Tintsumi Leti Nga Djikela Xikwembu

Tintsumi hinkwatu leti nga yendliwa hi Yehovha a ti li tinene. Kambe ku ve ni ntsumi yin’we leyi nga txintxa yi va ntsumi ya ku biha. Ntsumi leyi i Sathana Davulosi. A a lava swaku vanhu va tirhela yena va tshika ku tirhela Yehovha. Vona leswi swi nga yendleka:

Ka jardim la Edeni, a ku ni minsinya ya yinyingi leyi a yi psala mihandzu ya ku nandzika. Yehovha a byele Adamu ni nsati wa yena Evha swaku a va fanele va dla hinkwaswu leswi a va swi lava. Kambe a ku ni nsinya wun’we lowu Xikwembu xi nga va byela swaku a va nga fanelanga va dla mihandzu ya wona. Xi va byele swaku loko vo dla mihandzu ya nsinya lowu a va ta fa. — Genesa 2:9, 16, 17.

Siku lin’wani na Evha a sale yexe, ku humelele nyoka yi vulavula na yena. Ku vula ntiyiso a ku nga li nyoka leyi a yi vulavula kambe a ku li Sathana Davulosi lweyi a a tirhisa nyoka swaku a vulavula na Evha. Sathana a byele Evha swaku loko a dla handzu wa nsinya lowu a wu tsimbisiwa a a ta tlhariha a fana ni Xikwembu. Sathana a tlhele a mu byela swaku a a nga ta fa. Phela leswi Sathana a nga byela Evha a ku li mavunhwa. Kambe Evha a kholwe mavunhwa ya Sathana, a dla handzu naswona a game a nyika Adamu na yena a wu dla. — Genesa 3:1-6.

Mhaka leyi yi yendlekile hikakunene naswona yi kombisa swaku Sathana a djikele Xikwembu funtshi i muhembi. A byele Evha swaku loko a nga xi yingisi Xikwembu a a nga ta fa. Leswo a ku li mavunhwa. Ku vula ntiyiso, Adamu na Evha va file. Sathana a nga fanga ka nkama wolowo kambe a ta fa ka nkama lowu taka hi mhaka ya leswi a nga djoha. Ka nkama wa swoswi Sathana wa ha hanya naswona a tama a kanganyisa vanhu va vanyingi. Sathana a ha li muhembi funtshi a zama ku yendla swaku vanhu va nga yi yingisi minawu ya Xikwembu. — Yohani 8:44.

Tintsumi Tin’wani Ti Djikele Xikwembu

Hi ku famba ka nkama, tintsumi tin’wani ti txintxile ti va tintsumi ta ku biha. Tintsumi leti ti navele vavasati va ku saseka lani misaveni naswona a ti lava ku famba masangu na vona. Ti tile lani misaveni na ti ni muzimbha wa vavanuna, se ti titekela vavasati. Leswo a swi nga fambisani ni ku rhandza ka Xikwembu. — Genesa 6:1, 2; Yuda 6.

Tintsumi leti ti yendle swaku vanhu va vanyingi va hlupheka. Vasati va tona va psale vana, kambe vana lava a va nga fani ni vana lavan’wani. Va kulile, va leha, va va ni matimba naswona a va ni mona. Hi ku famba ka nkama a misava yi tale hi wubihi, se Yehovha a yendla xiboho xa ku helisa vanhu hinkwavu va ku biha hi ku tirhisa ndhambi. Lava nga pona ka ndhambi yoleyo a ku li Nowa wanuna wa ku lulama ni ndjangu wa yena. — Genesa 6:4, 11; 7:23.

Tintsumi ta ku biha a ti fanga, ti tlhelele matilweni. Kambe ti khatisiwile. A ta ha pfumeleliwanga swaku ti tipatsa ni tintsumi tatinene ta Xikwembu. Naswona Yehovha a nga ha ti pfumelelanga swaku ti kota ku txintxa a muzimbha wa tona wu fana ni wa vanhu. Se ka nkama lowu taka ti ta dlayiwa hi nkama wa ku yavanyisa. — 2 Pedru 2:4; Yuda 6.

Sathana A Hlongoliwile Matilweni

Ka malembe lawa ma nga hundza ku ve ni nyimpi matilweni. Buku la Nhlawutelo li tlhamusela leswi nga yendleka. Li li: “Se ku pfuka nyimpi tilweni: Mikayele [ku nga Yesu Kreste loko se a pfuxiwile] ni tintsumi ta yena [tatinene] va lwa ni dragona [ku nga Sathana] leyi na yona a yi ni tintsumi ta yona [ta ku biha], kambe dragona ni tintsumi ta yona va hluliwile naswona a va ha pfumeleliwanga ku tshama tilweni. Se dragona leyi, ku nga nyoka ya khale, leyi vitaniwaka Davulosi na Sathana, leyi kanganyisaka misava hinkwayu, yi txukumeteliwa hansi misaveni yona ni tintsumi ta yona [ta ku biha].”

Kambe ku game ku yendleka yini? Bibele li li: “Tsakani n’wina matilo na n’wina lava tshamaka ka wona!” Tintsumi tatinene a ti fanele ti tsaka hikusa Sathana ni tintsumi ta ku biha, a va hlongoliwile matilweni. Kambe a ku ta yendleka yini hi vanhu lani misaveni? Bibele li li: “Khombo ka misava ni lwandle, hikusa Davulosi a xikele n’wina; na [a] kwatile hintamu hikusa wa swi tiva swaku a ni nkama wa wutsongo.” — Nhlawutelo 12:7-9, 12.

Ina, Sathana ni vanghanu va ku biha va kanganyisa vanhu lani misaveni va tlhela va yendla swaku vanhu va hlupheka hintamu. Tintsumi leti ta ku biha ti vitaniwa swaku i madimoni naswona i valala va Xikwembu. Hinkwatu i tintsumi ta ku biha.