Majovhem — Tamani Mi Kulisa Wunghanu La N’wina Na Yehovha Hambiloko Se Mi Tsakamisiwile

 1. Impsini leswi majovhem ya manyingi se ma nga swi yentxa?

LEMBE ni lembe ku ni majovhem ya manyingi lawa ma tsakamisiwaka. Se wena ke, u tsakamisiwile? Loko u tsakamisiwile, Yehovha ni vamakwerhu va tsaka hi xiboho lexi u nga xi yentxa! (Swi. 27:11) Pimisa hi leswi se u nga swi yentxa. Swi nga yentxeka se u ni malembe ya manyingi na u djondza Bibele, naswona leswi u nga swi djondza swi ku kholwisile swaku Bibele i Rito la Xikwembu. Xa lisima hintamu, u ye u mu tiva kahle Yehovha u tlhela u mu rhandza. Phela lirhandzu lolelo li ku yentxe u tinyiketela u tlhela u tsakamisiwa. A hi ku tsakisa ka swona!

 2. Hi swini swivutiso leswi nga ta hlamuliwa ka nhlokomhaka leyi?

² I ntiyiso swaku na u nge se tsakamisiwa ku ni miringo leyi u nga kumana na yona. Funtshi nkama lowu u yaka u kula, wa ha ta tama u ringiwa. Sathana a ta yentxa hinkwaswu leswi a nga swi kotaka swaku a ku tshikisa ku tirhela Yehovha. (Efe. 4:14) Kambe a wu fanelanga u mu pfumelela. I yini lexi nga ku pfunaka swaku u tama u tshembeka ka Yehovha u tlhela u hetisisa leswi u nga mu tshembisa swona? U fanele u yentxa hinkwaswu leswi u nga swi kotaka swaku u nga nyimi ndhawu yin’we, kambe u tama u kulisa wunghanu la wena na Yehovha. (Heb. 6:1) U nga swi yentxisa ku yini leswo?

 3. Impsini leswi Vakreste hinkwavu va faneleke va swi yentxa loko se va tsakamisiwile?

³ Loko se hi tsakamisiwile, hinkwerhu hi fanele hi yentxa leswi Pawulo a nga swi byela Vakreste va le Efeza. A va byele swaku va fanele va va “vanhu va ku wupfa”. (Efe. 4:13) Hi marito man’wana, a va fanele va tama va kulisa wunghanu la vona na Yehovha. Pawulo a fanise ku kula koloko ni leswi n’wana a kulisaka xiswona. Loko munhu wa ha li xin’wanana, vapsali va yena va mu rhandza hintamu naswona va tshama va mu veke tihlo. Kambe a nge vi xin’wanana nkama hinkwawu, hikusa loko nkama wu ya wu famba a fanele a tshika “ku hanya ku fana ni xin’wanana.” (1 Kor. 13:11) Leswo swa fana na hina Vakreste, hikusa hambiloko se hi tsakamisiwile hi fanele hi tama hi kula. A hi buleni hi minchumu yin’wana leyi nga hi pfunaka ku yentxa swoleswo.

 4. I yini xi nga ku pfunaka swaku u tama u kulisa wunghanu la wena na Yehovha? Tlhamusela. (Vafilipiya 1:9)

⁴ Kulisa lirhandzu la wena hi Yehovha. I ntiyiso swaku u mu rhandza hintamu Yehovha, kambe i swa lisima ku tama u kulisa lirhandzu lolelo. U nga swi yentxisa ku yini leswo? Ka Vafilipiya 1:9, (lerha.) mupostolo Pawulo a hi byela leswi nga hi pfunaka. Pawulo a khongelele swaku lirhandzu la vamakwerhu va Filipiya “li ya li kula hintamu”. Impsini swi nga hi pfunaka ku kulisa lirhandzu la hina hi Yehovha? Hi nga yentxa leswo hi ku va ni “wutivi la ntiyiso ni ku twisisa hinkwaku”. Phela loko hi ya hi mu tiva ku yampsa Yehovha, hi ta ya hi mu rhandza hi tlhela hi tsakisiwa hi wumunhu la yena ni ndlela leyi a yentxaka swilo hi yona. Leswo swi ta hi yentxa hi lava ku mu tsakisa ni ku nyenya ku mu kwatisa. Hi yentxa hinkwaswu leswi hi nga swi kotaka swaku hi hanya hi ku ya hi leswi a swi lavaka.

5-6. Hi nga li kulisisa ku yini lirhandzu la hina hi Yehovha? Tlhamusela.

⁵ Yesu a li tekelele kahle wumunhu la Yehovha. Se, loko hi ya hi mu tiva, hi ta ya hi mu rhandza hintamu Yehovha. (Heb. 1:3) Lexi nga hi pfunaka ku mu tiva kahle Yesu, i ku djondza mabuku ya Matewu, Marku, Luka na Yohani. Loko ku li swaku a wu djondzi Bibele siku ni siku, swi ngo yini u sungula swoswi? Nkama u lerhaka hi wutomi la Yesu u ta tsumbula swaku a a ni wumunhu la ku hlamalisa. Hi xikombiso, vanhu a va nga chavi ku bula na yena, naswona siku lin’wani hi lirhandzu a tlakule xin’wanana. (Marku 10:13-16) Vadjondzisiwa va yena a va nga chavi ku mu byela leswi a va titwisa xiswona, hikusa a a nga na mona funtshi a a ni xinghanu. (Mat. 16:22) Leswi Yesu a nga mu tekelela kahle Papayi wa yena Yehovha, swi kombisa swaku hi nga khongela ka Yehovha na hi nga chavi nchumu. Loko hi khongela, a hi nge mu fihleli nchumu Yehovha hikusa ha swi tiva swaku a nge hi yavanyisi. Phela, Yehovha wa hi rhandza funtshi a ni mhaka na hina. — 1 Ped. 5:7.

⁶ Yesu a a va twela wusiwana vanhu van’wana. Matewu a te: “Loko a vona xitshungu, a xi twela wusiwana hikusa a xi hluphiwa, xi pepetsekisiwa ku fana ni tinyempfu ta ku kala ti nga na murisi.” (Mat. 9:36) Yehovha ke, a titwisa ku yini hi vanhu van’wana? Yesu a te: “Papayi wa mina lweyi a nga tilweni a nga naveli swaku vanhu lava va ku fana ni swivanana va lahleka.” (Mat. 18:14) Marito lawa ma thova mbilu! Ma kombisa swaku Yehovha a hi rhandza hintamu. Se, loko hi ya hi mu tiva kahle Yesu, lirhandzu la hina hi Yehovha li ta ya li kula.

 7. Vamakwerhu bandleni va nga ku pfunisa ku yini?

⁷ Vamakwerhu bandleni va nga ku pfuna swaku u tama u rhandza Yehovha u tlhela u kulisa wunghanu la wena na yena. Phela vamakwerhu lava va tsakile, naswona a va tisoli hileswi va nga langa ku tirhela Yehovha. U nga ha va kombela swaku va ku kontarela swiperiyensiya leswi va nga swi kuma ka ntirho wa Yehovha. Loko swi lava u yentxa xiboho xa lisima, va kombeli swaku va ku pfuna, hikusa Bibele li li: “Lani ku nga ni vatsundzuxi va vanyingi swilo swi famba kahle.” — Swi. 11:14.

 8. Impsini leswi u faneleke u swi yentxa loko u kanakana leswi Bibele li swi vulaka?

⁸ U nga kanakani. Hilani swi nga kombisiwa hi kona ka paragrafu 2, Sathana a ta yentxa hinkwaswu leswi a nga swi kotaka swaku a ku sivela ku kulisa wunghanu la wena na Yehovha. Nchumu xin’wana lexi a xi tirhisaka, i ku ku yentxa u kanakana leswi Bibele li swi djondzisaka. Hi xikombiso, vanhu van’wana va nga ha zama ku ku kholwisa swaku Xikwembu a xi kona ni swaku swilo swi yo tiyentxekela. Swi nga yentxeka nkama na wa ha li mutsongo u nga zanga u pimisa hi swona, kambe leswi se u yaka u kula, a xikola va zama ku ku kholwisa swaku swilo swi yo tiyentxekela. Leswi vaprisori va wena va ku djondzisaka swona, swi nga ha tikomba swi twisiseka. Kambe, swi nga yentxeka va nga se tshama va kambisisa minchumu leyi kombisaka swaku ku ni lweyi a nga yentxa minchumu hinkwayu. Khumbuka leswi Swivuriso 18:17 yi swi vulaka. Yi li: “Munhu wa ku sungula ku tlhamusela mhaka ya yena a tikomba a lulamile, ku fikela loko munhu mun’wana a mu vutisisa leswaku a kuma ntiyiso.” Ku hambana ni ku kholwa minchumu hinkwayu leyi u yi twaka xikola, u fanele u kambisisa leswi Bibele li swi vulaka. Yentxa mapexkiza, bula ni vamakwerhu lava khale a va kholwa swaku minchumu yi yo tiyentxekela, va vutisi swaku impsini swi nga va yentxa va kholwa swaku Yehovha hi yena a nga yentxa minchumu hinkwayu ni swaku wa hi rhandza. Loko u yentxa leswo, a wu nga ta kanakana swaku ku ni lweyi a nga yentxa minchumu hinkwayu.

 9. U djondze yini ka xikombiso xa Melissa?

⁹ Makwerhu lweyi a vitaniwaka Melissa a pfunekile hi ku kambisisa minchumu leyi nga mu yentxa a kholwa swaku ku ni lweyi a nga yentxa swilo hinkwaswu.b Yena a li: “A xikola a va zama ku hi kholwisa swaku swilo swi yo tiyentxekela. A ku sunguleni, a ni nga swi lavi ku hamba mapexkiza hikusa a ni chava ku kuma swaku djondzo ya ku tiyentxekela ka swilo i ntiyiso. Kambe, ku khumbuka swaku Yehovha a lava swaku hi tiyiseka hi leswi hi swi kholwaka, swi ni yentxe ni hamba mapexkiza. Ni lerhe buku leli nge: Existe um Criador Que Se Importa com Você? ni broxura leli nge: Xana Swilo Leswi Hanyaka Swi Lo Tumbuluxiwa? ni leli nge: A Origem da Vida – Cinco Perguntas Que Merecem Resposta. Phela leswi a ku li swona leswi a ni swi lava. Na tilaya hi ku kala ni nga swi yentxanga khale.”

10-11. Impsini swi nga ku pfunaka ku tama u va ni mahanyelo ya manene? (1 Vatesalonika 4:3, 4)

¹⁰ Baleka mahanyelo ya ku biha. Loko munhu a ya a kula, ku fika nkama lowu a swi navelaka hintamu ku yentxa swa masangu. Naswona van’wana va nga ha mu sindzisa ku yentxa nsila ya swa masangu. Phela Sathana a lava swaku u yentxa swoleswo. Se, impsini swi nga ku pfunaka swaku u va ni mahanyelo ya manene? (Lerha 1 Vatesalonika 4:3, 4.) Loko u khongela, byela Yehovha leswi u titwisaka xiswona. U nga mu fihleli nchumu, naswona mu kombeli swaku a ku pfuna u tama u tiya. (Mat. 6:13) Khumbuka swaku Yehovha a nga lavi ku ku yavanyisa, o lava ku ku pfuna. (Pis. 103:13, 14) Nchumu xin’wana xi nga ku pfunaka, i ku lerha Bibele. Phela leswo hi swona swi nga pfuna Melissa lweyi se hi nga bula hi yena, swaku a baleka mahanyelo ya ku biha. Yena a li: “Ku lerha Bibele siku ni siku swi ni pfunile ku lwisana ni mahanyelo ya ku biha. Swi tlhele swi ni khumbukisa swaku ni lumba Yehovha ni swaku ni lava ku tirhela yena wutomi hinkwalu.” — Pis. 119:9.

¹¹ U nga lwisani ni swikarhatu na u li wexe. Bula ni vapsali va wena hi leswi swi ku yentxekelaka. I ntiyiso swaku a swi vevuki ku vulavula ni vapsali va wena hi leswi u titwisaka xiswona, kambe ku yentxa leswo swi nga ku pfuna. Melissa a li: “Ni khongele ka Yehovha, ni kombela swaku a ni pfuna ni nga chavi. Ni game ni bula ni papayi wa mina hi leswi a swi ni karhata. Ni game ni titwa na ni pepile. A ni swi tiva swaku Yehovha wa tsaka hi mina.”

12. I yini xi nga ku pfunaka ku yentxa swiboho swa swinene?

¹² Pfumela ku kongomisiwa hi matshinya ya minawu ya Bibele. Loko u ya u kula, hi kutsongokutsongo vapsali va wena va ta ku tshika u tilangela leswi u swi lavaka. Kambe ka ha ni minchumu ya yinyingi leyi u kalaka u nga yi tivi. Se, u nga swi kotisa ku yini ku fambela kule ni minchumu leyi nga wonhaka wunghanu la wena na Yehovha? (Swi. 22:3) Makwerhu Kari a tlhamusela leswi nga mu pfuna ku yentxa swiboho swa swinene. Yena a swi twisisile swaku loko u li Mukreste wa ku wupfa a swi zi swi lava u vekeliwa swinawanawana ka xin’wana ni xin’wana. Yena a li: “A swi lava ni twisisa leswi Yehovha a titwisaka xiswona ku tlula ku va ni vekeliwa minawu.” Loko u lerha Bibele tivutisi: ‘Mhaka leyi yi ni djondzisa yini hi Yehovha? Ku nga va swaku ku ni tshinya la nawu leli nga ni pfunaka ku yentxa minchumu ya yinene? Loko li li kona, ni nga pfunekisa ku yini hi ku li tirhisa ka wutomi la mina?’ (Pis. 19:7; Esa. 48:17, 18) Loko u lerha Bibele u tlhela u pimisa hi leswi u swi djondzaka, swi ta ku vevukela ku yentxa swiboho leswi nga ta tsakisa Yehovha. Nkama lowu u yaka u kulisa wunghanu la wena na Yehovha, u ta swi tsumbula swaku a swi lavi u vekeliwa minawu ka swiyimu hinkwaswu swa wutomi la wena, swo lava u twisisa leswi Yehovha a titwisaka xiswona.

13. Vanghanu va vanene va nga ku pfunisa ku yini? (Swivuriso 13:20)

¹³ Langa vanghanu lava rhandzaka Yehovha. Hilani se hi nga bula hi kona, vanghanu va vanene va nga ku pfuna swaku u kulisa wunghanu la wena na Yehovha. (Lerha Swivuriso 13:20.) Makwerhu lweyi a vitaniwaka Sara a a sungula ku kala a nga ha tsaki ka wutomi la yena. Kambe ku ni nchumu lexi nga yentxeka lexi nga mu pfuna swaku a tlhela a tsaka. A li: “Vanghanu va mina va ni pfunile hintamu. Hi xikombiso, a ni ni munghanu lweyi a hi hamba hi lunghiselela Murindzi xikan’we vhiki ni vhiki. Munghanu mun’wani wa mina a ni pfune swaku ni sungula ku hlamula mintlhanganwini. Phela vanghanu va mina va ni pfunile swaku ni sungula ku va ni djondzo ya mina ya Bibele ni ku khongela nkama ni nkama. Hi kutsongokutsongo wunghanu la mina na Yehovha a li ya li tiya naswona ni tlhele ni sungula ku tsaka.”

14. Impsini swi nga pfuna Julien ku va ni vanghanu va vanene?

¹⁴ U nga swi kotisa ku yini ku kuma vanghanu lava nga ku pfunaka ku yentxa minchumu ya yinene? Julien, lweyi swoswi a nga doda, a li: “Nkama na na ha li jovhem, a ni ni vanghanu lava a ni chumayela na vona. Vanghanu lava, a va hiseka naswona va ni pfunile ku vona swaku ku chumayela swi tsakisa hintamu. Ni game ni pimisa hi ku va mupfuli wa ndlela wa nkama hinkwawu. Ni tlhele ni swi vona swaku lexi a xi yentxa swaku ni nga vi ni vanghanu va vanyingi va vanene, hi leswi a ni li ni vanghanu va ntanga ya mina ntsena. Hi ku famba ka nkama, ni game ni va ni vanghanu aBetele. Xikombiso xa vona, xi ni pfune ku langa kahle leswi a ni hungata hi swona ni ku tiyisa wunghanu la mina na Yehovha.”

15. Impsini leswi Pawulo a nga byela Timotiyu swaku a swi yentxa? (2 Timotiyu 2:20-22)

¹⁵ U ta yentxa yini loko u tsumbula swaku van’wana bandleni va nga wonha wunghanu la wena na Yehovha? Pawulo a a swi tiva swaku ka bandla la Wukreste a ku ni vanhu lava a va nga na mahanyelo ya manene. Hi mhaka leyo, a byele Timotiyu swaku a fambela kule na vona. (Lerha 2 Timotiyu 2:20-22.) Wunghanu la hina na Yehovha i la lisima hintamu. Phela hi tirhe hi matimba swaku hi kulisa wunghanu lolelo. Hi mhaka leyo, a hi fanelanga hi pfumelela munhu a wonha wunghanu la hina na yena. — Pis. 26:4.

16. Impsini leswi u nga swi yentxaka swaku u kulisa wunghanu la wena na Yehovha?

¹⁶ Pimisa hi leswi u nga swi yentxaka. Pimisa hi swaku u nga yentxa yini swaku u tiyisa lipfumelo la wena ni ku kulisa wunghanu la wena na Yehovha. (Efe. 3:16) Hi xikombiso, u nga ha tinyimisela ku yampsisa djondzo ya wena ya Bibele u tlhela u lerha Bibele siku ni siku. (Pis. 1:2, 3) U nga ha yampsisa swikhongelo swa wena, u tlhela u yengesela makhambi lawa u khongelaka hi wona hi siku. Swi nga yentxeka swi lava u tivonela ka leswi u swi langaka swaku u hungata hi swona ni nkama lowu u wu hetaka na u hungata. (Efe. 5:15, 16) Yehovha a tsaka hintamu loko a vona swaku u yentxa hinkwaswu leswi u nga swi kotaka swaku u kulisa wunghanu la wena na yena.

17. U nga pfunekisa ku yini loko u pfuna vanhu van’wana?

¹⁷ Nchumu xin’wana lexi nga ku pfunaka swaku u va Mukreste wa ku wupfa, i ku pfuna van’wana. Yesu a te: “Swi tsakisa hintamu ku nyika ku tlula ku yamukela.” (Mint. 20:35) U ta pfuneka hintamu loko u tirhisa nkama ni ntamu wa wena swaku u pfuna van’wana. Hi xikombiso, u nga ha pimisa hi ku pfuna vamakwerhu lava nga guga ni lava va vabyaka ka bandla la wena. Swi ngo yini u va pfuna hi ku va xavela minchumu, kumbe ku va djondzisa ku tirhisa matelefoni ni makomputadori ya vona? Loko u li makwerhu wa wanuna, swi ngo yini u pimisa hi ku va mupfunisi wa bandla swaku u pfuna vamakwerhu? (Filp. 2:4) U nga tlhela u kombisa lirhandzu hi ku chumayela mahungu ya ku tsakisa ka vanhu lava va kalaka va nga tivi nchumu hi Yehovha. (Mat. 9:36, 37) Loko swi koteka, tinyimiseli ku nghenela ntirho wa nkama hinkwawu.

18. Ku va mupfuli wa ndlela wa nkama hinkwawu swi nga ku pfunisa ku yini?

¹⁸ Ku nghenela ntirho wa nkama hinkwawu, swi nga ku pfuna swaku u kulisa wunghanu la wena na Yehovha. Ku va mupfuli wa ndlela wa nkama hinkwawu swi nga ku pfuna swaku u ya ka Xikola Xa Vachumayeli Va Mfumu, ku tirha Betele kumbe ku pfunisa ka maprojetu ya ku yaka. Kaitlyn lweyi a nga mupfuli wa ndlela naswona a nga ni 21 wa malembe a li: “Ku heta nkama wa wunyingi na ni chumayela ni vamakwerhu lava nga ni wunghanu la linene na Yehovha, swi ni pfunile swaku ni kulisa wunghanu la mina na Yehovha nkama ni nga tsakamisiwa. Xikombiso xa vona xi ni pfunile ku djondza Bibele nkama ni nkama ni ku yampsisa madjondziselo ya mina.”

19. Hi yini minkateko leyi u nga ta yi kuma loko u tama u kulisa wunghanu la wena na Yehovha?

¹⁹ Loko u tikarhata swaku u kulisa wunghanu la wena na Yehovha, yena a ta ku katekisa hintamu. A wu nga ta heta nkama ni ntamu wa wena hi ku yentxa swilo leswi kalaka swi nga pfuni nchumu. (1 Yoh. 2:17) Phela a wu nga ta ku twa ku vava loku tisiwaka hi ku yentxa minchumu ya ku biha. Ku hambana ni leswo, u ta tsaka. (Swi. 16:3) Naswona xikombiso xa wena xi ta pfuna vamakwerhu hinkwavu. (1 Tim. 4:12) Xa lisima hintamu, u ta va ni ku rhula naswona u ta tikhorisa hi minkateko leyi tisiwaka hi ku va munghanu wa Yehovha. — Swi. 23:15, 16.