Ezekiyele

3 Kutani a ni byela a ku: “N’wana wa munhu, dlana leswi nga phambheni ka wena.* Dlana buku* leyi, u gama u famba u ya vulavula ni Vayisrayele.”+

2 Se ni pfula nomo, a ni dlisa buku leyi. 3 A tama a khuluma a ku: “N’wana wa munhu, dlana buku leyi ni ku nyikaka yona, u tata khwirhi la wena.” Kutani ni sungula ku yi dla naswona a yi tsokombela ku fana ni wulombe.+

4 A gama a ni byela a ku: “N’wana wa munhu, famba ka Vayisrayele u fika u va byela leswi ni nga ku byela swona. 5 Hikusa a wu rhumiwi ka vanhu lava va vulavulaka lirimi leli swi karhataka ku li twisisa kumbe lava vulavulaka lirimi leli u kalaka u nga li tivi, kambe u rhumiwa ka Vayisrayele. 6 A wu rhumiwi ka vanhu lava vulavulaka lirimi leli swi karhataka ku li twisisa kumbe lava vulavulaka lirimi leli u kalaka u nga li tivi, leli marito ya lona u kalaka u nga ma twisisi. Loko a ni ku rhuma ka vona a va ta ku yingisa.+ 7 Kambe Vayisrayele va ta yala ku ku yingisa hikusa a va swi lavi ku ni yingisa.+ Hinkwavu va wome tinhloko naswona va tiyele timbilu.+ 8 Ni yendle swaku nghohe* ya wena yi tiyela ku fana ni tinghohe ta vona; ni ximombo xa wena ni yendle swaku xi tiyela ku fana ni swimombo swa vona.+ 9 Ni yendle swaku ximombo xa wena xi fana ni diyamanti,* xi tiya ku tlula ni ribye la ku tiya.+ U nga va chavi kumbe u chavisiwa hi tinghohe ta vona+ hikusa i vanhu lava va kalaka va nga yingisi.”

10 A tama a khuluma na mina a ku: “N’wana wa munhu, yingisa marito hinkwawu lawa ni nga ku byela wona u tlhela u ma veka mbilwini ya wena. 11 Famba ka vanhu va lixaka la wena lava nga wukaraweni+ u fika u khuluma na vona. U va byela u ku: ‘Leswi, hi leswi Yehovha Hosi Leyikulu a swi vulaka,’ hambi va yingisa kumbe va yala ku yingisa.”+

12 Se matimba* ma ni tlakula+ ni gama ni twa rito lalikulu ndzhaku ka mina na li ku: “Ku phatima ka Yehovha a ku dzunisiwe ka ndhawu ya yena.” 13 Ni tlhele ni twa guwa la timpapa ta tintsumi loko ti khumbana,+ guwa la maroda lawa a ma li matlhelweni ka tona,+ ni guwa lin’wani lalikulu. 14 Se matimba ma ni tlakula ma famba na mina, ni fambe na ni xukuvalile naswona na ni kwatile, kutani matimba* ya Yehovha ma sungula ku tirha swinene ka mina. 15 Ni gama ni ya ka vanhu lava nga wukaraweni aTeli-Abibi, lava a va tshama kusuhi ni nambu wa Kebari,+ ni fika ni tshama na vona kolanu; ni tshame na vona 7 wa masiku na ni karhatekile.+

16 Loko 7 wa masiku se ma hundzile, Yehovha a gama a vulavula na mina a ku:

17 “N’wana wa munhu, ni ku langile swaku u va murindzi wa Vayisrayele,+ naswona loko ni ku byela swilo u fanele u ni basopisela vona.+ 18 Loko ni byela lweyi a yendlaka swa ku biha ni ku: ‘U ta fa’ kambe wena u nga mu basopisi, u nga mu byeli leswaku a txintxa ndlela ya yena ya ku biha leswaku a nga fi,+ a ta fa hi mhaka ya xihoxo xa yena hikusa a yendla swa ku biha,+ kambe ngati ya yena ni ta yi lava ka wena.*+ 19 Kambe loko u basopisa lweyi a yendlaka swa ku biha kutani a nga tshiki ku yendla swilo swa ku biha ni ndlela ya yena ya ku biha, a ta fa hi mhaka ya xihoxo xa yena kambe wena u ta va na u ponise wutomi la wena.+ 20 Kambe loko lweyi wa ku lulama a tshika ku yendla swa ku lulama se a yendla swa ku biha, ni ta mu vekela swa ku mu wisa ka ndlela ya yena naswona a ta fa.+ Loko u nga mu basopisi a ta fela xidjoho xa yena naswona swilo swaswinene leswi a nga swi yendla a swi nga ta khumbukiwa, kambe ngati ya yena ni ta yi lava ka wena.*+ 21 Kambe loko u basopisa lweyi wa ku lulama swaku a nga djohi, kutani a nga djohi, a nga ta fa hikusa a basopisiwile,+ se wena u ta va u ponise wutomi la wena.”

22 Matimba* ya Yehovha ma sungule ku tirha ka mina na ni li kolanu, a gama a ni byela a ku: “Sekeleka u nyima u ya ka ndhawu leyi nga pfuleka ni ta ya vulavula na wena koseniyani.” 23 Se ni suka ni famba ni ya ka ndhawu leyi nga pfuleka ni gama ni vona ku phatima ka Yehovha kolanu,+ a ku fana ni ku phatima loku ni nga ku vona akusuhi ni nambu wa Kebari,+ se ni khizama, nghohe ya mina yi txuvuka hansi. 24 Kutani moya wa ku kwetsima wu nghena ka mina wu ni yendla ni nyima hi minenge,+ se Xikwembu xi gama xi khuluma na mina xi ku:

“Famba u ya tipfalela ka yindlo ya wena. 25 Wena n’wana wa munhu, va ta ku bohelela hi magoda swaku u nga fambafambi xikarhi ka vona. 26 Ni ta yendla swaku lirimi la wena li namarhela lomu non’wini, u ta va mbheveve, a wu nga ta swi kota ku va laya hikusa i vanhu lava va kalaka va nga ni yingisi. 27 Kambe loko ni vulavula na wena ni ta wu pfula nomo wa wena, se u ta va byela u ku:+ ‘Leswi, hi leswi Yehovha Hosi Leyikulu a swi vulaka.’ Lweyi a yingisaka a a yingisi+ ni lweyi a yalaka ku yingisa a nga yingisi hikusa i vanhu lava va nga woma tinhloko.+