A Va ‘Holovisanile Ni Ku Phikizana’

1-3. a) I yini leswi nga yendla swaku vanhu va holovisana va tlhela va nga twanani ka bandla la Wukreste? b) Hi nga pfunekisa ku yini hi ku kambisisa mhaka leyi yi nga ka buku la Mintirho?

NA VA tsake hintamu, Pawulo na Barnaba va nghena aAntiyokiya wa Siriya na va vuya hi ka liyendzo la vona la ku sungula la wumisiyonariyu. Va tsake hintamu hikusa Yehovha a “pfulele vamatiko ndlela ya leswaku va va vapfumeli.” (Min. 14:26, 27) Phela aAntiyokiya a vanhu a va nga ha vulavuli hi nchumu wun’wani loko ku nga li mahungu ya ku tsakisa naswona “vanhu va ku tala” lava a va li Vamatiko a va ya va nghena ka nhlengeletanu ya Yehovha ka doropa lolelo. — Min. 11:20-26.

² A mahungu ya ku tsakisa ya ku txintxa ka vamatiko va va Vakreste ma fike aYudiya hi ku hantlisa. Kambe handle ka ku vanhu hinkwavu va tsaka, mhaka leyi yi yendle swaku va nga twanani hi mhaka ya ku tsema nsuvu. Lava a va li Vayuda ni lava a va nga li Vayuda a va fanele va hanyisanisa ku yini, naswona lava a va ha ku txintxa a va fanele va wu vonisa ku yini Nawu wa Moxe? Mhaka leyi a yi ta yendla leswaku va nga twanani yi tlhela yi yava bandla la Wukreste. Se a yi ta lulamisisiwa ku yini mhaka leyi?

³ Nkama lowu hi kambisisaka leswi nga tsaliwa ka buku la Mintirho, hi ta djondza swilo swa lisima hintamu. Leswo swi ta hi pfuna swaku hi yendla swilo hi wutlharhi loko ku tshuka ku humelela timhaka leti nga yendlaka swaku ku va ni ku yavana abandleni.

 4. I yini leswi vavanuna van’wani a va swi vula naswona hi xini xivutiso lexi lavaka ku hlamuliwa?

⁴ Mudjondzisiwa Luka a tsale leswi: “Ku te vavanuna hi Yudiya va fika va djondzisa vamakwavu abandleni va ku: ‘Loko mi nga landzi Nawu wa Moxe wa ku tsema nsuvu, a mi nge ponisiwi.’” (Min. 15:1) A swi tiviwi swaku “vavanuna” lava va ve Vafarisi na va nge se txintxa va va Vakreste kambe leswi hi swi tivaka hi leswaku swi nga yendleka va djondzisiwe leswo ka wukhongeli la vona la Xiyuda. Handle ka leswo, swi nga yendleka a va vula swaku mhaka leyi a yi ta hi ka vapostolo ni madoda ya Yerusalema. (Min. 15:23, 24) Kambe hi mhaka muni Vakreste va Vayuda a va ha vulavula hi ku tsema nsuvu hambileswi se a ku hundze 13 wa malembe na Xikwembu xi tirhise mupostolo Pedru nkama a nga yamukela Vamatiko lava a va nga tsemanga nsuvu ka bandla la Wukreste?a — Min. 10:24-29, 44-48.

5, 6. a) I mpsini swi nga yendla swaku Vakreste van’wani va Vayuda va lava ku tama va tirhisa nawu wa ku tsema nsuvu? b) Indjhe ntwananu wa ku tsema nsuvu a wu lumba ntwananu lowu Xikwembu xi nga wu yendla na Abrahamu? Tlhamusela. (Vona ntlhamuselo wa le hansi.)

⁵ Ku ni swilo swa swinyingi leswi nga ha vaka swi yendle Vayuda swaku va sindzisa ka mhaka ya ku tsema nsuvu. Xa ku sungula, a mhaka ya ku tsemiwa ka nsuvu yi sunguliwe hi Yehovha naswona a yi kombisa swaku munhu lweyi a nga tsemiwa nsuvu a ni wuxaka la ku hlawuleka na Yehovha. Funtshi mhaka leyi yi sungule na Yehovha a nga se hamba ntwananu wa Nawu na Abrahamu ni ndjangu wa yena kambe yi game yi petiwa ka Nawu.b (Lev. 12:2, 3) Ka Nawu wa Moxe, hambi vanhu lava a va ta hi ka matiko man’wani a va fanele va tsema nsuvu swaku va nyikiwa mintirho ya ku hlawuleka a xikarhi ka Vayisrayele ya ku fana ni ku ya ka Paxkwa. (Eks. 12:43, 44, 48, 49) Phela ka Vayuda kuva wanuna a nga tsemi nsuvu a swi kombisa swaku a nga basanga naswona a a nga faneleki ku tirhela Xikwembu. — Esa. 52:1.

⁶ Hi mhaka leyo, Vakreste va Vayuda a swi lava va va ni lipfumelo ni ku tiveka hansi swaku va titwananisa ni ntiyiso lowu nga yampsisiwa. A ntwananu wa Nawu a wu txintxiwile hi ntwananu wa nyuwani, hi mhaka leyo ku va munhu a va n’wana wa Muyuda a swi nga mu yendli a va mun’we wa vanhu va Xikwembu. Naswona Vakreste va Vayuda lava a va tshama kolomuyani kusuhi va ku fana ni Vakreste va le Yudiya, a swi va karhatela ku vula swaku vona i Vakreste ni ku vona Vamatiko na va li vamakwavu va vona. — Yer. 31:31-33; Luk. 22:20.

 7. I mpsini leswi “vavanuna van’wani” va le Yudiya a va nga se swi twisisa?

⁷ I ntiyiso swaku leswi Xikwembu xi lavaka swaku vanhu va xona va hanyisa xiswona a swi txintxanga. Xikombiso xa leswo, hi leswaku ka ntwananu wa nyuwani a ku ni swin’wani leswi a swi fambisana ni Nawu wa Moxe. (Mat. 22:36-40) Hi xikombiso, ka mhaka ya ku tsema nsuvu Pawulo a game a tsala leswi: “Kambe Muyuda wa ntiyiso hi leswi munhu a nga swona hi le ndzeni, naswona i Muyuda hi le mbilwini, ku nga li hi ku landza Nawu lowu nga tsaliwa.” (Rom. 2:29; Det. 10:16) “Vavanuna van’wani” va le Yudiya lava a va nga se swi twisisa kahle leswo a va tama va vula leswaku Xikwembu a xi nga wu helisanga Nawu wa Moxe ku patsa ni ku tsema nsuvu. Indjhe vavanuna volavo a va ta pfumela ku txintxa mavonelo ya vona?

 8. Hi mhaka muni mhaka ya ku tsema ka nsuvu yi yisiwe ka ntlawa lowu rhangelaka aYerusalema?

⁸ Luka a tlhele a ku: “Nkama Pawulo na Barnaba va nga gama ku holovisana ni ku phikizana ni vavanuna volavo [lava a va ta hi Yudiya] ku yendliwe xiboho xa leswaku Pawulo, Barnaba ni van’wani va vona va ya Yerusalema ka vapostolo ni madoda swaku va ya lulamisa mhaka leyi.”c (Min. 15:2) “Ku holovisana ni ku phikizana” ka vona a swi kombisa leswi a va titwisa xiswona ni leswi a va kholwa ka swona funtshi a bandla la Antiyokiya a li swi kotanga ku lulamisa xikarhatu lexo. Leswaku va tama va va ni ku rhula va tlhela va twanana, Vakreste va bandla leli va yise mhaka aYerusalema “ka vapostolo ni madoda,” lava a va li ntlawa lowu rhangelaka. Se hi nga djondza yini ka leswi madoda ya Antiyokiya ma nga swi yendla?

9, 10. Hi xini xikombiso xaxinene lexi vamakwerhu va Antiyokiya ku patsa na Pawulo na Barnaba va nga hi vekela xona?

⁹ Nchumu wa lisima lowu hi wu djondzaka i wa leswaku hi fanele hi tshemba nhlengeletanu ya Xikwembu. Pimisa hi leswi: Vamakwerhu aAntiyokiya a va swi tiva swaku ntlawa lowu rhangelaka a wu vumbiwa hi Vakreste va Vayuda. Hambileswo, vona a va tshemba swaku vamakwerhu lavayani a va ta lulamisa mhaka ya ku tsemiwa ka nsuvu hi ku ya hi Matsalwa. Hi mhaka muni? Abandla a li tshemba swaku Yehovha a a ta lulamisa swilo hi ku tirhisa moya wa yena wa ku kwetsima ni Nhloko ya bandla ku nga Yesu Kreste. (Mat. 28:18, 20; Efe. 1:22, 23) Namuntlha loko hi tshuka hi kumana ni swikarhatu leswi fanaka, a hi tekeleleni xikombiso xaxinene xa Vakreste va Antiyokiya hi ku tshemba nhlengeletanu ya Xikwembu ni Ntlawa Lowu Rhangelaka wa vatotiwa.

¹⁰ Naswona hi khumbukisiwa hi lisima la ku tiveka hansi hi tlhela hi lehisa mbilu. Pawulo na Barnaba a va rhumiwe hi moya wa ku kwetsima swaku va ya ka vanhu va matiko kambe a va zanga va tivona na va ni mfanelo ya ku lulamisa mhaka leyi ya ku tsema nsuvu aAntiyokiya. (Min. 13:2, 3) Naswona Pawulo a game a tsala leswi: “Ni yile [aYerusalema] hikusa ni kombiwe swaku ni fanele ni ya.” Marito lawa ma kombisa swaku Pawulo a a rhumiwile hi Xikwembu swaku a ya lulamisa mhaka leyi. (Gal. 2:2) Madoda na wona ma zama ku tekelela xikombiso lexi xa ku tiveka hansi ni ku lehisa mbilu loko ku humelela timhaka leti ti nga yendlaka swaku bandla li yavana. Madoda a ma sindzisi mavonelo ya wona kambe ma zama ku tiva leswi Yehovha a swi lavaka hi ku kambela ka Matsalwa ni ka nkongomiso lowu ma wu kumaka ka mutirhi wa ku tshembeka. — Filp. 2:2, 3.

11, 12. Hi mhaka muni swi li swa lisima ku nyimela Yehovha?

¹¹ Minkama yin’wani swi lava hi nyimela Yehovha anze a lulamisa mhaka. Khumbuka swaku vamakwerhu ankameni wa Pawulo swi lave va nyima anze ku fika lembe la 49 E.C., na se ku hundze 13 wa malembe ku sukela nkama Korneliyo a nga yamukela moya wa ku kwetsima hi lembe la 36 E.C., leswaku Yehovha a lulamisa mhaka leyi ya ku tsema nsuvu. Hi mhaka muni swi lave va nyimela nkama lowu hinkwawu? Swi nga yendleka Xikwembu a xi lava ku nyika Vayuda va ku tshembeka nkama wa ku yenela swaku va titwananisa ni ku txintxa loku kakukulu. Phela a ntwananu wa ku tsema nsuvu lowu Xikwembu xi nga wu yendla ni vhovho wa vona lweyi a va mu rhandza ku nga Abrahamu wu hete 1.900 wa malembe. Se swa tikomba swaku ku helisiwa ka ntwananu lowu a ku nga li nchumu wawutsongo! — Yoh. 16:12.

¹² Swa tsakisa ku djondzisiwa hi Papayi wa hina wa lirhandzu lweyi a nga matilweni, lweyi a lehisaka mbilu naswona loko a hi djondzisa minkama hinkwayu swi pfuna hina! (Esa. 48:17, 18; 64:8) Hi mhaka leyo, hi nga sindziseni mavonelo ya hina naswona hi nga yaleni loko ku va ni ku txintxa ndzeni ka nhlengeletanu kumbe loko ku txintxiwa leswi tindzimana ta Bibele hi ti twisisaka xiswona. (Ekl. 7:8) Loko ku li swaku minkama yin’wani wa sola kumbe a wu yamukeli ku txintxa loku vaka kona, tinyiki nkama wa ku khongela u tlhela u pimisa hi leswi nga tsaliwa ka buku la Mintirho ndzima 15?d

13. Hi nga ku tekelelisa ku yini ku lehisa ka mbilu ka Yehovha ka ntirho wa hina wa ku chumayela?

¹³ Minkama yin’wani swi nga ha lava hi lehisa mbilu nkama hi djondzaka ni munhu a Bibele lweyi swi mu karhatelaka ku tshika tidjondzo ta mavunhwa kumbe swilo leswi kalaka swi nga fambisani ni Bibele. Ka timhaka leti, swi nga ha lava hi nyimela kuva moya wa Xikwembu wu tirha ka mbilu ya munhu lweyi hi djondzaka na yena. (1 Ko. 3:6, 7) Naswona swi nga va swinene ku khongela hi mhaka leyi. Hambi swo yini, Xikwembu xi ta hi pfuna ku tiva leswi hi faneleke hi swi yendla. — 1 Yo. 5:14.

14, 15. Bandla la Antiyokiya li swi kombisise ku yini leswaku a li mu hlonipha Pawulo na Barnaba ni vamakwerhu lava a va li na vona, naswona vamakwerhu lava va li pfunise ku yini bandla?

¹⁴ Luka a tlhele a ku: “Nkama va nga heleketiwa hi bandla, vavanuna lava va hundze hi le Fenisiya ni le Samariya, na va byela vadjondzisiwa hi ta leswi vamatiko va nga tisolisa xiswona; kutani vadjondzisiwa va tsaka nkama va nga twa leswo.” (Min. 15:3) Kuva vamakwerhu lava va helekete Pawulo, Barnaba ni van’wani swi kombisa swaku a va va rhandza hintamu naswona a va va hlonipha swi tlhela swi kombisa swaku a va va navelela minkateko ya Xikwembu. Lexi i xikombiso xin’wani xaxinene lexi vamakwerhu va Antiyokiya va nga hi siyela xona! Wena ke? Wa va nyika lisima vamakwerhu, ngopfungopfu “[madoda] lawa ma tirhaka hi matimba ku vulavuleni ni ku ni le djondziseni”? — 1 Tm. 5:17.

¹⁵ Na va ha li ndleleni, vamakwerhu lava va va pfune swinene vamakwerhu va le Fenisiya ni va Samariya hi ku va byela “swilo swa swinyingi” leswi a swi yendleka ka ntirho wa ku chumayela vanhu Vamatiko. Ka lava a va yingisela, swi nga yendleka a ku ni Vayuda lava va nga baleka va ya ka tindhawu toleto nkama ku nga dlayiwa Stefano. Hi ku fanana, ninamuntlha loko hi tiva leswi Yehovha a wu katekisisaka xiswona ntirho wa ku chumayela swa hi tiyisa, ngopfungopfu loko hi kumana ni swikarhatu. Wena ke? Wa pfuniwa hi ku tiva leswi Yehovha a va pfunisaka xiswona vamakwerhu ka ntirho wa ku chumayela, loko u li mintlhanganwini, masembleya, makongresu kumbe loko u lerha leswi swi nga va yendlekela ka wutomi la vona ka mabuku ya hina kumbe ka site la hina la jw.org?

16. Hi mhaka muni hi nga vulaka swaku mhaka ya ku tsema nsuvu a ku li mhaka yayikulu leyi a yi lava ku lulamisiwa?

¹⁶ Ntlawa lowu a wu suka Antiyokiya, loko se wu fambe mpfhuka wa kolomuyani ka 550 wa makilometru na wu ya sul, wu game wu fika lomu a wu ya kona. Luka a tsale leswi: “Nkama va nga fika aYerusalema, bandla, vapostolo ni madoda va va yamukele hi mandla mambirhi, kutani va va byela swilo swa swinyingi leswi Xikwembu xi nga swi yendla hi ku tirhisa vona.” (Min. 15:4) “Kambe van’wani va ntlawa wa Vafarisi lava nga tisola va va vapfumeli va suka va nyima va ku: ‘Swo boha swaku va tsema nsuvu va tlhela va landzela Nawu wa Moxe.’” (Min. 15:5) Se hi nga vula swaku mhaka ya ku tsema ka nsuvu ka Vakreste lava a va nga li Vayuda a ku li mhaka leyi a yi lava ku lulamisiwa.

17. I vamani lava a va lumba ntlawa lowu rhangelaka aYerusalema, naswona hi mhaka muni ku patsiwe ni “madoda”?

¹⁷ Buku la Swivuriso 13:10 li li: “Wutlharhi i la lava lavaka xitsundzuxu.” Hi ku tirhisa marito lawa ya wutlharhi ‘vapostolo ni madoda va tlhanganile swaku va vulavulisana hi mhaka leyi [ya ku tsema nsuvu].’ (Min. 15:6) “Vapostolo ni madoda” a va nyimela bandla hinkwalu la Wukreste ku fana ni leswi Ntlawa Lowu Rhangelaka wu swi yendlaka ka masiku ya hina. Se hi mhaka muni “madoda” a ma tirhisana xikan’we ni vapostolo? Khumbuka swaku mupostolo Yakobe a a dlayiwile naswona ku ve ni nkama lowu mupostolo Pedru a nga pfaleliwa djele. Se a ku ta yendleka yini loko swilo swoleswo a swo yendlekela vapostolo lava van’wani? Leswi a ku ni vavanuna van’wani lava nga totiwa lava va fanelekaka a swi ta yendla swaku a bandla li tama li voneleliwa hi ndlela yayinene.

18, 19. I yini leswi Pedru a nga swi vula naswona lava va nga mu yingisela va twisise yini?

¹⁸ Luka a tlhele a ku: “Na se va hete nkama wa wunyingi na va banana hi mavonelo, Pedru a sekeleka a ku: ‘Vavanuna, vamakwerhu, mi swi tiva kahle swaku Xikwembu xi ni lange khale xikarhi ka n’wina, swaku hi nomo wa mina vanhu vamatiko va twa mahungu ya ku tsakisa kutani va va vapfumeli; Xikwembu lexi tivaka mbilu, xi va kombe swaku xa va yamukela hi ku va nyika moya wa ku kwetsima, ku fana ni leswi xi nga swi yendlisa xiswona ni le ka hina. Xi swi kombisile swaku a ku na ku hambana xikarhi ka hina na vona, kambe xi basise timbilu ta vona hi mhaka ya ku pfumela ka vona.’” (Min. 15:7-9) Buku lin’wani li kombisa swaku rito la Xigriki leli nga ka ndzimana 7 leli nge “va banana hi mavonelo” li vula ku “lavetela kumbe ku kambisisa.” Swa tikomba swaku vamakwerhu lava a va vula leswi a va titwisa xiswona, va hlaya mavonelo ya vona na va nga chavi nchumu hambileswi a ma hambanile.

¹⁹ Marito ya matimba ya Pedru ma khumbukise hinkwavu swaku hambi hi yena a ve kona nkama Vamatiko va ku sungula lava a va nga tsemanga nsuvu ku nga Korneliyo ni ndjangu wa yena, va nga totiwa hi moya wa ku kwetsima hi lembe la 36 E.C. Hi mhaka leyo, loko Yehovha a nga ha hambanisi Muyuda ni lweyi a a nga li Muyuda, hi mhaka muni vanhu a va fanele va va hambanisa? Handle ka leswo, a ku li lipfumelo ka Kreste leli a li ta basisa timbilu ta vanhu ku nga li ku yingisa Nawu wa Moxe. — Gal. 2:16.

20. Hi mhaka muni lava a va sindzisa van’wani swaku va tsema nsuvu a va “ringa Xikwembu”?

²⁰ Leswi a nga kombisa wumboni hi rito la Xikwembu ni hi moya wa ku kwetsima, Pedru a te: “Se hi mhaka muni mi ringa Xikwembu hi ku rhwexa vadjondzisiwa ndzhwalu lowu hambi vavhovho va hina kumbe hina hi nga tsandzeka ku wu rhwala? Kambe hi ni lipfumelo la leswaku hi ponisiwa hi mhaka ya timpsalu tatikulu ta Hosi Yesu ku fana na vona.” (Min. 15:10, 11) Vakreste lava a va sindzisa van’wani swaku va tsema nsuvu a va “ringa Xikwembu” kumbe va ‘ringa ku lehisa mbilu ka Xikwembu’ hi lani Mabibele man’wani ma vulaka hi kona. Phela a va zama ku sindzisa Vakreste lava a va li Vamatiko swaku va yingisa nawu lowu hambi hi vona Vayuda a va nga swi koti ku wu yingisa hi ku helela naswona nawu wolowo a wu yendla swaku va faneliwa hi ku fa. (Gal. 3:10) Handle ka ku sindzisa van’wani swaku va tsemiwa nsuvu, Vayuda lava a va yingisela Pedru a va fanele va khensa Xikwembu hi timpsalu tatikulu leti xi nga va komba tona hi ku tirhisa Yesu Kreste.

21. I mpsini leswi Barnaba na Pawulo va nga swi vula ka ntlhanganu?

²¹ Phela swa tikomba swaku marito ya Pedru ma va khumbile hintamu vanhu lava a va li kona hikusa hinkwavu va game “va miyela.” Se Barnaba na Pawulo va “va byela hi ta masingita ni minchumu ya yinyingi ya ku hlamalisa, leyi Xikwembu xi nga yi yendla hi ku tirhisa vona xikarhi ka vamatiko.” (Min. 15:12) Se vapostolo ni madoda a va ni hinkwaswu leswi a swi laveka swaku va kota ku kambisisa ni ku yendla xiboho lexi a xi ta kombisa leswi Xikwembu a xi swi lava ka mhaka ya ku tsema nsuvu.

22-24. a) Ntlawa Lowu Rhangelaka namuntlha wu xi tekelelisa ku yini xikombiso xa ntlawa lowu rhangelaka wa minkameni ya vapostolo? b) Madoda hinkwawu ma nga yendla yini leswaku ma kombisa swaku ma hlonipha lava va rhangelaka ndzeni ka nhlengeletanu?

²² Ninamuntlha loko Ntlawa Lowu Rhangelaka wu tlhangana wu lava ku kongomisiwa hi Rito la Xikwembu naswona wu khongela hi mbilu hinkwayu wu kombela ku pfuniwa hi moya wa ku kwetsima. (Ps. 119:105; Mat. 7:7-11) Swaku leswo swi yendleka, vamakwerhu hinkwavu lava va lumbaka Ntlawa Lowu Rhangelaka va yamukela swilo leswi ku nga ta buliwa hi swona ka ntlhanganu na ka ha li nkama swaku va pimisa hi swona va tlhela va khongela. (Swiv. 15:28) Ka mintlhanganu yoleyo, vamakwerhu lava nga totiwa va vula mavonelo ya vona na va chunsekile kambe na va hlonipha van’wani naswona ka mintlhanganu yoleyo ku tirhisiwa ngopfu Bibele.

²³ Madoda ya bandla ma fanele ma landzela xikombiso lexi. Loko ku li swaku ka ntlhanganu wa wona ku ni mhaka yayikulu leyi ma kalaka ma nga swi kotanga ku yi lulamisa ma fanele ma vutisa Betele kumbe vamakwerhu lava va nga vekiwa va ku fana ni vadjikelezi. Betele na lona li nga ha tsala mhaka leyi li yi yisa ka Ntlawa Lowu Rhangelaka loko swi laveka.

²⁴ Impela Yehovha wa va katekisa lava va hloniphaka leswi nhlengeletanu ya yena yi tirhisaka xiswona va tlhela va tiveka hansi, va tshembeka ni ku lehisa mbilu. Hi lani hi nga ta swi vona hi kona ka ndzima leyi landzelaka, yin’wani ya minkateko leyi Yehovha a hi nyikaka yona loko hi yendla leswo i ku yendla swaku hi va ni ku rhula ka ntiyiso, swilo swi hi fambela kahle mabandleni hi tlhela hi twanana.