Seketela Bandla La Wena

Amisaveni hinkwayu, ku ni vanhu va vanyingi lava tirhelaka Yehovha na va tsakile ka mabandla ya ku hambanahambana. Va swi khensa hintamu leswi va djondzisiwaka swona, funtshi va swi lava hintamu ku pfunisa abandleni. Indje wena u titwisa xileswo?

1. U nga wu tirhisisa ku yini nkama ni ntamu wa wena swaku u seketela bandla?

Hinkwerhu hi nga swi kota ku pfunisa abandleni. Hi xikombiso, i nga va swaku u nga swi kota ku pfuna lava nga guga kumbe lava va vabyaka swaku va ya mintlhanganwini? Kumbe ku va pfuna hi minchumu yin’wana ya ku fana ni ku ya va xavela swilo bazara? Kumbe ku va pfuna hi mintirho ya le kaya? (Lerha Yakobo 1:27.) Hi nga ha tinyikela swaku hi pfunisa ka ku basisa ni ku lunghisa Tiyindlo ta Wugandzeli. A hi sindzisiwi hi munhu ku maha leswo, ku rhandza Xikwembu ni vamakwerhu va hina hi swona swi hi yentxaka ‘hi tinyikela hi ku swi rhandza’. — Tipisalema 110:3.

Timboni ta Yehovha leti nga tsakamisiwa, ti nga pfunisa abandleni hi tindlela ta ku hambanahambana. Hi xikombiso, vamakwerhu va xinuna va nga ha tikarhata swaku va va vapfunisi va bandla kumbe madoda ya bandla. Vamakwerhu va xinuna ni vamakwerhu va xisati hinkwavu va nga pfunisa ka ntirho wa ku chumayela hi ku va vapfuli va ndlela. Timboni ta Yehovha tin’wana ta swi kota ku pfunisa ka ntirho wa ku yaka Tiyindlo ta Wugandzeli swaku ku gandzeliwa Yehovha ka tona, tin’wana ti rhurha ti ya ka mabandla lawa ma lavaka ku pfuniwa.

2. Hi nga yi tirhisisa ku yini minchumu leyi hi nga na yona swaku hi pfuna bandla?

Hina hi ‘hlonipha Yehovha hi swilo swa hina swa lisima’. (Swivuriso 3:9) Phela ka hina i swa lisima hintamu ku nyikela hi male kumbe swin’wana swaku hi pfunisa abandleni kumbe ka ntirho wa ku chumayela amisaveni hinkwayu. (Lerha 2 Vakorinto 9:7.) Leswi hi swi nyikelaka swi tlhela swi pfunisa ka ntirho wa ku pfuna lava va nga humeleliwa hi tinghozi, van’wana va ‘khweketa xan’wanchumu’ kumbe va veka male hi tlhelo vhiki ni vhiki kumbe wheti ni wheti swaku va ta nyikela hi yona. (Lerha 1 Vakorinto 16:2.) Hi nga peta minyikelo ya hina ka makaxa lawa ma nga ka Tiyindlo ta Wugandzeli kumbe hi nyikela hi ku tirhisa interneti ka site la donate.jw.org. Yehovha a hi pfumelela swaku hi mu komba swaku ha mu rhandza hi ku nyikela hi male ya hina ni minchumu yin’wana leyi hi nga na yona.

DJONDZA SWIN’WANA

3. Seketela bandla la wena hi ku peta male ka kaxa la minyikelo

Yehovha na Yesu va va rhandza lava nyikelaka hi ku swi rhandza. Hi xikombiso, Yesu a swi vonile nkama wansati wa ku feliwa hi nuna a tlhela a va xisiwana a nga peta male ka kaxa. Lerhani Luka 21:1-4, mi gama mi bula hi swivutiso leswi landzelaka:

• Ku nga va swaku swi lava u za u nyikela male ya yinyingi swaku u tsakisa Yehovha?

• Yehovha na Yesu va titwisa ku yini loko hi nyikela hi ku swi rhandza?

Swaku u tiva leswi yentxiwaka hi male leyi nyikeliwaka, sixtirani VHIDIYO. Mi gama mi bula hi xivutiso lexi landzelaka.

VHIDIYO: Minyikelo ya Hina ka Yehovha (4:47)

• Minyikelo yi tirhisiwa ndjani swaku yi pfuna mabandla misaveni hinkwayu?

4. Hi nga tinyikela swaku hi pfunisa

Vanhu va Yehovha va khale a va swi rhandza hintamu ku hlayisa tindhawu leti a va mu gandzela ka tona. Kambe swaku leswo swi yentxeka a ku laveka swilo swa swinyingi swa ku tlula male. Lerhani 2 Tikronika 34:9-11, mi gama mi bula hi xivutiso lexi landzelaka:

• I mpsini leswi Vayisrayele a va swi maha swaku va kota ku hlayisa ndhawu leyi a va mu gandzela ka yona Yehovha?

Kuva u vona swaku Timboni ta Yehovha ti xi tekelelisa ku yini xikombiso xa Vayisrayele, sixtirani VHIDIYO. Mi gama mi bula hi swivutiso leswi landzelaka.

VHIDIYO: Kuhlayisa Tindhawu ta Hina ta Wugandzeli (3:31)

• Hi mhaka muni swi li swa lisima ku basisa Yindlo ya Wugandzeli hi tlhela hi yi tshika na yi tshamisekile?

• U nga maha yini swaku u pfunisa?

5. Vamakwerhu va xinuna va nga tikarhatela ku yentxa mintirho yin’wana bandleni

Bibele li byela vamakwerhu va xinuna swaku va tikarhata hintamu kuva va pfunisa abandleni. Swaku u vona xikombiso, sixtirani VHIDIYO. Mi gama mi bula hi xivutiso lexi landzelaka.

VHIDIYO: Vamakwerhu Vaxinuna — Fanelekani Ku Yendla Mintirho Ya Yinene (5:19)

• Ka vhidiyo, i mpsini leswi Ryan a nga swi yentxa swaku a pfunisa abandleni?

Bibele la hi byela swaku i mpsini leswi vamakwerhu va xinuna va faneleke va swi yentxa swaku va va vapfunisi va bandla kumbe madoda. Lerhani 1 Timotiyu 3:1-13, mi gama mi bula hi swivutiso leswi landzelaka:

• I yini leswi vamakwerhu va xinuna va faneleke va swi maha swaku va va vapfunisi va bandla kumbe madoda?

• I mpsini leswi nga nyimeliwa ka mindjangu ya vona? — Vonani tindzimana 4 ni 11.

• Bandla li nga pfunekisa ku yini loko vamakwerhu lava va tikarhata swaku va va swikombiso swa swinene?

LESWI HI NGA SWI DJONDZA

Yehovha a hi khensa swinene loko hi yentxa minzamu ya ku tirhisa nkama, ntamu ni minchumu ya hina swaku hi seketela bandla.

Ku kambela leswi hi nga swi djondza

• Hi nga wu tirhisisa ku yini nkama ni ntamu wa hina swaku hi pfunisa abandleni?

• Hi nga yi tirhisisa ku yini minchumu ya hina swaku hi pfunisa abandleni?

• U navela ku maha yini swaku u pfunisa abandleni?

LOKO U LAVA KU TIVA SWIN’WANA

Vona swaku hi mhaka muni Xikwembu xi nga ha swi lavi swaku vanhu va xona va hakela swa wukhume.

“Bibele Yi Ri Yini Hi Ku Humesa Vukhume?” (Nhlokomhaka leyi nga ka site la jw.org hi Xitsonga)

Vona swaku swi vula yini ku tikarhata kuva u yentxa mintirho yin’wana bandleni.

“Xana U ‘Lwela Ku Fikelela Ntirho Wa Ku Va Mulanguteri’?” (Murindzi wa 15 ka Setembro wa 2014 hi Xitsonga)

Vona leswi Timboni ta Yehovha ti nga swi maha swaku ti nyikela mabuku ka vamakwerhu van’wana.

Ku Nyikeliwa Ka Mabuku aCongo (4:25)

Ku hambana ni wukhongeli lin’wana, i yini leswi Timboni ta Yehovha ti swi mahaka swaku ti kuma male ya ku yentxa ntirho wa tona?

“Ntirho Wa N’wina Wu Seketeriwa Njhani Hi Timali?” (Nhlokomhaka leyi nga ka site la jw.org hi Xitsonga)