Mahungu Ya Ku Tsakisa Ya Ku Tsaliwa Hi Luka
21 Nkama Yesu a nga txuvuka, a vone vanhu va ku ganya na va peta male ka makaxa ya minyikelo.+ 2 Se a vona wansati wa xisiwana lweyi a nga feliwa hi nuna na a peta masentavhu mambirhi* ya ku kala ma nga pfuni nchumu,+ 3 kutani a ku: “Ni mi byela ntiyiso: Wansati lweyi wa ku feliwa hi nuna a tlhela a va xisiwana a nyikele ku tlula hinkwavu.+ 4 Hikusa lava hinkwavu va nyikele leswi va nga swi pambula ka leswi nga va talela, kambe hambileswi yena a pfumalaka, a nyikele hinkwaswu swa wusiwana la yena leswi a a ta tihanyisa hi swona.”+
5 Loko van’wani se va vulavula hi tempele, ndlela leyi a yi sasekisiwe hi yona hi maribye ya ku saseka ni swilo leswi nga nyikeliwa ka Xikwembu,+ 6 a ku: “Loko ku li swilo leswi mi swi vonaka swoswi, ma ta masiku lawa maribye hinkwawu lawa ma nga lani ma nga ta diliziwa naswona a li kona ni lin’we li nga ta sala henhla ka lin’wani.”+ 7 Se va mu vutisa va ku: “Mudjondzisi, swi ta yendleka siku muni swilo leswi naswona xi ta va xihi xikombiso xa nkama lowu swilo leswi swi nga ta yendleka hi wona?”+ 8 Se a va hlamula a ku: “Tivoneleni swaku mi nga kanganyisiwi,+ hikusa va ku tala va ta ta hi vito la mina va ku: ‘Hi mina Kreste!’ Va tlhela va ku: ‘Magamu ma kusuhi.’ Kambe mi nga va landzeli.+ 9 Naswona loko mi twa hi ta tinyimpi ni nyimanyima,* mi nga chaveni. Hikusa swilo leswi swi fanele swi rhanga swi yendleka, kambe magamu a ma nga ta fika hi nkama wolowo.”+
10 Kutani a ku: “Hikusa matiko ma ta lwa hi xiwona,+ ni mimfumu yi ta lwa hi xiyona.+ 11 Ku ta va ni ku tsekatseka kakukulu ka misava, ku ta pfumaleka swakudla, ku va ni mintungu ka tindhawu ta ku hambanahambana;+ vanhu va ta vona swilo leswi nga ta va chavisa ni swikombiso swaswikulu leswi taka hi le tilweni.
12 “Kambe na swilo hinkwaswu leswi swi nge se yendleka, vanhu va ta mi khoma va tlhela va mi xanisa,+ va ta mi yisa ka masinagoga,* va mi pfalela ni le madjele. Mi ta yisiwa ka tihosi ni ka vagovhernadori hi mhaka ya vito la mina.+ 13 Leswo swi ta yendla swaku mi byela van’wani hi ta mina. 14 Kutani mi nga karhatekeni hi leswi mi nga ta va hlamulisa xiswona swaku mi tinyimelela,+ 15 hikusa ni ta mi nyika wutlharhi naswona ni ta mi byela leswi mi faneleke mi swi vula; valala va n’wina a va nge swi koti ku mi kaneta kumbe ku mi hlamula.+ 16 Naswona vapsali va n’wina, vamakwenu, maxaka ni vanghanu va ta mi xavisa, naswona van’wani va n’wina va ta dlayiwa,+ 17 mi ta nyenyiwa hi vanhu hinkwavu hi mhaka ya vito la mina.+ 18 Kambe hambi hi nsisi ni wun’we wa tinhloko ta n’wina a wu nga ta lahleka.+ 19 Loko mi tiyisela, mi ta ponisiwa.+
20 “Kambe nkama mi nga ta vona doropa la Yerusalema na li rhendzeliwe hi masonchwa,+ swi tiveni swaku nkama wa ku helisiwa ka lona wu kusuhi.+ 21 Kutani lava nga Yudiya a va baleke va ya ka tintshava,+ se lava nga Yerusalema a va hume naswona lava nga handle ka Yerusalema va nga tshuki va nghena, 22 hikusa lawa i masiku ya Xikwembu ya ku khatisa vanhu leswaku ku ta hetiseka hinkwaswu leswi nga tsaliwa. 23 Phela swi ta va karhatela ndjhani vavasati lava nga ni tinyimba ni lava yan’wisaka vana ka masiku wolawo!+ Hikusa ku ta hluphekiwa hintamu atikweni naswona vanhu volavo va ta khatisiwa. 24 Va ta dlayiwa hi xipada, va ta va swikarawa ka matiko hinkwawu;+ naswona Yerusalema a ta kandziheliwa hi matiko* anze nkama lowu nga vekiwa wa matiko wu hela.+
25 “Naswona mi ta vona swikombiso ka dlambu, ka n’weti ni ka tinyeleti+ naswona vanhu vamatiko va ta rila, va nga swi tivi swaku va ta yendla yini hi mhaka ya ku duma ka lwandle ni ku kwata ka lona. 26 Vanhu va ta titivala hi mhaka ya ku chava ni ku nyimela swilo leswi nga ta yendleka lani misaveni, hikusa matimba lama nga matilweni ma ta tsekatsekisiwa. 27 Va ta gama va vona N’wana wa munhu+ a ta na a li ka marhefu hi matimba ni ku phatima kakukulu.+ 28 Kambe loko swilo leswi swi sungula ku yendleka, nyimani mi tiya mi tlakusa tinhloko hikusa ku ponisiwa ka n’wina ku le kusuhi.”
29 Se a va byela xifaniso a ku: “Txuvukani nsinya wa nkuwa ni minsinya leyin’wani.+ 30 Loko yi sungula ku hluka, ma swi tiva swaku malanga* ma le kusuhi. 31 Hi ku fana, na n’wina loko mi vona swilo leswi swi yendleka, swi tiveni swaku Mfumu wa Xikwembu wu le kusuhi. 32 Ni mi byela ntiyiso: Vanhu va nkama lowu* a va nge fi va hela na swilo leswi hinkwaswu swi nge se yendleka.+ 33 Tilo ni misava swi ta hundza, kambe marito ya mina ma ta tshama hi masiku ni masiku.+
34 “Kambe tivoneleni swaku timbilu ta n’wina ti nga tshuki ti tikeliwa hi ku dla ngopfu, ku phuza ngopfu+ ni ku vilela hi swa wutomi,+ se siku lelo li fika na mi nga li nyimelanga 35 ku fana ni ntlhamu.+ Hikusa li ta wela hinkwavu lava tshamaka misaveni. 36 Kutani tshamani na mi rindzile,+ mi khongela nkama ni nkama+ swaku mi ta kota ku pona ka swilo leswi hinkwaswu leswi faneleke swi yendleka ni ku nyima phambheni ka N’wana wa munhu.”+
37 Loko li xa Yesu a a djondzisa tempeleni, se loko li pela a a famba a ya tshama ka Ntshava ya Mawolivhera. 38 Vanhu a va ya tempeleni nimpundzu swaku va ya mu yingisela.