Ruti

1 Ka nkama lowu a ku fuma* vayavanyisi,+ ku ve ni ndlala tikweni. Se wanuna mun’wani a rhurha aBetlehema+ aYuda a ya tshama ka tiko la Mowabu.+ A fambe ni nsati wa yena ni vana va yena va vambirhi va madjaha. 2 Vito la wanuna lweyi a ku li Elimeleki,* nsati wa yena a ku li Nawomi,* kasi vana va yena a ku li Mahaloni* na Kiliyoni.* A va ta hi ka doropa la Efrata ku nga Betlehema aYuda. Se va fike va tshama ka tiko la Mowabu.

3 Hi ku famba ka nkama Elimeleki nuna wa Nawomi a fa, se Nawomi a sala ni vana va yena vambirhi va madjaha. 4 Madjaha lawa ma chade ni vavasati va Vamowabu. Mavito ya vona a ku li Orpa na Ruti.+ Va tshame kolanu kolomuyani ka 10 wa malembe. 5 Se Mahaloni na Kiliyoni na vona va fa, Nawomi a gama a sala na a nga na nuna funtshi a nga na vana. 6 Nawomi a suka ka tiko la Mowabu na a na Orpa na Ruti, hikusa a nkama a a li Mowabu a twe swaku Yehovha a pfune vanhu va yena hi ku va nyika swakudla.*

7 A suke ka ndhawu leyi a a tshama ka yona na a na Orpa na Ruti. A nkama a va tlhela va ya ka tiko la Yuda, 8 Nawomi a byela Orpa na Ruti a ku: “Tlhelani mi ya ka vamamani va n’wina. Yehovha a a mi rhandzi+ ku fana ni leswi mi nga va rhandzisa xiswona vanuna va n’wina lava nga fa, ni leswi mi nga ni rhandzisa xiswona. 9 Yehovha a a mi hlayise a tlhela a nyika mun’wani ni mun’wani wa n’wina a nuna ni kaya.”+ Se a va bejara* va sungula ku rila hintamu. 10 Kambe va tama va ku: “Hi ta famba na wena ka vanhu va wena.” 11 Kambe Nawomi a ku: “Tlhelani vana va mina. Mi nga ni landzi. Indjhe ni nga ha swi kota ku psala* vana swaku va ta mi chada?+ 12 Mukani vana va mina. Fambani, hikusa leswi se ni nga guga, a ni nge he chadiwi hi munhu. Hambi a no va ni ntshembo wa ku ni ta chadiwa namuntlha ni tlhela ni psala vana, 13 indjhe a mi ta va nyimela anze va kula? Impela a mi ta tshama mi nga chadiwi hi vavanuna van’wani na ma ha nyimela vona? Na mi twela vana va mina, hikusa Yehovha a ni tshikile.”+

14 Se va tlhela va rila hintamu, se Orpa a bejara Nawomi a gama a muka. Kambe Ruti a nga mukanga. 15 Nawomi a ku: “A wu swi voni swaku hambi Orpa lweyi na yena a nga feliwa a tlhelelile ka tiko la yena ni ka swikwembu swa yena? Hi mhaka muni u nga fambi na yena?”

16 Kambe Ruti a ku: “U nga ni tlhelisi; hikusa lani u nga ta ya kona, na mina ni ta ya kona, lani u nga ta yetlela kona na mina ni ta yetlela kona. Maxaka ya wena ma ta va maxaka ya mina ni Xikwembu xa wena xi ta va Xikwembu xa mina.+ 17 Lani u nga ta fela kona, na mina ni ta fela kona, ni tlhela ni lahliwa kona. Yehovha a a ni khatisi hintamu loko hi hambanisiwa hi swin’wani ku nga li lifu.”

18 A nkama Nawomi a nga vona swaku Ruti a a yala ku tlhela, a nga ha hlayanga nchumu. 19 Se hi vambirhi va famba va ya Betlehema.+ A nkama va nga fika aBetlehema, vanhu hinkwavu va va hlamala, se vavasati va ku: “I Nawomi lweyi?” 20 Yena a hlamula vavasati lava a ku: “Mi nga ni vitani Nawomi.* Ni vitaneni Mara,* hikusa Lweyi Wa Matimba Hinkwawu a ni tikisele wutomi.+ 21 Nkama ni nga famba a ni ni hinkwaswu, kambe Yehovha a yendle swaku ni vuya ni nga na nchumu. Hi mhaka muni ma ha ni vitana Nawomi, kuve Yehovha Lweyi Wa Matimba Hinkwawu a ni tshikile, a tlhela a ni vangela khombo?”+

22 Nawomi a vuyise swoleswo na a suka ka tiko la Mowabu,+ a a li na Ruti wa Mumowabu lweyi a a li nsati wa n’wana wa yena. Va fike Betlehema na ku sungula ntshovelo wa maxalani.*+