Ŵateŵeti Ŵakovwira Ŵakuchita Ntchito Yakuzirwa

MPOSITOLE PAULOSI wakalembera kalata mpingo wa Filipi, kuti: “Ine Paulosi na Timote, ŵazga ŵa Khristu Yesu, ku ŵatuŵa wose mwa Khristu Yesu awo ŵali mu Filipi, pamoza na ŵalaŵiliri na ŵateŵeti ŵakovwira.” (Fil. 1:1) Paulosi wakatawuzga ŵateŵeti ŵakovwira. Ŵanalume aŵa ŵakachitanga ntchito yakuzirwa chomene pakovwira ŵalara mu mpingo. Umu ndimo viliriso mazuŵa ghano. Ŵateŵeti ŵakovwira ŵali na ntchito ya kovwira ŵalaŵiliri kuti vinthu vyendenge makora mu mpingo.

² Kasi mukuŵamanya ŵateŵeti ŵakovwira mu mpingo winu? Kasi mukumanya ntchito iyo ŵakuchita mu mpingo? Yehova wakuwonga chomene ŵateŵeti ŵakovwira chifukwa cha ntchito iyo ŵakuchita. Paulosi wakalemba kuti: “Ŵanalume awo ŵakuteŵeta makora, ŵakuŵa na mbiri yiwemi na wanangwa ukuru wakuyowoya chipulikano icho ŵali nacho mwa Khristu Yesu.”—1 Tim. 3:13.

³ Muteŵeti wakovwira wakwera kuŵa na nkharo yiwemi, mwanalume wakugomezgeka, ndiposo waŵe wakuti wangachita nadi ntchito iyo wangapika. Fundo iyi yikukolerana na ivyo Paulosi wakalembera Timote apo wakayowoyanga ivyo vikukhumbikwa kuti munthu waŵe muteŵeti wakovwira. Wakati: “Ŵateŵeti ŵakovwira nawo ŵakwenera kuŵa ŵambura mawara, ŵa lulimi lwa paŵiri yayi, ŵambura kutemwa vinyo linandi, ŵakusanga chandulo munthowa yauryarya yayi. Ŵakwenera kukoleska chisisi chakupatulika cha chipulikano na njuŵi yituŵa. Kweniso aŵa ŵayezgeke dankha usange mbakwenelera, ndipo para mbambura kafukwa, ŵateŵetere nga mbateŵeti. Muteŵeti wakovwira waŵe mfumu wa muwoli yumoza, wakulongozga makora ŵana ŵake na ŵamunyumba yake.” (1 Tim. 3:8-10, 12) Para ŵateŵeti ŵakovwira ŵakuchita ivyo Baibolo likuyowoya, pangaŵavya uyo wangayowoyera viheni mpingo chifukwa cha ŵanalume awo ŵakulaŵilira.

⁴ Muteŵeti wakovwira waliyose wakwenera kulimbikira kupharazga mwezi uliwose. Nga ni Yesu, muteŵeti wakovwira wakwenera kutemwa chomene uteŵeti. Para wakuchita nthena ndikuti wakukolerana na khumbo la Yehova lakuti ŵanthu ŵazakaponoskeke.—Yes. 9:7.

⁵ Ŵateŵeti ŵakovwira ŵakwenera kuvwara makora, kujitozga mwakwenelera, kuyowoya mwantchindi, kuwona vinthu mwakwenelera, ndiposo ŵaŵe na nkharo yiwemi. Ŵanthu ŵangaŵachindika para ŵakuchita vinthu mwamahara. Ŵakwenera kumanya kuti kuŵa paubwezi na Yehova ntchinthu chakuzirwa chomene. Ndipo ŵakwenera kuchita na mtima wose ntchito iyo ŵapika.—Tito 2:2, 6-8.

⁶ Ŵanalume aŵa ‘ŵakuyezgeka dankha usange mbakwenelera.’ Ŵakwenera kulongora kuti mbanalume ŵakujipeleka pambere ŵandaŵe ŵateŵeti ŵakovwira. Ŵakuŵika Ufumu pakwamba mu umoyo wawo, ndipo mbakunozgeka kuchita uteŵeti uliwose uwo ungaŵajulikira. Ŵakulongora nkharo iyo ŵanji ŵangatolerako mu mpingo.—1 Tim. 3:10.

⁷ Ŵateŵeti ŵakovwira ŵakuchita ntchito zakupambanapambana izo zikovwira ŵabali na ŵadumbu. Ntheura, ŵalaŵiliri ŵakuŵa na nyengo ya kusambizga na kuliska. Ŵalara ŵakugaŵira ŵateŵeti ŵakovwira ntchito zawo mwakuyana na maluso ndiposo unandi wa ŵateŵeti awo ŵali pa mpingo.

⁸ Pali ntchito zinandi izo ŵateŵeti ŵakovwira ŵakuchita. Muteŵeti wakovwira yumoza wangapwelelera mabuku. Ŵanyake ŵakusunga ndalama za mpingo, kulaŵilira vigaŵa vyakupharazgako, kupelekera mayikirofoni, kuchuna vyakukuzgira mazgu, ŵanyake ŵakuŵa ŵalinda, ndipo ŵanyake ŵakovwira ŵalara ntchito zinyake. Nyumba ya Ufumu kuti yilutilire kuwoneka makora yikukhumbikwira kuyipwelelera, ntheura ŵateŵeti ŵakovwira ŵakupempheka kuti ŵawovwire pa ntchito iyi.

⁹ Mu mipingo yinyake, muteŵeti waliyose wakupika ntchito yake na yake. Kweni mu mipingo yinyake muteŵeti wakovwira wangapika ntchito zinandi. Nyengo zinyake ŵateŵeti ŵaŵiri ŵakovwira ŵakupika ntchito yimoza. Para pa mpingo palije ŵateŵeti ŵakovwira ŵakukwana, wupu wa ŵalara ungasankha ŵabali ŵakubatizika ŵankharo yiwemi kuti ŵachitenge ntchito zinyake. Ntheura ŵabali aŵa ŵakusambira vinthu ivyo vingazakaŵawovwira para ŵazakaŵa ŵakwenelera kuŵa ŵateŵeti ŵakovwira. Para pa mpingo palije ŵabali awo ŵangachita ntchito zinyake, mbwenu mudumbu wankharo yiwemi wangapempheka kuchita ntchito izi nangauli ŵangaŵa yayi muteŵeti wakovwira. Munthu wankharo yiwemi ni uyo wakulimbikira kusopa Chiuta. Wakuwungana nyengo zose, wakutemwa kupharazga, wali na nkharo yiwemi pa nyumba yake, wakusankha vyakusanguluska viwemi, wakuvwara na kujitozga mwakwenelera, ndipo ŵanji mu mpingo ŵangasambirako kwa iyo.

¹⁰ Mu mipingo iyo muli ŵalara ŵachoko chomene, ŵateŵeti ŵakovwira awo ŵakuchita makora ŵangapempheka kuti ŵafumbe mafumbo awo ŵakukhumba kubatizika. Mafumbo agha ghakusangika ku Vyakusazgirapo, ndipo ŵangafumba Chigaŵa 1, “Visambizgo Vikuruvikuru vya mu Baibolo,” na Chigaŵa 3, “Umo Yehova Wakwendeskera Vinthu.” Muteŵeti wakovwira wakwenera yayi kufumba Chigaŵa 2, “Fundo Zaurunji za Yehova,” chifukwa muli nkhani zikuruzikuru.

¹¹ Nyengo zinyake, ŵalara ŵangasintha ntchito ya ŵateŵeti ŵakovwira. Ndipouli, chikuŵa makora chomene para ŵabali ŵakuchita nyengo yitali ntchito iyo ŵapika. Ichi chikovwira kuti ŵayimanye makora.

¹² Mu mipingo yinyake ŵateŵeti ŵakovwira awo ŵakuchita makora mwauzimu, mwakuti ‘ŵanthu wose ŵakuwona umo ŵakukulira,’ ŵakuchitako ntchito zinyake za ŵalara. (1 Tim. 4:15) Para ŵalara mbachoko pa mpingo, muteŵeti wakovwira wangaŵa movwiri wa mulaŵiliri wa gulu la uteŵeti. Nyengo zinyake wangaŵa muteŵeti wa gulu, ndipo wakulongozgeka na ŵalara. Para ŵalara mbachoko, ŵateŵeti ŵakovwira ŵangapika nkhani mu Ungano wa Uteŵeti na Umoyo Wachikhristu, ŵangalongozga Sambiro la Baibolo la Mpingo, kweniso ŵangayowoya nkhani zachisanisani. Kuyana na umo vinthu viliri pa mpingo, ŵateŵeti ŵakovwira ŵangapikaso ntchito zinyake para ŵangafiska ntchito izo. (1 Pet. 4:10) Ŵateŵeti ŵakovwira ŵakwenera kujipeleka na mtima wose pakuchita ntchito zawo.

¹³ Nangauli ntchito yawo yikupambana na ya ŵalara, kweni nawo ŵakuchita uteŵeti wakupatulika kwa Chiuta ndipo uteŵeti uwo ŵakuchita ukovwira kuti mpingo wendenge makora. Para nyengo yajumphapo, ŵateŵeti ŵakovwira awo ŵakuchita makora, ndipo ŵakuchita ivyo vikukhumbikwa kuti ŵaŵe ŵaliska na ŵasambizgi, ŵangaŵa ŵalara mu mpingo.

¹⁴ Para ndimwe mubali wachinyamata panji mwabatizika waka sonosono, kasi mukukhumba kuŵa muteŵeti wakovwira? (1 Tim. 3:1) Mazuŵa ghano, ŵanthu ŵanandi ŵakwiza mu gulu la Yehova, ntheura pakukhumbikwa ŵanalume ŵakukhwima mwauzimu kuti ŵawovwire mipingo. Mukwenera kuŵa na mtima wa kovwira ŵanji nga umo Yesu wakachitira. (Mat. 20:28; Yoh. 4:6, 7; 13:4, 5) Mungaŵa na mtima wa kuteŵetera ŵanji para mukumanya fundo yakuti munthu uyo wakupeleka wakuŵa wakukondwa. (Mil. 20:35) Ntheura jipelekani kovwira ŵanyinu, munganozga pa Nyumba ya Ufumu, kweniso mukwenera kujipeleka kuchita chiyezgelero mu Ungano wa Uteŵeti na Umoyo Wachikhristu para mweneko watondeka. Mukweneraso kusambira pamwekha kuti muŵe na vipambi vya mzimu. (Sal. 1:1, 2; Gal. 5:22, 23) Manyaniso kuti mubali uyo wakukhumba kuchitako mauteŵeti ghanyake, wakwenera kuŵa wakugomezgeka para wapika ntchito yakuti wachite mu mpingo.—1 Kor. 4:2.

¹⁵ Ŵateŵeti ŵakovwira ŵakwimikika na mzimu utuŵa kuti ŵateŵetere mpingo. Para waliyose mu mpingo wakukolerana na ŵateŵeti ŵakovwira, wakulongora kuti wakuwonga ntchito iyo ŵakuchita. Para mukuchita nthena, ndikuti mukukolerana na khumbo la Yehova lakuti vinthu vyendenge mu ndondomeko mu mbumba yake.—Gal. 6:10.