Yehovha Wa Hi Tiyisekisa Swaku Misava Yi Ta Va Paradesi

 1. I yini leswi muprofeta Esaya a nga swi byela Vayisrayele?

MUPROFETA Esaya a vule leswaku Yehovha i “Xikwembu xa ntiyiso.” A rito leli nge “ntiyiso” hi Xiheberu li vula swaku “amen.” (Esa. 65:16, ntlhamuselo.) Funtshi rito leli nge “amen” li vula swaku “a swi yendlekise xiswoleswo.” Rito leli nge “amen” loko li tirhisiwa ka Bibele na ku vulavuliwa hi Yehovha na Yesu, swi hi tiyisekisa swaku a nchumu xolexo lexi ku vulavuliwaka hi xona i ntiyiso. Se, hi nga vula swaku a leswi muprofeta Esaya a nga swi byela Vayisrayele a swi twisiseka hikusa hinkwaswu leswi Yehovha a swi tshembisaka hi nga tiyiseka swaku a ta swi yendla. Phela Yehovha a swi kombisile swaku i Xikwembu lexi tshembekaka hikusa a swi kotile ku hetisisa switshembiso leswi a nga swi yendla ka nkama lowu nga hundza.

 2. a) Hi mhaka muni hi nga tshembaka swaku leswi Yehovha a hi tshembisaka swona swi ta yendleka hikakunene? b) Hi ta hlamula swivutiso swini ka nhlokomhaka leyi?

² Indjhe na hina hi nga kholwa swaku leswi Yehovha a nga vula swaku swi ta yendleka ka nkama lowu taka i ntiyiso? Loko se ku hundze kolomuyani ka 800 wa malembe na Esaya a file, mupostolo Pawulo a vulile swaku hi mhaka muni hi nga tiyisekaka swaku swilo leswi Xikwembu xi hi tshembisaka swona swi ta hetiseka minkama hinkwayu. Pawulo a te: “Xikwembu a xi nge tshuki xi hemba.” (Heb. 6:18) Ku fana ni leswi swi kalaka swi nga koteki swaku xihlovo xi humesa mati yamanene ni mati ya ku bava hi nkama wun’we, Yehovha ku nga xihlovo xa ntiyiso a nga hembi. Hi mhaka leyo, hi nga tiyiseka swaku swilo hinkwaswu leswi Yehovha a swi vulaka ku patsa ni leswi a hi tshembisaka swaku swi ta yendleka ka nkama lowu taka, i ntiyiso swi ta yendleka hikakunene. Ka djondzo leyi hi ta hlamula swivutiso swimbirhi leswi nge: I mpsini leswi Yehovha a nga tshembisa ku hi nyika swona ka nkama lowu taka? Naswona i mpsini leswi Yehovha a nga swi vula leswi hi tiyisekisaka swaku leswi a nga swi tshembisa swi ta yendleka hikakunene?

 3. a) I yini leswi Yehovha a swi tshembisaka vanhu va yena? (Nhlawutelo 21:3, 4) b) I yini leswi van’wani va swi pimisaka hi xitshembiso lexi?

³ Yehovha a tshembisa swaku ka nkama lowu taka “lifu a li nga ha ta va kona, hambi nkosi, ku rila ni ku twa ku vava a swi nge he vi kona”. (Lerha Nhlawutelo 21:3, 4.) Phela xitshembiso lexi xi tsakisa ndjhani! Hina hinkwerhu hi tirhelaka Yehovha ha tsaka hi ku tiva swaku Yehovha a ta hi yendlela swilo leswi swa ku tsakisa. Kambe a vanhu van’wani loko hi va bulela hi xitshembiso lexi va nga ha ku: “Phela xitshembiso lexi xi kahle, kambe swi nge koteki swaku xi yendleka hikusa misava yi tale hi swilo swa ku biha hintamu.”

 4. a) I yini leswi Yehovha a a swi tiva ku sukela khale? b) I mpsini swin’wani leswi Yehovha a hi byelaka swona hi xitshembiso lexi a xi hambaka?

⁴ Yehovha a byele mupostolo Yohani swaku a tsala hi xitshembiso lexi xa wutomi aparadesi. Yehovha a a swi tiva swaku namuntlha a hi ta ma chumayela mahungu lawa ya ku tsakisa ya Mfumu, funtshi a swi vonile swaku a swi ta va karhatela vanhu ku kholwa mahungu lawa ya ku tsakisa. (Esa. 42:9; 60:2; 2 Kor. 4:3, 4) Se i yini xi nga hi tiyisekisaka swaku xitshembiso xi nga ka Nhlawutelo 21:3, 4 xi ta hetiseka? Naswona hi nga va tiyisekisa ku yini van’wani swaku leswi vuliwaka ka ndzimana leyi swi ta yendleka hikakunene? Yehovha a nga yo hi tshembisa ntsena leswi hi swi lerhaka ka Nhlawutelo 21:3 ni 4, kambe a tlhele a hi nyika ni swivangelo swa ku va hi tiyiseka hi swona. Se a hi voneni swivangelo swoleswo.

 5. Hi yini ndzimana ya Bibele leyi vulavulaka hi xitshembiso xa Yehovha xa paradesi, naswona yi li yini?

⁵ Ka buku la Nhlawutelo 21:5, 6a, hi kuma xitshembiso lexi: “Lweyi a nga tshama ka xitshamu xa wuhosi a ku: ‘Vona, ni yendla swilo hinkwaswu swi va swa nyuwani.’ A tlhela a ku: ‘Tsala, hikusa marito lawa ma tshembeka naswona i ya ntiyiso.’ A tlhela a ku: ‘Swi yendlekile! Hi mina Alfa na Omega, masungulo ni magamu.’” Marito lawa ma kombisa swaku hi nga tiyiseka swaku xitshembiso xa Yehovha xa ku a ta yendla misava leyi yi va paradesi xi ta hetiseka hikakunene.

 6. Hi mhaka muni marito lawa ma nga ka Nhlawutelo 21:5, 6 ma tiyisa ntshembo wa hina?

⁶ Hi mhaka muni tindzimana leti ti hi tiyisekisa swaku leswi Yehovha a nga swi vula swi ta yendleka hikakunene? Ka tindzimana leti, leswi Yehovha a hi tshembisaka swona hi nga swi fanisa ni dokumentu leli li nga sinariwa swaku li hi tiyisekisa swaku xanchumu xi ta yendleka hikakunene.b Ka Nhlawutelo 21:3, 4, Yehovha a hi tshembisa swaku a ta hi susela swilo hinkwaswu leswi swi hi yendlaka hi hlupheka. Kambe ka tindzimana 5 ni 6, hi kuma sinatura la Yehovha leli hi tiyisekisaka swaku leswi a nga hi tshembisa swona swi ta yendleka. Swoswi a hi buleni hi marito lawa Yehovha a ma tirhisaka swaku a hi tiyisekisa.

 7. Hi wani marito ya ku hlawuleka lawa Yehovha a rhangaka hi ku ma vula na a nga se yendla xitshembiso xa yena naswona hi mhaka muni ma li ya lisima?

⁷ Ndzimana 5 loko yi sungula yi li: “Lweyi a nga tshama ka xitshamu xa wuhosi a ku.” (Nhla. 21:5a) Marito lawa mo kumeka kanharhu ntsena ka buku la Nhlawutelo. Se, ha tiyiseka swaku a hi ntsumi ya matimba, funtshi a hi Yesu a nga vula marito lawa, kambe i Yehovha hi yexe a nga ma vula. Leswo swi hi yendla hi tshemba swaku leswi hi tshembisiwaka swona hikakunene swi ta yendleka hikusa Yehovha “a nge tshuki a hemba.” (Tito 1:2) Marito lawa ma nga ka buku la Nhlawutelo 21:5, 6 i ntiyiso.

 8. Yehovha a swi kombisisa ku yini swaku a xitshembiso xa yena xi ta hetiseka? (Esaya 46:10)

⁸ Ka Nhlawutelo 21:5, Yehovha a gama a ku: “Vona.” Rito leli nge “vona” ni leli nge “vonani” ma tirhisiwa ka kunyingi ka buku la Nhlawutelo. Funtshi buku lin’wani loko li vulavula hi marito lawa li vula swaku ma tirhiseliwa kuva lweyi a ma twaka kumbe ku ma lerha a twisisa swaku ku ni swilo swa lisima leswi nga ta landzela. Ka ndzimana leyi, loko se ku vuliwe rito leli nge “vona,” ku gama ku landzela leswi: “Ni yendla swilo hinkwaswu swi va swa nyuwani.” I ntiyiso swaku Yehovha a va na a vulavula hi swilo leswi swi nga ta yendleka ka nkama lowu taka, kambe a vulavula ingi hiloko se swi yendlekile hikusa switshembiso swa yena a swi phazami, minkama hinkwayu swa hetiseka. — Lerha Esaya 46:10.

 9. a) Marito lawa ma nge “ni yendla swilo hinkwaswu swi va swa nyuwani” ma vula yini? b) I yini swi nga ta yendleka hi “tilo la ku sungula “ ni “misava ya ku sungula”?

⁹ Ka Nhlawutelo 21:5 Yehovha a te: “Ni yendla swilo hinkwaswu swi va swa nyuwani.” Ka ndzima leyi ya Bibele, ku vulavuliwa hi swilo swimbirhi leswi Yehovha a nga ta swi yendla. Xa ku sungula, Yehovha a ta helisa swilo swa khale. Xa wumbirhi, a ta txintxa swilo lani misaveni ku patsa ni tilweni. Ka buku la Nhlawutelo 21:1, hi kuma swaku: “Tilo la ku sungula ni misava ya ku sungula a swi nga ha li kona.” “Tilo la ku sungula” i mimfumu ya ku biha leyi fumaka swoswi leyi kongomisiwaka hi Sathana ni madimoni ya yena. (Mat. 4:8, 9; 1 Yoh. 5:19) Minkama ya yinyingi loko Bibele li vulavula hi “misava” li vulavula hi vanhu lava tshamaka ka yona. (Gen. 11:1; Pis. 96:1) Hi mhaka leyo, “misava ya ku sungula” ku vuliwa vanhu va ku biha lava nga kona misaveni namuntlha. Phela Yehovha a nga to lunghisa “matilo” kumbe “misava,” kambe a ta yi helisa a yi txintxa hi yin’wani. Leswi vulaka swaku ku ta va ni Mfumu wa nyuwani lowu nga ta fuma vanhu va ku lulama.

10. I mpsini leswi Yehovha a nga ta yendla swaku swi va swa nyuwani?

¹⁰ Yehovha a ta yi yendlisa ku yini minchumu yi va ya nyuwani? (Nhla. 21:5) Yehovha a ta yendla swaku vanhu hinkwavu amisaveni va va va ku hetiseka va tlhela va va ni wutomi la ku hetiseka. Hilani Esaya a nga swi vula hi kona, misava hinkwayu yi ta va paradesi ku fana ni jardim la Edeni. Phela na hina hi ta pfuneka hi leswo hikusa hi ta va va nyuwani, hi ta pfuxetiwa, leswi vulaka swaku hi ta dahiwa ka swilo hinkwaswu leswi hi vavaka. Hambi hi vanhu va ku limala, va ku fa matihlo ni timbheveve phela va ta hanyisiwa, va tlhela va va ni wutomi lalinene la ku hetiseka. Ni vanhu lava va nga fa va ta pfuxiwa. — Esa. 25:8; 35:1-7.

11. I mpsini leswi Yehovha a nga rhuma Yohani swaku a swi yendla?

¹¹ I yini swin’wani leswi Yehovha a nga swi vula swaku a hi tiyisekisa swaku hi nga mu tshemba? Yehovha a byele Yohani a ku: “Tsala, hikusa marito lawa ma tshembeka naswona i ya ntiyiso.” (Nhla. 21:5) Phela Yehovha a nga yo byela Yohani swaku a a fanele a “tsala” ntsena, kambe a tlhele a mu nyika ni xivangelo. A te: “hikusa marito lawa ma tshembeka naswona i ya ntiyiso.” Hi tsaka hintamu hileswi Yohani a nga yingisa nawu wolowo, hikusa swoswi hi za hi tiva xitshembiso xa paradesi ni minkateko ya yinyingi leyi hi nga ta yi kuma ka nkama lowu taka hileswi Yohani a nga yingisa nawu wolowo.

12. Hi mhaka muni Yehovha a vule swaku: “Swi yendlekile”?

¹² Ku ni swin’wani leswi Yehovha a nga gama a swi vula ka Nhlawutelo 21:6. Yena a te: “Swi yendlekile!” Hi mhaka muni Yehovha a tirhise marito lawa? Hikusa ka yena swo fana ni loko se a xi hetisisile xitshembiso xa ku yendla misava yi va paradesi, funtshi a vulavulise xileswo hikusa a ku na nchumu lexi xi nga mu pfalelaka ku va a hetisisa xikongomelo xa yena hi misava. Se swoswi a hi voneni swilo swin’wani leswi a nga swi vula leswi kombisaka swaku a xitshembiso xa yena xa ku yendla misava yi va paradesi xi ta hetiseka hikakunene.

13. Hi mhaka muni Yehovha a vule swaku: “Hi mina Alfa na Omega”?

¹³ Hi lani se hi nga swi vona hi kona, Yehovha hi yexe a vulavule makhambi manharhu na Yohani, nkama lowu a nga mu komba swilo hi ndlela ya singita. (Nhla. 1:8; 21:5, 6; 22:13) Ka makhambi hinkwawu lawa Yehovha a nga vulavula, a vule marito lawa: “Hi mina Alfa na Omega.” Ka mabesedi ya Xigriki, Alfa i letra la ku sungula, kasi Omega i letra la wugamu. Hi ku vula swaku “hi mina Alfa na Omega,” Yehovha a a kombisa swaku loko a za a sungula ku yendla xanchumu a ta za a fika magamu ka xona.

14. a) I nkama muni lani Yehovha a nga vula swaku “Alfa” naswona a ta vula swaku “Omega” loko swi te yini? b) Hi xini xitshembiso lexi hi xi kumaka ka buku la Genesa 2:1-3?

¹⁴ Loko Yehovha se a yendle Adamu na Evha, a va byelile hi leswi a a lava swaku misava ni vanhu va tshamisa xiswona. A va katekisile a gama a va byela swaku a va fanele va ‘psalanana va va vanyingi va tata misava, va yi fuma.’ (Gen. 1:28) Hi nkama wolowo a swo fana ni loko Yehovha a vula swaku “Alfa,” hikusa a va byele hi xikongomelo xa Yena hi misava xa leswaku a ku ta fika nkama lowu misava a yi ta tala hi vanhu lava va yingisaka Xikwembu na va sukela ka Adamu na Evha, va tlhela va yendla swaku yi va paradesi. Se ka nkama lowu taka Yehovha swi ta fana ni loko a ku “Omega” loko xikongomelo xa yena hi misava se xi yendlekile. Nkama lowu Yehovha a nga heta ku yendla matilo ni misava ni swilo hinkwaswu leswi nga ka swona, ku ni swin’wani leswi Yehovha a nga swi vula kuva a hi tiyisekisa swaku leswi a swi vulaka swi ta yendleka hikakunene. Swilo swoleswo swi kumeka ka Genesa 2:1-3. (Lerha.) Ka tindzimana leti, Yehovha a vule swaku a siku la wu 7 la kwetsima ka yena. Leswo swi vula swaku a xikongomelo xa yena hi misava ni vanhu xi ta hetiseka hi ku helela a ku heleni ka siku la wu 7.

15. Swi nga yendleka Sathana a pimise swaku a swi kotile ku yendla swaku xikongomelo xa Yehovha xi nga ha hetiseki. Hi mhaka muni hi vula leswo?

¹⁵ Nkama Adamu na Evha va nga langa ku kala va nga mu yingisi Yehovha, va djohile funtshi va tlulete xidjoho ni lifu ka vana va vona. (Rom. 5:12) Se a swi tikomba ingaku Davulosi a swi kotile ku yendla swaku xikongomelo xa Yehovha xa ku tata misava hi vanhu va ku hetiseka ni va ku yingisa xi nga ha yendleki. A swi tikomba ingaku Sathana a swi kotile ku yendla swaku Yehovha a nga ha swi koti ku vula swaku “Omega.” Swi nga yendleka Sathana a pimise swaku leswi Yehovha a a swi lava a swi nga ha ta yendlekisa xileswi Yehovha a a swi lavisa xiswona, funtshi Yehovha a a ta yendla wanuna mun’wani ni wansati mun’wani swaku va hetisisa xikongomelo xa yena hi vanhu. Kambe loko a ku li swaku Yehovha a yendle swoleswo Sathana a a ta vula swaku i muhembi. Hi mhaka muni? Hikusa hilani swi nga tsaliwa hi kona ka Genesa 1:28, Yehovha a byele Adamu na Evha swaku a va fanele va tata misava hi vana va vona.

16. Hi mhaka muni Sathana a a ta va a pimise swaku a a ta swi kota ku vula swaku Yehovha a hi wa nchumu?

¹⁶ Swi nga yendleka Sathana a pimise swaku Yehovha a a ta pfumelela swaku Adamu na Evha va va ni vana, kambe vana volavo a va ta tama va va ni xidjoho, naswona a va nga ta tshuka va va vanhu va ku hetiseka. (Ekl. 7:20; Rom. 3:23) Loko leswo a swi yo yendleka, Sathana ina a vulile swaku Yehovha a hi wa nchumu, hikusa a nga swi kotanga ku hetisisa xikongomelo xa yena xa ku yendla swaku misava hinkwayu yi tala hi vanhu va ku hetiseka va tlhela va yingisa Xikwembu na va sukela ka Adamu na Evha.

17. Yehovha a yi lulamisise ku yini mhaka ya ku kala ku yingisa ka Sathana ni vanhu va ku sungula, naswona ku ta yendleka yini? (Vona mufoto.)

¹⁷ Yehovha a lulamise swilo hi ndlela leyi Sathana a a nga yi nyimelanga. (Pis. 92:5) Yehovha a pfumelele Adamu na Evha swaku va va ni vana. Hi ku yendla leswo, Yehovha a kombise swaku a hi muhembi. Kambe leswaku xikongomelo xa Yena xi hetiseka a yendle swaku ku va ni N’wana lweyi a a ta ponisa vana hinkwavu lava yingisaka va Adamu na Evha. (Gen. 3:15; 22:18) N’wana a a ta nyikela wutomi la yena tanihi nkutsulu swaku li ponisa vanhu. Phela swi nga yendleka Sathana a a nga swi nyimelanga leswo. Hi mhaka muni? Hikusa a nkutsulu i xikombiso xaxikulu xa lirhandzu. (Mat. 20:28; Yoh. 3:16) Funtshi Sathana a nga rhandzi munhu. Se i mpsini swi nga ta yendleka hi mhaka ya nkutsulu? Loko 1.000 wa Malembe ya ku fuma ka Kreste se ma helile, vana hinkwavu lava yingisaka va Adamu na Evha va ta va se va hetisekile funtshi na va hanya ka misava leyi nga paradesi xileswi Yehovha a a swi lavise xiswona ku sunguleni. Hi nkama wolowo swi ta fana ni loko Yehovha a ku “Omega.”

18. Hi swini swilo leswi hi nga swi djondza leswi hi tiyisekisaka swaku Xikwembu xi ta hetisisa leswi xi nga swi tshembisa? (Vona ni kwadru leli nge: “3 Wa Swilo Leswi Hi Yendlaka Hi Tiyiseka Swaku Leswi Yehovha A Nga Swi Tshembisa Swi Ta Yendleka.”)

¹⁸ Ka nhlokomhaka leyi, hi djondzile hi swilo leswi swi hi tiyisekisaka swaku misava leyi hikakunene yi ta va paradesi ka nkama lowu taka. Se loko vanhu van’wani va nga kholwi ke, swaku misava leyi hikakunene yi ta va paradesi ka nkama lowu taka? Xin’wani hi nga xi yendlaka i ku va pfuna va twisisa swaku lweyi a yendlaka xitshembiso lexi i Yehovha. Ka buku la Nhlawutelo hi kuma marito lawa ma nge: “Kutani Lweyi a nga tshama ka xitshamu xa wuhosi a ku: ‘Vona, ni yendla swilo hinkwaswu swi va swa nyuwani.’” Se, Yehovha a ni wutivi, matimba naswona a swi lava hintamu ku hetisisa xitshembiso lexi. Xin’wani hi nga va pfunaka swaku va swi twisisa lava va kalaka va nga kholwi swaku misava leyi yi ta va paradesi, hi leswaku ka Yehovha xitshembiso lexi xo fana ni loko se xi yendlekile. Hikusa yena a te: “Marito lawa ma tshembeka naswona i ya ntiyiso.” A tlhela a ku: “Swi yendlekile!” Kasi xa wugamu hi nga bula hi xona xi nga hi pfunaka ku tama hi tiyiseka swaku misava leyi yi ta va paradesi, hileswaku Yehovha a tlhele a vula swaku hi yena “Alfa na Omega.” Leswi kombisaka swaku hinkwaswu leswi a swi sungulaka a gama a swi hetisisa. Se hi nga tiyiseka swaku Yehovha a ta swi kota ku komba Sathana swaku a hi wa nchumu ni swaku i muhembi.

19. Hi nga yendla yini loko vanhu lava hi va chumayelaka va nga kholwi ka xitshembiso xa Yehovha?

¹⁹ Khumbuka swaku nkama lowu u byelaka vanhu hi leswi Yehovha a nga hi byela swona swaku swi hi tiyisekisa swaku a ta hetisisa switshembiso swa yena, u va na u tiyisa ntshembo wa wena ka switshembiso swa Yehovha. Se loko u tshuka u lerhela munhu hi ntshembo wa ku ta ka paradesi, lowu nga ka Nhlawutelo 21:4 se yena a ku: “Leswo i swinene, kambe a swi nga ta tshuka swi yendleka,” u nga yendla yini? Mu lerheli buku la Nhlawutelo 21:5, 6 u gama u mu byela swaku a tindzimana leti ti fana ni sinatura la Yehovha. Funtshi li komba swaku a swi nga ta phazama leswi Yehovha a nga hi tshembisa swona. Swi ta yendleka hikakunene. — Esa. 65:16.