Ungaswi Kota Kuhlula Sathana

1, 2. I yini leswi hi fanele hiswi twisisa hi Sathana ni madimona ya yena?

A WUTOMI lita tsakisa swinene misaveni leyimpsha. Phela hi kona se hingata hanya hi ndlela leyi Yehovha a akunguhate ha yona. Kambe namuntlha hi hanya ka misava leyi fumiwaka hi Sathana ni madimona ya yena. (2 Vakorinto 4:4) I ntiyiso leswaku ahi va voni, kambe va kona naswona va ni ntamu swinene.

² Ka ndzima leyi, hita bula hi ndlela leyi hinga vaka ni wuxaka na Yehovha ni kutlhela hi tisirhelela ka Sathana. Yehovha ahi tshembisa leswaku atahi pfuna. Kambe hi fanele hi twisisa tindlela leti Sathana ni madimona ya yena va titirhisaka kuhi kanganyisa ni kuhi hlasela.

 3. I yini leswi Diyavulosi a lavaka kuhi yendla swona?

³ Sathana a vula leswaku vanhu va gandzela Yehovha hi kulava xokarhi naswona vata tshika kutirhela Xikwembu loko swilo swiva tikela swinene. (Lerha Yobo 2:4, 5.) Sathana ni madimona ya yena vaswi vona loko munhu a kombisa leswaku a lava kudjondza hi Yehovha, kutani va zama kumu tshikisa. Va kwata swinene loko munhu a tinyiketela ka Yehovha a tlhela a tsakamisiwa. Bibele li vula leswaku Sathana i ‘nghonyama leyibongaka, yilava lweyi yingamudlaka.’ (1 Petro 5:8) Sathana a lava kuhahlula wuxaka la hina na Yehovha. — Tipisalema 7:1, 2; 2 Timotiya 3:12.

4, 5. a) I yini leswi Sathana anga kalaka angaswi yendli? b) Swi vula yini ‘kuyalela Diyavulosi’?

⁴ Hi fanele himu chava Sathana ni madimona ya yena? Nikatsongo! Hikusa Yehovha ava vekele swipimelo ka leswi vangahi yendlelaka swona. Yehovha a tshembisa leswaku “xitshungu lexikulu” xa Vakreste va ntiyiso xita pona ‘kuxanisekeni lokukulu’. (Nhlavutelo 7:9, 14) Kutani Diyavulosi angeswi siveli leswo, hikusa Yehovha a karhi a sirhelela vanhu va Yena.

⁵ Loko hi va ni wuxaka leli tiyeke na Yehovha, Sathana angeswi koti kuhi hambanisa na Yena. Bibele li li: “Yehovha ana n’wina ntsena loko mi tshama na yena”. (2 Tikronika 15:2; lerha 1 Vakorinto 10:13.) Vavanuna ni vavasati votala va khale lava tshameke va tshembekile, vofana na Avele, Enoko, Nowa, Sara, na Moxe, va hlule Diyavulosi hi kuva vanghanu va Yehovha. (Vaheveru 11:4-40) Na hina hinga yendla leswi fanaka. Bibele lahi tshembisa: “Yalelani Diyavulosi, kutani atamibaleka.” — Yakobo 4:7.

 6. Sathana ahi hlaselisa kuyini?

⁶ Sathana waswi tiva leswaku Yehovha angamu pfumeleli kuyendla hinkwaswu leswi aswi lavaka hi hina, kambe a ringeta kuyendla minzamu hinkwayu kuva a wonha wuxaka la hina ni Xikwembu. Namuntlha, Diyavulosi a hlasela hi tindlela totala, naswona waha tirhisa mintlhamu leyi angayi tirhisa khale. Hi yihi ya kona?

 7. Hi mhaka muni Sathana a hlasela vanhu va Yehovha?

⁷ Mupostola Yohane a tsale a ku: “Misava hinkwayu yi le ka lweyi wobiha.” (1 Yohane 5:19) Misava leyi yobiha yi fumiwa hi Sathana naswona a lava kufuma ni vanhu va Yehovha. (Mikiya 4:1; Yohane 15:19; Nhlavutelo 12:12, 17) Diyavulosi waswi tiva leswaku a saleliwe hi nkama wa wutsongo swinene, kutani a zama hilaha anga kotaka hi kona kuva a yendla leswaku mun’wana ni mun’wana wa hina anga tshembeki ka Xikwembu. Minkama yin’wana Sathana a tirhisa minhlaselo leyi kongomeke, kambe ka minkama yin’wana minhlaselo ya yena yi fihlekile.

 8. I yini leswi Vakreste hinkwavu va faneleke vaswi twisisa?

⁸ Vaefesa 6:12 yi li: ‘Hilwa . . . ni mimoya yobiha leyi hanyaka mpfukeni.’ Mukreste mun’wana ni mun’wana a lwa nyimpi na Diyavulosi ni madimona. Hi fanele hiswi twisisa leswaku hinkwavu lava tinyiketeleke ka Yehovha, va le ndzeni ka yona nyimpi leyi. Hi leswo swinga yendla leswaku ka papila leli mupostola Pawulo ali tsaleleke Vakreste va le Efesa, a phindha kanharhu marito lamange tshamani ‘mi tiyile’. — Vaefesa 6:11, 13, 14.

 9. I yini leswi Sathana ni madimona va zamaka kuhi yendla swona?

⁹ Sathana ni madimona va tirhisa tindlela totala leswaku va zama kuhi kanganyisa. Loko hi hlulile ka ntlhamu wokarhi wa Sathana, aswi vuli swona leswaku angehe tshuki ahi phasa hi ntlhamu wun’wana. Phela Diyavulosi a rhanga a vona laha hinga tsana kona leswaku a langa ntlhamu lowungatahi phasa. Kambe ahi fanelanga hi kanganyisiwa hikuva Bibele se lahi byela hi mintlhamu ya Diyavulosi. (2 Vakorinto 2:11; vona Nhlamuselo 31.) Yin’we ya kona i wudimona.

10. a) I yini wudimona? b) Yehovha ali vonisa kuyini wudimona?

¹⁰ Wudimona li katsa kutirhisa swilo leswinga tolovelekangiki leswi yendlaka munhu a tirhisana ni madimona. Kunga swilo swofana ni kuvhumbata, kuloya kumbe kuringeta kuvulavula ni vanhu lava feke. Bibele li vula leswaku wudimona la “nyenyentsa” naswona ahi fanelanga hi gandzela Yehovha kuve hi tlhela hi tipeta ka wudimona. (Deteronoma 18:10-12; Nhlavutelo 21:8) Vakreste va fanele va fambela kule hi kuhelela ni swilo hinkwaswu leswi fambisanaka ni wudimona. — Varhoma 12:9.

11. Kurhandza swilo leswinga tolovelekangiki swingahi tisela khombo lihi?

¹¹ Phela Sathana waswi tiva leswaku loko hi rhandza swilo leswinga tolovelekangiki, switamu vevukela kuhi nghenisa ka wudimona. Minxaka hinkwayu ya wudimona yinga hahlula wuxaka la hina na Yehovha.

12. Sathana a zamisa kuyini kupfilunganya ndlela leyi vanhu va pimisaka hi yona?

¹² Sathana a zama kupfilunganya ndlela leyi vanhu va pimisaka ha yona. A yendla vanhu hakatsongokatsongo va va ni kukanakana, anze va hetelela va pimisa leswaku “leswinene swibihile ni leswaku leswobiha i swinene”. (Esaya 5:20) Diyavulosi a lava leswaku hi pimisa leswaku switsundzuxu swa Bibeleni aswi tirhi naswona hita va ni wutomi lotsakisa loko hiswi ba hi makatla leswi Xikwembu xi vulaka leswaku swi bihile ni leswinga swinene.

13. Sathana a zame kuyendla vanhu va kanakana hi tindlela tihi?

¹³ Kuyendla vanhu va kanakana i yin’we ya mintlhamu ya Sathana leyi humelelaka swinene. Se i khale ali karhi a tirhisa ntlhamu lowu. Hi xikombiso, le jaradi la Edeni, a zame kuyendla Evha a kanakana loko amu vutisa a ku: “Hakunene i ntiyisu leswaku Xikwembu xi vule leswaku ami fanelanga mi dla mihandzu ya nsinya wun’wana ni wun’wana lowunga la jaradi?” (Genesa 3:1) Kasi nkameni wa Yobo, Sathana a vutise Yehovha mahlweni ka tintsumi a ku: “Xana Yobo a chava Xikwembu swa ntsenantsena?” (Yobo 1:9) Ndzhaku ka loko Yesu a tsakamisiwile, Sathana amu tlhontlhe a ku: ‘Loko uli N’wana wa Xikwembu, byela maribye lawa leswaku mahundzuka swakudla.’ — Matewu 4:3.

14. Sathana a yendla vanhu va kanakana leswaku wudimona li ni nghozi. Aswi yendlisa kuyini?

¹⁴ Ni namuntlha Diyavulosi waha tama a nyendla vanhu va kanakana. A zama kuyendla vanhu va tivutisa leswi: ‘Kunga va leswaku wudimona li bihile hakunene?’ Phela hambi kuli Vakreste van’wana va sungule kupimisa leswaku akunga na lexinga biha hintamu ka leswo. (2 Vakorinto 11:3) Se hinga yendla yini leswaku hi tisirhelela? Hinga tiyisekisa kuyini leswaku ahi kanganyisiwi hi mintlhamu ya Sathana? Ahi kambisiseni 2 wa swiyenge leswi Sathana angahi kanganyisaka ka swona: vuhungasi ni wudahu.

15. Vuhungasi lingahi nghenisa ka madimona hi ndlela yihi?

¹⁵ Namuntlha, ka mafilmi yotala, mavhidiyo, minongonoko leyi kombisiwaka ka televhizori, mintlango ya komputadori ni Interneti, kukombisiwa swilo swa wudimona, masalamusi ni swilo swa matimba lamanga tolovelekangiki. Votala vaswi vona swinga bihanga naswona ava li voni khombo la kupfumelela madimona ma nghenelela ka wutomi la vona. Munhu angahati nghenisa ka swilo leswi fambisanaka ni wudimona hi kutirhisa swilo swofana ni rungula leli hlamuselaka leswingata humelela hikuya hi siku leli munhu a psaliweke hi lona, kunyanganyanga swiyandla, kuhlahluva ni kufemba. Diyavulosi a fihla khombo la swilo leswi naswona aswi yendla swi va swilo leswinga twisisekiki, swi hlamalisa swi tlhela swi tsakisa. Munhu angaha pimisa leswaku aku na lexinga biha loko a hlalela swilo leswinga ni wudimona kumbe swa matimba lamanga tolovelekangiki, ntsena loko anga tirhisi wudimona hi kukongoma. Leswo swini khombo. Hi mhaka muni? — 1 Vakorinto 10:12.

16. Hi mhaka muni hi fanele hi nyenya vuhungasi lelinga ni swilo swa matimba lamanga tolovelekangiki?

¹⁶ Sathana ni madimona avaswi koti kuvona leswi hiswi pimisaka. Kambe vanga tiva leswi hiswi rhandzaka ni ndlela leyi hi pimisaka ha yona hi kuvona leswi hi tilangelaka ni leswi hi langelaka ndjangu wa hina, kupatsa ni vuhungasi. Loko hi langa mafilmi, wuyimbeleli, mabuku ya wungoma, masalamusi, wuloyi, mavhampiru kumbe swilo swofana ni sweswo, Sathana ni madimona vataswi tsumbula leswaku haswi navela. Se vanga zama kuhi peta hi nhloko ka swa wungoma. — Lerha Vagalatiya 6:7.

17. Sathana angaku londzovota hi ndlela yihi kunavela loku hinga na kona kolava kuva ni lihanyu la kahle?

¹⁷ Hinkwerhu haswi lava kuva ni lihanyu la kahle, kutani Sathana anga londzovota kunavela koloko kuva ahi kanganyisa. Vanhu votala namuntlha va hluphiwa hi mavabyi yotala. Munhu anga zama tindlela totala ta wudahu kambe swinga pasi. (Marka 5:25, 26) Angaha karhateka swinene lakakuva a lava ni kuyendla xin’wana ni xin’wana leswaku a kota kuyampsa. Kambe tani hi Vakreste, hi fanele hi tivonela swinene leswaku hinga langi wudahu leli fambisanaka ni “masalamusi”. — Esaya 1:13.

18. Hi lihi wudahu leli Vakreste va faneleke va fambela kule na lona?

¹⁸ Khale le Israyele aku ni lava ava tirhisa “masalamusi.” Yehovha ava byele leswi: “Loko mi tlakusa mavoko ya n’wina, nimi fihlela matihlo ya mina. Hambileswi mi yendlaka swikhongelo swotala, ani yingisi”. (Esaya 1:15) Pimisa kahle — Yehovha angaswi yingisi ni swikhongelo swa vona! Ahi lavi kuyendla nchumu ni xin’we lexingata wonha wuxaka la hina na Yehovha xi tlhela xihi yendla hingaha pfuniwi hi yena, ngopfungopfu loko hi vabya. (Tipisalema 41:3) Kutani loko hi pimisa kuyendla wudahu lokarhi, hi fanele hi tiyiseka leswaku ali fambisani ni wudimona kumbe ni swilo leswinga ni matimba lamanga tolovelekangiki. (Matewu 6:13) Loko hi tsumbula leswaku wudahu leli li fambisana ni wudimona, swa yampsa hi fambela kule na lona! — Vona Nhlamuselo 32.

19. I yini lexi yendlaka vanhu votala va chava madimona?

¹⁹ Vanhu van’wana va pimisa leswaku Diyavulosi ni madimona ahi va hakakunene. Kasi van’wana hi mhaka leswi vaswi hanyeke khale, vaswi tiva leswaku i va hakakunene. Vanhu votala va hanya hi kuchava mimoya yobiha naswona i swib’ochwa swa mimoya yoleyo. Van’wanyana va yendla vanhu va chava madimona hi kukontarela switoriya leswi chavisaka swinene. Hakanyingi, swava hlamalisa vanhu switoriya leswo naswona hi xihantla vaswi byela van’wana. Switoriya swoleswo hakanyingi swi yendla vanhu vamu chava Diyavulosi.

20. Hingama hangalasisa kuyini mavunhwa ya Sathana hingaswi xiyanga?

²⁰ Pimisa hi leswi — Sathana a lava leswaku vanhu vamu chava. (2 Vatesalonika 2:9, 10) Phela i muhembi naswona wayi tiva ndlela leyi anga kanganyisaka vanhu lava rhandzaka wudimona ha yona, ni ndlela ya kuva yendla va kholwa ka minchumu leyi minkama yin’wana yinga liki ntiyiso. Vanhu volavo vangaha kontarela switoriya hi leswi va pimisaka leswaku vaswi vonile kumbe kuswi twa. Loko va tama va yendla leswo, swiya swi hangalaka swinene. Ahi lavi kupfuna Sathana a hangalasela kuchava hi kukontarela switoriya swoleswo. — Yohane 8:44; 2 Timotiya 2:16.

21. Hi faneleke hi vulavula hi yini matshan’wini ya kukontarela vanhu switoriya swa madimona?

²¹ Loko nandza wa Yehovha a tshame a vona swokarhi hi wudimona, anga fanelanga a heta nkama a kontarela van’wana swoleswo. Vanhu va Yehovha, ava fanelanga va chavisiwa hi leswi Sathana ni madimona ya yena vangaswi yendlaka. Kambe hi fanele hi dzikisa miyanakanyu ya hina ka Yesu ni ntamu lowu Yehovha amu nyikeke wona, kunga li ka Sathana. (Vaheveru 12:2) Yesu aanga tsameli kukontarela vadjondzisiwa va yena switoriya swa madimona. Kambe a dzikise miyanakanyu ya yena ka rungula la Mfumu ni le ka “mintirho leyikulu ya Xikwembu”. — Mintirho 2:11; Luka 8:1; Varhoma 1:11, 12.

22. U tinyimisele kuyendla yini?

²² Phela ahi fanelanga hi khohlwa leswaku makungu ya Sathana i kuhahlula wuxaka la hina na Yehovha. Ata zama hilaha anga kotaka ha kona leswaku aswi yendla leswo. Kambe hina hayi tiva mintlhamu yakwe naswona hi tinyimisele kulwisana ni xin’wana ni xin’wana lexi fambisanaka ni wudimona. Ahi lavi ‘kunyika Diyavulosi nkama’ leswaku a tsanisa kutinyimisela ka hina. (Lerha Vaefesa 4:27.) Hakunene, loko himu baleka Sathana, hita sirheleleka ka mintlhamu yakwe naswona hita va ni nsirhelelo wa Yehovha. — Vaefesa 6:11.