Madimoni Ma Yendla Swaku Vanhu Va Djikela Xikwembu

Kasi hi mhaka muni Sathana ni madimoni ya yena va yendla hinkwaswu leswi va nga swi kotaka swaku va kanganyisa vanhu? Hikusa va lava hi tipatsa na vona hi nga xi yingisi Xikwembu. Va lava swaku hi va gandzela. Funtshi va lava swaku hi kholwa mavunhwa ya vona hi tlhela hi yendla swilo leswi Yehovha a swi nyenyaka. Swin’wani ka swilo swoleswo swi fambisana ni vanhu lava nga fa.

Ku feliwa hi munhu lweyi hi mu rhandzaka swa vava swinene, naswona a swi bihanga ku twa ku vava loko hi feliwile. Hi xikombiso, nkama Yesu a nga feliwa hi munghanu wa yena Lazaru, ‘Yesu a xiririke mihloti.’ — Yohani 11:35.

Ku ni minkhuva ya yinyingi leyi fambisanaka ni lifu, naswona ya hambana hi ku ya hi tindhawu. Ku tala ka yona a yi lwisani ni leswi Bibele li swi vulaka. Kambe swin’wani swi yendliwaka ka minkhuva yoleyo, swi fambisana ni mhaka ya leswaku lava nga fa va ha hanya funtshi va nga swi kota ku pfuna lava hanyaka. Swilahlu, ku rila yi nga chayi ni swilo swin’wani leswi yendliwaka loku munhu a file swi kombisa swaku vanhu va chava ku kwatisa vanhu lava nga fa. Kambe leswi vanhu lava nga fa va kalaka va nga “tivi nchumu” vanhu lava va yendlaka swilo swoleswo va seketela mavunhwa ya Sathana. — Ekleziyaxta 9:5.

Minkhuva yin’wani leyi yendliwaka yi seketela mhaka ya leswaku vafi va lava ku pfuniwa hi lava va hanyaka, ni swaku loko va nga va pfuni va ta va yendlela swilo swa ku biha. Ka matiko man’wani, ku yendliwa mafexta ni magandzelo na se ku hundzile 40 wa masiku kumbe lembe na munhu a file. Ku vuliwa swaku va yendla leswo leswaku va pfuna lava nga fa swaku va ‘nghena’ tilweni. Nchumu wun’wani lowu wu yendliwaka i ku nyika vafi swakudla ni swa ku phuza.

Minchumu leyi yi bihile, funtshi yi hangalasa mavunhwa ya Sathana ya leswaku loko munhu a fa wa ha tama a hanya. Indjhe Yehovha a nga hi yamukela loko hi yendla minchumu leyi seketelaka tidjondzo ta madimoni? Ihim! — 2 Vakorinto 6:14-18.

Vanhu lava va tirhelaka Xikwembu a va nge yendli nchumu lexi nga ta seketelaka mavunhwa ya Sathana. Kambe hi lirhandzu va zama ku pfuna lava va hanyaka ni ku va tiyisa. Va swi tiva swaku munhu lweyi a nga fa, a va nge mu pfuni hi nchumu kambe a ngo pfuniwa ntsena hi Yehovha. — Yobo 14:14, 15.

Xikwembu xa li nyenya wuloyi

Vanhu van’wani va titlhanganisa ni madimoni hi ku kongoma kumbe hi ku tirhisa nyanga. Swilo swoleswo swi vitaniwa wuloyi. Ku hlahluva, ku femba, masalamusi, ku vhumba ni ku vutisa hi ta vafi hinkwaswu swi fambisana ni wuloyi.

Bibele la swi nyenya swilo leswo loku li ku: “Xikarhi ka wena ku nga tshuki ku kumiwa munhu lweyi a . . . hlahluvaka, lweyi a yendlaka masalamusi, lweyi a vhumbaka, muloyi, lweyi a loyaka van’wani, lweyi a vutisaka mungoma kumbe lweyi a vhumbaka kumbe lweyi a vutisaka lava va nga fa. Hikusa mun’wani ni mun’wani lweyi a yendlaka swilo leswi wa nyenyentsa ka Yehovha.” — Deteronoma 18:10-12.

Hi mhaka muni Yehovha a hi basopisa ka swilo leswi?

Leswaku swi hi fambela kahle, Yehovha wa hi basopisa ka swilo leswi fambisanaka ni wuloyi. Phela Yehovha wa va rhandza vanhu funtshi a ni mhaka na vona, naswona wa swi tiva swaku loko hi tipeta ka swilo leswi fambisaka ni wudimoni hi ta hlupheka swinene.

Munhu mun’wani lweyi a nga hluphiwa hintamu hi madimoni i Nilda, lweyi a a li nyanga aBrazil. Madimoni ma li hohlotile a wutomi la Nilda. Yena a li: “Madimoni . . . a ma nghena ndzeni ka mina ma tlhela ma ni fuma. Minkama yin’wani a ni nga yetleli, minkama yin’wani a ni titivala. Ni yisiwe ka xibelhela xa vanhu va ku hlanya. Ni sungule ku dzaha masigari ni tlhela ni nwa hintamu byala. Leswo swi teke malembe ya manyingi.”

Hi ku famba ka nkama, hi ku pfuniwa hi Yehovha ni Timboni ta yena, Nilda a chunsekile ka madimoni funtshi a hanya wutomi la ku tsakisa. Yena a li: “Ni byela hinkwavu swaku va nga tshuki ni siku ni lin’we va tipeta ka swa wudimoni.”