NHLOKOMHAKA YA DJONDZO 14
Hiseka ka Ntirho Lowu Uwu Yendlelaka Yehovha
“Tirha ntirho wa kuhiteka wa kuvula evhangeli, hetisa timfanelo ta ntirho wa wena.” — 2 TIM. 4:5.
LISIMU 142 Hi Chumayela Vanhu Va Mixaka Hinkwayo
LESWI HINGATASWI DJONDZAa
Ndzhaku ka loko a pfuxiwile, Yesu a hlangana ni vadjondzisiwa va yena a tlhela ava rhuma leswaku ‘vafamba . . . vayendla vadjondzisiwa’ (Vona paragrafu 1)
1. I yini leswi malandza hinkwawu ya Yehovha maswi navelaka naswona hayini? (Vona xifanisu akusunguleni ka djondzo.)
YESU KRESTE a rhume vadjondzisiwa va yena leswaku ‘vafamba ka tinxaka hinkwatu, vayendla vadjondzisiwa’. (Mat. 28:19) Malandza hinkwawu ya Yehovha ma yendla hinkwaswu leswi mangaswi kotaka leswaku ma yampsisa ndlela leyi ma chumayelaka ni kudjondzisa ha yona. (2 Tim. 4:5) Maswi tiva leswaku aku na ntirho lowunga wa lisima, lowungava yendlaka va tsaka ni lowunga wa xihantla swinene kutlula kuchumayela. Hambiswilitanu, swinga yendleka swinga vevuki kuheta nkama wotala hilaha hi navelaka ha kona antirhweni lowu.
2. I swikarhato swihi leswi hi kumanaka na swona leswingaha khumbaka ntirho wa hina wochumayela?
2 Mintirho yin’wana leyi hi bohekaka kuyi yendla yihi tekela nkama wawuyingi naswona yihi tshika hi karhalile. Hi xikombiso, swinga yendleka hi boheka kutirha mawora manyingi hi siku leswaku hi kuma male leyi yeneleke ya kuxava swilo leswi hina ni ndjangu wa hina hiswi lavaka. Swinga yendleka swingahi vevukeli kukhatalela swilaveko leswin’wana swa ndjangu wa hina. Kumbexana ha vabya, hi ni gome kumbe hi kumana ni swikarhato swotala hileswi hi yaka hi guga. Loko kuli leswaku hi kumana ni swikarhato swofana ni leswi, i yini leswi hingaswi yendlaka leswaku hi hetisisa ntirho wa hina wochumayela hilaha kuyengetelekeke?
3. Hi twisisa yini hi marito ya Yesu lamanga ka Matewu 13:23?
3 Unga heli ntamu loko swiyimu swa wena swiku sivela kuheta nkama wotala hilaha u navelaka ha kona antirhweni wa Yehovha. Yesu aaswi tiva leswaku ahingeswi koti kutirhisa ntamu ni nkama wa hina hi ndlela leyi fanaka antirhweni wochumayela. (Lerha Matewu 13:23.) Yehovha a nyika lisima xin’wana ni xin’wana lexi hixi yendlaka leswaku himu tirhela hi mbilu ya hina hinkwayu. (Hev. 6:10-12) Kambe minkama yin’wana hingaha tsumbula leswaku swiyimu swa hina swahi pfumelela kuyendla leswi yengetelekeke. Ka djondzo leyi hita vona leswi hingaswi yendlaka leswaku hi rhangisa ntirho wochumayela awuton’wini, hi papalata swilo leswinga hingeletelaka ntirho lowu ni leswi hingaswi yendlaka leswaku hi yampsisa machumayelela ni madjondzisela ya hina. Kambe ahi sunguleni hi kutwisisa leswi kuhetisisa ntirho wochumayela hilaha kuyengetelekeke swi vulaka swona.
4. Swi vula yini kuhetisisa ntirho wochumayela hilaha kuyengetelekeke?
4 Kuhetisisa ntirho wochumayela hilaha kuyengetelekeke swi vula kuchumayela ni kudjondzisa hilaha hinga kotaka ha kona. Hambiswilitanu, hi fanele hi twisisa leswaku xa lisima hintamu kutlula nkama lowu hiwu hetaka hi leswi swihi susumetelaka kuhetisisa ntirho lowu, kunga lirhandzu leli hinga na lona hi Yehovha ni vanhu. Lirhandzu leli lihi susumetela kuhetisisa ntirho wa hina wa Wukresteb hi mbilu ya hina hinkwayu. (Marka 12:30, 31; Kol. 3:23) Hi tirhisa ntamu wa hina hilaha hinga kotaka ha kona leswaku hiwu hetisisa ntirho lowu. Loko hiswi twisisa leswaku kuchumayela i lunghelo lalikulu swinene, i yini leswi hintaswi yendla? Hita yendla hinkwaswu leswi hingaswi kotaka leswaku hi chumayela hinkwavu lava hi kotaka kubula na vona.
5-6. Munhu lweyi anga ni nkama wutsongo angaswi kota kurhangisa ntirho wochumayela? Nyikela xikombiso.
5 Pimisa hi mumpsha mun’wana lweyi a rhandzaka kuchaya vhiyola. Loko a kuma nkama, a tshamela kuchaya vhiyola ntsena. Siku lin’wana, a kuma ntirho wa kuchaya vhiyola ka rextawurante lokarhi hi mahelovhiki. Kambe male leyi a holeliwaka yona ayi yeneli leswaku a khatalela swilaveko swa yena. Hikolaho, axikarhi ka vhiki a boheka kutirha tani hi kobrador wa xapa leswaku a kuma male leyi yengetelekeke. Hambileswi a hetaka nkama wunyingi xapeni, kuchaya vhiyola kule mbilwini ya yena. Aswi navela hintamu kuyampsisa wuswikoti la yena la kuchaya ni kuhanyela kuchaya ntsena. Kambe xiyimu xa yena aximu pfumeleli swoswi. Hambileswo, a lava mukhandlu, hambi kova nkama wutsongo, leswaku a chaya.
6 Hilaha kufanaka, swinga yendleka xiyimu xa wena xingaku pfumeleli kuheta nkama wunyingi hilaha awu navela ha kona antirhweni wochumayela. Kambe mbilwini ya wena kopfurha kuchumayela ntsena. Hambileswo, u yendla hinkwaswu leswi ungaswi kotaka leswaku u yampsisa wuswikoti la wena la kuchumayela. Kambe tani hileswi unga ni minchumu yinyingi ya kuyi yendla, ungaha tivutisa: I yini leswi ningaswi yendlaka leswaku ni rhangisa ntirho wochumayela awuton’wini la mina?
TINDLELA TORHANGISA NTIRHO WOCHUMAYELA AWUTON’WINI
7-8. Hingali tekelelisa kuyini vonelo la Yesu hi ntirho wochumayela?
7 Yesu ahi vekele xikombiso xikulu loko swi ta ka kurhangisa ntirho wochumayela awuton’wini. Loko a li laha misaveni, a arhangisa ntirho wa kuchumayela mahungu yotsakisa ya Mfumu wa Xikwembu. (Yoh. 4:34, 35) A fambe mpfhuka woleha leswaku a chumayela vanhu votala hilaha a akota ha kona. Minkama hinkwayu, a alava tindlela ta kubula ni vanhu amakaya ya vona kumbe kun’wana ni kun’wana laha ava kumeka kona. Kunene, Yesu a aveka ntirho wochumayela aphambeni ka swilo hinkwaswu.
8 Hingamu tekelelisa kuyini Yesu Kreste? Hi fanele hi tirhisa mukhandlu wun’wana ni wun’wana lowu hinga na wona leswaku hi chumayela vanhu kun’wana ni kun’wana laha hinga vaka hi li kona. Hi fanele hi tiyimisela kuluzekeliwa hi swilo leswaku hi hisekela ntirho wochumayela. (Marka 6:31-34; 1 Pet. 2:21) Vamakwerhu van’wana va vevukise wutomi leswaku va tirha tani hi maphayona ya kupfunisa, ya nkama hinkwawu kumbe yohlawuleka. Van’wana va djondza lirimi lin’wana kumbe kurhurha va ya ka teritoriyu lelinga ni xilaveko xa vachumayeli. Kambe, swiyimu swa vachumayeli van’wana aswiva pfumeleli kuyendla leswi. Hambileswo, va yendla hinkwaswu leswi vangaswi kotaka ka swiyimu leswi vanga ka swona. Kuvula ntiyiso, ntirho wunyingi wa kuchumayela wu yendliwa hi vachumayeli lava. Hikolaho, kunga khataliseki leswaku hi kota kuyendla swinyingi kumbe switsongo, ahi khumbukeni leswaku Yehovha anga nyimeli ku hi yendla swilo leswinga handle ka matimba ya hina. Kuhambana ni leswo, a navela leswaku hi tsaka ka ntirho wokwetsima lowu himu yendlelaka wona, lowu katsaka kuchumayela “evhangeli . . . leyitwalisaka kukwetsima ka Xikwembu, xihlovo xa minkateko [Xikwembu lexitsakeke, NM].” — 1 Tim. 1:11; Det. 30:11.
9. a) Hambilewi a aboheka kutirha, Pawulo aswi kombise kuyini leswaku a arhangisa ntirho wochumayela? b) Mintirho 28:16, 30, 31 yihi byela yini hi ndlela leyi Pawulo a alanguta ntirho wochumayela ha yona?
9 Mupostola Pawulo na yena a arhangisa ntirho wochumayela awuton’wini la yena. Ka liyendzo la yena la wumbirhi la wurhumiwa, a saleliwe hi male yitsongo loko a li Korinto. Hi mhaka leyo, a nghenele ntirho wa kuyendla matenda leswaku a tihanyisa. Hambiswilitanu, Pawulo aanga rhangisi ntirho lowu awuton’wini. A yendle ntirho lowu ntsena leswaku a kota kutikhatalela loko a li karhi a hetisisa ntirho wa yena wochumyela ka Vakorinto. Aangaswi lavi leswaku Vakorinto vamu ‘hakela’ kumbe kukhatalela swilaveko swa yena. (2 Kor. 11:7) Hambileswi a bohekeke kutirha, a tame a rhangisa ntirho wa kuchumayela naswona a ayendla ntirho lowu hi ma Sábado. Kambe a nkama lowu swiyimu swingamu yampsela, aswi kotile kuyengetela ntirho wa yena. Bibele li kombisa leswaku ‘Pawulo aatinyiketa kujondziseni [ka] Rito ntsena, aangahatirhi swin’wana [naswona] aatiyisa ka Vayuda leswaku Mesiya, hi yena Yesu.’ (Mint. 18:3-5; 2 Kor. 11:9) Loko kuhundze malembe nyana, Pawulo a pfaleliwile akaya ka yena aRoma kuringana 2 wa malembe. Hambi ka xiyimu lexi, Pawulo a achumayela. A achumayela lava avamu yendzela a tlhela a tsala mapapila. (Lerha Mintirho 28:16, 30, 31.) Pawulo anga pfumelelanga nchumu ni xin’we ximu sivela kurhangisa ntirho wochumayela. A tsale leswi: ‘Hikolaho leswi Xikwembu . . . xingahirhuma kutirha ntirho wolowo, ahiheli mbilu.’ (2 Kor. 4:1) Xikombiso xa Pawulo xihi djondzisa yini? Xihi djondzisa leswaku hambiloko hi boheka kuheta nkama wunyingi antirhweni wa kutihanyisa, hingaswi kota kurhangisa ntirho wochumayela awuton’wini la hina.
Ku ni tindlela tinyingi ta kuhetisisa ntirho wochumayela hilaha kuyengetelekeke (Vona maparagrafu 10-11)
10-11. Hambiloko u vabya, unga yendla yini leswaku u hetisisa ntirho wa wena wochumayela hilaha kuyengetelekeke?
10 Loko hi tsandzeka kuchumayela hi munti ni munti hilaha ahi navela ha kona hikolaho ka leswi hi yaka hi guga kumbe hileswi hi vabyaka, hingaswi kota kuchumayela hi tindlela tin’wana. Vakreste vosungula ava tirhisa mukhandlu wun’wana ni wun’wana leswaku va chumayela kun’wana ni kun’wana laha aku ni vanhu, hi munti ni munti kumbe ka tindhawu ta mani na mani. Bibele li vula leswaku ‘avahlamulana ni lava avali kona’. (Mint. 17:17; 20:20) Loko minenge yingahahi pfuni, hingaha tshama ka ndhawu leyi taleke hi vanhu ivi hi chumayela lava hundzaka hi ndlela. Kumbexana hinga chumayela lava hi kumanaka na vona loko hi yendla mintirho ya siku ni siku. Vachumayeli vanyingi lava tsandzekaka kuchumayela hi munti ni munti hikolaho ka mavabyi kumbe swikarhato swin’wana va tsaka loko va ringisa tindlela tin’wana ta kuchumayela.
11 Ungaswi kota kuhetisisa ntirho wa wena wochumayela hilaha kuyengetelekeke hambiloko u vabya. Ahi tlheli hi kambisisa xikombiso xa Pawulo. A vule leswi: ‘Ningayendla hinkwaswu hi matimba ya Lweyi anitiyisaka.’ (Filp. 4:13) Matimba ya Yehovha mamu pfunile leswaku a hambeta a chumayela ka lin’wani la mayendzo ya yena ya wurhumiwa hambileswi a avabya. A tsalele Vagalatiya a ku: ‘Matsundzuka leswaku i kuvabya ka mina lokunganinyika nkama womijondzisa Evhangeli kusunguleni.’ (Gal. 4:13) Kufana na Pawulo, mavabyi ya wena mangaku nyika mukhandlu wa kuchumayela van’wana lava wumbeni nkama vanga kumiwiki makaya hi vachumayeli van’wana hileswi va hetaka nkama wunyingi antirhweni. Ungaha chumayela vadodori, vaservhenti kumbe van’wana lavaku khatalelaka.
LESWI UNGASWI YENDLAKA LESWAKU NTIRHO WA WENA WOCHUMAYELA WUNGA HINGELETELIWI
12. Swi vula yini kuva ni tihlo la kuwolova?
12 Yesu a te: “Rivoni ra miri [i] tihlo; hikolaho, loko mahlo ya wena mali manene kumbe ma wolova, miri wa wena hinkwawu wutava kuvonakaleni.” (Mat. 6:22) Yesu a alava kuvula yini hi marito lawa? A alava kuvula leswaku hi fanele hi wolovisa wutomi la hina kumbe hinga pfumeleli nchumu leswaku xihi hingeletela ka xikongometo lexi hi lavaka kuxi fikelela. Yesu a veke xikombiso lexinene amhakeni leyi. A aveka miyanakanyu ya yena ka ntirho wochumayela. A khutaze valandzeli va yena leswaku na vona va veka miyanakanyu ya vona ka ntirho wa Yehovha ni Mfumu wa Yena. Hinga tekelela xikombiso xa Yesu hi kurhangisa ntirho wochumayela awuton’wini la hina ni ‘kurhanga hilava Mfumu [wa Yehovha] ni kululama ka yena.’ — Mat. 6:33.
13. I yini leswingahi pfunaka kuveka ntirho wochumayela aphambeni?
13 Ndlela yin’wana ya kurhangisa ntirho wa kuchumayela i kupumba nkama lowu hiwu hetaka na hi yendla swilo leswinga liki swa lisima. Loko hi yendla leswo, hita va ni nkama wotala wopfuna van’wana leswaku va djondza ni kurhandza Yehovha.c Hi xikombiso, xana hinga pumba nkama lowu hiwu hetaka ntirhweni leswaku hita va ni nkama lowu yengetelekeke woseketela ntirho wa nsimu axikarhi ka vhiki? Xana hinga pumba nkama wa swihungatiso leswi tekaka nkama wawunyingi?
14. I yini leswi Elias ni nsati wa yena vaswi yendleke leswaku va kota kuyengetela ntirho wa vona?
14 Elias, lweyi anga doda, xikan’we ni nsati wa yena va yendle malulamiselo leswaku va yengetela ntirho wa vona. Elias wa hlamusela: “Nkama lowu hinga sungula kubula hi kuyengetela ntirho wa hina, swiyimu swa hina aswingahi pfumeleli kuphayona. Hambileswo, hi xiye leswaku aku ni swilo leswi loko ahoswi yendla aswitahi pfulela mukhandlu wa kuyengetela nkama lowu ahiwu heta kuchumayeleni. Hikolaho, hi sungule kuyendla kucinca leswaku hi va ni nkama lowu yengetelekeke antirhweni wochumayela. Hi xikombiso, hi sungule kupumba swixavaxava. Hi tlhele hi pumba nkama lowu ahiwu heta kuhungateni naswona hi kombele valungu va hina leswaku vahi pumbela nkama lowu hiwu hetaka ntirhweni. Hikolaho ka kucinca loku hiku yendleke, hiswi kotile kuhamba hi chumayela niwusiku, kufambisa tidjondzo ta Bibele leti yengetelekeke hambi kufamba nsin’wini axikarhi ka vhiki kambirhi hi wheti. Hi tsake swinene hileswi ahi kota kuswi yendla!”
LESWI HINGASWI YENDLAKA LESWAKU HI YAMPSISA MACHUMAYELELA NI MADJONDZISELA YA HINA
Loko hi tirhisa leswi hiswi djondzaka ka nhlanganu wa xikarhi ka vhiki, hita hambeta hi yampsisa machumayelela ni madjondzisela ya hina (Vona maparagrafu 15-16)d
15-16. Hikuya hi 1 Timotiya 4:13, 15, i yini leswi hingaswi yendlaka leswaku hi yampsisa ndlela leyi hi chumayelaka ni kudjondzisa ha yona? (Vona nakambe kwadru lelinge “Leswingani Pfunaka Kuhetisisa Ntirho Wochumayela Hilaha Kuyengetelekeke.”)
15 Xin’wana lexi hingaxi yendlaka leswaku hi hetisisa ntirho wa hina wochumayela hilaha kuyengetelekeke i kuyampsisa ndlela leyi hi chumayelaka ha yona. Phela hambi vanhu van’wana lava yendlaka mintirho yokarhi va boheka kufuxetisiwa mayendlela ya ntirho wa vona leswaku va yengetela wutivi ni kuyampsisa matirhela ya vona. Hilaha kufanaka, na hina vachumayeli va mahungu ya Mfumu, hi fanele hi hambeta hi djondza ni kuyampisa ndlela leyi hi chumayelaka ni kudjondzisa ha yona. — Swi. 1:5; lerha 1 Timotiya 4:13, 15.
16 Se, i yini leswi hingaswi yendlaka leswaku hi hambeta hi yampsisa ndlela leyi hi chumayelaka ni kudjondzisa ha yona? I kunyikela yingiso ka swileleto leswi hiswi kumaka ka nhlanganu wa Mahanyelo ni Ntirho wa Hina wa Wukreste. Nhlanganu lowu wahi djondzisa leswaku hi yampsisa wuswikoti la hina la kuchumayela. Hi mhaka leyo, loko mukongomisi wa nhlanganu a nyikela swilayu ka lava veke ni swiyavelo swa switudanti, hi fanele hi nyikela yingiso akuva hi djondza leswingahi pfunaka kuyampsisa machumayelela ya hina. Loko se hi djondzile, hi lava kuswi tirhisa loko se hi li ntirhweni wochumayela. Xin’wana lexi hingaxi yendlaka i kukombela leswaku mulanguteli wa ntlawa wa hina wa ntirho wochumayela ahi pfuna. Hingaha famba na yena n’siwini kumbe ni vachumayeli van’wana lavanga ni ntokoto, vofana ni mulanguteli wa xifundza kumbe maphayona. Loko hi ya hi yampsisa ndlela leyi hi tirhisaka ha yona Switirho swa Hina Swodjondzisa, hitaswi tsakela swinene kuchumayela ni kudjondzisa van’wana.
17. Hi wahi mavuyelo lawa ungatama kuma loko u hetisisa ntirho wa wena hilaha kuyengetelekeke?
17 Kunene, i lunghelo likulu kuva ‘vatirhikulobye ni Xikwembu!’ (1 Kor. 3:9) Loko hi kota ‘kuhlawula leswinga swinene kutlula swin’wana’ ni kurhangisa ntirho wa Yehovha awuton’wini, hita “tirhela Yehovha hi kutsaka”. (Filp. 1:10; Pis. 100:2) Leswi hinga malandza ya Yehovha, hinga tiyiseka leswaku kunga khataliseki swikarhato leswi hinga na swona, Yehovha atahi nyika ntamu leswaku hi hetisisa ntirho wa yena hilaha kuyengetelekeke. (2 Kor. 4:1, 7; 6:4) Kunga khataliseki leswaku swiyimu swa wena swaku pfumelela kuchumayela hintamu kumbe aswiku pfumeleli, loko u yendla hinkwaswu leswinga matimbeni ya wena leswaku u hetisisa ntirho wa wena, uta va ni xa ‘kutidzunisa’ kumbe xa kutsaka hi xona. (Gal. 6:4) Loko u hetisisa ntirho wochumayela hilaha kuyengetelekeke u kombisa leswaku wamu rhandza Yehovha ni vanhu van’wana naswona “utatiponisa ni kuponisa vayingisi va wena.” — 1 Tim. 4:16.
LISIMU 141 Hi Lavisisa Vanghana Va Ku Rhula
a Yesu ahi nyike ntirho wa kuchumayela mahungu yotsakisa ya Mfumu wa Xikwembu ni wa kuyendla vadjondzisiwa. Djondzo leyi yitahi pfuna kuvona swilo leswi hingaswi yendlaka leswaku hiwu hetisisa kahle ntirho lowu hambiloko hi kumana ni swikarhato swotala. Hita tlhela hi vona leswi hingaswi yendlaka leswaku hi hambeta hi tsaka loko hi chumayela ni kuyampsisa ndlela leyi hi chumayelaka ha yona.
b RITO LELI HLAMUSELIWEKE: Ntirho wa hina wa Wukreste wu katsa swiyenge swo hambanahambana swa ntirho lowu hiwu yendlelaka Yehovha swofana ni kuchumayela ni kudjondzisa, kupfuna lava weliweke hi timhangu ta ntumbuluku ni kuyaka ni kuhlayisa ma Salão do Reino, ma Salão ya masembleya, maBetele ni swikritori swa kuhundzuluxela. — 2 Kor. 5:18, 19; 8:4.
c Vona 7 wa swilo leswi ungaswi yendlaka leswaku u wolovisa wutomi la wena, leswi kumekaka ka kwadru lelinga ni nhlokomhaka leyinge “Ndlela Yo Olovisa Vutomi Bya Wena”, leli kumekaka ka tluka 8 la Xihondzo Xo Rindza xa Julho 2016.
d NHLAMUSELO WA SWIFANISO: Makwerhu waxisati a li karhi a yendla nkombiso wa liyendzo losungula ka nhlanganu wa xikarhi ka vhiki. Ndzhaku, mukongomisi wa nhlanganu a nyikela swilayelu. Loko swi li karhi swi nyikeliwa, makwerhu lweyi waxisati a karhi tsala leswi a byeliwaka swona ka broxura la yena la Tinyiketeli. Ndzhaku, a tirhisa leswi aswi djondzeke aminhlanganwini antirhweni wochumayela.