Uwemi wa Kupulikira Dango la Chiuta pa Nkhani ya Kujilambika

KUTI tiŵe ŵakunozgeka kuchita khumbo la Yehova, tikwenera kujilambika kwa iyo. Tikujilambika kwa Yesu chifukwa ndiyo ni mutu wa mpingo wa Ŵakhristu ŵaunenesko. Kweniso tikujilambika ku ŵanthu ŵanyake awo ŵali na mazaza. Waliyose wakukondwa para tikulondezga dango la Chiuta pa nkhani ya kujilambika.

² Dango lakuti tikwenera kujilambika ku ŵamazaza likamba mu munda wa Edeni. Likusangika mu malango gha Chiuta pa Genizesi 1:28 na 2:16, 17. Vinyama vikeneranga kujilambika ku ŵanthu, ndipo Adamu na Eva ŵakeneranga kujilambika ku Ufumu wa Chiuta na kuchita khumbo lake. Ŵapulikirenge dango ili, mphanyi pakaŵa mtende kweniso vinthu vikate viŵayenderenge makora. Dango lakuti tikwenera kujilambika ku ŵamazaza likusangikaso pa 1 Ŵakorinte 11:3. Mpositole Paulosi wakalemba kuti: “Nkhukhumba kuti mumanye kuti mutu wa mwanalume waliyose ni Khristu, mutu wa mwanakazi ni mwanalume, ndipo mutu wa Khristu ni Chiuta.” Fundo iyi yikulongora kuti waliyose wakwenera kujilambika, kupaturako Yehova pera.

³ Ŵanthu ŵanandi mazuŵa ghano ŵakulimanya yayi dango lakuti ŵakwenera kujilambika ku ŵamazaza ndipo awo ŵakulimanya ŵakulilondezga yayi. Chifukwa wuli? Chifukwa suzgo ili likamba na ŵapapi ŵithu ŵakwambilira mu Edeni. Iwo ŵakakanira dala kuti Chiuta ndiyo waŵalongozgenge. (Gen. 3:4, 5) Nangauli ŵakaghanaghananga kuti ŵaŵenge na wanangwa ukuru, kweni ndimo vikaŵira yayi. Satana Dyabulosi ndiyo wakamba kuŵalongozga. Chifukwa chakuti ŵapapi ŵithu aŵa ŵakagaluka, ubwezi wawo na Chiuta ukamara. (Kol. 1:21) Lekani mazuŵa ghano tose tili pasi pa nkhongono za muheni.—1 Yoh. 5:19.

⁴ Kweni pakuti tasambira Baibolo na kuchita ivyo tikusambira, tiliso pasi pa nkhongono za Satana yayi. Pakuti tili kujipeleka kwa Yehova na kubatizika, talongora kuti tasankha Yehova kuti ndiyo watilongozgenge. Nase tingayowoya nga ni Themba Davide, ilo likati Yehova ni “mutu pachanya pa vyose.” (1 Mid. 29:11) Ndipo tikuphalirako ŵanthu kuti: “Manyani kuti Yehova ni Chiuta. Ndiyo wali kutilenga, tili ŵake. Tili ŵanthu ŵake na mberere za mu mskambo wake.” (Sal. 100:3) Tikumanya kuti Yehova ni mukuru ndiposo kuti tikwenera kujilambika kwa iyo pera chifukwa ndiyo wali kulenga vinthu vyose. (Chivu. 4:11) Pakuti ndise ŵateŵeti ŵa Chiuta, nase tikujilambika kwa Chiuta nga umo wakachitira Yesu Khristu.

⁵ Kasi Yesu wakasambira vichi pa masuzgo agho wakakumana nagho apo wakaŵa pa charu chapasi? Pa Ŵahebere 5:8 pakuti: “Nangauli wakaŵa mwana, wakasambira kupulikira kwizira mu vinthu ivyo wakasuzgika navyo.” Yesu wakalutilira kujilambika kwa Adada ŵake ŵakuchanya nanga ni apo wakasuzgikanga. Kweniso Yesu wakachitanga vinthu payekha yayi. Wakayowoyanga vya mu mutu wake yayi, kweniso wakajipenjeranga uchindami yayi. (Yoh. 5:19, 30; 6:38; 7:16-18) Apo wakaŵa pa charu chapasi wakakondwanga kuchita khumbo la Awiske, nangauli ŵanthu ŵakamususkanga na kumutambuzga. (Yoh. 15:20) Yesu wakajilambikanga kwa Chiuta nangauli wakasuzgikanga. Kweniso “wakajiyuyura ndipo wakapulikira m’paka nyifwa, nyifwa ya pa khuni lakusuzgikirapo.” Chifukwa chakuti Yesu wakajilambika kwa Yehova, taŵanthu tizamuponoskeka, zina la Adada ŵake likuchindikika kweniso Chiuta wali kumukwezga.—Fil. 2:5-11; Heb. 5:9.

⁶ Para tikujilambika kwa Chiuta na kuchita khumbo lake, tikugega masuzgo agho ŵanthu awo ŵakukana kujilambika ku Ufumu wa Yehova ŵakusangana nagho. Mulwani withu Dyabulosi, wakutipenja kuti watimilimitizge. Para tikujilambika kwa Yehova na kwimikana na Satana, Yehova wativikilirenge.—Mat. 6:10, 13; 1 Pet. 5:6-9.

⁷ Tikumanya udindo uwo Khristu wali nawo mu mpingo kweniso mazaza agho wali kupeleka kwa “muzga wakugomezgeka na wavinjeru.” Ichi chikovwira kuti tikhalenge makora na ŵanyithu. Para tikupulikira ivyo Mazgu gha Chiuta ghakuyowoya pa vyose ivyo tikuchita mu mpingo, tikulongora kuti tikujilambika kwa iyo. Kweniso para tikupharazga, kuluta ku maungano na kuzgorapo, kukolerana na ŵalara, na kulondezga ndondomeko ya gulu, tikulongora kuti tikupulikira.—Mat. 24:45-47; 28:19, 20; Heb. 10:24, 25; 13:7, 17.

⁸ Para tikujilambika kwa Chiuta, mu mpingo mukuŵa mtende, mpingo ukuŵa wakuvikilirika, kweniso vinthu vikwenda makora. Awo ŵakujilambika kwa Yehova, ŵakuŵa na mikhaliro nga yake. (1 Kor. 14:33, 40) Ivyo vikuchitika mu gulu la Yehova, vikutipangiska kuti tiyowoye mazgu agho Themba Davide likayowoya likati lawona mphambano iyo yilipo pakati pa ŵateŵeti ŵa Yehova na ŵanthu ŵaheni. Likati: “Ŵakukondwa mbanthu awo Chiuta wawo ni Yehova!”—Sal. 144:15.

⁹ Mu banja, “mutu wa mwanakazi ni mwanalume.” Ŵanalume mutu wawo ni Khristu, ndipo mutu wa Khristu ni Chiuta. (1 Kor. 11:3) Ŵawoli ŵakwenera kujilambika ku ŵafumu ŵawo, ndipo ŵana ku ŵapapi ŵawo. (Efe. 5:22-24; 6:1) Para waliyose wakujilambika ku mutu wake, pakuŵa mtende.

¹⁰ Mfumu wakwenera kulongozga banja lake mwachitemwa nga ni Khristu. (Efe. 5:25-29) Para mfumu wakulongozga mwankhaza yayi kweniso wakugwentha yayi udindo wake pakuŵa mutu, chiŵenge chipusu kuti muwoli wake na ŵana ŵajilambikenge kwa iyo. Udindo wa muwoli nkhovwira mfumu wake. (Gen. 2:18) Para muwoli wakovwira mfumu wake na kumuchindika, mfumu wake wakumutemwa ndipo Chiuta wakulumbika. (1 Pet. 3:1-4) Para ŵafumu na ŵawoli ŵakulondezga ulongozgi wa mu Baibolo pa nkhani ya kujilambika, ŵakovwira ŵana ŵawo kuti nawo ŵajilambikenge kwa Chiuta.

¹¹ Para tikujilambika kwa Chiuta, tiŵawonenge mwakwenelera “ŵamazaza,” awo “ŵalipo mu malo ghawo mwakuzomerezgeka na Chiuta.” (Rom. 13:1-7) Pakuti Ŵakhristu ŵakupulikira malango, ŵakupeleka msonkho, kuwezgera vya “Kesare kwa Kesare, ndipo vya Chiuta kwa Chiuta.” (Mat. 22:21) Kweniso ŵakulondezga malango gha boma pa nkhani ya mphaka ya charu chawo icho ŵakupharazgako. Pakuti tikujilambika na kupulikira ŵamazaza pa chilichose icho chikuleka kususkana na malango gha Yehova, vikovwira kuti timalire nkhongono zithu zose pa ntchito ya kupharazga.—Mrk. 13:10; Mil. 5:29.

¹² Ntchakuzirwa chomene kupulikira dango la Chiuta pa nkhani ya kujilambika. Tikulindilira nyengo iyo ŵanthu wose ŵazamujilambikanga kwa Chiuta. (1 Kor. 15:27, 28) Yehova wazamutumbika ŵanthu awo ŵali ku chigaŵa cha Ufumu wake awo ŵakulutilira kujilambika kwa iyo.