Mahungu Ya Ku Tsakisa Ya Ku Tsaliwa Hi Yohani

11 Siku lin’wani, wanuna mun’wani lweyi a vitaniwaka Lazaru a a vabya; a a li wa le Betaniya, ka xidoropani lexi Mariya ni makwavu wa yena Marta+ a va tshama ka xona. 2 Mariya hi yena lweyi a nga tshama a tota minkondzo ya Hosi hi mafurha ya ku nun’hwela a tlhela a yi limpa hi misisi ya yena;+ naswona Lazaru lweyi a a vabya, a a li makwavu wa yena. 3 Se Marta na Mariya va rhumela vanhu ka Yesu va ya ku: “Hosi, munghanu wa wena lweyi u mu rhandzaka wa vabya.” 4 Kambe nkama Yesu a nga twa leswo a ku: “Xikongomelo xa ku vabya loku a hi lifu, kambe i ku dzunisa Xikwembu+ ni swaku N’wana wa Xikwembu a ta dzunisiwa hi mhaka ya kona.”

5 Yesu a a rhandza Marta, Mariya na Lazaru. 6 Kambe nkama a nga twa swaku Lazaru wa vabya, a tshame masiku mambirhi lomu a a li kona. 7 A game a byela vadjondzisiwa va yena a ku: “A hi tlheleleni Yudiya.” 8 Vadjondzisiwa va ku: “Rabi,*+ phela a hi khale vanhu va le Yudiya va nga lava ku ku ba hi maribye,+ se wa ha lava ku tlhelela kona?” 9 Yesu a hlamula a ku: “Dlambu a li voningi 12 wa mawora hi siku ke?+ Kutani munhu a nge wi loko a famba na dlambu li vona, hikusa la mu voningela. 10 Kambe lweyi a fambaka niwusiku, a ta wa hikusa a nga ku voni lomu a yaka kona.”

11 Nkama a nga vula leswo, a tlhele a ku: “Munghanu wa hina Lazaru a yo yetlela+ kambe ni ta ya ni ya mu pfuxa.” 12 Vadjondzisiwa va ku: “Hosi, loko a yo yetlela a ta pfuka.” 13 Phela Yesu a a vula swaku Lazaru a file. Kambe vona a va pimisa swaku a vulavula hi ku yetlela wurhongo la hikakunene. 14 Se Yesu a va byela hi ku kongoma a ku: “Lazaru a file+ 15 kambe ni tsakile hileswi a ni nga li kona hikusa leswi ni nga ta swi yendla swi ta tiyisa lipfumelo la n’wina. A hi fambeni lomu a nga kona.” 16 Kutani Tomasi lweyi a a vitaniwa Hahla, a byela vadjondzisiwa lavan’wani a ku: “Na hina a hi fambeni swaku hi ta ya fa na yena.”+

17 Nkama Yesu a nga fika, a kume swaku Lazaru se a a ni 4 wa masiku na a li sirheni. 18 Xidoropani xa Betaniya a xi li kusuhi ni Yerusalema; mpfhuka wa kona a wu li wa kolomuyani ka makilometru manharhu.* 19 Ku tala ka Vayuda va tile va ta singatha Marta na Mariya hi mhaka ya leswi va nga feliwa hi makwavu. 20 Nkama Marta a nga twa swaku Yesu a le ku teni, a mu tlhangaveta; kambe Mariya+ a sala kaya. 21 Kutani Marta a byela Yesu a ku: “Hosi, loko a wu li kona, makwerhu ina a nga fanga. 22 Kambe hambi swoswi na swi tiva swaku hinkwaswu leswi u swi kombelaka ka Xikwembu, xi ta ku nyika swona.” 23 Yesu a ku: “Makwenu a ta pfuka.” 24 Marta a ku: “Na swi tiva swaku a ta pfuka loko ku pfuxiwa lava nga fa+ hi siku la wugamu.” 25 Yesu a ku: “Hi mina ni pfuxaka vafi ni tlhela ni va nyika wutomi.+ Lweyi a pfumelaka ka mina, hambi o fa, a ta tlhela a hanya; 26 naswona lweyi a hanyaka a tlhela a pfumela ka mina, a nge tshuki a fa.+ Wa swi kholwa leswi ni swi vulaka?” 27 Marta a ku: “Ina Hosi, na kholwa swaku hi wena Kreste, N’wana wa Xikwembu, lweyi a a fanele a ta misaveni.” 28 Nkama a nga gama ku vula leswo, a fambe a ya vitana makwavu Mariya; a fike a mu hlevetela a ku: “A fikile Mudjondzisi+ naswona wa ku vitana.” 29 Nkama Mariya a nga swi twa, a suka hi ku kahlula a ya ka Yesu.

30 Yesu a a nge se fika ka xidoropani xolexo, kambe a wa ha li lomu Marta a nga mu tlhangaveta kona. 31 Nkama Vayuda lava a va li ndlwini na Mariya na va mu singatha va nga mu vona na a suka hi ku kahlula a huma, va mu landza, hikusa a va pimisa swaku a ya sirheni+ a ya rila kona. 32 Nkama Mariya a nga fika lomu Yesu a a li kona, a khizama phambheni ka yena a ku: “Hosi, loko a wu li kona, makwerhu ina a nga fanga.” 33 Nkama Yesu a nga vona Mariya na a ba nkosi xikan’we ni Vayuda lava nga ta na Mariya, na yena a tlhaveka swinene mbilwini* naswona a vaviseka ngopfu. 34 Se Yesu a ku: “Mi mu veke kwini?” Va mu hlamula va ku: “Hosi, tani u ta ku vona.” 35 Kutani Yesu a xiririka mihloti.+ 36 Nkama Vayuda va nga vona leswo va ku: “Impela a a mu rhandza!” 37 Kambe van’wani va vona va ku: “Wanuna lweyi a kote ku pfula matihlo ya munhu lweyi a a nga voni,+ se hi mhaka muni a tsandzekile ku yendla swaku Lazaru a nga fi ke?”

38 Yesu a tlhela a tlhaveka mbilwini, a gama a ya ka sirha. Phela sirha la kona a ku li mbhovo lowu a wu pfaliwe hi ribye. 39 Kutani Yesu a ku: “Susani ribye.” Kambe Marta makwavu wa mufi a ku: “Hosi, a fanele se a nun’hwa hikusa se ku hundza 4 wa masiku na a file.” 40 Yesu a ku: “Kasi a ni ku byelanga swaku loko u pfumela u ta vona matimba ya Xikwembu?”+ 41 Se va susa ribye. Se Yesu a txuvuka tilweni+ a khongela a ku: “Papayi, na ku khensa hikusa u ni yingisile. 42 Na swi tiva swaku wa ni yingisa nkama hinkwawu; kambe ni vulavula hi mhaka ya vanhu lava nga nyima lani leswaku va ta kholwa swaku hi wena u nga ni rhuma.”+ 43 Nkama a nga gama ku vula leswo, a huwelela a ku: “Lazaru, huma handle!”+ 44 Se Lazaru, lweyi a a file, a huma na a boheleliwile mavoko ni minenge ni nhloko hi switarapu. Yesu a ku: “Mu tlhantlheni, mi mu tshika a tifambela.”

45 Kutani Vayuda va ku tala lava nga ta ka Mariya, loko va vona leswi Yesu a nga swi yendla va ve ni lipfumelo ka yena,+ 46 kambe van’wani va vona va ye ka Vafarisi va ya va byela leswi Yesu a nga swi yendla. 47 Se vaprista vavakulu ni Vafarisi va hlengeleta lava a va lumba Tribunali Lalikulu la Vayuda* va ku: “Se hi ta ku yini leswi munhu lweyi a yendlaka masingita ya manyingi?+ 48 Loko hi mu tshikisa leswi, hinkwavu va ta pfumela ka yena naswona Varoma va ta ta, va ta teka ndhawu* ni tiko la hina.” 49 Kambe mun’we ka vona, ku nga Kayafasi,+ lweyi a a li muprista wamukulu hi lembe lolelo a ku: “A mi tivi nchumu n’wina, 50 naswona a mi swi voni swaku swi pfuna n’wina loko munhu mun’we a fela vanhu, ku tlula swaku tiko hinkwalu li helisiwa.” 51 Leswi a nga swi vula a ku nga li mavonelo ya yena, kambe leswi a a li muprista wamukulu hi lembe lolelo, Xikwembu xi mu tirhisile ku profeta swaku Yesu a ta fela Vayuda, 52 naswona a nga ta fela Vayuda ntsena kambe leswaku ku hlengeletiwa vana va Xikwembu lava nga hangalaka swaku va twanana. 53 Se ku sukela hi siku lolelo, va sungule ku yendla maplanu* ya ku mu dlaya.

54 Hi mhaka leyo, Yesu a nga ha tlhelanga a fambafamba xikarhi ka Vayuda kambe a ye ka ndhawu leyi nga kusuhi ni mananga, ka doropa leli vitaniwaka Efrayimi,+ a fika a tshama kona ni vadjondzisiwa va yena. 55 Paxkwa+ la Vayuda a li li kusuhi naswona vanhu va ku tala lava taka hi ntlhaveni va ye Yerusalema, na Paxkwa li nge se fika leswaku va ya tibasisa hi ku landza Nawu wa Moxe. 56 Se va lavetela Yesu, va vutisana na va nyime tempeleni va ku: “Mi swi vonisa ku yini? Mi pimisa swaku a ta ta ka fexta leli ke?” 57 Vaprista vavakulu ni Vafarisi va humese nawu wa leswaku lweyi a nga ta vona Yesu, a fanele a va tivisa swaku va ta kota ku mu khoma.