DJONDZO 55
Seketela Bandla La Wena
Vanhu va vanyingi amisaveni hinkwayu va tirhela Yehovha ka mabandla ya ku hambanahambana. Vanhu volavo va swi nyika lisima leswi va swi djondzaka, hi mhaka leyo va tama va seketela mabandla ya vona. Hi leswi na wena u titwisaka xiswona ka bandla leli u nga ka lona?
1. U nga wu tirhisisa ku yini nkama wa wena ni ntamu wa wena swaku u seketela bandla?
Hinkwerhu ku ni leswi hi nga swi yendlaka swaku hi seketela bandla. Hi xikombiso, u nga swi kota ku pfuna lava nga guga kumbe lava va vabyaka ka bandla la wena swaku va ya mintlhanganwini? Kumbe u va pfuna hi swilo swin’wani swa ku fana ni ku ya va xavela swilo kumbe u va pfuna hi mintirho ya le kaya? (Lerha Yakobe 1:27.) Na hina hi nga tinyiketela swaku hi pfunisa ka ku basisa kumbe ka ku lunghisa Tiyindlo ta Wugandzeli. Phela a ku na munhu a hi sindzisaka ku yendla leswo. Kambe ku rhandza Yehovha ni vamakwerhu hi swona swi hi yendlaka ‘hi tinyikela hi ku swi rhandza’. — Tipisalema 110:3.
Timboni ta Yehovha leti nga tsakamisiwa, ti seketela bandla hi tindlela ta ku hambanahambana. Hi xikombiso, vamakwerhu va xinuna va nga yendla hinkwaswu leswi va nga swi kotaka swaku va va vapfunisi va bandla kumbe va va madoda ya bandla. Vamakwerhu va xinuna ni va xisati va nga pfunisa ka ntirho wa ku chumayela hi ku va vapfuli va ndlela va nkama hinkwawu. Timboni ta Yehovha tin’wani ti pfunisa ka ku yaka tindhawu leti nga ta tirhiseliwa ku gandzela Yehovha ka tona, kasi tin’wani ti rhurha ti ya tshama ka ndhawu yin’wani swaku ti pfunisa mabandla lawa ma nga ni vachumayeli vavatsongo.
2. Hi nga swi tirhisisa ku yini swilo swa hina swaku hi seketela bandla?
Hina hi ‘hlonipha Yehovha hi minchumu ya hina ya lisima’. (Swivuriso 3:9) Phela ka hina i swa lisima hintamu ku nyikela hi male ni swilo swin’wani leswi hi nga na swona swaku hi seketela bandla kumbe hi seketela ntirho wa ku chumayela mahungu ya ku tsakisa amisaveni hinkwayu. (Lerha 2 Vakorinto 9:7.) Leswi hi swi nyikelaka swi tlhela swi tirhisiwa swaku swi pfunisa ka ntirho wa ku pfuna lava nga humeleliwa hi tinghozi. Van’wani va ‘veka xanchumu’ kumbe male vhiki ni vhiki kumbe wheti ni wheti swaku va ta nyikela hi yona. (Lerha 1 Vakorinto 16:2.) Hi nga nyikela hi male ka makaxa lawa ma nga ka Tiyindlo ta Wugandzeli kumbe hi nyikela hi ku tirhisa a interneti ka site la donate.jw.org. Phela hi nga kombisa swaku ha mu rhandza Yehovha hi ku nyikela hi male ya hina ni minchumu leyi hi nga na yona.
DJONDZA SWIN’WANI
Vona swilo swin’wani leswi u nga swi yendlaka swaku u seketela bandla.
3. Seketela bandla hi minyikelo ya wena
Yehovha na Yesu va va rhandza lava va nyikelaka hi mbilu ya vona hinkwayu. Hi xikombiso, Yesu a tshame a vona wansati lweyi a nga feliwa hi nuna na a peta male ka kaxa. Lerhani Luka 21:1-4, mi gama mi bula hi swivutiso leswi landzelaka:
Ku nga va swaku hi fanele hi nyikela hi male ya yinyingi swaku hi tsakisa Yehovha?
Yehovha na Yesu va titwisa ku yini loko hi nyikela hi mbilu ya hina hinkwayu?
Leswaku u vona swaku minyikelo ya hina yi tirhisisiwa ku yini, sixtirani VHIDIYO. Mi gama mi bula hi xivutiso lexi landzelaka.
Male ya minyikelo yi tirhisisiwa ku yini swaku yi seketela mabandla amisaveni hinkwayu?
4. Hi nga tinyikela swaku hi pfunisa bandla
Vanhu va Yehovha va khale, handle ka ku nyikela hi male a va swi rhandza hintamu ku hlayisa tindhawu leti a va gandzela Yehovha ka tona. Lerhani 2 Tikronika 34:9-11, mi gama mi bula hi xivutiso lexi landzelaka:
Hi ku ya hi tindzimana leti, i mpsini leswi Vayisrayele a va swi yendla swaku va hlayisa tempele?
Leswaku u vona swaku Timboni ta Yehovha ti xi tekelelisa ku yini xikombiso xa Vayisrayele namuntlha, sixtirani VHIDIYO. Mi gama mi bula hi swivutiso leswi landzelaka.
Hi mhaka muni Yindlo ya hina ya Wugandzeli yi fanele yi tshama na yi basile yi tlhela yi li ka xiyimu xa kahle?
U nga yendla yini swaku u pfunisa ka ku basisa Yindlo ya Wugandzeli?
5. Vamakwerhu va xinuna va nga yendla mintirho ya yinyingi abandleni
A Bibele li pfuna vamakwerhu va xinuna leswaku va tikarhatela ku yendla mintirho yin’wani abandleni. Sixtirani VHIDIYO, mi gama mi bula hi xivutiso lexi landzelaka.
Ka vhidiyo, i mpsini leswi Ryan a nga swi yendla swaku a tama a seketela bandla?
Bibele li vula leswi vamakwerhu va xinuna lava va lavaka ku va vapfunisi va bandla kumbe madoda va faneleke va swi yendla. Lerhani 1 Timotiya 3:1-13, mi gama mi bula hi swivutiso leswi landzelaka:
I mpsini leswi vamakwerhu lava lavaka ku va vapfunisi va bandla kumbe madoda va faneleke va swi yendla?
I mpsini leswi mindjangu ya vona yi faneleke yi swi yendla? — Vona tindzimana 4 ni 11.
Loko vamakwerhu lava va yendla leswo, vamakwerhu abandleni va pfunekisa ku yini?
VAN’WANI VA NGA HA KU VUTISA VA KU: “Timboni ta Yehovha ti yi kuma kwini male leyi ti yi tirhisaka swaku ti yendla mintirho ya tona?”
A wu ta vula yini loko vo ku vutisa leswo?
LESWI HI NGA SWI DJONDZA
Loko hi tirhisa nkama wa hina, ntamu ni minchumu ya hina swaku hi seketela a bandla, Yehovha a yi nyika lisima hintamu minzamu yoleyo.
Ku kambela leswi hi nga swi djondza
Hi nga wu tirhisisa ku yini nkama ni ntamu wa hina swaku hi seketela bandla?
Hi nga swi tirhisisa ku yini swilo leswi hi nga na swona swaku hi seketela bandla?
Hi swini swilo leswi u tsakelaka ku swi yendla swaku u seketela bandla?
LOKO U LAVA KU TIVA SWIN’WANI
Vona swaku hi mhaka muni Xikwembu xi nga londzi swa wukhume.
“Bibele Yi Ri Yini Hi Ku Humesa Vukhume?” (Nhlokomhaka leyi nga ka site la jw.org hi Xitsonga)
Ku ni mintirho leyi Bibele li vulaka swaku yi fanele yi yendliwa hi vamakwerhu va xinuna lava nga tsakamisiwa. Kambe vamakwerhu va xisati lava nga tsakamisiwa va nga yendla yini loko swi boha swaku ku li vona va yendlaka mintirho yoleyo?
“Twisisa Leswi Bandla Li Tirhisaka Xiswona” (Murindzi wa Fevereiro wa 2021)
Tiva Timboni ta Yehovha leti nga tikarhata hintamu leswaku ti heleketa mabuku ka vamakwerhu van’wani.
Ku hambana ni wukhongeli lin’wani, Timboni ta Yehovha ti yi tirhisisa ku yini male swaku ti yendla mintirho ya tona?