Mareferensiya Ya Xibukwana Xa Mintlhanganu Ya Mahanyelo Ni Ntirho
4 KU YA KA 10 KA JANEIRO
XUMA XI NGA KA RITO LA XIKWEMBU | LEVHITIKA 18-19
“Vana Ni Mahanyelo Ya Manene”
Tisirheleli Ka Ntlhamu Wa Sathana Wa Pornografiya
Yehovha a va byele swilo swa ku biha leswi matiko lawa a va gamakane na wona a ma swi yentxa. Yena a te: “Minga yentxi swilo leswi vanhu va tiko la Kanana ku nga tiko leli ni mi yisaka ka lona va swi yentxaka . . . tiko a li basanga, kutani ni ta tisa xikhatiso ahenhla ka lona hi mhaka ya xihoxo xa lona.” Ka Xikwembu lexi kwetsimaka xa Israyele, mahanyelo ya Vakanana lama nyenyetsaka a ma yentxa leswaku tiko la vona liva leli chakeke. — Lev. 18:3, 25.
Murindzi 02/17 paj. 20 par. 13
Yehovha A Kongomisa Vanhu Va Yena Nkama Hinkwawu
Tihosi leti ta ku tshembeka a ti hambanile ni vanhu lava a va rhangela matiko man’wana, lava a va tirhisa wutlhari la vona! Vanhu lava a va fumiwa hi Vakanana a va yentxa swilo swa ku nyenyetsa, swa ku fana ni ku famba masangu hi xixaka kumbe ni swiharhi, wanuna ni wanuna kumbe wansati ni wansati, va tlhela va yentxa magandzelo hi vana. (Lev. 18:6, 21-25) Naswona varhangeli va Vababilona ni Vagipta a va nga yi landzeli minawu leyi a yi vhikela vanhu ka mavabyi, leyi Xikwembu a xi yi nyike Vayisrayele. (Tinhl. 19:13) Vanhu va Xikwembu va vone swaku varhangeli va vona a va tshembekile naswona va va pfunile swaku va va ni wunghanu la linene ni Xikwembu, va basa ka mahanyelo ya vona ni ka mirhi. Hinkwaswo leswi swi kombisa swaku Yehovha a a rhangela vanhu va yena.
Murindzi 01/07/14 paj. 7 par. 2
Xikwembu Xi Ta Yentxa Yini Hi Wubihi?
Ku ta yentxeka yini hi vanhu lava yalaka hi maxivomu ku txintxa mahanyelo ya vona naswona va tama va yentxa swilo swa ku biha? Pimisa hi xitshembiso lexi: “Lava va ku lulama va ta hanya misaveni, naswona lava va pfumalaka nandzu va ta tshama ka yona. Loko kuli lavo biha vata helisiwa lani misaveni, naswona vaxengi vata susiwa ka yona.” (Swivuriso 2:21, 22) Vanhu va ku yentxa swilo swa ku biha a va nga ha ta va kona. Ka nkama wolowo wa ku rhula, vanhu lava yingisaka va ta ya va hetiseka hi ka tsongo ka tsongo. — Varoma 6:17, 18; 8:21.
Lavetela Xuma Ka Rito La Xikwembu
Murindzi 15/06/06 paj. 22 par. 11
“Ni Wu Rhandza Swinene Nawu Wa Wena”
Nawu wa wumbirhi ka Nawu wa Moxe lowu kombisaka leswaku Xikwembu xi ni mhaka ni vanhu va xona, i lulamiselo la ku rholela leswi swi nga sala a masin’wini. Yehovha a byele Vayisrayele swaku loko va tshovela ka masimu ya vona a va fanele va tshika swisiwana swi rholela leswi nga sala. Varimi a va nga fanelanga va tshovela hinkwaswo ku nga sali nchumu ka masimu ya vona, naswona a va nga fanelanga va tshovela matlhelweni ka masimu, va hlengeleta mawuvha hinkwawu kumbe mafruta man’wani va nga siyi nchumu. Nyandza ya switsama leyi nga rivaliwa masin’wini a va nga fanelanga va yi landza. Lawa ama li malulamiselo ya manene ya ku pfuna lava a va li swisiwana, lava a va nga li Vayisrayele, lava a va feliwi hi vapapayi ni lava a va feliwi hi vanuna va vona. Phela, ku rholela swilo ka masimu a swi karhata, kambe loko lava va nga swisiwana va yentxa ntirho lowu, a swi nga ta lava va famba va kombela swakudla. — Levhitika 19:9, 10; Deteronoma 24:19-22; Tipisalema 37:25.
11 KU YA KA 17 KA JANEIRO
XUMA XI NGA KA RITO LA XIKWEMBU | LEVHITIKA 20-21
“Yehovha A Hambanisa Vanhu Va Yena Ni Vamatiko”
Murindzi 15/10/04 paj. 11 par. 12
Hi Mhaka Muni U Kholwa Swaku Paradesi Yi Ta Va Kona?
Ku ni nchumu xin’wana xa ku a hi fanelanga hi xi siya ndzaku. Xikwembu xi byele Vayisrayele xi ku: “Kutani mu fanele mu hlayisa nawu hinkwawu lowu ni mu byelaka wona namuntlha, leswaku mu tiya, kunene mu ngena mu teka tiku leli mu yaka ka lona.” (Deteronoma 11:8) Tiku leli ku tlhela ku vulavuliwa hi lona ka Levhitika 20:22, 24 leyi nge: “Mu fanele mu yingisa minawu ya mina hinkwayu ni swiboho swa mina swa wuyavanyisi, leswaku tiku leli ni mu yisaka ka lona li nga mu hlaseli. Hi mhaka leyo ni mu byele leswi: ‘N’wina mi ta teka tiku la vona naswona mina ni ta mu nyika lona li va la n’wina. Tiku leli li tale hi leyiti ni wulombe.’” Phela, leswaku va nghena ka tiku leli va nga tshembisiwa lona a va fanele va va vanghanu va vakulu va Yehovha Xikwembu. Leswi Vaisrayele va kalaka va nga mu yingisanga Yehovha a pfumelele swaku va hluliwa hi Vababilona va tlhela va va susa ka tiku la vona.
Perspicaz vol. 2 paj. 314
Ndzhaka
I minchumu hinkwayu leyi siyiwaka hi mufi kumbe minchumu hinkwayu leyi munhu a yi yamukelaka ya vapapayi va yena kumbe ya vavhovho va yena loko se va file. Rito leli li nga tirhisiwa hi Xiheberu i na·hhál. Leswi vulaka ku nyika kumbe ku yamukela a ndzhaka ni ku sala ni swilo leswi swi nga siyiwa hi mufi. (Tin 26:55; Ezk 46:18) Rito leli nge ya·rásh li tshuka li tirhiseliwa ku vula swaku “ku sala ni ndzhaka”. (Gn 15:3; Lv 20:24) Naswona li nga ha vula ku hlongola vanhu hi tinyimpi swaku u sala ni minchumu ya vona. (Dt 2:12; 31:3) A marito ya Xigriki lawa ma tirhisiwaka ku tlhamusela rito ndzhaka ma fambisana ni rito leli nge klé·ros, leli vulaka swaku “ndjombo”, kambe li nga gama li txintxiwa li vula swaku “ku yavana hi xikarhi” kambe hi wugamu li vula swaku, “ndzhaka”. — Mt 27:35; Min 1:17; 26:18.
Perspicaz vol. 1 paj. 279 par. 1
Swinyenyani
Loko ku hundze Ndhambhi, Nowa a yentxe magandzelo hi “swinyenyani leswi nga basa” ni swihari swin’wana. (Gn 8:18-20) Se Xikwembu xi game xi pfumelela vanhu swaku va dla swinyenyani kambe va halata ngati ya kona. (Gn 9:1-4; komparara ni Lv 7:26; 17:13.) A rito leli nge “leswi nga basa” li kombisa swaku a swi yamukeleka ka ku yentxa magandzelo, naswona ka swakudla a xi kona xinyenyani lexi a ku vuliwa swaku a xi basanga ku ya fika ka Nawu wa Moxe. (Lv 11:13-19, 46, 47; 20:25; Dt 14:11-20) Bibele a li hlayi swaku hi mhaka muni swinyenyani swin’wana a swi nga basanga. Hambileswi hakanyingi a ku vuliwa swaku swinyenyani swa ku kala swi nga basanga a ku li leswi swi hlotaka kumbe leswi hlotiwaka, kambe a ku nga li hinkwaswu. Ku yaleliwa ka ku dla swinyanyani leswo ku helisiwili loko ku sungula a ntwananu wa nyuwani, tanihi leswi Xikwembu xi nga komba Pedru. — Min 10:9-15.
Lavetela Xuma Ka Rito La Xikwembu
Perspicaz vol. 1 paj. 572
Ku Titsemelela
A Nawu wa Xikwembu a wu tsimbisa swaku munhu a titsemelela hi mhaka ku feliwa. (Lv 19:28; 21:5; Dt 14:1) Xivangelo xa kona hi leswaku Vayisrayele a va li vanhu va ku basa ka Yehovha naswona a va hlawulekile. (Dt 14:2) Se Vayisrayele a va nga fanelanga va hanya hi swilo swa wukhongeli la mavunwa. Swilo leswi swa ku chavisa swa ku rilela mufi ku tlula mpimu, swa ku fana ni ku titsemelela muzimba, a swi bihe hintamu ka vanhu lava a va swi tiva swaku ku yentxeka yini hi munhu loko a fa ni swaku vafi va ta pfuxiwa. (Dt 12:13; Heb 11:19) Naswona a ku yaleliwa ku titsemelela muzimba a swi ta yentxa Vayisrayele va hlonipha a mirhi lowu va nga nyikiwa hi Xikwembu.
18 KU YA KA 24 KA JANEIRO
XUMA XI NGA KA RITO LA XIKWEMBU | LEVHITIKA 22-23
“Hi Djondza Yini Ka Mafexta Ya Vayisrayele?”
Perspicaz vol. 2 paj. 125
Fexta La Mapawu Ya Ku Kala Ma Nga Na Fermentu
Siku la ku sungula la Fexta la Mapawu ya ku Kala ma nga na Fermentu a ku li ntlhanganu wa ku kwetsima lowu a wu tlhela wu vitaniwa swaku i Sábado. Se hi siku la wumbirhi ku nga 16 ka Nisani a ku tekiwa maxalana kumbe masevhada ma ya nyikiwa muprista ku nga tipu la sereyali leli hantlaka li wupfa aPalestina. Na ku nge se fika a fexta leli, a nga kona lweyi a a fanele a dla masereyali ma ha ku wupfaka kumbe pawu ni swilo leswi a swa ha ku tshoveliwa. Muprista a a nyikela masereyali lawa a ma ha ku tshoveliwa ka Yehovha hi nkama lowu a a nyikela gandzelo la ku hisiwa la xinyempfani xa ku hanya kahle xi nga ni lembe lin’we, ku patsa ni masereyali ya ku tsakamisiwa hi azeyite ni byala. (Lv 23:6-14) A ku nga na nawu wa ku hisa masereyali kumbe mpupu ka alitari ku fana ni leswi vaprista va nga gama va yentxisa xiswona. Nawu a wu vula swaku Vayisrayele va fanele va nyikela mafruta ya ku sungula, kambe a ku ni lulamiselo la ku munhu ni munhu kumbe ndjangu ni ndjangu wu nyikela leswi wu swi lavaka hi siku la fexta leli. — Eks 23:19; Dt 26:1, 2; vona PRIMÍCIAS.
Ntlhamuselo. Ku dla mapawu ya ku kala fermentu ka nkama wa fexta leli, swi fambisana ni leswi Yehovha a a swi byele Moxe, tanihi leswi vuliwaka ka Eksoda 12:14-20, lani ka vhersikulu 19 ku nga ni nawu wa ku kongoma lowu nge: “Ku nga tshuki ku kumeka fermentu ndlwini ka wena ku ringana 7 wa masiku.” Ka Deteronoma 16:3, a mapawu ya ku kala fermentu ma vitaniwa swaku i “mapawu ya ku karhateka”. Lembe ni lembe leswo a swi va khumbukisa ku suka Gibita hi xihantla (lani ka ku a va nga na nkama wa ku teka trigu [Eks 12:34]). Naswona a swi va khumbukisa nkama wa ku xaniseka ni wa wukarawa lowu va nga chunsiwa ka wona, hilani Yehovha a nga vula a ku: “Leswaku masiku hinkwawu ya wutomi la wena u khumbuka siku leli u nga suka hi lona Gibita”. A Vayisraele a va fanele va yentxa mafexta lawa ya manharhu lembe ni lembe leswaku va khumbuka ku chunsiwa ka vona ni swaku lweyi a nga va chunsa i Yehovha. — Dt 16:16.
Perspicaz vol. 3 paj. 224 par. 3
Pentekoxta
Trigu la ku sungula leli a li tshoveliwa, a li fanele li yentxiwa swa ku hambana ni leswi a swi yentxiwa ka masevhada. A va fanele va teka trigu la 4,4 wa malitru (ku nga ndlela leyi a va pima hi yona khale) va sweka va hamba 2 wa mapawu. Xikwembu xi te a va fanele va swi yentxela lani va tshamaka kona, leswi vulaka swaku mapawu ya kona a ma fanele ma fana ni lawa a va ma dla siku ni siku, ku nga li wona lawa a va ma yentxela magandzelo. (Lv 23:17) Leswo, a va fanele va swi yentxa ni magandzelo ya ku hisiwa ni ya ku kombela ku rivaleliwa, a va fanele va nyikela 2 wa swinyempfani ku fana ni leswi a va swi yentxa ka magandzelo ya ku khensa. Muprista a a veka mavoko ka mapawu ni ka nyama ya swinyempfani a swi yisa hala ni hala ku kombisa swaku a a swi nyikela ka Yehovha. Loko mapawu lawa ni nyama leyi se swi nyikeliwile ka Yehovha, muprista a a swi teka a ya dla tanihi gandzelo la ku khensa. — Lv 23:18-20.
Murindzi 15/05/14 mapaj. 28-29 par. 11
Longoloka Ni Nhlengeletanu Ya Yehovha
Nhlengeletanu ya Yehovha yi hi navelela swa swinene loko yi hi byela swaku hi yingisa leswi mupostolo Pawulo a nga swi vula, loko a ku: “A hi hlayisaneni leswaku hi tiyisana, hi rhandzana hi tlhela hi yentxa mintirho ya yinene, hi nga tshikeni ku tlhangana ku fana ni leswi van’wana va yentxisaka xiswona kambe hi tiyisana naswona hi yentxa leswo ngopfungopfu leswi mi vonaka leswaku siku li le kusuhi.” (Heb. 10:24, 25) Mafexta ya lembe ni lembe ni mintlhanganu yin’wana ya ku gandzela Xikwembu a swi tiyisa wuxaka la Vayisrayele na Yehovha. Ku nga li leswo ntsena, ka nkama wa Nehemiya, a Mafexta ya Matende a ku li nkama wa ku tsakisa. (Ekso. 23:15, 16; Neh. 8:9-18) Hi ku fana, na hina ha tsaka loko hi li makongresu, masembleya ni ka mintlhangano ya bandla. Hi fanele hi yentxa hinkwaswu swaku hi va kona ka mintlhanganu hinkwayu hikusa yi hi pfuna ku tshama hi li kusuhi na Yehovha hi tlhela hi mu tirhela na hi tsakile. — Tito 2:2.
Lavetela Xuma Ka Rito La Xikwembu
Swi Vula Yini Ku Tshembeka?
Malandza ya Xikwembu ma swi kombisisa ku yini swaku ma tshembeka? Ma kombisa leswo hi ku rhandza Yehovha hi mbilu hinkwayu. Leswo hi swona swi va pfunaka ku yentxa hinkwaswu swaku va tsakisaka Yehovha. A hi kambisiseni ntlhamuselo wa rito leli hi wuyenti. Marito man’wana lama tirhisiwaka Bibeleni leswaku ma tlhamusela rito “ku tshembeka” i “ku kala xi nga limalanga, lexi kalaka xi nga li na xivati kumbe lexi heleleke”. Hi xikombiso, Vayisrayele a va nyikiwe nawu wa ku nyikela swiharhi tanihi magandzelo ka Yehovha. Kambe leswaku Yehovha a yamukela magandzelo ya vona, a va fanele va nyikela swiharhi leswi kalaka swi nga limalanga. (Lev. 22:21, 22) A va nga pfumeleliwi ku nyikela swiharhi leswi feke matihlo, leswi tshovekeke nenge kumbe leswi vabyaka. Ka Yehovha, ku nyikela xiharhi lexi kalaka xi nga limalanga a swi li swa lisima swinene. (Mal. 1:6-9) Leswi swi hi yentxa hi twisisa swaku hi mhaka muni Yehovha a lava swaku hi nyikela minchumu ya ku hetiseka. Hambi hina vanhu hi rhandza minchumu leyi heleleke. Hi xikombiso, loko hi lava ku xava nchumu, ku nga ha va mafruta, livru kumbe nchumu xin’wana, a hi langi xa ku boxeka kumbe xa ku kala xi nga tirhi kahle. Hi lava lexi nga kahle hi matlhelo hinkwawu. Hi leswi Yehovha na yena a swi nyimeleke ka hina. A lava leswaku hi tshembeka ka yena ni ku mu rhandza hilaha ku heleleke.
25 KU YA KA 31 KA JANEIRO
XUMA XI NGA KA RITO LA XIKWEMBU | LEVHITIKA 24-25
“Lembe La Jubilewu Ni Ku Chunsiwa Ka Nkama Lowu Taka”
Perspicaz vol. 2 mapaj. 697-698
Ku Chunsiwa
Xikwembu Xa Nchunseko. Yehovha i Xikwembu lexi chunsaka vanhu va xona. Xi chunse Vayisrayele ka wukarawa la Gibita. Yehovha a va byele swaku loko va yingisa minawu ya yena a va ta chunseka ka wusiwana. (Dt 15:4, 5) Davhida a vule swaku vanhu a va ta hanya na va chunsekile aJerusalema. (Ps 122:6, 7) Hambileswi Nawu a wu pfumela swaku munhu lweyi a nga xisiwana a tixavisa a va xikarawa swaku a ta kuma swa ku tihanyisa ni swa ku pfuna ndjangu wa yena, kambe nawu a wu pfumelela swaku munhu yelweyo a chunsiwa hi lembe la wu 7. (Eks 21:2) Hi lembe la jubileu a ku va ni nchuseko ka vanhu hinkwavu lava a va tshama aIsrayele. Swikarawa hinkwaswu a swi chunsiwa swi tlhelisiwa makaya ka swona, naswona vanhu hinkwavu a va tlheliseliwa masimu ya vona. — Lv 25:10-19.
Perspicaz vol. 2 paj. 315
Ndzhaka
Leswi masimu a ma li ya ndjangu a ma nga fanelanga ma xavisiwa. Kambe a vo yentxa hi ku lugarisa, va hakeliwa hi leswi a swi tshoveliwa. Lweyi a nga lugariseliwa a a hakela hi ku ya hi malembe lawa a va pfumelelane wona anze ku fika lembe la Jubilewu, lani minchumu hinkwayu a yi tlheliseliwa ka n’winyi wa yona, loko a nga swi kotanga ku yi hakelela kumbe ku yi teka na ku nge se fika Jubilewu. (Lv 25:13, 15, 23, 24) Nawu lowu a wu tirha ni ka tiyindlo leti a ti nga na mimuru. Tiyindlo leti a ti vuliwa swaku i masimu ya le handle. Kambe ka tiyindlo leti nga ndzeni ka muru, n’winyi a a nyikiwa lembe lin’we swaku a zama ku hakelela yindlo ya yena leswaku a tlhela a yi kuma, loko a tsandzeka, a yi mu luzekela swa wugamu. Kambe loko ku li tiyindlo ta Valevhi, a va nga pimeliwi nkama swaku va hakela swaku va ta tlhela va ti kuma hikusa Valevhi a va nga na ndzhaka tikweni. — Lv 25:29-34.
Perspicaz vol. 2 mapaj. 610-611
Jubilewu
Loko Vayisrayele va yingisa nawu wa Jubilewu, a swi yentxa swaku va hanya kahle, ku nga yentxeki leswi hi swi vonaka namuntlha ka misava leyi swaku van’wana i swisiwana hintamu kuve van’wana va ganye hintamu. Leswi vanhu hinkwavu a va pfuneka hi lulamiselo leli atikweni, a ku nga ta va ni munhu lweyi a a ta va xisiwana kumbe a xaniseka hi mhaka ya ku pfumala male, kambe vanhu hinkwavu a va ta pfunana swaku ku nga vi ni wusiwana atikweni. Loko Vayisrayele va yingisa nawu lowu wa Jubilewu, a va ta va ni mfumu wa wunene va tlhela va hanya kahle. — Esa 33:22.
Lavetela Xuma Ka Rito La Xikwembu
Murindzi 01/09/09 paj. 22 par. 4
Loko U Kwatisiwile
Loko Muyisrayele a lwa ni Muyisrayele mun’wana kutani a mu xokola tihlo, Nawu a wu pfumela swaku a layiwa hi ku landza leswi nawu wu vulaka swona. Kambe lweyi a nga xokoliwa tihlo kumbe vandyangu wa yena a va nga fanelanga va hakelisa. Nawu a wu lava leswaku lweyi a nga xokoliwa tihlo a ya mangala mhaka ya kona awuhosini leswaku yi lulamisiwa hi ndlela ya yinene. Leswi vanhu a swi va tiva swaku loko munhu a yentxa swa ku biha kumbe a vavisa mun’wana a ta khatisiwa, swi yentxe swaku vanhu va nga yentxi minchumu ya ku biha. Kambe ku ni swin’wana swi katsekaka ka mhaka leyi.
1 KU YA KA 7 KA FEVEREIRO
XUMA XI NGA KA RITO LA XIKWEMBU | LEVHITIKA 26-27
“U Nga Yentxa Yini Swaku U Kuma Minkateko Ya Yehovha?”
Murindzi 15/04/08 paj. 4 par. 8
Fambela Kule Ni “Swilo Swa Ku Kala Swi Nga Pfuni Nchumu”
Swi nga yentxekisa ku yini swaku “Male” yi hundzuka xikwembu? Hi xikombiso, pimisa hi ribye leli a li kumeka ka masimu ya Vayisrayele va khale. Ribye lolelo ku nga ha yakiwa yindlo kumbe muru hi lona. Kambe loko va teka ribye lolelo va yentxa poxte la ku kwetsima kumbe xifaniso, a swi ta yentxa vanhu va nga ha yingisi minawu ya Yehovha. (Lev. 26:1) Hilaha ku fanaka, ha yi lava mali naswona hi fanele hi yi tirhisa kahle. Ha yi lava leswaku hi kota ku tihanyisa, naswona hi nga yi tirhisa hi ndlela ya yinene ka ntirho wa Yehovha. (Ekl. 7:12; Luk. 16:9) Kambe loko hi lavetela hintamu male la kakuva ku gandzela Yehovha swi sala ndzhaku, male yi gama yi va xikwembu xa hina. (Lerha 1 Timotiyu 6:9, 10.) Hi fanele hi tivonela ka mhaka leyi, hikusa vanhu va vanyingi ka misava leyi va hanyela ku lavetela male ntsena. — 1 Tim. 6:17-19.
Perspicaz vol. 2 paj. 21 par. 2
Ku Hlamala
A swi va hlamalisa Vayisrayele ku vona ndlela leyi Yehovha a a tirhisa xiswona na Moxe. (Dt 34:10, 12; Eks 19:9) Lava nga ni lipfumelo, a va li yingisa hintamu wurhangeli la Moxe. A va swi twisisa swaku Xikwembu xi vulavula na vona hi ku tirhisa Moxe. Funtshi Vayisrayele a va fanele va hlonipha ndhawu ya ku kwetsima ya Yehovha. (Lv 19:30; 26:2) Leswo swi vula swaku loko va yentxa magandzelo ka ndhawu leyi, a va fanele va ma yentxisa xileswi Yehovha a nga va byelisa xiswona hi ku landza minawu ya Yena.
Murindzi 01/03/91 paj. 17 par. 10
“Ku Rhula Ka Xikwembu” A Ku Hlayise Mbilu Ya Wena
Yehovha a byele tiko a ku: “Loko mi tama mi yingisa minawu ya mina ni leswi ni mi byelaka swona, mi tlhela mi swi yentxa, ni ta mi nisela timpfula hi nkama wa kona naswona misava yi ta mi nyika swakudla, ni minsinya ya masin’wini yi ta humesa mafruta. Ni ta mi nyika ku rhula tikweni; mi ta yetlela na mi nga chavisiwi hi munhu; tiko la n’wina a li nga ta tshuka li hlaseliwa hi swiharhi swa nhova, naswona tinyimpi a ti nga ta nghena tikweni la n’wina. Ni ta va xikarhi ka n’wina naswona ni ta va Xikwembu xa n’wina, n’wina mi ta va vanhu va mina.” (Levhitika 26:3, 4, 6, 12) Leswi Vayisrayele a va sirheleliwile ka valala va vona, a va ganyile naswona a va li ni wuxaka la le kusuhi na Yehovha, a va ta tshama hi ku rhula. Kambe leswo a swi to tama swi yentxeka ntsena loko va yingisa Nawu wa Yehovha. — Tipisalema 119:165.
Lavetela Xuma Ka Rito La Xikwembu
Perspicaz vol. 3 paj. 265
Mavabyi Lama Dlayaka
Mavabyi Lawa A Ma Tisiwa Loko Ku Nga Yingisiwi Nawu Wa Yehovha. Vayisrayele va byeliwile swaku loko vo tshika ku yingisa minawu ya Yehovha a va ta biwa hi mavabyi ya ku chavisa. (Lv 26:14-16, 23-25; Dt 28:15, 21, 22) Bibele li vula swaku ku va ni lihanyu la linene ni ku va ni wunghanu la linene ni Xikwembu swi fambisana ni ku katekisiwa hi Xikwembu. (Dt 7:12, 15; Ps 103:1-3; Swiv 3:1, 2, 7, 8; 4:21, 22; Nhl 21:1-4) Se a mavabyi ma fambisana ni xidjoho ni ku kala ku hetiseka. (Eks 15:26; Dt 28:58-61; Esa 53:4, 5; Mt 9:2-6, 12; Yh 5:14) I ntiyiso swaku minkama yin’wana Yehovha a be vanhu hi mavabyi kola na kola, ya ku fana ni lepra la Miriyamu, la Uziya ni la Gehazi. (Tin 12:10; 2Tk 26:16-21; 2Th 5:25-27) Kambe swi tikomba ingi mavabyi ya manyingi lawa vanhu a va kumana na wona a ma vangiwa hi swilo swa ku toloveleka ni swin’wana leswi vanhu a va ti vangela hi ku kala ku hetiseka. Loko va kumana ni mavabyi lawo, a va tshovela leswi va nga swi byala hi voxe, va xanisa miri wa vona hi mhaka ya mintirho ya vona ya ku biha. (Ga 6:7, 8) Ka lava nga tlhelela ka mahanyelo ya vona ya ku nyenyentsa ya swa masangu, mupostolo Pawulo a vule swaku “Xikwembu xi va tshikile va yentxa ku navela ka timbilu ta vona xi tlhela xi va pfumelela ku yentxa minchumu ya chaka swaku va chimisa miri wa vona . . . kutani va ta khatisiwa hi ku helela hi ku ya hi xidjoho xa vona.” — Rm 1:24-27.
8 KU YA KA 14 KA FEVEREIRO
XUMA XI NGA KA RITO LA XIKWEMBU | TINHLAYO 1-2
“Yehovha A Hlengeleta Vanhu Va Yena”
Murindzi 01/12/94 paj. 9 par. 4
Ndlela Leyinene Ya Ku Gandzela Yehovha Ka Wutomi La Hina
A hi nge u vona Vayisrayele nkama na va li ka matende ya vona deserto kumbe mananga, a wu ta va u vone yini? A wu ta va u vone fila la matende ya manyingi lawa a ku tshama 3 milhões wa vanhu kumbe ku tlula. Matende lawa a ma hambanisiwe hi magrupu ya tinxaka tinharhu, ka tlhelo la sul, la norte, la wupeladlambu ni le wuxeni. Loko u langutisisa na u li kusuhi a wu ta vona 4 wa magrupu ya matsongo lawa a ku tshama mindjangu ya lixaka la Levhi kusuhi ni xikarhi ka matende. Xikarhi ka magrupu lawa ya Valevhi, a ku ni nchumu xa ku hlamalisa lexi a xi pfaleliwe hi tipanu. A ku li ‘tende la ntlhanganu,’ kumbe tabernakele, leyi Vayisrayele “va ku tlhariha” va nga yi yaka hi ku ya hi leswi Yehovha a a swi lavisa xiswona. — Tinhlayo 1:52, 53; 2:3, 10, 17, 18, 25; Eksoda 35:10.
Perspicaz vol. 1 paj. 39
Matende
Vanhu lava a va li ka matende lawa a va li vanyingi hintamu. A ku ni 603.550 wa vavanuna lava a va lwa nyimpi, hi nga konti vavasati, vana, lava gugeke ni lava nga limala. Funtshi a ku ni 22.000 wa valevhi, ni switranjeru swa swinyingi. Swi nga yentxeka hinkwavu lava a va li 3 milhões kumbe ku tlula. (Eks 12:38, 44; Tin 3:21-34, 39) A swi tiveki kahle swaku a va tate ndhawu ya ku fika kwini; vanhu va ni mavonelo ya ku hambana ka mhaka leyi. Nkama lowu matende a ma gwimbiwe phambheni ka Jeriku, ka Tinhava ta Mowabe, ku vuliwa swaku a ma sukela “Bete-Jesimote ma ya fika Abel-Sitim”. — Tin 33:49.
Lavetela Xuma Ka Rito La Xikwembu
Perspicaz vol. 3 paj. 396
Ku Tsalisa
Vanhu a va tsalisa vito la vona, longoloko wa lixaka la vona ni ndjangu wa vona. Ku tsalisa loku a ku nga yentxeliwi ku konta vanhu ntsena. A ku tsalisa loku Bibele li vulavulaka hi kona, a ku tirhela minchumu ya yinyingi, ya ku fana ni ku hakela impoxtu, ku nyikiwa ntirho wa ku ya nyimpini, kumbe ku nyikiwa mintirho ya le tempeleni (ka valevhi lava nga langiwa).
15 KU YA KA 21 KA FEVEREIRO
XUMA XI NGA KA RITO LA XIKWEMBU | TINHLAYO 3-4
“Ntirho Wa Valevhi”
Perspicaz vol. 3 paj. 484
Vaprista
Ka Xipfumelelwanu Xa Nawu. Nkama Vayisrayele a va li ka wukarawa aGibita, Yehovha a hlawule mativula hinkwawu ya vavanuna va Vayisrayele nkama a nga dlaya mativula hinkwawu ya Vagibita ka khombo la wu 10. (Eks 12:29; Tin 3:13) Impela mativula lawa a ma lumba Yehovha swaku ma tirhisiwa ka ntirho wa xipesiyali. Loko Xikwembu a xi yo swi lava, a xi ta va xi veke vavanuna hinkwavu va Vayisrayele swaku va va vaprista kumbe vavoneleli va ndhawu ya ku kwetsima. Kambe planu la xona kuve ku langa vavanuna hinkwavu va lixaka la Levhi swaku va yentxa ntirho lowu. Hi mhaka leyo xi pfumelele swaku vavanuna va Valevhi va pfaleta vavanuna hinkwavu va matevula va 12 va tinxaka ta Vayisrayele (leswo swi patsa ni tinxaka timbirhi leti nga huma ka vana vambirhi va Yosefa, ku nga Efrayimi na Manasse). Loko va kontiwa ku kumeke 273 wa vana va matevula va ku kala va nga li Valevhi, va ku sukela ka wheti yin’we ku ya henhla. A va li vanyingi ku tlula vavanuna va Valevhi a za Yehovha a vula swaku mun’we ni mun’we ka lava 273 a a ti hakeleli male ya ku ringana 780 MT. Male leyi va yi nyikete Aroni ni vana va yena. (Tin 3:11-16, 40-51) Na yi nge se hakeliwa male leyi, Yehovha a rhange hi ku langa vavanuna va ndjangu wa Aroni ka lixaka la Levhi leswaku va va vaprista va Vayisrayele. — Tin 1:1; 3:6-10.
Perspicaz vol. 2 mapaj. 693-694
Valevhi
Mintirho. Valevhi a va vumbiwa hi 3 wa mindjangu, ku nga Gerixoni, Kohata na Merari leyi a yi ta hi ka papayi wa vona Levhi. (Gn 46:11; 1Tk 6:1) Hinkwayu mindjangu leyi a yi yaveliwe ndhawu ya ku tshama ka yona a kusuhi ni tabernakela. A ndjangu wa Aroni wa vakohata a wu tshama frenti ka tabernakela ka tlhelo la le wuxeni. Se Vakohata van’wana a va tshama ka tlhelo la sul, a va Gerixoni a va tshama wupeladlambu, se a Vamerarita a va li norte. (Tin 3:23, 29, 35, 38) A ku gwimba tabernakela ni ku yi susa yi ya ka ndhawu yin’wana a ku li ntirho wa Valevhi. Loko ku fika nkama wa ku susa matende, Aroni ni vana va yena hi vona a va susa kortina leli a li hambanisa ndhawu ya ku kwetsima ka ndhawu ya ku kwetsima ngopfu, va mbhonya arka la ntwananu, ma alitari ni swibya swin’wana swa ku kwetsima. Se Vakohata hi vona a va tlakula minchumu leyi. Vagerixoni a va tlakula tipanu, swa ku mbhonya hi swona, makortina ni tingoti ta tende (swi nga yentxeka ku li tingoti ta lona tabernakela). Se va Merari hi vona a va susa timhandzi, ni tingoti leti a ti tiyisa tabernakela. — Tin 1:50, 51; 3:25, 26, 30, 31, 36, 37; 4:4-33; 7:5-9.
Perspicaz vol. 2 paj. 694
Valevhi
Ka nkama wa Moxe, Mulevhi a a sungula ku yentxa ntirho wa yena wa ku fana ni ku tlakula tabernakela loko yi yisiwa kun’wana ni swibya swa yona, loko se a ni 30 wa malembe. (Tin 4:46-49) Mintirho yin’wana a va ta yi yentxa na va ni 25 wa malembe, kambe swi tikomba ingi a va nga fanelanga va yentxa mintirho ya ku tika ya ku fana ni ku rhurhisa tabernakela. (Tin 8:24) Ka nkama wa Hosi Davhida, lava a va yentxa ntirho lowu podiya va va ni 20 wa malembe. Xivangelo hi leswaku Davhida a vule swaku tabernakela a yi nga ha ta famba fambisiwa hikusa se a ku ta yakiwa tempele. Mintirho leyi a swi boha swaku munhu a yi yentxa a yi nyikiwa vanhu lava nga ni malembe ya hansi ka 50. (Tin 8:25, 26; 1Tk 23:24-26) Valevhi a va fanele va wu tiva kahle Nawu, hikusa a va fanele va vitaniwa minkama ya yinyingi swaku va ya lerha va tlhela va djondzisa vanhu. — 1Tk 15:27; 2Tk 5:12; 17:7-9; Neh 8:7-9.
Lavetela Xuma Ka Rito La Xikwembu
Murindzi 01/08/06 paj. 23 par. 13
Tlhariha U Chava Xikwembu!
Leswi Yehovha a nga pfuna Davhida hi nkama lowu a a li ku karhatekeni swi mu yentxe swaku a chava Xikwembu a tlhela a xi tshemba hintamu. (Tipisalema 31:22-24) Kambe ku ni minchumu yinharhu yi nga humelela ka wutomi la Davhida yi nga yentxa swaku a nga ha xi chavi hintamu Xikwembu ivi a yentxa xidjoho. Xa ku sungula i ve nkama lowu va nga teka a arka la xipfumelelwanu va li yisa Yerusalema hi ku tirhisa xikarinyana ku ve Nawu wa Yehovha a wu vula leswaku Valevhi a va fanele va li tlakula. Nkama Uza a nga zama ku khoma a arka a tekele ku fa kolanu hikusa leswi a nga swi yentxa a swi nga kombisi xihloniphu. Phela Uza a yentxe xidjoho xa xikulu, kambe leswo swi yentxeke hi mhaka ya leswi Davhida a kalaka a nga wu yingisanga a Nawu wa Xikwembu. Ku chava Xikwembu swi vula ku yentxa swilo hi ndlela leyi xi swi lavisaka xiswona. — 2 Samuwele 6:2-9; Tinhlayo 4:15; 7:9.
22 KU YA KA 28 KA FEVEREIRO
XUMA XI NGA KA RITO LA XIKWEMBU| TINHLAYO 5-6
“Hi Nga Va Tekelelisa Ku Yini Vanaziri?”
Perspicaz vol. 3 paj. 71
Vanaziri
Lava a va yentxa xiboho xa ku va Vanaziri a va tsimbisiwa ku yentxa 3 wa minchumu. 1) A va nga fanelanga va nwa byala, naswona a va nga fanelanga va dla nchumu xa ku hambiwa hi mawuvha, hambi ma li ya mambisi, ya ku wupfa, ya ku woma, hambi hi ku nwa a sumu la ku hambiwa hi mawuvha kumbe vinagri. 2) A va nga fanelanga va tsemeta misisi. 3) A va nga fanelanga va khoma mirhi wa munhu wa ku fa hambi kova wa xaka la vona. — Tin 6:1-7.
Xihlambanyu Xa Ku Hlawuleka. Lweyi a a yentxa xihlambanyu lexi xa ku hlawuleka a a fanele a hanya tanihi Munaziri leswi vulaka ku tirhela Yehovha hi ku helela. A a nga yentxi xihlambanyu lexi hi ku lava ku khuziwa hi vanhu. Kambe wutomi la yena hinkwalu la wunaziri a a li tirhisela ku tirhela Yehovha. — Tin 6:2, 8; komparara ni Gn 49:26.
Phela minawu leyi nga nyikiwa vanaziri a yi ni ntlhamuselo wa lisima ka wugandzeli la Yehovha. Ku fana ni vaprista lavakulu lava a va ni ntirho wa ku kwetsima, lava a va nga fenelanga va khoma mimirhi ya vanhu va ku fa hambi ku li ya maxaka ya vona, na vona vanaziri a va nga fanelanga va tshuka va swi yentxa leswo. Vaprista lavakulu ni lava a va tirhisana na vona a va nga fanelanga va nwa byala hikusa ntirho lowu a va li na wona a wu li wa lisima hintamu ka Yehovha. — Lv 10:8-11; 21:10, 11.
Funtshi Vanaziri a va fanele va tshika misisi ya vona yi kula hintamu ku nga leswi a swi ta komba van’wana swaku vona i Vanaziri lava va nga langiwa swaku va yentxa ntirho wa ku kwetsima. (Tin 6:5) A rito la Xiheberu leli nge na·zír, li vula nsinya wa mawuvha lowu a wu nga podariwanga ka malembe ya Sábado ni ya Jubilewu. (Lv 25:5, 11) A xixapana xa woru lexi a xi li ka nhloko ya muprista wa mukulu, a xi tsaliwe marito lawa ma nge: “Ku kwetsima i ka Yehovha”, leswo a swi vula xikombiso xa ku kwetsima xa ku tinyiketela ka vona [hi Xiheberu i né·zer]. (Eks 39:30, 31) Hi ku fanana a xilembe xa wuhosi lexi a xi yambaliwa hi tihosi ta Israyele, na xona a vitaniwa né·zer. (2Sa 1:10; 2Th 11:12; vona COROA; DEDICAÇÃO.) Mupostolo Pawulo a vule swaku ka bandla la Wukreste a misisi ya ku leha ya wansati a yi pfaleta nchumu xa ku mbhonya nhloko. Leswo a swi ta mu kumbuxa swaku a ni ntirho wa ku hambana ni lowu a wu yentxiwa hi wanuna a bandleni naswona a swi mu khumbukisa ku tiveka hansi ka lunghiselelo la Yehovha. A minawu leyi a yi nyikiwe Vanaziri ya ku kala va nga tsemi misisi, va nga nwi byala ni swaku va tshama va basile ka mahanyelo ya vona a yi va khumbukisa a lisima la ku tinyiketela ka Yehovha ni ku tiveka hansi. — 1Ko 11:2-16; vona CABELO; COBERTURA PARA CABEÇA; NATUREZA.
Lavetela Xuma Ka Rito La Xikwembu
Murindzi 15/01/05 paj. 30 par. 2
Swivutiso Swa Valerhi
Samsoni a a li Munaziri hi ndlela leyi hambaneke. Loko Samsoni a nga si psaliwa, ntsumi ya Yehovha yi byele mamana wa yena yi ku: “U ta va ni nyimba naswona u ta psala n’wana wa djaha. A nga fanelanga a tsemetiwa a misisi, hikusa n’wana a ta psaliwa na a li Munaziri wa Xikwembu naswona hi yena a nga ta sungula ku ponisa Vaisrayele ka mavoko ya Vafilista.” (Vaavanyisi 13:5) Samsoni a nga xi yentxanga xitshembiso xa xihlambanyu xa Wunaziri. A a li Munaziri lweyi a nga langiwa hi Xikwembu, naswona a a ta va Munaziri wutomi la yena hinkwalu. Nawu lowu a wu tsimbisa ku khoma mimirhi ya vanhu va ku fa a wu nga tirhi ka yena. Loko a wu tirha ka yena a gama a phazama a khoma mirhi wa munhu lweyi a nga fa, a a nga ta swi kota ku tlhela a va Munaziri. Hi mhaka leyo, minawu leyi a yi tirha ka lava a va ta va Vanaziri wutomi la vona hinkwalo a yi hambanile ni ya lava a va li Vanaziri hi ku swi rhandza.