni ku nyikela wutomi la hina+ swaku hi mi pfuna.

9 Vamakwerhu, ha tiyiseka swaku ma swi khumbuka swaku hi tirhe yi nga chayi. Phela a hi tirha wusiku ni nhlikanhi swaku hi nga rhwexi munhu ndzhwalu wa ku hi pfuna hi swa timale+ nkama lowu a hi mi chumayela mahungu ya ku tsakisa ya Xikwembu. 10 N’wina mi timboni ta hina, na xona Xikwembu xa hi fakazela swaku hi hanyisane na n’wina hi ku tshembeka, hi ku lulama ni ku pfumala nandzu ka n’wina vapfumeli. 11 Mi swi tiva kahle swaku a hi tshamela ku mi khongotela ni ku mi tiyisa, hi tsundzuxa mun’wani ni mun’wani wa n’wina+ leswi a faneleke a swi yendla ku fana ni leswi papayi+ a yendlisaka xiswona ka vana va yena, 12 leswaku mi tama mi famba hi ndlela leyi tsakisaka Xikwembu,+ lexi mi vitanaka ka Mfumu wa xona+ ni ka ku phatima ka xona.+

13 Phela hi leswo swi yendlaka na hina hi khensa Xikwembu nkama hinkwawu,+ hikusa nkama mi nga yamukela rito la Xikwembu leli mi nga li twa ka hina, a mi li yamukelanga ingaku i rito la vanhu kambe mi li yamukele na li li rito la Xikwembu leli tirhaka ni le ka n’wina vapfumeli. 14 Hikusa n’wina vamakwerhu, mi tekelele mabandla ya Wukreste ya le Yudiya lama lumbaka Xikwembu, hikusa mi hluphiwile hi vanhu va tiko la ka n’wina+ hi ndlela ya ku fana ni leyi vamakwerhu va le Yudiya va hluphiwaka hi yona hi Vayuda, 15 lava nga za va dlaya na Hosi Yesu+ ni vaprofeta va tlhela va hlupha na hina.+ Phela a va xi tsakisi Xikwembu kambe va lwisana ni leswi nga ta pfuna vanhu hinkwavu, 16 hileswi va zamaka ku hi pfalela ku vulavula ni vanhu vamatiko leswaku na vona va ta ponisiwa.+ Loko va yendla leswo, minkama hinkwayu va yengetela swidjoho swa vona. Kambe hi wugamu ku kwata ka Xikwembu ku le henhla ka vona.+

17 Kambe vamakwerhu, a nkama hi nga hambanisiwa na n’wina swa nkamanyana, (a hi nga mi voni kambe ka timbilu ta hina a hi tshamela ku mi khumbuka) hi zame hi tindlela hinkwatu swaku hi tlhela hi mi vona hikusa a hi mi xuva hintamu. 18 Hi mhaka leyo, a hi lava ku ta mi pfuxela, mina Pawulo ni zame ku mi tela kambirhi kambe Sathana a hi sivelile. 19 Hikusa nkama lowu Hosi ya hina Yesu a nga ta vuya hi wona, i mani lweyi a nga ta va ntshembo wa hina, ku tsaka ka hina kumbe harhi* ya ku tsaka ka hina phambheni ka yena ke? A hi n’wina ke?+ 20 Hikakunene hi n’wina mi nga ku dzuneka ni ku tsaka ka hina.