Djondzisa Hi Ndlela Ya Ku Twisiseka

I Mpsini Leswi Yesu A Nga Swi Yendla?

VHIDIYO: Yesu A Kombisa Leswi Papayi Wa Hina A Hi Rhandzisaka Xiswona

1. Sixtira VHIDIYO, kumbe u lerha Matewu 6:25-27. U gama u hlamula swivutiso leswi landzelaka:

1. Yesu a swi kombisise ku yini swaku Yehovha wa hi rhandza?

2. Hambileswi Yesu a a tiva minchumu ya yinyingi hi swinyanyani, i mpsini leswi a nga swi vula hi swinyanyani? Hi mhaka muni kuva a yendle leswo a ku li madjondziselo yamanene?

Hi Djondza Yini Ka Leswi Yesu A Nga Swi Yendla?

2. Loko hi djondzisa hi ndlela ya ku twisiseka, vanhu va ta twisisa leswi hi va djondzisaka swona swi tlhela swi va khumba timbilu.

Tekelela Xikombiso Xa Yesu

3. U nga vulavuli ngopfu. Handle ka ku vulavula hintamu hi swilo leswi u swi tivaka hi mhaka leyi mi bulaka hi yona, vulavula hi leswi nga tsaliwa ka buku leli mi djondzaka hi lona. Loko se u mu yendle xivutiso munhu lweyi u bulaka na yena, mu lehiseli mbilu u mu nyimela swaku a hlamula. Loko a nga yi tivi nhlamulu, kumbe a vula swilo swin’wani leswi kalaka swi nga fambisani ni leswi Bibele li swi djondzisaka, mu yendli swivutiso swin’wani kuva u mu pfuna ku twisisa leswi mi djondzaka hi swona. Loko se a yi twisisile pontu ya lisima yanani ka pontu yin’wani.

4. Tirhisa leswi xidjondzo xa wena xi swi tivaka swaku u xi pfuna ku twisisa swilo swin’wani. Hi xikombiso, na mi nga se sungula ku djondza hi ta ku pfuxiwa ka vafi, mu vutisi swaku i mpsini leswi a swi tivaka hi xiyimu xa lava nga fa.

5. Swi tirhisi kahle swikombiso. Na u nga se yendla swikombiso tivutisi leswi:

1. ‘Xikombiso lexi xa vevuka ku xi twisisa?’

2. ‘Lweyi ni djondzaka na yena xi ta mu vevukela ku xi twisisa?’

3. ‘Indjhe swi ta mu vevukela ku khumbuka pontu ya lisima ya leswi hi swi djondzaka kumbe a to khumbuka xikombiso ntsena?’