Mareferensiya ya Xibukwana xa Minhlanganu ya Mahanyelo ni Ntirho
7 KUYA KA 13 KA OUTUBRO
XUMA XINGA KA RITO LA XIKWEMBU | YAKOBO 3-5
“Kombisa Wutlharhi Leli Taka hi Henhla”
cl tl. 222 mapar. 9-10
Wali Kombisa “Wutlharhi Leli Taka hi Henhla”?
“Xosungula, li basile”. Kubasa swi vula kupfumala chaka a handle ni le ndzeni. Bibele li li a wutlharhi li fambisana ni mbilu, kambe a wutlharhi la Xikwembu alinge ngheni ka mbilu leyi chakisiweke hi mimpimiso, kunavela ni minsusumeto ya kubiha. (Swivuriso 2:10; Matewu 15:19, 20) Kambe loko mbilu ya hina yi basile, hi mpimu lowu swi kotekaka ka vanhu vokala kuhetiseka, hita “hambuka ka swobiha [hi] yendla leswinene”. (Tipisalema 37:27; Swivuriso 3:7) Waswi vona leswaku swa fanela leswaku kubasa ku li nchumu xosungula xi xaxametiwa ka wutlharhi? Phela, loko hinga basanga hi tlhelo la moya ni ka mahanyelo, ahingeswi koti kukombisa swiyenge swin’wana swa wutlharhi leli taka hi henhla hi kuhelela.
“Li gama li va ni kurhula”. Wutlharhi la le tilweni lihi yendla hi va vanhu vorhula. Kurhula i yin’wana ya mihandzu ya moya. (Vagalatiya 5:22) Hi tikarhatela ‘kuhanyisana hi kurhula’ loku yendlaka vanhu va Yehovha va va ni wun’we. (Vaefesa 4:3) Hi tlhela hi lulamisa swilo hilaha hi kotaka hakona leswaku hi vuyisa kurhula. Hi mhaka muni leswi swi li swinene? Bibele li li: ‘Mihanya hi kurhula; kutani Xikwembu xa lirhandzu ni xa kurhula xitava na n’wina.’ (2 Vakorinto 13:11) Loko hi tama hi hanya hi kurhula, Xikwembu xa kurhula xita va na hina. Ndlela leyi hi hanyisanaka ha yona ni vamakwerhu, yi khumba wuxaka la hina na Yehovha hi kukongoma. Hingaswi kombisisa kuyini leswaku hi vayendli va kurhula? Ahi voneni xikombiso lexi landzelaka.
cl tl. 224 par. 12
Wali Kombisa “Wutlharhi Leli Taka hi Henhla”?
“Kuyanakanyela”. Swi vula yini kuyanakanyela? Tintivi tin’wana ti vula leswaku swa tika kuhundzuluxela rito la Xigriki xa khale, leli kumekaka ka Yakobo 3:17, lelinga hundzuluxeliwa va ku “kuyanakanyela”. Vahundzuluxeli van’wana va li hundzuluxela va ku “wunene”, “kulehisa mbilu” ni “kuyanakanyela”. Hi xigriki xa khale, rito leli, li vula “kuvevuka, kupfumelelana ni swiyimo”. Hingaswi kombisisa kuyini leswaku hi na lona wutlhari la muxaka lowu?
cl matl. 224-225 mapar. 14-15
Wali Kombisa “Wutlharhi Leli Taka hi Henhla”?
“Kutinyimisela kuyingisa”. Rito la Xigriki lelinga hundzuluxeliwa va ku “kutinyimisela kuyingisa” lo kumeka ka Yakobo 3:17 kuhela. Hi kuvula ka ntivi yin’wana, rito leli, li “tirhisiwa ngopfu ka swa wusochwa”. Li vula “kukholwisiwa hi kuvevuka” ni “kutiveka hansi”. Lweyi a fumiwaka hi Wutlharhi leli taka hi ka Xikwembu, a yingisa leswi Matsalwa ma vulaka swona hi kuhantlisa. Anga tiviwi tani hi lweyi loko o za a yendla xiboho xokarhi, angaha tlheli ndzhaku hambiloko ku ni xivangelo xa kucinca. Kuhambana ni leswo, anga hlweli kucinca loko a pfuniwa hi kutirhisa Matsalwa leswaku wa phazama kumbe a yendle xiboho lexi hoxeke. U tiviwa u li munhu wa kutshamisa xileswi?
“Li Tele Timpsalo ni Mihandzu Ya yinene”
“Li tele timpsalo ni mihandzu ya yinene”. Timpsalu i xiyenge xa lisima xa wutlharhi la le henhla hikusa li vuliwa leswaku li “tele timpsalo”. Vona leswaku “timpsalo” ni “mihandzu ya yinene” swi longoloxiwa xikan’we. Swa twala hikusa aBibeleni rito lelinge “timpsalo” li vula kukombisa leswaku hi ni mhaka ni van’wana, i ntwelawusiwana lowu susumetelaka munhu kuva a yendlela van’wana swa swinene. Buku lin’wana li tlhamusela timpsalo tani hi “kurila ni lava rilaka ni kuzama kuva pfuna.” Kutani, a wutlharhi la Xikwembu a hi kuyendlela van’wana swa swinene ntsena kambe i kuva yendlela swa swinene hi kususumeteliwa hi lirhandzu ni hi ntwelawusiwana. Hingaswi kombisisa kuyini leswaku hi ni timpsalo?
cl matl. 226-227 mapar. 18-19
Wali Kombisa “Wutlharhi Leli Taka hi Henhla”?
“A li na xikheto”. A wutlharhi la Xikwembu a li na swona leswaku lweyi i mulungu, lweyi i mulandi kumbe mubaniyani. Naswona a li na swona leswaku tiko la mina la yampsa kutlala la van’wana. Loko hi kongomisiwa hi wutlharhi leli, hita zama kususa moya lowu wa xihlahlawuhlawu. (Yakobo 2:9) Ahingata kombisa malwandla ya kuhlawuleka ka munhu hi kuya hi leswi anga na swona, swofana ni kudjondzeka, kuva ni mali kumbe wutihlamuleli leli anga na lona abandleni. Ahingatava vonela hansi vamakwerhu lavanga swisiwana. Leswi Yehovha ava kombeke lirhandzu la yena, na hina hi fanele hiva vona nava faneliwa hi lirhandzu la hina.
“A li na wukanganyisi”. Rito la Xigriki lelinge “mukanganyisi” linga vula “munhu lweyi a yendlaka ntlangu wa teatro”. Aminkameni ya khale, atikweni la Roma ni le Grécia, vatlangi va mateatro ava yambala mamáscara leswaku va tipfala loko va tlanga teatro. Kutani rito lelinge “mukanganyisi” hi Xigriki, li sungule kutirhisiwa ka munhu lweyi a tifihlaka leswi anga swona. A wutlharhi la Xikwembu leli pfumalaka wukanganyisi li fanele lihi yendla hi tirhisana kahle ni vamakwerhu hi lirhandzu la ntiyiso kunga li hi kuyendla ingi hava rhandza.
Lavetela Xuma xa Moya
w08 15/11 tl. 20 par. 6
Tipontunkulu ta Mapapila ya Yakobo na Petro
4:5 — Yakobo a vulavula hi tsalwa lihi la Bibele? Anga vulavuli hi tsalwa lokarhi hi kukongoma. Kambe marito lawa manga huhuteliwa hi Xikwembu, mangaha sekeliwa ka ntsutsu wa matsalwa yotani hi Genesa 6:5; 8:21; Swivuriso 21:10; na Vagalatiya 5:17.
w97 15/11 matl. 20-21 par. 8
Kupfumela Kuhi Yendla hi Lehisa Mbilu ni Kukhongela
Kuvulavula kubiha hi vamakwerhu i xidjoho. (Yakobo 4:11, 12) Kambe van’wana va solasola vamakwerhu kumbexana hi leswi va tivonaka nava lulamile ngopfu kumbe hi leswi va navelaka kutitwa va li henhla ka vona hi kuva veka hansi. (Tipisalema 50:20; Swivuriso 3:29) Rito la Xigriki leli hundzuluxiweke va ku ‘kuvulavula kubiha’ li kombisa tihanyi naswona li vula kuhehla munhu hi swihehlo leswi hundzeletiweke kumbe swa mavunhwa. Leswi swi vula kuyavanyisa makwerhu hi ndlela yobiha. Leswi swi vula ‘kuvulavula kubiha hi nawu wa Xikwembu ni kuwu yavanyisa’ hi ndlela yihi? Hi kunghwala, Vatsali ni Vafarisi ava veka Nawu wa Xikwembu atlhelweni kutani va thethisa vanhu hi kuya hi minawu ya vona. (Marka 7:1-13) Hi kufanana, loko hi sola makwerhu wokarhi na kuve Yehovha angamu khomelanga minandzu, ahingata va hi ‘yavanyisa nawu wa Xikwembu’ ni kudjoha hi kuvula leswaku wona awu helelanga? Naswona loko hi solasola makwerhu hi ndlela yobiha, hitava hingawu yingisi nawu wa lirhandzu. — Varhoma 13:8-10.
14 KUYA KA 20 KA OUTUBRO
XUMA XINGA KA RITO LA XIKWEMBU | 1 PETRO 1-2
“Kwetsimani na N’wina”
w17.02 tl. 9 par. 5
Nkutsulu I “Nyiko Leyi Hetisekeke” ya Xikwembu
Hingaswi kombisisa kuyini leswaku hali rhandza vito la Yehovha? Hi kuva ni mahanyelo lamanene. Yehovha a lava leswaku hi kwetsima kumbe kubasa. (Lerha 1 Petro 1:15, 16.) Swi vula leswaku hi fanele hi gandzela Yehovha kuhela naswona himu yingisa hi mbilu hinkwayu. Hambiloko hi hluphiwa, hi yendla hinkwaswu leswi hiswi kotaka kuhanya hi matshinya ya minawu ya yena yolulama. Loko hi ni mahanyelo lamanene, vanhu vatahi vona kutani leswo swita vangamisa vito la Yehovha. (Mat. 5:14-16) Tani hi Vanhu vokwestima, hiswi kombisa hi mahanyelo ya hina lamanene leswaku minawu ya Yehovha yi lulamile ni leswaku swihehlo swa Sathana i mavunhwa. Loko hi phazama, ha tisola hi mbilu hinkwayu, naswona hi tshika mahanyelo yobiha lama susaka Yehovha xindzhuti. — Pis. 79:9.
lv matl. 64-65 par. 6
Hinga hungata hi yini?
Yehovha a li: “Mi fanele mi kwetsima, hikusa mina na kwetsima.” (1 Petro 1:14-16; 2 Petro 3:11) Leswaku Yehovha a tsakela wugandzeli la hina, li fanele li kwetsima kumbe li basa. (Deteronoma 15:21) Haswi tiva leswaku loko hi yendla swilo leswi Yehovha aswi nyenyaka, wugandzeli la hina alingata basa. Swo tani hi, mahanyelo yobiha hi masangu, kubanana kumbe swillo leswi fambisanaka ni wudimoni. (Varhoma 6:12-14; 8:13) Naswona, Yehovha ange tsaki hambiloko hi tihungata hi kuswi hlalela swilo leswi. Hikusa wugandzeli la hina lingahata basa naswona hingaha luzekeliwa hi wuxaka la hina na Yena.
Lavetela Xuma xa Moya
w08 15/11 tl. 21 par. 8
Tipontunkulu ta Mapapila ya Petro na Yakobo
1:10-12. Tintsumi ti navele kukambisisa ni kutwisisa kahle wuyenti la mintiyiso ya Xikwembu leyi vaprofeta va khale va xona va tsaleke ha yona mayelana ni bandla la wukreste leli totiweke. Hambileswo, mintiyiso leyi yi twisiseke hi kuhelela loko Yehovha a sungula kutirhisana ni bandla la wukreste. (Efe. 3:10) Phela, kufana ni tintsumi hi fanele hi tikarhatela kukambisisa mintiyiso leyi yenteke ya Xikwembu. — 1 Kor. 2:10.
it-3 tl. 658 par. 3
Muvoneleli
Muvoneleli Lwenkulu Ngopfu. Hilaha swi vonekaka hakona, 1 Petro 2:25 yi vulavula hi marito ya Esaya 53:6 mayelana ni lava ‘ava pepetsekile kufana ni tinyempfu’. Kutani Petro a li: ‘Kambe swoswi mi tlhelelile ka murisi tlhelo muvoneleli wa wutomi la n’wina.’ Marito lawa ma ya ka Yehovha, hikusa lava Petro aava tsalela avanga hambukanga ka Kreste Yesu, kambe kuhambana ni leswo, ava vuyisiwile ka Yehovha ha yena. Yehovha hi yena Murisi Lwenkulu wa vanhu va yena. (Ps 23:1; 80:1; Yr 23:3; Ezk 34:12) Nakambe Yehovha i mulanguteli lweyi a kambelaka. (Ps 17:3) Kukambela (e·pi·sko·pe’ hi Xigriki) kungaha fambisana ni wuyavanyisi la kuvava, kufana ni leswinga yendleka ka minkama ya vapostola loko Yerusalema angaswi twisisanga leswaku a kufike nkama wa yena wa ‘kukambeliwa [e·pi·sko·pe’ hi Xigriki]’. (Lk 19:44) Kumbe kukambela loku akuta tisa vuyelo lelinene ka lava dzunisaka Xikwembu hi siku ‘la kukambela ka xona [e·pi·sko·pe’ hi Xigriki]’. — 1 Pet. 2:12.
21 KUYA KA 27 KA OUTUBRO
XUMA XINGA KA RITO LA XIKWEMBU | 1 PETRO 3-5
‘Kuhela ka Swilo Hinkwaswu Kule Kusuhi’
w13 15/11 tl. 3 par. 1
“Mi Khindlimuka Amhakeni ya Swikhongelo”
Mulumuzana mun’wana lweyi a tshameke a va gwardu a li: “Loko li ya kuxeni leswiya, hi kona wurhongo li taka.” Van’wana lava swi bohaka kutshama nava vona wusiku wusiku vanga pfumelelana na swona leswi. Ni nyamuntlha Vakreste va le ka xiyimo xa kufanana ni xa wugwardu hikusa xiyimo xa misava leyi ya Sathana xi le kusuhi ni kuhelisiwa. (Rhom. 13:12) Kunene swinga va ni khombo loko ho yetlela hi le moyeni ka nkama lowu wa magamu! Swa laveka leswaku hi va ni “miyanakanyo ya kuhluteka” hi tlhela hi yingisa xikhutazo xa Matsalwa xa ku “khindlimuka amhakeni ya swikhongelo.” — 1 Pet. 4:7.
w99 15/4 tl. 21 par. 5
Ndlela ya Kutiva ni Kuhlula Kutsana hi tlhelo la Moya
Xa wugamu, unga khohlwi kupimisa hi xitsundzuxo xa lirhandzu xa mupostola Petro lexinge: “Kambe kuhela ka swilo hinkwaswu ku kusuhi. Hi mhaka leyo, vanani ni miyanakanyo ya kuhluteka, mi khindlimuka amhakeni ya swikhongelo. Kutlula hinkwaswu, rhandzanani ngopfu, hikusa lirhandzu li funengeta swidjoho swotala.” (1 Petro 4:7, 8) Swa vevuka ngopfu kutshika kunga hetiseki ka hina ni ka van’wana kunghena ka timbilu ni miyanakanyo ya hina ivi ku va xihinga. Sathana waku tiva kutsana loku ka vanhu. Rhengu la yena i kuhi hambanisa leswaku ahi hlula. Hi mhaka leyo, hi fanele kupfalapfala swihoxo hi xihantla hi kurhandzana ngopfu naswona ‘hinganyiki Diyavulosi’ ndhawu. — Vaefesa 4:25-27.
w18 15/3 tl. 14 par. 2
Kukombisa Malwandla swa Laveka Naswona swa Tsakisa!
Petro a khongotele vamakwavu a ku: “Titoloveteni kuyamukela vayendzi, mirhurhelana”. (1 Pet. 4:9) Hi Xigriki, rito lelinge “malwandla” li vula ku “rhandza ni kukombisa wunene ka vanhu lava hingava tiviki”. Hambileswo, vona leswaku Petro a akhongotela vamakwavu lavanga Vakreste leswaku va kombana malwandla. Kunga vanhu lava se ava tivana ni kuhanyisana xikan’we siku ni siku. Kambe kukombisana malwandla aswitava pfunisa kuyini?
Aswitava yendla va va ni wun’we. Vona hi wena! Wa ke u rhambiwa hi munhu kaya ka yena? Aswiku tsakisanga kuva kona? Loko u rhamba van’wana kaya ka wena, awu titwanga uva rhandza ngopfu? Kukomba vamakwerhu malwandla swi yendla hi va tiva kuyanpsa. Vakreste va minkama ya Petro ava fanelele va tshinelelana va va ni wun’we hikusa swiyimo aswi ya swi tika. Ni nyamuntlha, ‘amasikwini lawa ya magamu’ na hina swi lava hi va ni wun’we! — 2 Tim. 3:1.
Lavetela Xuma xa Moya
w13 15/6 tl. 23
Swivutiso swa Valerhi
Bibele li li Yesu a ‘[chumayele] mimoya leyinga djele’. (1 Pet. 3:19) Leswi swi vula yini?
▪ Mupostola Petro a vula leswaku mimoya leyi hi leyi “a yinga yingisanga hi nkama lowu Xikwembu axi li karhi xi rindza hi kulehisa mbilu amasikwini ya Nowa, nakaha yakiwa ngalava, leyi ka yona vanhu vatsongo, kunga 8 wa vona, va ponisiweke amatini.” (1 Pet. 3:20) Swi li livaleni leswaku Petro a avulavula hi tintsumi letinga langa kunyima na Sathana. Yudha a vulavula hi “tintsumi letingahlayisangiki xiyimu xa tona, kambe tisukile laha akuli kaya ka tona” a tlhela a ku: “Xikwembu xibohile tintsumi takona hi machini, xitipfalela hilaha kungaheliki xinyameni lexichavisaka, tirindzela siku lelikulu.” — Yudha 6.
Tintsumi a tiyingisanga aminkameni ya Nowa hi ndlela yihi? Ndhambi yingase fika, tintsumi leti titi yendle ingi i vanhu va nyama. Xikwembu axingati yendlelanga leswo. (Gen. 6:2, 4) Kutlula leswo, kuva tintsumi ti fambe masangu ni vavasati misaveni aswinga li swa ntumbuluku wa tona. Hikusa Xikwembu axi tumbuluxanga swivumbiwa swa moya leswaku swi yetlela ni vavasati. (Gen. 5:2) Tintsumi leti tobiha, tokala tinga yingisanga, tita helisiwa hi Xikwembu hi nkama wa xona. Swoswi tintsumi leti ti le “xinyameni lexichavisaka”, kunga djele la kufanekisela, hi kuvula ka Yudha.
Yesu ayi chumayelise kuyini “mimoya leyinga djele” naswona hi nkama muni? Petro a tsale leswaku swi yendleke ndzhaku ka loko Yesu “ayendliwile lweyi ahanyaka hi tlhelo la moya.” (1 Pet. 3:18, 19) Nakona vona leswaku Petro a li Yesu a ‘chumayelile’. Loko a ku Yesu a ‘chumayelile’, Petro a lava kuvula leswaku kuchumayela loku kuyendleke na angase tsala papila la yena losungula. Swi voneka ingi ndzhakunyana ka kupfuxiwa ka yena, Yesu a tivise tintsumi leti leswaku atita kuma xikhatiso lexi faneleke. Akunga li kuchumayela loku nyikaka ntshembo. Kambe aku li kuchumayela ka wuyavanyisi. (Yonasi 1:1, 2) Aswimu fanela Yesu kuva a twalisa wuyavanyisi leli la kuvava hikusa a kombise kupfumela ni kutshembeka anze a fa ivi a pfuxiwa kufeni. Hi ndlela leyi, a kombise leswaku Diyavulosi angemu yendli nchumu. — Yoh. 14:30; 16:8-11.
Ka nkama lowu taka, Yesu ata khoma Sathana ni tintsumi toleto ava cukumeta axikheleni xa kuyenta. (Luka 8:30, 31; Nhla. 20:1-3) Kambe, na minkama leyo yingase fika, tintsumi leti tokala kuyingisa, ti kumeka ka xiyimo xa moya xa munyama wa wukulu, naswona tita helisiwa ti kujii. — Nhla. 20:7-10.
w08 15/11 tl. 21 par. 6
Tipontunkulu ta Mapapila ya Yakobo na Petro
4:6 — “Lavafeke” lava byeliweke “evhangeli kumbe mahungu yotsakisa” aku li vamani? Aku li vanhu lava ‘avafile moyeni hikolaho ka milandzu ni swidjoho swa vona’, hi marito man’wana, ava file hi tlhelo la moya loko vangase twa mahungu yotsakisa. (Efe. 2:1) Kambe ndzhaku ka loko vama pfumelile mahungu wolawo, va sungule “kuhanya”, hikusa se ava ni wuxaka na Yehovha Xikwembu.
28 KA OUTUBRO KUYA KA 3 KA NOVEMBRO
XUMA XINGA KA RITO LA XIKWEMBU | 2 PETRO 1-3
“Tshamelani Kukhumbuka Siku la Yehovha”
w06 15/12 tl. 27 par. 11
Yehovha Ata ‘Yendla Leswaku Kuyendliwa Wululami’
Ina ka, hi fanele hixi twisisa hi ndlela yihi xitiyisekiso xa Yesu xa leswaku Yehovha ata yendla leswaku wululami li yendliwa hi ‘kuhantlisa’? Bibele laswi kombisa leswaku hambileswi Yehovha ‘a lehisaka mbilu’, ata tisa wululami hi kuhantlisa loko nkama wu fika. (Luka 18:7, 8; 2 Petro 3:9, 10) Loko ndhambi yi ku swee, amasikwini ya Nowa, lavobiha va helisiwile hi kuhantlisa. Hi kufanana, loko kuxika ndzilu hi le tilweni aminkameni ya Lota, lavobiha vahelisiwile. Yesu a te: ‘Switava tano hi siku leli N’wana-wa-Munhu angatahumelela ha lona.’ (Luka 17:27-30) Lavobiha vata tlhela va helisiwa hi “xitshuketa” (1 Vatesalonika 5:2, 3) Hinga tiyiseka leswaku Yehovha ange pfumeleli misava leyi ya Sathana yi tama yiva kona ku za kuhundza nkama lowu yi vekeliweke wona.
w06 15/12 tl. 19 par. 18
“Siku Lelikulu la Yehovha li Kusuhi”
Aswihi hlamalise leswi mupostola Petro ahi tsundzuxaka leswaku hi tama hi khumbula hi “wukona la siku la Yehovha”! Hingali khumbukisa kuyini? Yin’wana ya ndlela i kuva ni ‘mahanyelo yobasa hi tlhela hi hanya hi mintirho ya kutinyiketela ka Xikwembu’. (2 Petro 3:11, 12) Kukhomeka hi mintirho yotanu switahi pfuna kurindzela “siku la Yehovha” hi kunavela lokukulu. Rito la Xigriki lelinge “kutshamela kukhumbuka” hi kukongoma li vula “kuhantlisisa”. I ntiyiso leswaku ahingeswi koti kuli hantlisisa siku la Yehovha leswaku li fika. Kambe loko hi khomekile antirhweni wa Xikwembu, swita yendla ingi nkama wu famba hi ku kahlula. — 1 Vakorinto 15:58.
w08 15/11 tl. 22 par. 2
Tipontunkulu ta Mapapila ya Yakobo na Petro
1:19 — I mani ‘nyeleti ya nimixo’, a humelele nkama muni naswona hiswi tivisa kuyini swoleswo? Nyeleti ya nimixo i Yesu Kreste tani hi Hosi ya Mfumu wa Xikwembu. (Nhla. 22:16) Hi lembe la 1914, Yesu a humelelile tani hi Hosi leyinga Mesiya ka swivumbiwa hinkwaswu, na a twalisa kuxa ka siku la nyiwani. A xivono xa kuhundzuliwa ka Yesu xi kombise kuvangama ni matimba ya yena ya wuhosi. Xi kombise leswaku wuprofeta la Xikwembu li tshembekile. Loko hi yingisa wuprofeta leli li ta voningela timbilu ta hina, kutani hita kholwiseka hi kuhelela leswaku nyeleti ya nimixo yi humelelile.
w08 15/11 tl. 22 par. 3
Tipontunkulu ta Mapapila ya Yakobo na Petro
2:4 — “Thatharasi” i yini? Naswona tintsumi leti kaleke kuyingisa ti cukumetiwe kona nkama muni? Thatharasi i xiyimo lexi fanaka ni djele, lomu kupfaleliwaka tintsumi tokala tinga yingisi ntsena kunga li vanhu. I xiyimo xa munyama laha kungo mphuu loko swita mhakeni ya kutiva swikongomelo swa Xikwembu swa kuhlamalisa. Lavanga ka djele leli la thatharasi a va na ntsembo mayelana ni wumundzuku. Xikwembu xi cukumete tintsumi toka tinga yingisi ka thatharasi aminkameni ya Nowa. Naswona tita tama tiva kolomuya anze ti helisiwa.