I Yini Mfumu wa Xikwembu?

 1. Hi xihi xikhongelo xa ndhuma lexi hingata bula hi xona swoswi?

VANHU votala swinene vaxi tiva xikhongelo xa ndhuma swinene lexi vitaniwaka Tatana wa Hina, kumbe Xikhongelo xa Hosi. Yesu a tirhise xikhongelo lexi leswaku a djondzisa vadjondzisiwa va yena ndlela yokhongela hi yona. A khongelele yini? Hi mhaka muni xikhongelo lexi xi li xa lisima?

 2. Hi swihi swilo swinharhu swa lisima leswi Yesu angahi djondzisa kuswi khongelela?

² Yesu a te: “Khongelani hi ndlela leyi, miku: ‘Tatana wa hina lweyi anga matilweni, vito la wena alihlawuleke. Akute kufuma ka wena; kurhandza ka wena akuyendliwe misaveni, tani hi loko kuyendliwa tilweni.’” (Lerha Matewu 6:9-13.) Hi mhaka muni Yesu ahi djondzise kukhongelela swilo leswi swa swinharhu? — Vona Nhlamuselo 20.

 3. I yini leswi hi faneleke hiswi tiva hi Mfumu wa Xikwembu?

³ Se hi djondze leswaku vito la Xikwembu i Yehovha. Nakambe se hi bule hi leswaku hi kwihi kurhandza ka Xikwembu hi vanhu ni misava. Kambe Yesu a alava kuvula yini loko a ku: “Akute kufuma ka wena”? Hita djondza leswaku i yini Mfumu wa Xikwembu, leswi wungataswi yendla ni leswaku wutaswi yendlisa kuyini leswaku vito la Xikwembu li kwetsimisiwa.

 4. I yini Mfumu wa Xikwembu naswona i mani Hosi ya wona?

⁴ Yehovha a veke mfumu wa yena atilweni naswona a lange Yesu leswaku a va Hosi ya wona. Bibele liwu vitana Mfumu wa Xikwembu. Yesu i “Hosi ya tihosi ni Mufumi wa vafumi.” (1 Timotiya 6:15) Yesu waswi kota kuyendla swilo leswinene kutlula leswi vafumi hinkwavu vanga kotaka kuswi yendla naswona a ni matimba swinene kutlula vafumi hinkwavu.

 5. Mfumu wa Xikwembu wuta fuma yini naswona na wu sukela kwihi?

⁵ Ndzhaku ka 40 wa masiku a pfuxiwile, Yesu a tlhelele tilweni. Hi wugamu, Yehovha amu veke tani hi Hosi ya Mfumu wa yena. (Mintirho 2:33) Mfumu wa Xikwembu wuta fuma misava na wu sukela atilweni. (Nhlavutelo 11:15) Hi mhaka leswo, Bibele li vula leswaku Mfumu wa Xikwembu i “Mfumu wa le matilweni”. — 2 Timotiya 4:18.

6, 7. I yini lexi yendlaka leswaku Yesu a va hosi ya kahle kutlula tihosi ta misava?

⁶ Bibele li vula leswaku Yesu i mukulu kutlula tihosi hinkwatu ta misava hikusa hi “yena ntsena lweyi angaliki ni kufa”. (1 Timotiya 6:16) Vafumi hinkwavu va misava, hi wugamu va fa, kambe Yesu angata za a file. Swilo leswinene hinkwaswu angatahi yendlela swona, swita tshama hilaha kunga heliki.

⁷ Swiprofeto swa Bibele swi vula leswaku Yesu ata va wolulama a tlhela a va Hosi ya ntwelawusiwana: “Kutani moya wa Yehovha wuta tshama a henhla ka yena, moya wa wutlhari ni wa kutwisisa, moya wa wudoda ni wa matimba, moya wa wutivi ni wa kuchava Yehovha; naswona yena ata tsakisiwa hi kuchava Yehovha. Angata yavanyisa hikuya hi leswi aswi vonaka hi matihlo ya yena, kumbe kulaya hikuya hi leswi twiwaka hi tindleve ta yena. Ata yavanyisa swisiwana hi kululama”. (Esaya 11:2-4) Awungeswi tsakeli kuva ni Hosi ya kufana ni leyi?

 8. Hiswi tivisa kuyini leswaku Yesu angata fuma yexe?

⁸ Xikwembu xi lange vanhu van’wana leswaku vata fuma na Yesu ka mfumu wa matilo. Hi xikombiso, mupostola Pawulo a byele Timotiya a ku: “Loko hitiyisela, nakona hitafuma na yena” tani hi tihosi. (2 Timotiya 2:12) I vangani lavangata fuma na Yesu tani hi tihosi?

 9. I vangani lavangata fuma na Yesu? Se Xikwembu xi sungule siku muni kuva langa?

⁹ Hilaha hinga djondza ha kona ka Ndzima 7, mupostola Yohane a kombiwe xivono laha a voneke Yesu na a li Hosi atilweni ni 144.000 wa tihosi tin’wana. I vamani lava va 144.000? Yohane a hlamusela leswaku hi lava ‘mimombo ya vona yitsaliweke vito la xona ni la Tatana wa xona.’ Naswona a tlhela a ku: “Hi lava va landzelelaka Xinyempfana, hinkwaku lomu xiyaka kona. Lava hi lava va kutsuliweke xikarhi ka vanhu”. (Lerha Nhlavutelo 14:1, 4.) Lava va 144.000 i Vakreste votshembeka lava Xikwembu xiva langeke leswaku ‘vatafuma tani hi tihosi amisaveni.’ (Nhlavutelo 5:10) Kusukela ankameni wa vapostola, Yehovha a karhi a langa Vakreste votshembeka leswaku va yendla xiyenge xa ntlawa wa lava va 144.000 wa tihosi.

10. Hi mhaka muni kuva Yehovha a lange Yesu ni lava 144.000 leswaku va fuma vanhu, swi kombisa lirhandzu la Yena?

¹⁰ Yehovha a ni mhaka swinene na hina lakakuva a yendle leswaku vanhu va fuma na Yesu. Yesu ata va mufumi wa kahle hikusa wahi twisisa, waswi tiva kuva munhu ni leswaku i yini kuhlupheka. Pawulo a vule leswaku Yesu waswi twisisa leswi hiswi twaka, wa ‘hitwela vusiwana minkarhalweni ya hina’ “naswona hi lweyi aringiweke hi matlhelo hinkwawu kufana na hina”. (Vaheveru 4:15; 5:8) Ni lava va 144.000 vaswi tiva leswaku i yini kuva munhu wa nyama. Naswona va lwisane ni kukala kuhetiseka ni mavabyi. Kutani hinga tiyiseka leswaku Yesu ni lava va 144.000, vaswi twisisa kahle swikarhato leswi hi kumanaka na swona ni ndlela leyi hi titwaka hi yona.

11. Hi mhaka muni Yesu a djondzise vadjondzisiwa va yena leswaku va khongelela kuva kurhandza ka Xikwembu kuyendleka atilweni?

¹¹ Yesu a djondzise vadjondzisiwa va yena leswaku va khongelela kuva kurhandza ka Xikwembu kuyendleka atilweni. Hi mhaka muni? Ka Ndzima 3, hi djondze leswaku Sathana Diyavulosi a xandzukele Yehovha. Ndzhaku ka loko Sathana a xandzukile, Yehovha a pfumelele leswaku yena ni tintsumi letinga tshembekangiki, kunga madimona, va tama va tshama atilweni kuringana nkama wokarhi. Kutani, ahi hinkwavu lava ava yendla kurhandza ka Xikwembu atilweni. Ka Ndzima 10, hita djondza swin’wana hi Sathana ni madimona ya yena.

12. Hi swihi swiyendlakalo swimbirhi swa lisima leswi hlamuseliwaka ka Nhlavutelo 12:10?

¹² Bibele lihi byela leswaku ndzhaku ka loko a yendliwe Hosi ya Mfumu wa Xikwembu, Yesu a sungule nyimpi yolwa na Sathana. (Lerha Nhlavutelo 12:7-10.) Ndzimana 10 yi hlamusela swiyendlakalo swimbirhi swa lisima swinene. Mfumu wa Xikwembu wu sungula kufuma na wuna Yesu tani hi Hosi naswona Sathana a hlongoliwa atilweni ivi a cukumeteliwa laha misaveni. Hilaha hingata djondza ha kona, swiyendlakalo leswi se swi humelelile.

13. Kuyendleke yini atilweni ndzhaku ka loko Sathana ni madimona ya yena va hlongoliwile?

¹³ Bibele li hlamusela ntsaku lowu veke kona atilweni ka tintsumi totshembeka ndzhaku ka loko Sathana ni madimona ya yena va hlongoliwile. Hi lerha leswi: “Tsakani n’wina matilo, na n’wina lavayakeke ka wona.” (Nhlavutelo 12:12) Swoswi ku ni kurhula loku heleleke hikuva hinkwavu lavanga tilweni va yendla kurhandza ka Xikwembu.

14. I yini leswi humelelaka laha misaveni hi mhaka ya leswi Sathana anga hlongoliwa atilweni?

¹⁴ Kambe laha misaveni wutomi la tika. Vanhu va humeleliwa hi swilo swochavisa swinene “hikuva Diyavulosi axikele” ka hina naswona “akarihile ngopfu hi kutiva leswaku nkarhi wa yena wukomile.” (Nhlavutelo 12:12) Sathana a ni xiviti swinene. A hlongoliwe atilweni naswona waswi tiva leswaku kungali khale ata lovisiwa. A yendla hinkwaswu leswi angaswi kotaka leswaku a vanga hasahasa, kuvaviseka ni kuhlupheka amisaveni hinkwayu.

15. Hi kwihi kurhandza ka Xikwembu hi misava?

¹⁵ Kambe kurhandza ka Xikwembu hi misava akuse cinca. Xaha lava leswaku vanhu lava hetisekeke va hanya hilaha kunga heliki amisaveni ya Paradeyisi. (Tipisalema 37:29) Kambe Mfumu wa Xikwembu wutaswi kotisa kuyini leswo?

16, 17. Daniyele 2:44 yihi byela yini hi Mfumu wa Xikwembu?

¹⁶ Wuprofeta lelinga ka Daniyele 2:44 li vula leswi: “Amasikwini ya tihosi toleto, Xikwembu xa le tilweni xita simeka mfumu lowungata ka wunga lovisiwi. Naswona mfumu lowu awungata hundziseliwa ka vanhu van’wana. Wuta pshandlasa wu tlhela wu helisa mimfumu leyi hinkwayu, kutani hi wona ntsena wungatava kona hilaha kunga heliki”. Wuprofeta leli lihi djondzisa yini hi Mfumu wa Xikwembu?

¹⁷ Xosungula, wuprofeta leli lihi byela leswaku Mfumu wa Xikwembu awuta sungula kufuma “amasikwini ya tihosi toleto”. Leswi swi vula leswaku loko Mfumu wu sungula kufuma, mimfumu leyin’wana ayitava kona. Xa wumbirhi, hi djondza leswaku Mfumu wa Xikwembu wuta tshama hilaha kunga heliki naswona wungata pfaletiwa hi mfumu wun’wana. Xa wunharhu, kuta va ni nyimpi axikarhi ka Mfumu wa Xikwembu ni mimfumu ya misava leyi. Mfumu wa Xikwembu wuta hlula wu tlhela wuva wona ntsena lowungata fuma misava hinkwayu. Ndzhaku ka leswo, vanhu vata va ni mfumu woyampsa kutlula mimfumu hinkwayu leyi va tshameke vava na yona.

18. Hi lihi vito la nyimpi yohetelela leyingata va kona xikarhi ka mimfumu ya vanhu ni Mfumu wa Xikwembu?

¹⁸ Mfumu wa Xikwembu wuta sungulisa kuyini kufuma misava hinkwayu? Na kungese sungula nyimpi ya wugamu leyi vitaniwaka Armajedoni, madimona mata kanganyisa ‘tihosi ta misava hinkwayu, marhamba nyimpi, kuyalwa ni Xikwembu xa matimba hinkwawu hi siku lelikulu lelitaka.’ Hakunene, mimfumu ya vanhu yita lwa ni Mfumu wa Xikwembu. — Nhlavutelo 16:14, 16; vona Nhlamuselo 10.

19, 20. Hi mhaka muni hi lava Mfumu wa Xikwembu leswaku wu fuma misava?

¹⁹ Hi mhaka muni hi lava Mfumu wa Xikwembu? Ahi kambisisi swivangelo swinharhu. Xosungula, hi vadjohi, hi mhaka leswo ha vabya hi tlhela hi fa. Kambe Bibele li vula leswaku a hansi ka Mfumu wa Xikwembu, hita hanya hilaha kunga heliki. Antiyisweni, buku la Yohane 3:16 li li: ‘Xikwembu xirhandzile misava, lakakuva, xinyikile N’wana wa xona wa mun’we, leswaku hinkwavu lava vapfumelaka ka yena vangalovi, kambe vava ni vutomi lelingaheliki.’

²⁰ Xivangelo xa wumbirhi lexi yendlaka leswaku hi lava Mfumu wa Xikwembu hi leswaku amisaveni, kutale hi vanhu vobiha swinene. Vanhu votala va hemba, va kanganyisa ni kuhanya hi ndlela yobiha. Ahinge yendli nchumu leswaku hiva helisa, kambe Mfumu wa Xikwembu wutava helisa. Vanhu lava tamaka va yendla swilo swobiha vata helisiwa ka nyimpi ya Armajedoni. (Lerha Tipisalema 37:10.) Xivangelo xa wunharhu lexi yendlaka leswaku hi lava Mfumu wa Xikwembu hi leswaku mimfumu ya vanhu ayi na matimba, yi ni mona naswona ya kanganyisa. Ava na mhaka ni kupfuna vanhu leswaku va yingisa Xikwembu. Bibele li vula leswaku ‘munhu afuma munhu mun’wana kumu yendlela swobiha.’ — Eklesiasta 8:9.

21. Kasi Mfumu wa Xikwembu wuta yendla yini leswaku kurhandza ka Xikwembu kuyendleka laha misaveni?

²¹ Ndzhaku ka Armajedoni, Mfumu wa Xikwembu wuta yendla leswaku kurhandza ka xona kuyendleka laha misaveni. Hi xikombiso, wuta susa Sathana ni madimona ya yena. (Nhlavutelo 20:1-3) Hi wugamu, anga kona lweyi angata vabya kumbe a fa. Hi mhaka ya nkutsulo, vanhu hinkwavu lava tshembekaka vata hanya hilaha kunga heliki aParadeyisini. (Nhlavutelo 22:1-3) Mfumu wa Xikwembu wuta kwetsimisa vito la Xikwembu. Se leswo swi vula yini? Swi vula leswaku loko mfumu wa Xikwembu wu sungula kufuma laha misaveni, vanhu hinkwavu vata hlonipha vito la Yehovha. — Vona Nhlamuselo 21.

22. Hiswi tivisa kuyini leswaku Yesu anga vanga Hosi loko a li laha misaveni kumbe hi kuhatlisa ndzhaku ka loko a pfuxiwile ka lava feke?

²² Yesu a djondzise vadjondzisiwa va yena leswaku va khongela hi ndlela leyi: “Akute kufuma ka wena”. Aswi li livaleni leswaku mfumu wa Xikwembu awuta ta ka nkama lowu taka. Yehovha aata sungula hi kuveka mfumu wa yena ni kuyendla Yesu a va Hosi ya wona. Kunga va leswaku loko Yesu a tlhelele atilweni a tekele kuvekiwa tani hi Hosi? Nikatsongo! A afanele a rindza. Ndzhaku nyana ka loko Yesu a pfuxiwile, Petro na Pawulo vaswi veke livaleni leswaku wuprofeta lelinga ka Buku la Tipisalema 110:1 ali kombetela ka Yesu. Ka wuprofeta lelo Yehovha a te: ‘Tshama vokweni la mina la xinene, kufikela ni veka valala va wena hansi ka minkondzo ya wena.’ (Mintirho 2:32-35; Vaheveru 10:12, 13) Se Yesu aata rindza kufikela kwihi na Yehovha angesemu yendla Hosi?

23. a) Kasi Yesu a sungule siku muni kufuma tani hi Hosi ya Mfumu wa Xikwembu? b) Hita djondza yini ka ndzima leyi landzelaka?

²³ Nakaha sale malembe yotala leswaku kufika lembe la 1914, ntlawa wa Vakreste votshembeka wu twisise leswaku lembe lolelo alita va la lisima ka swiprofeto swa Bibele. Leswinga humelela amisaveni kusukela hi 1914, swi kombekise leswaku ntlawa wolowo awu tiyisile. Yesu a sungule kufuma tani hi Hosi hi lembe lolelo. (Tipisalema 110:2) Ndzhaku nyana ka leswo, Sathana a cukumeteliwe misaveni naswona swoswi “nkarhi wa yena wukomile.” (Nhlavutelo 12:12) Ka ndzima leyi landzelaka, hita vona wumboni lin’wana leli kombisaka leswaku hi hanya ka nkama wolowo. Hita tlhela hi djondza leswaku kungali khale Mfumu wa Xikwembu wuta yendla leswaku kurhandza ka xona kuyendliwa laha misaveni. — Vona Nhlamuselo 22.