Hi Mhaka Muni Kuhluphekiwa Swinene?

1, 2. Vanhu votala va tivutisa yini?

NAMUNTLHA, swi tolovelekile kutwa mahungu yofana ni lawa: tsunami yi wonhe xidoropana xokarhi. Wanuna lweyi anga ni xibamu a nghene ka kereke, a duvulela vanhu ava vavisa a tlhela a dlaya van’wana va vona. Mavabyi ya kankru ma dlaye mamana wokarhi kutani a siya 5 wa vana.

² Loko tinghozi ni swiyendlakalo swa muxaka lowu swi humelela, vanhu votala va tivutisa leswi: “Hi mhaka muni?” Va lava kutiva leswaku hi mhaka muni misava yi tale hi kunyenyana ni kuhlupheka. Wena u tshama u tivutisa hi mhaka leyi?

3, 4. a) Hi swihi swivutiso leswinga yendliwa hi Habakuku? b) Se Yehovha amu hlamulese kuyini?

³ Ka Bibele, hi djondza leswaku vavanuna lava ava ni lipfumelo lelikulu ka Xikwembu na vona va vutise swivutiso swofana ni leswo. Hi xikombiso, muprofeta Habakuku a vutise Yehovha a ku: “Hayini uni yendla nivona leswobiha? Naswona hayini u pfumelela kutshikeleliwa? Hayini mahlweni ka mina kutale ndzoviso ni madzolonga? Naswona hayini kutala kuholova ni kulwa?” — Habakuku 1:3.

⁴ Ka buku la Habakuku 2:2, 3, hi lerha nhlamulu ya Xikwembu ka swivutiso leswinga yendliwa hi Habakuku ni xitshembiso xa xona xolulamisa xiyimu. Yehovha a ni lirhandzu lelikulu hi vanhu. Bibele li vula leswi: “Xitikarhatela n’wina.” (1 Petro 5:7) Antiyisweni, Xikwembu xaku nyenya swinene kuhlupheka kutlula hina. (Esaya 55:8, 9) Kutani ahi buli hi xivutiso lexi: Hi mhaka muni kuhlupekiwa swinene?

 5. I yini leswi vafundhisi votala va wukhongeli vaswi vulaka hi kuhlupheka? Se Bibele li djondzisa yini?

⁵ Vaprista ni vafundhisi va wukhongeli minkama yotala va vula leswaku i kurhandza ka Xikwembu kuva vanhu va hlupheka. Van’wanyana va vula leswaku hinkwaswu leswi humelelaka munhu, kukatsa ni tinghozi, Xikwembu se axiswi tiva naswona ahingexi twisisi xivangelo xa kona. Kasi van’wana va vula leswaku vanhu, kukatsa ni swivavana swi fa leswaku swi ya tshama ni Xikwembu atilweni. Kambe leswo ahi ntiyiso. Yehovha angese tshama a vanga wubihi. Bibele li vula leswi: “Swi kule swinene ni Xikwembu xa ntiyiso kuyendla hi ndlela leyi biheke, ni lweyi wa Matimba Hinkwawu kuyendla swobiha!” — Yobo 34:10.

 6. Hi mhaka muni vanhu votala va sola Xikwembu hi kuhlupheka hinkwaku lokunga kona laha misaveni?

⁶ Vanhu votala va sola Xikwembu hi mhaka ya kuhlupheka hinkwaku loku kunga kona laha misaveni. Va pimisa leswaku hi xona xi fumaka misava. Kambe hilaha hinga djondza hi kona ka Ndzima 3, misava leyi yi fumiwa hi Sathana Diyavulosi.

7, 8. Hi mhaka muni kutale kuhlupheka amisaveni?

⁷ Bibele lihi byela leswaku “misava hinkwayu yi le ka lweyi wobiha.” (1 Yohane 5:19) Mufumi wa misava leyi i Sathana. A ni mbilu yobiha a tlhela a ni lunya naswona i “mukanganyisi wa misava hinkwayu”. (Nhlavutelo 12:9) Vanhu votala vamu tekelela. Naswona lexi i xin’wana xa swivangelo leswi yendlaka leswaku misava yi tala hi kunyenyana, kuhemba ni tihanyi.

⁸ Ku ni swivangelo swin’wana leswi yendlaka leswaku misava yi tala hi kuhlupheka. Ndzhaku ka loko Adamu na Evha va xandzukile, va tlulete xidjoho ka vana va vona. Naswona vanhu va hluphana tani hi leswi vanga ni xidjoho. Minkama hinkwayu va lava kuva va lisima kutlula van’wana. Va holovisana, va lwa tinyimpi va tlhela va xolola van’wana. (Eklesiasta 4:1; 8:9) Kambe minkama yin’wana vanhu va hlupheka hi mhaka ya “nkama ni swiyendlakalo leswi kalaka swinga nyimeliwanga”. (Eklesiasta 9:11) Loko va li ka ndhawu leyi hoxeke hi nkama lowu hoxeke, tinghozi kumbe swiyendlakalo swin’wana leswobiha swinga va humelela.

 9. Hi mhaka muni hi tiyiseka leswaku Yehovha a ni xivangelo lexi twalaka xa kupfumelela kuhlupheka?

⁹ Yehovha ange tshuki avanga kuhlupheka. Anga na nandzu hi mhaka ya tinyimpi, wugevenga ni kukhomiwa hi ndlela yobiha lokunga kona. Xikwembu ahi xona xi vangaka tinghozi tofana ni kutsekatseka ka misava, swidzedze kumbe tindhambi. Kambe ungaha pimisa leswi: ‘Leswi Yehovha anga ni matimba lamakulu kutlula vanhu hinkwavu, hi mhaka muni angaswi siveli swilo swobiha leswi yendlekaka?’ Haswi tiva leswaku Xikwembu xi ni mhaka na hina swinene, kutani xi ni xivangelo lexi twalaka xa kuva xi pfumelela leswaku kuhlupheka kutama kuva kona. — 1 Yohane 4:8.

10. Sathana amu tlhontlhise kuyini Yehovha?

¹⁰ Timhaka ti sungule le Jaradi la Edeni loko Diyavulosi a kanganyise Adamu na Evha. Sathana a lumbete Xikwembu leswaku i Mufumi wobiha. A vule leswaku Xikwembu axi yalela Adamu na Evha swilo leswinene. Sathana a alava kuva yendla va pimisa leswaku yena i mufumi wa kahle kutlula Yehovha naswona aswinga sindzisi leswaku va yingisa Xikwembu. — Genesa 3:2-5; vona Nhlamuselo 27.

11. Hi xihi xivutiso lexi hi faneleke hixi hlamula?

¹¹ Adamu na Evha va xandzukele Yehovha hi kukala vangamu yingisi. Ava pimisa leswaku va ni mfanelo ya kutiyendlela xiboho xa leswinga swinene ni leswobiha. Yehovha aataswi kombisisa kuyini leswaku vaxandzuki ava hoxile ni leswaku hi yena a tivaka leswinga swinene ka hina?

12, 13. a) Hi mhaka muni Yehovha anga tekelanga kulovisa vaxandzuki? b) Naswona hi mhaka muni Yehovha a pfumelele Sathana ni vanhu leswaku va tifuma?

¹² Yehovha anga tekelanga kuva lovisa Adamu na Evha. Kambe a pfumelele leswaku va va ni vana. Ndzhaku ka leswo, Yehovha a yendle leswaku swi koteka kuva vana va Adamu na Evha va langa lweyi va lavaka leswaku a va mufumi wa vona. Makungu ya Yehovha aku li leswaku misava yi tala hi vanhu lava hetisekeke. Hambileswi Sathana anga zama kukavanyeta, kambe makungu ya Xikwembu amata hetiseka. — Genesa 1:28; Esaya 55:10, 11.

¹³ Sathana a tlhontlhe Yehovha phambeni ka tintsumi totala swinene. (Yobo 38:7; Daniyele 7:10) Kutani Yehovha a nyike nkama Sathana kuva a kombisa leswaku leswi angaswi vula aku li ntiyiso kumbe mavunwha. Nakambe a nyike vanhu nkama wa kutivekela mimfumu hansi ka nkongomiso wa Sathana leswaku ava pfuna kuvona leswaku Sathana i muhembi.

14. I yini leswinga tsumbuleka hi kufamba ka nkama?

¹⁴ Vanhu va zame kutifuma kuringana malembe yotala swinene, kambe va be hansi. Sathana a kombisiwile leswaku i muhembi. Vanhu va lava kupfuniwa hi Xikwembu. Muprofeta Yeremiya a tiyisile loko a te: “Oho Yehovha, niswi tiva kahle leswaku ndlela ya munhu ayimu lumbi. Aswimu lumbi munhu lweyi a fambaka kukongomisa nkondzo wakwe.” — Yeremiya 10:23.

15, 16. a) Hi mhaka muni Yehovha a pfumelela leswaku kuhluphekiwa nkama woleha? b) Hi mhaka muni Yehovha anga lulamisanga swikarhato leswi vangiweke hi Sathana?

¹⁵ Hi mhaka muni Yehovha a pfumelela leswaku kuhluphekiwa nkama woleha swinene? Kasi hi mhaka muni anga helisi swilo swobiha? Swi teke nkama woleha kuva swi tikomba leswaku Sathana a tsandzekile kufuma vanhu. Vanhu va zame kufuma hi tindlela to hambanahambana, kambe va txope nchila. Hambileswi vanga hluvuka ka siyensiya ni tekinolojiya, ku ni kupfumaleka ka wululami, wusiwana naswona tinyimpi tiya ti kula swinene kutlula khale. Swa tikomba leswaku vanhu va fanele va fumiwa hi Xikwembu.

¹⁶ Yehovha anga lulamisanga swikarhato leswi vangiweke hi Sathana, hikuva loko aayo yendla leswo, aswita vula leswaku a seketela mfumu wa Sathana. Nakambe vanhu avata pimisa leswaku vangaswi kota kutifuma. Swoleswo akuta va mavunhwa. Naswona angema seketeli. Ange tshuki a hemba. — Vaheveru 6:18.

17, 18. I yini leswi Yehovha angataswi yendla hi swilo hinkwaswu swobiha leswi vangiweke hi Sathana?

¹⁷ Ina ka, se Yehovha angaswi kota kululamisa swilo hinkwaswu swobiha leswi vangiweke hi kuxandzuka ka Sathana ni vanhu? Ina. Ka Xikwembu hinkwaswu swa koteka. Yehovha wawu tiva nkama lowu angata kombisa ha wona leswaku Sathana i muhembi hi kuhelela. Hi wugamu, ata hundzula misava hinkwayu yi va paradeyisi hilaha a alava hi kona. Hinkwavu lavanga “masirheni” vata pfuxiwa. (Yohane 5:28, 29) Vanhu avangehe vabyi kumbe kufa. Yesu ata lulamisa swilo hinkwaswu swobiha leswi vangiweke hi Sathana. Yehovha ata tirhisa Yesu leswaku a ‘helisa mintirho ya Diyavulosi’. (1 Yohane 3:8) Ha tsaka swinene leswi Yehovha angahi lehisela mbilu leswaku himu tiva ni kutlhela himu langa leswaku a va Mufumi wa hina. (Lerha 2 Petro 3:9, 10.) Hambi hi hlupheka, wahi pfuna leswaku hi tiyisela. — Yohane 4:23; lerha 1 Vakorinto 10:13.

¹⁸ Yehovha angahi sindzisi leswaku himu langa kuva Mufumi wa hina, hikuva ahi nyike vanhu tshunxeko wotilangela. Se ahi kambisiseni leswi xihiwa lexi xohlawuleka xi vulaka swona.

19. Hi xihi xihiwa lexi Yehovha angahi nyika xona? Hi mhaka muni hi fanele hi tsaka hi xihiwa lexi?

¹⁹ A tshunxeko wa kutilangela wuhi yendla hi hambana swinene ni swihari. Hinga tilangela ndlela leyi hi lavaka kuhanya hi yona ni kutiyendlela swiboho swa kutsakisa Yehovha, kambe swihari swi yendla swilo hi kukongomisiwa hi ntumbuluku. (Swivuriso 30:24) Nakambe ahi fani ni muchini lowu yendlaka leswi wunga yendleliwa kuyendla swona ntsena. Hi ni tshunxeko wolanga wumunhu leli hi li lavaka, vanghanu ni leswi hi lavaka kuswi yendla hi wutomi la hina. Phela Yehovha a lava leswaku hi tikhorisa hi wutomi.

20, 21. Hi xihi xiboho xa lisima lexi ungaxi yendlaka swoswi?

²⁰ Yehovha a lava leswaku himu rhandza. (Matewu 22:37, 38) A fana ni papayi lweyi a tsakaka loko a twa n’wana wa yena amu byela leswaku wamu rhandza, kambe aswi vula naswi huma mbilwini. Yehovha ahi nyike tshunxeko wa kuva hi langa kumu tirhela kumbe kungamu tirheli. Lexi hlomulaka mbilu, hi leswaku Sathana, Adamu na Evha va lange kungamu yingisi Yehovha. Se wena ke? Utawu tirhisisa kuyini tshunxeko wa wena wotilangela?

²¹ Langa kutirhela Yehovha. Ku ni vanhu votala swinene lavanga langa kutsakisa Yehovha kambe va fularhela Sathana. (Swivuriso 27:11) Se u fanele u yendla yini leswaku uta nghena misaveni leyimpsha laha Yehovha angata helisa kuhlupheka hinkwaku? Ndzima leyi landzelaka yita hlamula xivutiso lexo.