Timotiya Wa Ku Sungula
1 Mina Pawulo, ni nga vekiwa ku va mupostolo wa Kreste Yesu hi matimba ya Xikwembu Muponisi wa hina ni ya Kreste Yesu ntshembo wa hina,+ 2 ni tsalela Timotiya,*+ lweyi hi nga xikan’we lipfumelweni naswona a fanaka ni n’wana+ ka mina:
Timpsalu tatikulu ni ku rhula leswi taka hi ka Xikwembu Papayi na Kreste Yesu Hosi ya hina a swi ve na wena.
3 Ku fana ni leswi ni nga ku kombela swaku u tshama aEfeza nkama a ni li kusuhi ni ku ya Makedoniya, na ku kombela ni swoswi swaku u laya vanhu van’wani leswaku va nga djondzisi djondzo ya ku hambana, 4 kumbe ku yingisela switoriya swa mavunhwa+ ni ku landzelela matimu ya tinxaka ta vavhovho. Leswo a swi pfuni nchumu,+ swo yendla vanhu va vulavula hi timhaka ta ku kala ti nga pfuni nchumu, va tshika ku vulavula hi leswi taka hi ka Xikwembu leswi tiyisaka lipfumelo. 5 Xikongomelo xa nawu lowu hi leswaku hi rhandzana+ hi mbilu leyi nga basa ni ku va ni lipfalu lalinene ni lipfumelo+ la ku kala li nga na wukanganyisi. 6 Van’wani va yi tshikile minchumu leyi va sungula ku vulavula swilo swa ku kala swi nga pfuni nchumu.+ 7 Va lava ku djondzisa+ nawu kambe a va swi twisisi leswi va swi vulaka kumbe leswi va hisekelaka ku swi djondzisa.
8 Swoswi ha swi tiva swaku a Nawu i wunene loko munhu a wu tirhisa hi ndlela ya kona, 9 a tlhela a twisisa swaku a nawu a wu vekeliwanga vanhu va ku lulama kambe wu vekeliwe vanhu va ku kala va nga wu yingisi,+ lava djikelaka Xikwembu, lava kalaka va nga xi hloniphi, vadjohi, lava kalaka va nga tshembeki, lava nga chaka, lava dlayaka vapapayi va vona, lava dlayaka vamamani va vona, lava dlayaka vanhu van’wani, 10 lava yendlaka wuntunga la swa masangu,* vavanuna lava fambaka masangu ni vavanuna,* lava yivaka vanhu, vahembi, lava fungaka swa mavunhwa ni lava yendlaka nchumu wun’wani ni wun’wani lowu lwaka ni djondzo yayinene+ 11 leyi fambisanaka ni mahungu ya ku tsakisa ya ku hlamalisa swinene ya Xikwembu lexi nga tsaka, lawa ni nga nyikiwa wona.+
12 Na mu khensa Kreste Yesu Hosi ya hina, lweyi a nga ni nyika matimba, hikusa a swi vonile swaku na tshembeka hi ku ni nyika ntirho wa ku kwetsima,+ 13 hambileswi khale a ni rhuketela Xikwembu, ni hlupha vanhu va xona ni tlhela ni tiwomisa nhloko.+ Kambe Kreste a ni tsetselelile hikusa a ni yendla leswo hi ku pfumala wutivi ni lipfumelo. 14 Kambe Hosi ya hina yi ni kombe timpsalu tatikulu naswona ni kume lipfumelo ni lirhandzu ka Kreste Yesu. 15 Mhaka leyi ya tshembeka naswona yi fanele yi yamukeliwa hi ku helela: Kreste Yesu a tile misaveni a ta ponisa vadjohi.+ Mina ni mudjohi wamukulu wa kona.+ 16 Hambileswi ni nga mudjohi wamukulu ni kombiwe timpsalu leswaku Kreste Yesu a ni tirhisa swaku a kombisa ku lehisa mbilu ka yena hinkwaku a tlhela a ni yendla xikombiso ka lava nga ta va ni lipfumelo ka yena kutani va kuma wutomi la ku kala li nga heli.+
17 Swoswi a ku hlonipheka ni ku tlakuka a swi ye ka Hosi leyi nga kona hi masiku ni masiku,+ leyi kalaka yi nga wonheki,+ leyi kalaka yi nga voneki,+ leyi nga Xikwembu xin’we ntsena,+ hi masiku ni masiku. Amen.
18 N’wananga Timotiya, ni ku nyika nawu lowu hi mhaka ya wuprofeta leli vulavulaka hi wena, leswaku u ta kota ku tama u lwa nyimpi yayinene hi mhaka ya lona,+ 19 u va ni lipfumelo ni lipfalu lalinene+ leli van’wani va nga li lahla, kutani lipfumelo la vona li tshoveka ku fana ni boti leli nga tshoveka. 20 Xikarhi ka vona, ku na Iminewu+ na Alexandri, lava ni nga va nyikela ka Sathana+ leswaku va ta djondzisiwa hi ku khatisiwa leswaku va nga rhuketeli Xikwembu.