Mareferensiya Ya Xibukwana Xa Mintlhanganu Ya Mahanyelo Ni Ntirho
3 KU YA KA 9 KA JANEIRO
XUMA XI NGA KA RITO LA XIKWEMBU | VAAVANYISI 15-16
“Ku Kanganyisa Swi Bihile!”
Murindzi 15/04/12 paj. 8 par. 4
Ku Kanganyisa I Xikombiso Xa Masiku Ya Wugamu
Munhu mun’wana lweyi a a li mukanganyisi a ku li Delila, lweyi a a rhandzana na Samsoni. Phela Samsoni a a lava ku lwa ni Vafilista hi mhaka ya vanhu va Xikwembu. Swi nga yentxeka a 5 wa tihosi ta Vafilista a ti swi tiva swaku Delila a a nga mu rhandzi hi mbilu hinkwayu Samsoni. Hi mhaka leyo, ti mu tshembise ku mu nyika male ya yinyingi swaku a tsumbula leswaku Samsoni a a ma kuma kwini matimba ya makulu, leswaku ti ta kota ku mu dlaya. Leswi Delila a a rhandza swilo, a pfumelile ku xenga Samsoni, kambe ku ringana makhambi manharhu Delila a tsandzekile ku tiva swaku Samsoni a a ma kuma kwini matimba. Hambileswo “a a tshamela ku mu vangela guwa ni ku mu sindzisa.” Hi mhaka leyo Samsoni “a a nga ha swi koti ku tiyisela.” A gama a mu byela swaku misisi ya yena a yi nge se tshama yi tsemiwa ni swaku loko o tshuka a yi tsema, matimba ya yena a ma ta hela. Leswi Delila se a a tiva mhaka leyi, a vitane munhu leswaku a ta tsema misisi ya Samsoni na a yetlelile ka matsolo ya yena, a gama a mu nyiketa ka Vafilista leswaku va ta mu yentxa xin’wana ni xin’wana lexi va xi lavaka. (Vaava. 16:4, 5, 15-21) Phela leswi Delila a nga swi yentxa a swi bihile. Hikusa hi mhaka ya ku rhandza swilo a kanganyise wanuna lweyi a a mu rhandza.
Murindzi 15/01/05 paj. 27 par. 4
Tipontu Ta Lisima Ta Buku La Vaavanyisi
14:16, 17; 16:16. Ku sindzisa munhu swaku a hi nyika kumbe a hi yentxela nchumu hi ku mu rilela kumbe hi ku tshamela ku khala, swi nga wonha muchadu. — Swivuriso 19:13; 21:19.
Murindzi 15/04/12 mapaj. 11-12 mapar. 15-16
Ku Kanganyisa I Xikombiso Xa Masiku Ya Wugamu
Vanhu lava nga chada va nga swi kotisa ku yini ku tshama va tshembekile ka lweyi va nga chada na yena? Rito la Xikwembu li li: “Hanya wutomi ni nsati [kumbe nuna] lweyi u mu rhandzaka ka masiku hinkwawu ya wutomi la wena.” (Swi. 5:18; Ekl. 9:9) Loko nuna na nsati va ya va kula, va fanele va yentxa hinkwaswu leswi va nga swi kotaka leswaku wunghanu la vona li tshama li tiyile. Leswo swi vula swaku va fanele va kombana timpsalu, va kulisa a wunghanu la vona naswona va heta nkama xikan’we. Va fanele va tikarhatela ku vhikela a muchadu wa vona ni wunghanu la vona na Yehovha. Leswaku va yentxa leswo, va fanele va djondza Bibele xikan’we, va famba xikan’we nkama ni nkama ka ntirho wa ku nchumayela va tlhela va khongela xikan’we va kombela swaku Yehovha a va katekisa.
TSHAMA U TSHEMBEKILE KA YEHOVHA
Ku ni vamakwerhu abandleni lava nga tshama va yentxa swidjoho swa swikulu, va gama ‘va layiwa swinene leswaku va ta tiya lipfumelweni.’ (Tito 1:13) Kambe van’wana swi lave va susiwa bandleni hi mhaka ya mahanyelo ya vona. Kambe lava va nga pfumela ku “layiwa” swi va pfunile leswaku va tlhela va va ni wunghanu la linene na Yehovha. (Heb. 12:11) Se hi ta yentxa yini loko hi ni xaka kumbe munghanu lweyi a nga susiwa bandleni? Leswi hi nga ta swi yentxa swi ta kombisa swaku hi tshembeka ka lweyi a nga susiwa kumbe ka Xikwembu. Yehovha a ta swi vona loko hi nga wu yingisi nawu lowu nge hi nga titlhanganisi ni munhu lweyi a nga susiwa bandleni. — Lerha 1 Vakorinto 5:11-13.
Lavetela Xuma Ka Rito La Xikwembu
Murindzi 15/03/05 paj. 27 par. 6
Samsoni A Hlula Hi Ku Pfuniwa Hi Yehovha!
Samsoni a a tinyimisele ku hetisisa leswi a a swi lava, ku nga ku lwa ni Vafilista. Leswi Samsoni a a lava ndhawu ya ku yetlela ka yona ka doropa la valala va yena, a ye a ya yetlela kaya ka nghwavani aGaza leswaku a ta kota ku lwa ni valala va Xikwembu. Phela Samsoni a nga yanga kaya ka wansati lweyi leswaku va yentxa nsila ya swa masangu. A hume kaya ka wansati lweyi xikarhi ka wusiku, a hohlota swipfalu swa doropa ni tinsika timbirhi, a swi tlakula a famba na swona a henhla ka nhava kusuhi ni Hebroni, lani a ku li mpfhuka wa ku ringana 60 wa makilometru. Phela Samsoni a yentxe leswo hikusa a a kongomisiwa hi Yehovha naswona hi yena a nga mu nyika matimba. — Vaavanyisi 16:1-3.
10 KU YA KA 16 KA JANEIRO
XUMA XI NGA KA RITO LA XIKWEMBU | VAAVANYISI 17-19
“Ku Kala Ku Yingisa Minawu Ya Yehovha Swi Tisa Swikarhatu”
Perspicaz vol. 2 paj. 369 par. 7
Mikiya
1. Wanuna wa Efrayimi lweyi a kalaka a nga wu yingisanga Nawu wa wu 8 ka 10 wa Minawu leyi Yehovha a nga yi nyika Moxe. (Eks 20:15) Mikiya a yivele mamana wa yena male ya 1.100 ya prata. Nkama a nga tlhelisa male yoleyo, mamana wa yena a te: “Male leyi ni ta yi nyika Yehovha swaku wena n’wana wa mina u hamba xifaniso xa ku vatliwa ni xifaniso xa nsimbi. Se prata leli li ta va la wena.” A tlhele a teka 200 wa mapesa ya prata a “hamba xifaniso xa ku vatliwa ni xifaniso xa nsimbi,” leswi Mikiya a nga gama a swi teka a swi veka kaya ka yena. Mikiya lweyi a a ni “yindlo ya swikwembu,” a yentxe efodi ni terafimi a tlhela a veka n’wana wa yena swaku a va muprista wa yena. Hambileswi Mikiya a nga yentxa leswo na a pimisa swaku a swi yentxela Xikwembu xa ntiyiso, a swi nga li swinene hikusa a swi nga fambisani ni leswi Nawu a wu swi vula, hikusa a wu tsimbisa ku gandzela swifaniso (Eks 20:4-6) naswona a swi kombisa swaku a a nga li hloniphi tabernakela la Yehovha ni nawu wa wuprista. (Vay 17:1-6; Dt 12:1-14) Hi ku famba ka nkama, Mikiya a thole Yonathani n’wana wa Gerixomu, lweyi a a li ntukulu wa Moxe kuva a va muprista wa yena hileswi a a li Mulevhi. (Vay 18:4, 30) Leswi se a a tsakile hi swilo swa ku biha leswi a nga swi yentxa, a te: “Swoswi na swi tiva swaku Yehovha a ta ni katekisa, hikusa muprista wa mina i Mulevhi.” (Vay 17:7-13) Phela leswi Mikiya a nga swi yentxa a swi bihe hintamu hikusa hambi hi Yonathani a a nga faneleki ku va muprista hikusa a a nga ti hi ka Aroni. — Tin 3:10.
Perspicaz vol. 2 paj. 369 par. 9
Mikiya
Loko se ku hundze nkama, Mikiya ni vanhu va yena va hlongolise vana va Dani. Loko se va va kumile naswona vana va Dani va va vutise swaku a va lava yini ka vona, Mikiya a te: “Mi teke muprista ni swikwembu swa mina leswi ni nga swi yentxa mi famba na swona, se ni sale ni yini ke?” Vana va Dani va game va byela Mikiya swaku loko a tama a va landzelela a va ta mu dlaya, yena ni ndjangu wa yena. Se loko a vona swaku vana va Dani va ni matimba ku mu tlula, a tlhelele kaya. (Vay 18:22-26) Vana va Dani va game va dumela doropa la Layixi va tlhela va li hisa naswona hi wugamu ka ndhawu yoleyo va yake doropa leli va nga li nyika vito la Dani. Funtshi Yonathani ni vana va yena va game va va vaprista va vana va Dani, naswona “va nyimise xifaniso xa ku vatliwa lexi nga yentxiwa hi Mikiya naswona xi ve kolanu masiku hinkwawu lawa yindlo ya Xikwembu xa ntiyiso a yi li aXilo.” — Vay 18:27-31.
Lavetela Xuma Ka Rito La Xikwembu
Murindzi 15/12/15 paj. 10 par. 6
Bibele Leli Khumbaka Mbilu
Namuntlha, ku ni wumboni la ku tala leli kombisaka swaku vito la Xikwembu li fanele li va kona ka Bibele. Ka Wuhundzuluxeli La Misava Ya Nyuwani la 2013 leli nga yampsisiwa, vito la Xikwembu li kumeka kolomu ka 7.216 wa makhambi. Ka Bibele leli la nyuwani ku yengeseliwe 6 wa makhambi lani vito la Xikwembu li kumekaka kona. A 5 wa wona ma kumeka ka 1 Samuwele 2:25; 6:3; 10:26; 23:14, 16. Leswaku ku tiviwa swaku a vito la Xikwembu li fanele li kumeka ka tindzimana leti, swi tsumbuliwe ka mabuku ya Mar Morto hikusa na wona ka tindzimana leti ma ni vito la Xikwembu. Phela mabuku lawa i ya khale hintamu ku tlula mabuku ya va massorético ya Xiheberhu lawa ma nga tirhisiwa swaku ku hundzuluxeliwa Bibele la Misava Ya Nyuwani la khale. Handle ka leswo, a vito la Xikwembu li tlhela li kumeka ka buku la Vaavanyisi 19:18. Leswaku vito la Xikwembu la kumeka ka ndzimana leyi swi tiviwe hi mhaka ya leswi ku nga yentxiwa mapexkiza ka mabuku ya khale ya Bibele lawa ma nga tsaliwa hi mavoko.
17 KU YA KA 23 KA JANEIRO
XUMA XI NGA KA RITO LA XIKWEMBU | VAAVANYISI 20-21
“Tama U Kombela Ku Pfuniwa Hi Yehovha”
Murindzi 15/09/11 paj. 32 par. 2
U Nga Mu Tekelelisa Ku Yini Finiyasi Loko U Kumana Ni Swikarhatu?
Loko ku pfinyiwe ni ku dlayiwa nsati mun’wana wa Mulevhi hi vavanuna va Gibiya lava humaka ka lixaka la Benjamini, tinxaka letin’wana ti tilunghiselele ku ya lwa ni lixaka la Benjamini. (Vaava. 20:1-11) Kambe na ti nge se ya lwa ti khongele ti kombela ku pfuniwa hi Yehovha. Hambileswo ti hluliwile kambirhi hi ndlela ya ku vava. (Vaava. 20:14-25) Ku nga va swaku leswo a swi ta ti yentxa ti pimisa swaku swikhongelo swa tona a swi nga pfuni nchumu? Kumbe ti pimisa swaku a ti khatisiwa hi Yehovha?
Murindzi 15/01/05 paj. 27 par. 9
Tipontu Ta Lisima Ta Buku La Vaavanyisi
20:17-48 — Hi mhaka muni Yehovha a pfumelele lixaka la Benjamini li hlula tinxaka letin’wana kambirhi, hambileswi lixaka la Benjamini a li fanele li khatisiwa? Ku va Yehovha a pfumelele swaku tinxaka ta ku tshembeka ti rhanga ti hluliwa nyimpini a a lava ku vona swaku ti tinyimisele ku fikela kwini ku susa wubihi aIsrayele.
Murindzi 15/09/11 paj. 32 par. 4
U Nga Mu Tekelelisa Ku Yini Finiyasi Loko U Kumana Ni Swikarhatu?
Hi nga djondza yini ka mhaka leyi? Swikarhatu swin’wana swi nga tama swi va kona bandleni, hambiloko madoda ma yentxe hinkwaswu ma nga swi kota swaku ma swi lulamisa ni ku tlhela ma kombela ku pfuniwa hi Yehovha. Loko leswo swi yentxeka, madoda ma fanele ma khumbuka marito ya Yesu lama nge: “Tamani mi kombela [kumbe mi khongela], mi ta nyikiwa; tamani mi lava, mi ta swi kuma; tamani mi gongondza, mi ta pfuleliwa.” (Luk. 11:9) Hambiloko swikhongelo swa madoda swi tikomba swi hlwela ku hlamuliwa, ma nga tiyiseka leswaku Yehovha a ta swi hlamula hi nkama lowu faneleke.
Lavetela Xuma Ka Rito La Xikwembu
Murindzi 01/05/14 paj. 11 mapar. 4-6
A Wu Swi Tiva?
A khale nchumu xa ku txopa hi xona a xi tirhisiwa ku yini anyimpini?
Nchumu xa ku txopa hi xona lexi a va xi tirhisa khale hi xona lexi Davhida a nga xi tirhisa swaku a dlaya Goliyadi lweyi a a lehe hintamu a tlhela a va ni matimba. Swi nga yentxeka Davhida a djondze ku tirhisa nchumu xolexo na a ha li mutsongo nkama na a risa swiharhi. — 1 Samuwele 17:40-50.
Mafoto ya nchumu xa ku txopa hi xona ma kumeka ka mafoto man’wana aGibita ni Asiriya lawa ma nga susiwa hi minkama ya ku tsaliwa ka Bibele. Nchumu wolowo a wu ni ndhawu leyi munhu a a ta peta ribye la litsongo ka yona leli ringanaka ni laranja hi ku kula ka lona. A a ta gama a ndzulukisa nchumu wolowo a henhla ka nhloko ya yena a gama a tshika ngoti yin’we leswaku ribye li ta kota ku tsutsuma hintamu naswona li kongoma lani a lavaka li ya kona.
Vakambisisi va Oriente Médio va kume maribye ya manyingi lawa a ma tirhisiwa ka nchumu wa ku txopa hi wona atinyimpini ta khale. Swi nga yentxeka masonchwa lawa a ma yi tiva kahle nyimpi, a ma ndzulukisa maribye wolawo lakakuva ma tsutsuma hintamu ma za ma fikisa kolomu ka 160 ku ya ka 240 wa makilometru hi wora lin’we. Hambileswi lava nga djondza ngopfu va kalaka va nga tiyiseki swaku nchumu wolowo a wu gama kwini, swa tikomba swaku a wu li wukulu naswona a wu ni matimba ya ku dlaya. — Vaavanyisi 20:16.
24 KU YA KA 30 KA JANEIRO
XUMA XI NGA KA RITO LA XIKWEMBU | RHUTI 1-2
“Kombisa Lirhandzu La Ku Kala Li Nga Heli”
Murindzi 02/16 paj. 10 par. 5
Tekelela Vanghanu Lavakulu Va Yehovha
Ndjangu wa Rhuti a wu tshama Mowabu. A a ta swi kota ku tlhelela ka wona naswona swi nga yentxeka a wu ta mu hlayisa. A a va tiva kahle vanhu va Mowabu, lirimi ni mahanyelo ya vona. Kambe loko va fika Betlehema Nawomi a a nga ta swi kota ku yentxela Rhuti swilo leswi hinkwaswu. Naswona Nawomi a a pimisa swaku a a nga ta swi kota ku nyika Rhuti wanuna kumbe munti. Hi mhaka leyo, Nawomi a byele Rhuti na Orpa swaku va tlhela ka maxaka ya vona aMowabu. Se Orpa “a tlhelele ka maxaka ya yena ni le ka swikwembu swa yena.” (Rhuti 1:9-15) Kambe Rhuti a nga tlhelelanga ka maxaka ya yena ni ka swikwembu swa vona swa mavunhwa.
Murindzi 02/16 paj. 10 par. 6
Tekelela Vanghanu Lavakulu Va Yehovha
Swi tikomba Rhuti a djondze hi Yehovha ka nuna wa yena kumbe ka Nawomi. A djondze leswaku Yehovha a nga fani ni swikwembu swa Vamowabu. Rhuti a a rhandza Yehovha naswona a a swi tiva swaku a fanele a mu gandzela. Kutani Rhuti a yentxe xiboho xa xinene. A byele Nawomi a ku: “Maxaka ya wena ma ta va maxaka ya mina ni Xikwembu xa wena xi ta va Xikwembu xa mina.” (Rhuti 1:16) Ku pimisa hileswi Rhuti a a mu rhandzisa xiswona Nawomi swa hi tiyisa. Kambe xa lisima hintamu, i lirhandzu leli Rhuti a a li na lona hi Yehovha. Leswi swi tlhele swi tsakisa na Bowazi, lweyi hi ku famba ka nkama a nga mu khensa hileswi ‘a nga ta ka Yehovha leswaku a ta tumbela ka yena.’ (Lerha Rhuti 2:12.) Marito lawa Bowazi a nga ma byela Rhuti, ma hi khumbukisa leswi xinyenyana xa xitsongo xi vhikelisiwaka xiswona ka timpapa ta mamani wa xona. (Pis. 36:7; 91:1-4) Hilani ku fanaka, Yehovha a vhikele Rhuti hi lirhandzu ni ku tlhela a mu katekisa hi mhaka lipfumelo la yena. Rhuti a nga tisolanga hi xiboho lexi a nga xi yentxa.
Lavetela Xuma Ka Rito La Xikwembu
Murindzi 01/03/05 paj. 27 par. 1
Tipontu Ta Lisima Ta Buku La Rhuti
1:13, 21 — Ku nga va swaku Yehovha hi yena a nga yentxa leswaku Nawomi a hlupheka? Ihim, naswona Nawomi a nga zanga a lumbeta Yehovha a vula swaku a mu yentxele swilo swa ku biha. Kambe loko a pimisa hi swikarhatu hinkwaswu leswi a nga kumana na swona, Nawomi a a vona swaku Yehovha a a lwa na yena. A a karhatekile hintamu lakakuva a nga swi twisisi leswi a swi yentxeka. Handle ka leswo, hi nkama wolowo ku kuma vana a swi voniwa ku li ku katekisiwa hi Xikwembu, kasi loko munhu a nga na vana a swi kombisa swaku Xikwembu a xi mu katekisi. Se leswi Nawomi a a nga na vatukulu ni leswi a nga feliwa hi vana vambirhi vavanuna, swi nga yentxeka Nawomi a pimise swaku Yehovha a a nga ha na mhaka na yena.
31 KA JANEIRO KU YA KA 6 KA FEVEREIRO
XUMA XI NGA KA RITO LA XIKWEMBU | RHUTI 3-4
“Tama U Va Ni Mahanyelo Ya Manene”
Murindzi 01/10/12 paj. 22 par. 5
“Wansati Wa Munene Hintamu”
Impela leswi Bowazi a nga vulavula na Rhuti hi ndlela ya ku rhula swi mu tiyise hintamu Rhuti. Bowazi a te: “Yehovha a a ku katekisi n’wananga. Swoswi u kombise lirhandzu la likulu ku tlula ku sunguleni, hikusa a wu lavanga madjaha lawa ma nga swisiwana kumbe ya ku ganya.” (Rhuti 3:10) Marito lawa ma nge “ku sunguleni” ma vulavula hi nkama lowu Rhuti a nga kombisa lirhandzu ka Nawomi hi ku famba na yena va tlhelela aIsrayele leswaku a ta mu hlayisa. Kasi marito lawa ma nge “swoswi” ma vulavula hi nkama lowu a va li xikan’we aIsrayele. Bowazi a a swi tiva swaku wansati wa mutsongo wa ku fana na Rhuti swi nga yentxeka a a ta va a kume nuna xikarhi ka madjaha ya ku ringana na yena, ku nga na mhaka swaku ma ganyile kumbe i swisiwana. Kambe handle ka leswo, Rhuti a a lava ku yentxela Nawomi swilo swa swinene ni nuna wa Nawomi lweyi se a a file, leswaku xiloso xa nuna wa Nawomi xi tama xi va kona. Phela a lirhandzu leli Rhuti a nga li komba Nawomi hi lona li nga khumba a mbilu ya Bowazi.
Murindzi 01/10/12 paj. 23 par. 1
“Wansati Wa Munene Hintamu”
Phela Rhuti a tsake hintamu loko a pimisa hi leswi Bowazi a nga swi vula loko a te i “wansati wa munene hintamu” ka vanhu hinkwavu! Swa tikomba swaku leswi Rhuti a a swi lava hintamu ku tiva Yehovha a tlhela a mu tirhela, swi yentxe swaku a tiviwa a li munhu wa munene. Naswona a kombe Nawomi timpsalu, hikusa hi ku swi rhandza a a tinyimisele ku hanyisa xileswi a va hanyisa xiswona aIsrayele hambileswi a a nga swi tolovelanga. Loko hi tekelela lipfumelo la Rhuti, hi ta tikarhatela ku hlonipha vanhu van’wana ni leswi va hanyisaka xiswona. Loko hi yentxa leswo hi ta tiviwa hi li vanhu va vanene.
Murindzi 01/10/12 paj. 24 par. 3
“Wansati Wa Munene Hintamu”
Bowazi a chade na Rhuti. Bibele li li: “Yehovha a mu katekisa, kutani a va ni nyimba a psala n’wana wa mufana.” Vavasati va Betlehema va katekise Nawomi va tlhela va tlangela Rhuti. Va vule swaku ka Nawomi, Rhuti wa yampsa ku tlula 7 wa vana. Phela hi ku famba ka nkama n’wana wa Rhuti a ve vhovho wa Hosi Davhida. (Rhuti 4:11-22) Naswona Davhida a game a va vhovho wa Yesu Kreste. — Matewu 1:1.
Lavetela Xuma Ka Rito La Xikwembu
Murindzi 01/03/05 paj. 29 par. 3
Tipontu Ta Lisima Ta Buku La Rhuti
4:6 — Mukutsuli a li ta mu lahlekelisa ku yini tshomba la yena loko a kutsula? Loko munhu lweyi a nga xisiwana a xavisa masimu ya yena, mukutsuli a a fanele a humesa male ya ku xava masimu wolawo hi ku ya hi swaku ku sale malembe mangani leswaku ku fika Jubilewu. (Levhitika 25:25-27) Leswo a swi ta yentxa swaku masimu ma nga duri. Handle ka leswo, loko Rhuti o va ni n’wana wa mufana, masimu wolawo ma nga xaviwa a ma ta va tshomba la n’wana wa yena, ku nga li ya xaka la mukutsuli.
7 KU YA KA 13 KA FEVEREIRO
XUMA XI NGA KA RITO LA XIKWEMBU | 1 SAMUWELE 1-2
“Khongela Ka Yehovha Hi Mbilu Hinkwayu”
Tekelela paj. 55 par. 12
A Byele Yehovha Leswi Nga Ka Mbilu Ya Yena Hi Xikhongelo
Hana a siye xikombiso xa xinene xa ku khongela ka vanhu hinkwavu lava tirhelaka Yehovha. Hi lirhandzu, Yehovha a kombela vanhu va yena swaku va vulavula na yena hi xikhongelo na va chunsekile, va mu byela leswi va karhata ku fana ni n’wana lweyi a tshembaka papayi wa yena lweyi a mu rhandzaka. (Lerha Tipisalema 62:8; 1 Vatesalonika 5:17.) Loko mupostolo Pedru a vulavula hi ku khongela ka Yehovha a vule marito ya lisima lawa ma tiyisaka, lawa ma nge: “Mi rhula ku vilela ka n’wina hinkwaku ka xona, hikusa xa mi hlayisa.” — 1 Ped. 5:7.
Murindzi 15/03/07 paj. 16 par. 4
Hana A Ku Kumise Ku Yini Ku Rhula
Hi nga djondza yini ka hinkwaswu leswi? Loko hi khongela ka Yehovha hi mu byela swikarhatu swa hina, hi nga mu byela ni ndlela leyi hi titwaka hi yona hi tlhela hi kombela swaku a hi pfuna hi mbilu hinkwayu. Loko ku nga na lexi hi nga xi yentxaka swaku hi lulamisa xikarhatu xa hina hi fanele hi xi tshika ka mavoko ya Yehovha. Phela a ku na swin’wana swa ku tlula leswo leswi hi nga swi yentxaka. — Swivuriso 3:5, 6.
Lavetela Xuma Ka Rito La Xikwembu
Murindzi 15/03/05 paj. 21 par. 5
Tipontu Ta Lisima Ta Buku La Samuwele Wa Ku Sungula
2:10 — Hi mhaka muni Hana a khongele a kombela Yehovha swaku a “nyika matimba hosi ya yena” ku ve a ku nga na hosi leyi a yi fuma Jerusalema hi nkama wolowo? Leswaku Vayisrayele a va ta va ni munhu lweyi a a ta va hosi ya vona se a swi vuliwile ka Nawu wa Moxe. (Deteronoma 17:14-18) Na a nge se fa, Yakobo a vule wuprofeta leli: “Nhonga ya wuhosi a yi nge suki ka Yuda.” (Genesa 49:10) Handle ka leswo, Yehovha a vule leswi hi Sara vhovho wa Vayisrayele: “Tihosi ta matiko ti ta huma ka yena.” (Genesa 17:16) Hi mhaka leyo, loko Hana a khongela a a vulavula hi hosi leyi a yi ta fuma ka nkama lowu taka.
14 KU YA KA 20 KA FEVEREIRO
XUMA XI NGA KA RITO LA XIKWEMBU | 1 SAMUWELE 3-5
“Yehovha Wa Va Nyika Lisima Vanhu Va Yena”
Murindzi 09/18 paj. 24 par. 3
Yehovha A Hi Nyika Lisima
Samuwele a sungule ku tirha ka tabernakela na a ha li mutsongo hintamu. (1 Samuwele 3:1) Ka wusiku lin’wana ku humelele nchumu xa ku hlamalisa ngopfu loko a li karhi a yetlela. (Lerha 1 Samuwele 3:2-10.) A twe rito la munhu li mu vitana. Hikolaho ka leswi a apimisa leswaku i Eli, lweyi se a agugile, a nga mu vitana, a tsutsumele ndlwini ya yena ivi a ku: “Hi mina lweyi, hikusa u ni vitanile.” Kambe Eli a mu byele leswi: “A ni ku vitananga n’wananga.” Ndzhaku ka kuva leswi swi yendleke makhambi mambirhi, Eli a tsumbule leswaku i Yehovha lweyi a a li karhi a vitana Samuwele. Hi mhaka leyo, a byele Samuwele leswi a a fanele a swi yendla loko a tlhela a twa rito li mu vitana. Samuwele a swi yendlile leswi a byeliweke swona. Hayini Yehovha a nga tekelanga ku mu byela Samuwele leswaku hi yena a amu vitana? A hi swi tivi hikusa Bibele a li hlayi nchumu hi swona. Kambe swinga yendleka Yehovha a nga ti tivisanga hileswi a a yanakanya hi ndlela leyi Samuwele a a ta titwa ha yona.
Murindzi 09/18 paj. 24 par. 4
Yehovha A Hi Nyika Lisima
Lerha 1 Samuwele 3:11-18. Nawu lowu Yehovha a wu nyikeke Vayisrayele a wu khutaza vatsongwana leswaku va hlonipha lava kuleke, ngopfungopfu lavanga ni wulawuli. (Eksoda 22:28; Levhitika 19:32) Hikolaho, a swi nga vevuki ka xijahatana xo fana na Samuwele leswaku xi yela Eli hi nkama lowuyani wa nimixo ivi hi xivindzi xi mu byela rungula la kutika la wuyavanyisi leli taka hi ka Yehovha. Bibele li vula leswaku Samuwele “a a chava kubyela Eli xivono.” Hambileswo, Xikwembu xi swi veke livaleni ka Eli leswaku hi xona a xi vitana Samuwele. Eli a kombele Samuwele leswaku a nga fihli nchumu ka leswi Xikwembu xiswi vuleke. Samuwele a mu yingisile ivi “a mu byela marito hinkwawo.”
Lavetela Xuma Ka Rito La Xikwembu
Murindzi 15/03/05 paj. 21 par. 6
Tipontu Ta Lisima Ta Buku La Samuwele Wa Ku Sungula
3:3 — Ku nga va swaku Samuwele a a yetlela ka ndhawu ya ku Kwetsima Hintamu? A a nga yetleli ka yona. Samuwele a a li Mulevhi wa ndjangu wa Vakohata lava a va nga li vaprista. (1 Tikronika 6:33-38) Hi mhaka leyo, a a nga pfumeleliwi ku “vona swilo swa ku kwetsima.” (Tinhlayo 4:17-20) Ka ndhawu ya ku kwetsima lani Samuwele a a pfumeleliwa ku nghena kona a ku li handle ka tabernakela. Phela swi nga yentxeka Samuwele a a yetlela ka ndhawu leyi. Swi tikomba na yena Eli a a yetlela kusuhi ni lani Samuwele a a li kona. Marito lawa ma nge: “Lomu arka ya Xikwembu a yi li kona”, ma vula lani tabernakela a li li kona.
21 KU YA KA 27 KA FEVEREIRO
XUMA XI NGA KA RITO LA XIKWEMBU | 1 SAMUWELE 6-8
“I Mani Hosi Ya Wena?”
Perspicaz vol. 2 paj. 812 par. 7
Mfumu Wa Xikwembu
Va Kombele Hosi. Loko se ku hundze kolomu ka 400 wa malembe na Vayisrayele va hume Gibita naswona na ku hundze 800 wa malembe na Yehovha a yentxe xipfumelelwanu na Abrahamu, Vayisrayele va kombele swaku Yehovha a va nyika munhu lweyi a a ta va fuma leswaku va fana ni matiko man’wana lawa a ma ni tihosi. Xikombelo xa vona a xi kombisa swaku a va nga ha swi lavi ku fumiwa hi Yehovha. (1Sa 8:4-8) I ntiyiso leswaku Vayisrayele a va nyimele swaku Yehovha a va nyika hosi hilani se a a tshembise hakona ka Abrahamu na Yakobo. Naswona leswi a swi va yentxa va tiyiseka hi leswo, hi mhaka Yakobo a profete hi swona na a li kusuhi ni ku fa loko a vulavula hi Yuda (Gn 49:8-10), hi mhaka ya marito lawa Yehovha a nga ma byela Vayisrayele loko se va hume Gibita (Eks 19:3-6), hi mhaka ya Nawu (Dt 17:14, 15), ni hi mhaka ya marito lawa Yehovha a nga yentxa swaku muprofeta Balama a ma vula. (Tin 24:2-7, 17) Hana mamana wa Samuwele a khongele hi mhaka leyo, hikusa a a tshemba swaku Yehovha a ta veka hosi aIsrayele. (1Sa 2:7-10) Hambileswo Yehovha a a nga se xi tlhamusela hi ku helela a “xihundla xa ku kwetsima” lexi vulavulaka hi Mfumu wa yena, naswona a a nge se hlaya swaku Mfumu wa yena a wu ta vekiwa nkama muni, funtshi a nga swi vulanga swaku Mfumu wolowo a wu ta tshamisa ku yini, ni swaku a wu ta fuma matilweni kumbe amisaveni. Se a swi nga twali ku va Vayisrayele va kombela Xikwembu swaku xi va nyika hosi hi nkama wolowo.
Murindzi 01/01/11 paj. 27 par. 1
A Tiyiselile Hambiloko A Hluphiwa
Vona leswi Yehovha a nga mu hlamulisa xiswona Samuwele loko a mu byela mhaka leyi hi xikhongelo. Yehovha a te: “Yingisa hinkwaswu leswi va ku byelaka swona; hikusa a va tshikanga wena, kambe va tshike mina hosi ya vona.” Marito lawa ma mu tiyise hintamu Samuwele hambileswi Vayisrayele a va kwatise Xikwembu xa Matimba Hinkwawu! Yehovha a byele muprofeta wa yena ku va a khumbukisa Vayisrayele hi swikarhatu leswi a va ta kumana na swona loko va fumiwa hi munhu. Loko Samuwele a va byele leswo, va sindzisile va ku: “A swi twali, hina hi lava hosi.” Leswi Samuwele a a yingisa Xikwembu minkama hinkwayu, a veke munhu lweyi Yehovha a nga mu langa swaku a va hosi. — 1 Samuwele 8:7-19.
Murindzi 15/01/10 paj. 30 par. 9
Yehovha A Fuma Hi Ndlela Ya Yinene!
Leswi nga humelela swi kombise swaku leswi Yehovha a nga va byela swona a ku li ntiyiso. Ku fumiwa hi hosi leyi nga munhu swi yentxe leswaku tiko la Israyele li va ni swikarhatu swa swikulu, ngopfungopfu loko hosi yoleyo yi nga ha tshembeki. Loko hi pimisa hi xikombiso xa tiko la Israyele, a swi hlamalisi leswi mimfumu ya vanhu leyi kalaka yi nga mu tivi Yehovha yi tsandzekaka ku fuma vanhu hi ndlela ya yinene. I ntiyiso leswaku vanhu van’wana lava fumaka va kombela swaku Xikwembu xi katekisa minzamu ya vona ya ku yentxa swaku ku va ni ku rhula, va tlhela va vhikela lava va va fumaka. Kambe Xikwembu xi nga va katekisisa ku yini vanhu lava kalaka va nga tiveki hansi ka Mfumu wa xona? — Pis. 2:10-12.
Lavetela Xuma Ka Rito La Xikwembu
Murindzi 01/04/02 paj. 12 par. 13
Hi Mhaka Muni Hi Fanele Hi Tsakamisiwa?
Hi fanele hi rhanga hi txintxa mahanyelo ya hina na hi nge se tsakamisiwa hi va Timboni ta Yehovha. A ku txintxa i xiboho lexi yentxiwaka hi munhu lweyi a nga tinyimisela hi mbilu ya yena hinkwayu ku va mulandzeli wa Kreste. Munhu yelweyo a tshika ku yentxa swilo swa ku biha leswi a a swi yentxa khale leswaku a yentxa ku rhandza ka Xikwembu. Ka Bibele rito leli nge ku txintxa li vula ku tshika swilo swa khale swa ku biha u yentxa swilo swa swinene. (1 Tihosi 8:33, 34) Loko hi txintxa, swi lava leswaku hi yentxa ‘mintirho leyi kombisaka swaku se hi tisolile.’ (Mintirho 26:20) Swi lava leswaku hi fambela kule ni wukhongeli la mavunhwa, hi yentxa swilo leswi tsakisaka Xikwembu hi tlhela hi tinyiketela ka Yehovha ntsena. (Deteronoma 30:2, 8-10; 1 Samuwele 7:3) Leswo swi patsa ku txintxa mapimiselo ya hina, leswi hi swi lavaka ka wutomi la hina ni wumunhu la hina. (Ezekiyele 18:31) Loko hi “txintxa,” hi ta tshika mahanyelo lawa ma kalaka ma nga xi tsakisi Xikwembu, hi va ni wumunhu la nyuwani. — Mintirho 3:19; Vaefeza 4:20-24; Vakolosa 3:5-14.
28 KA FEVEREIRO KU YA KA 6 KA MARÇO
XUMA XI NGA KA RITO LA XIKWEMBU | 1 SAMUWELE 9-11
“Ku Sunguleni Sawulo A A Tiveka Hansi”
Murindzi 08/20 paj. 10 par. 11
Tiveki Hansi Loko U Tirhela Yehovha
Pimisa hi leswi nga humelela Hosi Sawulo. A ku sunguleni a a ti veka hansi, a a swi tiva swaku a nge swi koti ku yentxa swilo hinkwaswu. Hi mhaka leyo, a a swi vona swi nga mu faneli ku va hosi. (1 Sam. 9:21; 10:20-22) Hi ku famba ka nkama a sungule ku ti byela, a yentxe swa ku biha hileswi se a li hosi. Siku lin’wana a nga swi kotanga ku lehisa mbilu loko a nyimela muprofeta Samuwele swaku a ta nyikela gandzelo. Ku hambana ni ku tshemba Yehovha phambheni ka xitshungu, Sawulo a nyikele gandzelo ku nga nchumu lexi a a nga fanelanga a xi yentxa. Leswo swi yentxe leswaku Yehovha a mu tekela wuhosi a tlhela a nga ha li munghanu wa Yehovha. (1 Sam. 13:8-14) I swinene ku djondza hi xikombiso lexi swaku hi nga yentxi swilo leswi kalaka swi nga hi lumbi.
Murindzi 15/03/14 paj. 9 par. 8
Tama U Tiveka Hansi Loko U Tirhela Yehovha
Leswi nga humelela Hosi Sawulo wa le Israyele swi hi khumbukisa swaku ku tibyela swi nga hi yentxa hi nga ha yentxi minzamu ya ku tama hi tsakisa Yehovha. Ku sunguleni Sawulo a a tiveka hansi. (1 Sam. 9:21) A nga pfumelanga ku khatisa Vayisrayele lava nga vulavula ku biha hi wuhosi la yena, hambileswi wuhosi lolelo a nga nyikiwa hi Xikwembu. (1 Sam. 10:27) Hosi Sawulo a pfumele ku kongomisiwa hi moya wa ku kwetsima wa Xikwembu hi ku rhangela Vayisrayele ka nyimpi leyi va nga lwa ni Vaamoni va za va va hlula. Leswi va nga hlula ka nyimpi, hi ku tiveka hansi va dzunise Yehovha. — 1 Sam. 11:6, 11-13.
Murindzi 15/12/95 paj. 10 par. 1
Vaamoni Va Yentxe Swilo Swa Ku Biha Hambileswi Yehovha A Nga Va Komba Lirhandzu
Vaamoni va yentxe swilo swa ku biha hambileswi Yehovha a nga va komba lirhandzu. Phela Yehovha a swi vonile swilo swa ku biha leswi va nga swi yentxa. Se “moya wa ku kwetsima wa Xikwembu wu nyika Sawulo matimba nkama a nga twa marito lawa, se a kwata hintamu.” Hi ku kongomisiwa hi moya wa ku kwetsima wa Xikwembu, Sawulo a hlengeleta 330.000 wa vavanuna va nyimpi lava nga gama va dlaya Vaamoni naswona “a ku zanga ku sala vanhu vambirhi na va li xikan’we.” — 1 Samuwele 11:6, 11.
Lavetela Xuma Ka Rito La Xikwembu
Murindzi 15/03/05 paj. 22 par. 8
Tipontu Ta Lisima Ta Buku La Samuwele Wa Ku Sungula
9:9 — Marito lama nge “khale muprofeta a va ku i munhu lweyi a vonaka leswi nga ta yentxeka ka nkama lowu taka” ma nga ha vula yini? Marito lawa ma nga ha kombisa swaku leswi vaprofeta a va tiviwa hi vanhu va vanyingi ka nkama wa Samuwele ni ka nkama wa tihosi ta Israyele, marito lama nge “lweyi a vonaka leswi nga ta yentxeka ka nkama lowu taka” ma txintxiwe hi rito leli nge “muprofeta.” Samuwele a voniwa a li muprofeta wa ku sungula ka vaprofeta hinkwavu. — Mint. 3:24.