DJONDZO 24
I Yini Tintsumi Naswona Hi Wini Ntirho Wa Tona?
Yehovha a lava swaku hi djondza hi ndjangu wa yena wa le tilweni. Ndjangu lowu wu patsa ni tintsumi leti vitaniwaka “vana va Xikwembu.” (Yobo 38:7) I mpsini leswi Bibele li swi djondzisaka hi tintsumi? Leswi tintsumi ti swi yentxaka swi va khumbisa ku yini vanhu? I tintsumi hinkwatu leti vitaniwaka vana va Xikwembu?
1. I yini tintsumi?
Yehovha a rhange a yentxa tintsumi na a nge se yentxa misava. Ku fana ni leswi hi kalaka hi nga mu voni Yehovha na tona tintsumi a hi nge ti voni naswona ti hanya atilweni. (Vaheberu 1:14) Ku ni tintsumi ta tinyingi naswona ti ni wumunhu la ku hambana. (Nhlawutelo 5:11) Tintsumi ‘ti yingisa rito la [Yehovha] hi ku yentxa leswi a swi vulaka.’ (Tipisalema 103:20) Khale minkama yin’wana Yehovha a a tirhisa tintsumi swaku ti hundzisela rungula la yena ka vanhu, ti pfuna vanhu va yena, ti va tiyisa ni ku va ponisa loko va li nghozini. Namuntlha tintsumi ti kongomisa Vakreste ka vanhu lava va lavaka ku djondza hi Xikwembu.
2. I mani Sathana ni madimoni ya yena?
Tintsumi tin’wana a ti tshamanga na ti tshembekile ka Yehovha. Ntsumi ya ku sungula leyi nga tshika ku tshembeka ka Yehovha hi “leyi vitaniwaka Davulosi na Sathana, leyi kanganyisaka misava hinkwayu”. (Nhlawutelo 12:9) Sathana a a lava ku fuma vanhu hinkwavu, hi mhaka leyo ku sungula a kanganyise Adamu na Evha naswona hi ku famba ka nkama a kanganyise ni tintsumi tin’wana. Tintsumi leto ti vitaniwa madimoni. Yehovha a ti hlongolile tilweni ti ta lani misaveni naswona a ku choti kule swaku a ti helisa swa wugamu. — Lerha Nhlawutelo 12:9, 12.
3. Sathana ni madimoni va yentxa yini swaku va zama ku hi kanganyisa?
Sathana ni madimoni va kanganyisa vanhu va vanyingi hi ku tirhisa wudimoni ku nga nchumu wa ku biha wa ku zama ku vulavula ni vanhu lava nga fa. Hi xikombiso, vanhu van’wana va lavetela ku pfuniwa hi vanhu lava va vhumbataka minchumu, lava va vhumbataka hi ku tirhisa tinyeleti, va tlhela va lavetela ku pfuniwa hi lava va vulaka swaku va kota ku vona mimpimiso ya vanhu ni minchumu leyi nga ta yentxeka ka nkama lowu taka ni hi tinyanga. Van’wana va ya tinyangeni kumbe va pfumela ku dahiwa hi tindlela leti fambisanaka ni wudimoni. Vanhu va tlhela va kanganyisiwa hi ku byeliwa swaku va nga swi kota ku vulavula ni vafi. Kambe Yehovha wa hi basopisa a ku: “Mi nga tshuki mi ya ka tinyanga, naswona mi nga tshuki mi ya ka lava va vhumbataka minchumu”. (Levhitika 19:31) Yehovha a hi byela leswo swaku a hi vhikela ka Sathana ni madimoni, ku nga valala va Xikwembu lava va lavaka ku hi vavisa.
DJONDZA SWIN’WANA
Djondza hi minchumu ya yinene leyi tintsumi ti yi yentxaka, u tlhela u vona nghozi ya ku tirhisa wudimoni, ni leswi hi nga swi yentxaka swaku hi tivhikela ka Sathana ni madimoni.
4. Tintsumi ti pfuna vanhu swaku va djondza hi Yehovha
Tintsumi ta Xikwembu a ti chumayeli vanhu hi ku kongoma kambe ti nga ha kongomisa vagandzeli va Xikwembu ka vanhu lava va lavaka ku djondza hi xona. Lerhani Nhlawutelo 14:6, 7, mi gama mi bula hi swivutiso leswi landzelaka:
Hi mhaka muni hi lava ku pfuniwa hi tintsumi loko hi chumayela?
Swa ku tiyisa ku tiva swaku tintsumi ti nga ku kongomisa ka vanhu lava va lavaka ku djondza Bibele? Hi mhaka muni?
5. Fambela kule ni wudimoni
Sathana ni madimoni va lwisana na Yehovha na hina vanhu va yena. Lerhani Luka 9:38-42, mi gama mi bula hi xivutiso lexi landzelaka:
Madimoni ma va yentxa yini vanhu?
A hi swi lavi ku fumiwa hi madimoni. Lerhani Deteronoma 18:10-12, mi gama mi bula hi swivutiso leswi landzelaka:
Hi tini tindlela leti madimoni ma ti tirhisaka swaku ma zama ku vulavula na hina ni ku hi kanganyisa? I mpsini leswi vanhu va tolovelaka ku swi yentxa lomu u tshamaka kona leswi yelanaka ni wudimoni?
Swa twala kuva Yehovha a hi byela swaku hi fambela kule ni madimoni? Hi mhaka muni?
Sixtirani VHIDIYO, mi gama mi bula hi swivutiso leswi landzelaka:
U pimisa swaku a ku ni nghozi leswi Peleza a nga veka xifungu ka voko la n’wana wa yena? Hi mhaka muni?
Peleza a a fanele a yentxa yini swaku a tivhikela ka madimoni?
Ku sukela khale Vakreste va ntiyiso va fambela kule ni madimoni. Lerhani Mintirho 19:19 na 1 Vakorinto 10:21, mi gama mi bula hi xivutiso lexi landzelaka:
Hi mhaka muni swi li swa lisima ku txukumeta hinkwaswu leswi fambisanaka ni wudimoni?
6. Hlula Sathana ni madimoni ya yena
Madimoni ma fumiwa hi Sathana. Kambe tintsumi ta ku tshembeka ti kongomisiwa hi ntsumi leyikulu Mikayele, ku nga vito lin’wana la Yesu. Mikayele a ni matimba ya ku fikela kwini? Lerhani Nhlawutelo 12:7-9, mi gama mi bula hi swivutiso leswi landzelaka:
Ka Mikayele ni tintsumi ta yena na Sathana ni madimoni ya yena i vamani va nga ni matimba ya makulu?
U pimisa swaku valandzeli va Yesu va fanele va mu chava Sathana ni madimoni ya yena?
U nga mu hlula Sathana ni madimoni ya yena. Lerhani Yakobo 4:7, mi gama mi bula hi xivutiso lexi landzelaka:
U nga tivhikelisa ku yini ka Sathana ni madimoni ya yena?
VAN’WANA VA LI: “A ku na xa ku biha hi ku tha majogu kumbe ku sixtira mafilmi lawa ma vulavulaka hi wudimoni. I ku hungata ntsena.”
Hi mhaka muni mapimiselo lawo ma li ni nghozi?
LESWI HI NGA SWI DJONDZA
Tintsumi ta ku tshembeka ta hi pfuna. Sathana ni madimoni ya yena i valala va Yehovha naswona va kanganyisa vanhu hi ku tirhisa wudimoni.
Ku kambela leswi hi nga swi djondza
Tintsumi ti va pfunisa ku yini vanhu ku djondza hi Yehovha?
I mani Sathana ni madimoni ya yena?
Hi mhaka muni u nga fanelanga u tipeta ka swa wudimoni?
LOKO U LAVA KU TIVA SWIN’WANA
Vona swaku i mpsini swi kombisaka swaku Yesu hi yena Mikayele.
“I Mani Mikayele Ntsumi Leyikulu?” (Nhlokomhaka leyi nga ka site la jw.org hi Xitsonga)
Vona leswi kombisaka swaku Sathana i munhu wa ntiyiso.
“Xana Diyavulosi I Wa Xiviri?” (Nhlokomhaka leyi nga ka site la jw.org hi Xitsonga)
Vona swaku wansati mun’wana a swi kotise ku yini ku tshika wudimoni.
“Ela descobriu que a vida tem um objetivo” (Murindzi wa 1 ka Julho wa 1993 hi Xiputukezi)
Vona swaku Sathana a li tirhisisa ku yini wudimoni swaku a kanganyisa vanhu.