Swivutiso Swa Valerhi

Hi mhaka muni Yesu a vule marito ya Davhida ma nga ka Tipisalema 22:1 nkama na a li kusuhi ni ku fa?

Man’wana ka marito lawa Yesu a nga ma vula nkama na a li kusuhi ni ku fa ma kumeka ka Matewu 27:46, ma nge: “Xikwembu xanga, Xikwembu xanga, u ni tshikele yini?” Ku va Yesu a vule marito lawa, a a hetisisa leswi nga vuliwa hi Davhida ka buku ya Tipisalema 22:1. (Marku 15:34) Swi ta va swi bihile ku pimisa swaku Yesu a vule marito lawa hi mhaka leswi lipfumelo la yena a li nga tiyanga. Yesu a a swi twisisa swaku hi mhaka muni a a fanele a fa, naswona a a tinyimisele ku swi yentxa leswo. (Mat. 16:21; 20:28) Yesu a a swi tiva swaku Yehovha a a nga ta mu vekela “xivhikelo” swaku a nga dlayiwi. (Yobo 1:10) Hi ndlela leyo, Yesu a a ta kombisa swaku wa tshembeka ka Yehovha hambileswi a a ta dlayiwa hi ndlela ya ku vava. — Marku 14:35, 36.

Se hi mhaka muni Yesu a phindhe marito lawa ma nga vuliwa hi Hosi Davhida? Hambileswi hi kalaka hi nga tiyiseki, a hi voneni swivangelo leswi nga ha vaka swi yentxe Yesu a vula marito lawa.a

Hi ku vula marito lawa swi nga yentxeka a a lava ku kombisa swaku Yehovha a a nga ta mu vhikela swaku a nga fi. Yesu a a fanele a fa swaku a hakelela swidjoho swa hina na a nga vhikeliwi hi Yehovha. Yena a a li munhu ku fana na hina, naswona a a fanele a fa leswaku “a ta nampsa lifu hi mhaka ya vanhu hinkwavu.” — Heb. 2:9.

Swi nga yentxeka a vule marito lawa swaku van’wana va khumbuka marito hinkwawu lawa Mupisalema a nga ma vula. A nkama lowu Yesu a a li lani misaveni, Vayuda a va tolovela ku vekisa ka nhloko marito ya mupisalema. Se loko munhu a vula ndzimana yin’we ya mupisalema a va vhela va khumbuka marito hinkwawu. Se loko kuli swaku Yesu a a pimisisa xileswo, swi nga yentxeka swaku vadjondzisiwa va yena lava a va li Vayuda va khumbuke swaku marito ya mupisalema a ma vulavula hi lifu la yena. (Pis. 22:7, 8, 15, 16, 18, 24) Funtshi marito ya wugamu ya mupisalema ma dzunisa Yehovha Hosi ya misava hinkwayu. — Pis. 22:27-31.

Swi nga yentxeka a a lava ku kombisa swaku a a nga na nandzu. Na a nge se fa, Yesu a yavanyisiwile hi ndlela ya ku biha, va tlhela va mu lumbeta swaku a rhuketela Xikwembu. (Mat. 26:65, 66) Va mu thethise swa kola na kola ni wusiku, naswona leswi a va mu thethisisa xiswona a swi nga pfumeleliwi hi ku ya hi nawu. (Mat. 26:59; Marku 14:56-59) Ku va Yesu a yentxe xivutiso lexi, swi nga yentxeka a a lava ku kombisa swaku a xi kona xa ku biha a nga xi yentxa swaku a hluphiwa hi ndlela ya ku vava.

Swi nga yentxeka a a lava ku va khumbuxa swaku kuva Davhida a hluphekile a swi nga vuli swaku Yehovha a a nga ha mu tsakeli. Ku va Davhida a hluphekile, a swi nga lavi ku vula swaku Yehovha a a nga ha mu tsakeli. Naswona loko se a yentxe xivutiso lexo, Davhida a vule swaku wa tshemba swaku Yehovha a ta va ponisa vanhu va yena, naswona Yehovha a tame a mu katekisa hintamu Davhida. (Pis. 22:23, 24, 27) Hi ku fana, kuva Yesu “N’wana wa Davhida,” a hluphiwile, a swi vuli swona swaku Yehovha a a nga na mhaka na yena. — Mat. 21:9.

Swi nga yentxeka a a lava ku kombisa ku vava loko a a ku twa hileswi Yehovha a kalaka a nga mu vhikelanga hi nkama lowuyani. A ku nga li ku rhandza ka Yehovha swaku N’wana wa yena a hluphiwa a tlhela a fa. Leswo swi yentxekile hi mhaka leswi Adamu na Evha va kalaka va nga mu yingisanga Yehovha. Yesu a a nga na xidjoho, kambe a boheke ku fa leswaku a ta kaneta mavunhwa ya Sathana, ni ku nyikela hi wutomi la yena leswaku hi rivaleliwa swidjoho. (Marku 8:31; 1 Ped. 2:21-24) Leswo swi kotekile hi leswi Yehovha a kalaka a nga mu vhikelanga Yesu nkama a nga fa.

Swi nga yentxeka Yesu a a lava ku pfuna vadjondzisiwa va yena swaku va pimisa hi leswi nga yentxa Yehovha a pfumelela swaku a fa hi ndlela liyani.b Yesu a a swi tiva swaku vanhu va nyingi a va nga ta kholwa ka yena hi leswi a nga dlayiwa ka mhandzi ku fana ni xigevenga. (1 Kor. 1:23) Loko valandzeli va Yesu a vo swi twisisa leswi nga yentxa Yesu a fa, a va ta li twisisa lisima la lifu la yena. (Gal. 3:13, 14) Hi ndlela yoleyo vadjondzisiwa va Yesu a va ta mu vona na a li munhu lweyi a va ta ponisiwa hi ku tirhisa yena ku nga li xigevenga.

A ku na mhaka swaku Yesu a vule marito lawa hi mhaka muni, kambe a a swi tiva swaku a ku ta yentxeka leswi Yehovha a swi lavaka. Loko a vule marito ya tipisalema, a game a ku: “Swi hetisekile!” (Yoh. 19:30; Luk. 22:37) Kuva Yehovha a nga mu vhikelanga swi yentxe swaku a kota ku yentxa hinkwaswu leswi a nga mu rhuma swona. Naswona a swi kotile ku hetisisa hinkwaswu “leswi nga tsaliwa ka Nawu wa Moxe, ka Vaprofeta ni ka Tipisalema”. — Luk. 24:44.