Khalilirani mu Gulu la Yehova

YAKOBE wakalemba kuti: “Sendelerani kwa Chiuta, ndipo iyo wasendelerenge kwa imwe.” (Yak. 4:8) Yehova wali kutali chomene yayi kuti waleke kupulika malurombo ghithu, nangauli tili ŵakwananga. (Mil. 17:27) Kasi tingasendelera wuli kwa Chiuta? Tikusendelera kwa Yehova para tikuchita vinthu vyakuti tiŵe nayo paubwezi. Tingasendelera kwa Yehova para tikulomba kufumira pasi pa mtima. (Sal. 39:12) Tikuŵaso ŵabwezi ŵa Chiuta para nyengo zose tikusambira Mazgu ghake, Baibolo. Para tikuchita nthena, timumanyenge makora Yehova Chiuta, khumbo lake, na ivyo wakukhumba kuti tichitenge. (2 Tim. 3:16, 17) Ndipo para tamumanya Yehova na khumbo lake, timutemwenge kweniso timukwiyiskenge yayi.—Sal. 25:14.

² Tingasendelera kwa Yehova kwizira mwa Mwana wake pera, Yesu. (Yoh. 17:3; Rom. 5:10) Palije munthu munyake uyo wangatovwira kumanya maghanoghano gha Yehova kuluska Yesu. Iyo wakaŵamanyanga makora Awiske lekani wakati: “Palije uyo wakumanya Mwana, kweni Adada. Palije uyo wakumanya Adada, kweni Mwana na waliyose uyo Mwana wakukhumba kumuvumbulira za iwo.” (Luka 10:22) Para tikusambira mabuku gha Makani Ghawemi kuti timanye umo Yesu wakaghanaghaniranga kweniso umo wakajipulikiranga, ndikuti tikusambiraso umo Yehova wakughanaghanira kweniso umo wakujipulikira. Ivi vikutovwira kuti tiŵe paubwezi na Chiuta.

³ Yesu ndiyo wakutovwira kuti tiŵe paubwezi na Yehova. Tikuŵa paubwezi na Yehova para tikulutilira kuŵa mu gulu ilo likutovwira kuti tichite khumbo lake. Lemba la Mateyu 24:45-47 likayowoyerathu kuti Fumu Yesu Khristu, yili kwimika gulu la “muzga wakugomezgeka na wavinjeru,” kuti lipelekenge “chakurya pa nyengo yakwenelera” ku nyumba ya chipulikano. Mazuŵa ghano, “muzga” uyu wakutipa chakurya chinandi chauzimu. Kwizira mu gulu ili, Yehova wakutiphalira kuti tiŵazgenge Mazgu ghake zuŵa lililose, tilutenge ku maungano nyengo zose, ndiposo kuti tilimbikirenge kupharazga “makani ghawemi gha Ufumu.” (Mat. 24:14; 28:19, 20; Josh. 1:8; Sal. 1:1-3) Muzga wakugomezgeka tingamuwonanga mwakupepuka yayi. Tikwenera kuŵikapo mtima chomene kuti tilutilire kuŵa pafupi na chigaŵa cha pa charu chapasi cha gulu la Yehova na kupulikira ulongozgi wake. Para tichitenge nthena, tiŵenge ŵabwezi ŵa Yehova, tiŵenge ŵakukhora ndiposo ŵakuvikilirika para tikuyezgeka.

⁴ Panji mukamanya unenesko ni kale chomene. Para ndimo viliri, mukwenera kuti mukumanya kuti ntchakusuzga kuzizipizga viyezgo. Kweni nanga mungaŵa kuti mwamumanya waka sonosono Yehova ndipo mwamba waka sono kukolerana na ŵanthu ŵake, mukumanya kuti Satana Dyabulosi wakulimbana na waliyose uyo wakujilambika ku ulamuliro wa Yehova. (2 Tim. 3:12) Kwali mwazizipizga nyengo yichoko waka panji yitali, lekani kopa panji kuwelera nyuma. Yehova wakulayizga kuti wamovwiraninge ndipo wazamumuthaskani na kumupani umoyo wamuyirayira.—Heb. 13:5, 6; Chivu. 2:10.

⁵ Mu nyengo iyo yakhalako kuti charu cha Satana chimare, waliyose wa ise wayezgekenge. Kwambira waka apo Ufumu wa Chiuta ukamba kulamulira kuchanya mu 1914, Satana wakuzomerezgeka yayi kuluta kuchanya. Wakaponyeka pa charu chapasi pamoza na ŵangelo ŵake ŵaheni. Pa charu chapasi pali masuzgo ghanandi ndipo ŵateŵeti ŵa Chiuta ŵakusuzgika chifukwa chakuti Satana ni mukali chomene kweniso mbukaboni wakuti tili mu mazuŵa ghaumaliro gha ulamuliro wa Satana.—Chivu. 12:1-12.

⁶ Chifukwa chakuti Satana wali kuchimbizgika kuchanya, ni mukali chomene chifukwa wakumanya kuti wali na nyengo yifupi. Iyo na viŵanda vyake ŵakuyezgayezga kutimbanizga ntchito ya kupharazga Ufumu na kutimbanizga ŵateŵeti ŵa Yehova kuti ŵaleke kukolerana. Lekani tili pa nkhondo yauzimu, “tikulimbana na ndopa na thupi yayi, kweni na maboma, na ŵamazaza, na mafumu gha charu cha chisi ichi, ndiposo mawumba gha mizimu yiheni mu malo ghakuchanya.” Kuti tiluske nkhondo iyi na kuŵa ku chigaŵa cha Yehova, tikwenera kuthera yayi, kweni tikwenera kuvwara vyankhondo vyose. Tikwenera kutchintha “pakulimbana na mauryarya gha Dyabulosi.” (Efe. 6:10-17) Kuti titchinthe, tikwenera kuzizipizga.

⁷ Kuzizipizga chikung’anamura kuleka kuthera para tikusuzgika panji kuyezgeka. Pa nkhani yauzimu, kuzizipizga chikung’anamura kuleka kusunkhunyika pakuchita icho ntchiwemi nanga tingaŵa na masuzgo, ŵanthu ŵangatisuska, panji kutisuzga. Kweniso tikuthera yayi usange pali chinthu chinyake icho chingananga ubwezi withu na Chiuta. Tikwenera kujisambizga kuti tizizipizgenge. Pakutora nyengo kuti tisambire kuzizipizga. Apo tikukura mwauzimu, tikwamba kuzizipizga chomene. Para tikuzizipizga viyezgo vichokovichoko panyengo iyo tasambira waka unenesko, tikuŵa ŵakukhora, ndipo kunthazi tingazakazizipizga viyezgo vikuru. (Luka 16:10) Tikwenera kwambapo sono kuŵa ŵakukhora mu chipulikano, pambere viyezgo vikuru vindize. Tikwenera kusimikizga mtima kuti tiŵe ŵakukhora pambere viyezgo vindize. Mpositole Petrosi wakalemba kuti tikwenera kuzizipizga kweniso kuŵa na mikhaliro yinyake iyo Chiuta wakukhumba. Wakati: “Fwiliranipo chomene kusazgako ku chipulikano chinu makhaliro ghawemi, ku makhaliro ghinu ghawemi kumanya, ku kumanya kwinu kujikora, ku kujikora kwinu kuzizipizga, ku kuzizipizga kwinu kusopa Chiuta mwakujipeleka, ku kusopa Chiuta mwakujipeleka kutemwa ŵabali, ku kutemwa ŵabali chitemwa.”—2 Pet. 1:5-7; 1 Tim. 6:11.

⁸ Mazgu agho Yakobe wakalemba mu kalata yake ghakulongora kuti kuzizipizga nkhwakuzirwa chomene. Wakati: “Mukondwenge ŵabali ŵane para mukukumana na viyezgo vyakupambanapambana. Pakuti mukumanya kuti para chipulikano chinu chayezgeka chikubaba kuzizipizga. Kweni zomerezgani kuzizipizga kuti kufiske mulimo wake, mwakuti muŵe ŵakukwana na ŵambura kalema mu vyose, ŵambura kupeleŵera mu kanthu kalikose.” (Yak. 1:2-4) Yakobe wakati Ŵakhristu ŵakwenera kuvipokelera viyezgo ndipo ŵakwenera kukondwa navyo chifukwa vikuŵawovwira kuti ŵasambire kuzizipizga. Kasi namwe ndimo mukuwonera viyezgo? Pamanyuma, Yakobe wakalongora kuti kuzizipizga kukovwira Taŵakhristu kuŵa na nkharo yiwemi kuti titemweke na Chiuta. Zuŵa lililose tikuŵa ŵakukhora para tikuzizipizga viyezgo ivyo tikukumana navyo. Para tazizipizga, vikutovwira kuti tiŵeso na mikhaliro yinyake yiwemi.

⁹ Yehova wakukondwa para tikuzizipizga ndipo wazamutipa umoyo wamuyirayira. Yakobe wakayowoyaso kuti: “Wakukondwa ni munthu uyo wakulutilira kuzizipizga chiyezgo, chifukwa para wazomerezgeka wazamupokera mphumphu ya umoyo, iyo Yehova wakalayizga awo ŵakulutilira kumutemwa.” (Yak. 1:12) Tikuzizipizga chifukwa tikumanya kuti tizamupokera umoyo. Para tikutondeka kuzizipizga, tingalutilira yayi kuŵa mu unenesko. Usange tingathera na masuzgo, mbwenu tiwelerenge ku charu. Para tikutondeka kuzizipizga, tingalutilira yayi kuŵa na mzimu wa Yehova, ndipo tingapambika yayi vipambi vya mzimu.

¹⁰ Tikwenera kuwona masuzgo mwakwenelera kuti tilutilire kuzizipizga mu nyengo zakusuzga izi. Kumbukani kuti Yakobe wakati: “Mukondwenge.” Kweni ntchipusu yayi kukondwa para tikuyezgeka, chifukwa tingapwetekeka panji kusuzgika maghanoghano. Kweni kumbukani kuti tingazakasanga umoyo pekha para tazizipizga. Ivyo vikachitikira ŵapositole vikutovwira kuwona umo tingaŵira na chimwemwe para tikusuzgika. Ivyo vikaŵachitikira vikuyowoyeka mu buku la Milimo. Likuti: “Ŵakachema ŵapositole, ŵakaŵathyapura na kuŵakanizga kuyowoya mu zina la Yesu, ndipo ŵakaŵaleka kuti ŵalutenge. Ntheura ŵakafumapo panthazi pa Khoti Likuru, ŵakasekeleranga pakuti ŵakapimika ŵakwenelera kuyuyulika chifukwa cha zina la Yesu.” (Mil. 5:40, 41) Ŵapositole ŵakamanya kuti ŵakasuzgikanga chifukwa chakuti ŵakapulikira mazgu gha Yesu ndiposo kuti Yehova wakakondwanga nawo. Vyaka vikati vyajumphapo, apo Petrosi wakalembanga kalata yake yakwamba, wakayowoyapo kuti ntchiwemi kusuzgika chifukwa cha kuchita urunji.—1 Pet. 4:12-16.

¹¹ Nkhani yinyake nja Paulosi na Sila. Apo ŵakachitanga umishonale ku Filipi, ŵakaŵakora ndipo ŵakaŵapa mulandu wakuti ŵakatimbanizganga msumba kweniso kuti ŵakapharazganga malango ghambura kwenelera. Chifukwa cha ivi, ŵakadupulika chomene na kuŵikika mu jele. Baibolo likutiphalira kuti apo ŵakaŵa ŵachali mu jele na vilonda vyambura kukakika, “pakati pa usiku, Paulosi na Sila ŵakalombanga na kwimba sumu kulumba Chiuta, ndipo ŵakayidi ŵakaŵapulikanga.” (Mil. 16:16-25) Paulosi na Sila ŵakawona kuti kusuzgika kwawo chifukwa cha Khristu ukaŵa ukaboni wakuti ŵakaŵa ŵakugomezgeka kwa Chiuta na ŵanthu. Kweniso ŵakawonanga kuti yikaŵa nthowa yakupharazgira makani ghawemi kwa awo ŵakatemwanga kutegherezga. Ivyo ŵakachita vikawovwiraso ŵanthu ŵanyake. Usiku wenewuwo, mulinda wa jele na ŵamunyumba yake ŵakategherezga na kuzgoka ŵasambiri. (Mil. 16:26-34) Paulosi na Sila ŵakagomezga Yehova na nkhongono zake. Ndiposo ŵakamanya kuti Yehova wakukhumbisiska kuti waŵawovwire mu masuzgo ghawo. Iwo ŵakagongowa yayi chifukwa cha masuzgo.

¹² Lero napo, Yehova watipa vyose ivyo tikukhumbikwira kuti watikhozge mu nyengo za viyezgo. Wakukhumba kuti tizizipizgenge masuzgo. Watipa Mazgu ghake kuti timanye makora khumbo lake. Ichi chikukhozga chipulikano chithu. Tili na mwaŵi wa kuwungana na Ŵakhristu ŵanyithu na kuchita uteŵeti wakupatulika. Tiliso na mwaŵi wa kulomba kwa Yehova kuti tikhozge ubwezi withu na iyo. Wakupulika para tikumulumba na para tikumulomba kufumira pasi pa mtima kuti watovwire kulutilira kuŵa ŵakutowa pamaso pake. (Fil. 4:13) Ndipo tikwenera yayi kuwona mwakupepuka nkhongono izo tikusanga para tikughanaghana za vinthu viwemi ivyo tikulindilira munthazi.—Mat. 24:13; Heb. 6:18; Chivu. 21:1-4.

¹³ Viyezgo ivyo tikukumana navyo sono, vikuyana waka na ivyo ŵakakumananga navyo ŵasambiri ŵakwambilira ŵa Yesu Khristu. Mazuŵa ghano Ŵakaboni ŵa Yehova ŵakutukika na kutimbika chifukwa cha mautesi gha ŵanthu awo ŵakuŵasuska. Nga ni umo vikaŵira mu nyengo ya ŵapositole, kanandi ŵaliska ŵa visopa ndiwo ŵakwamba kususka chifukwa chakuti Mazgu gha Chiuta ghakuvumbura visambizgo vyawo vyautesi na nkharo zawo ziheni. (Mil. 17:5-9, 13) Nyengo zinyake, ŵanthu ŵa Yehova ŵakumangara ku khoti para ŵakukhumba kuŵa na wanangwa pa vinthu vinyake vyakukhwaskana na kusopa kwawo. (Mil. 22:25; 25:11) Kweniso maboma ghakukanizga ntchito yithu ya kupharazga, ŵakukhumba kuti yimare. (Sal. 2:1-3) Para vyaŵa nthena, tikuchita nga mbapositole. Iwo ŵakati: “Tikwenera kupulikira Chiuta nga muwusi m’malo mwa ŵanthu.”—Mil. 5:29.

¹⁴ Pakuti ŵanthu ŵakutemwa chomene charu chawo, ŵakuchichizga awo ŵakupharazga makani ghawemi kuti ŵaleke ntchito yawo iyo Chiuta wali kuŵapa. Ŵateŵeti wose ŵa Chiuta ŵakulipulikiska makora chomene chenjezgo lakukhwaskana na kusopa “chikoko na chikozgo chake,” ilo liri pa Chivumbuzi 14:9-12. Tikumanya kuti mazgu gha Yohane ngakuzirwa. Iyo wakati: “Apa ndipo ŵatuŵa awo ŵakusungilira malango gha Chiuta na kukoleska chipulikano chawo mwa Yesu ŵakukhumbikwira kuzizipizga.”

¹⁵ Viyezgo ivyo vikwiza para kuli nkhondo, para ŵanthu ŵawukira boma, para ŵakutisuzga, ndiposo para boma lakanizga ntchito yithu, vingapangiska kuti titondeke kusopa pakweru. Nyengo zinyake mpingo wose ungatondeka kuchitira pamoza maungano. Chingaŵa chakusuzga kupokera ulongozgi kufuma ku ofesi. Ŵalaŵiliri ŵa dera ŵangatondeka kwendera mipingo. Mabuku na vinthu vinyake vingaleka kwiza. Para chimoza mwa vinthu ivi chingachitika, kasi mungachita vichi?

¹⁶ Zgoro ndakuti: Chitani chilichose icho mungafiska mwakuyana na umo vinthu viliri. Mungasambira pamwekha. Mungakumana mu tumagulu mu nyumba za ŵabali kuti muchite maungano. Mungasambira mabuku panji magazini agho mukasambira kale kumanyuma. Lekani kufipa mtima chomene. Wupu Wakulongozga uzamusanga nthowa zakuyowoyeskerana na ŵabali awo ŵakumulaŵilirani.

¹⁷ Nanga mungaŵa ku malo uko kulije mubali waliyose, kumbukani kuti Yehova na Mwana wake, Yesu Khristu ŵali namwe. Mungalutilira kuŵa ŵakukhora. Yehova wapulikenge malurombo ghinu, ndipo wamukhozganinge na mzimu wake. Mulombani kuti wamulongozgani. Kumbukani kuti ndimwe muteŵeti wa Yehova na msambiri wa Yesu Khristu. Ntheura palipose apo mpata wasangika mukwenera kupharazga. Yehova wamutumbikaninge para mukuyezgayezga kuchita nthena, ndipo ŵanyake ŵangamba kusopa namwe.—Mil. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Nanga ŵangamuphalirani kuti ŵamukomaninge, nga umo vikaŵira na ŵapositole na Ŵakhristu ŵanyake, gomezgani “Chiuta uyo wakuwuska ŵakufwa.” (2 Kor. 1:8-10) Para mukugomezga kuti Chiuta wazamuwuska ŵakufwa, muzizipizgenge nanga chiyezgo chingaŵa chikuru wuli. (Luka 21:19) Yesu Khristu wakamanya kuti para wagomezgeka pa viyezgo, wakhozgenge ŵanyake kuti nawo ŵazizipizgenge. Nase tikwenera kuchita nga ndiyo. Namwe mungakhozga ŵabali na ŵadumbu ŵinu.—Yoh. 16:33; Heb. 12:2, 3; 1 Pet. 2:21.

¹⁹ Padera pa kutambuzgika na kususkika, mukweneraso kuzizipizga masuzgo ghanyake. Ŵakhristu ŵanyake ŵakugongowa para ŵanthu mu chigaŵa chawo ŵakukana makani ghawemi. Ŵanyake ŵakuzizipizga matenda panji masuzgo ghanyake. Mpositole Paulosi nayo wakazizipizga chiyezgo icho chikatimbanizganga uteŵeti wake panji icho chikapangiskanga kuti wachitenge uteŵeti mwakusuzgikira. (2 Kor. 12:7) Epafurodito uyo wakaŵa Mkhristu wa ku Filipi, nayo ‘wakasuzgika maghanoghano chifukwa [ŵabwezi ŵake] ŵakapulika kuti wakalwara.’ (Fil. 2:25-27) Nyengo zinyake tingasuzgika chifukwa cha ivyo tachita tekha panji ivyo ŵanyithu ŵachita chifukwa tili ŵakwananga. Ntheura chingaŵa chakusuzga kuzizipizga. Nyengo zinyake tingapambana maghanoghano na Ŵakhristu ŵanyithu panji ŵamunyumba yithu chifukwa chakuti nkharo yawo na yithu yikupambana. Kweni awo ŵakulondezga ulongozgi wa mu Baibolo, ŵangazizipizga masuzgo ghose agha.—Ezek. 2:3-5; 1 Kor. 9:27; 13:8; Kol. 3:12-14; 1 Pet. 4:8.

²⁰ Tikwenera kudemelera kwa Yesu Khristu, uyo Yehova wali kumusankha kuŵa Mutu wa mpingo. (Kol. 2:18, 19) Tikwenera kuteŵetera mwakukolerana na “muzga wakugomezgeka na wavinjeru” kweniso awo ŵimikika kuŵa ŵalaŵiliri. (Heb. 13:7, 17) Para tikulondezga ndondomeko ya gulu, na kukolerana na awo ŵakulongozga, mbwenu tiŵenge ŵakunozgeka kuchita khumbo la Yehova. Tikwenera kulomba nyengo zose. Kumbukani kuti, nanga ŵangatiŵika mu jele panji kutitaya kwatekha, vingatitondeska kulomba yayi panji kutimbanizga ubali withu na Ŵakhristu ŵanyithu.

²¹ Tiyeni tiŵikepo mtima kuti tichite ntchito yithu ya kupharazga ndipo tizizipizgenge apo tikuchita ntchito iyi. Tiyeni tilimbikire kuchita ntchito iyo Yesu wakapa ŵalondezgi ŵake. Yesu wakati: “Lutaninge mukazgore ŵanthu ŵa mitundu yose kuŵa ŵasambiri, mukaŵabatize mu zina la Adada na la Mwana na la mzimu utuŵa, mukaŵasambizge kusungilira vinthu vyose ivyo namuphalirani. Ndipo wonani, ine nili namwe mazuŵa ghose m’paka umaliro wa charu ichi.” (Mat. 28:19, 20) Tiyeni tizizipizge nga umo wakachitira Yesu. Tikumbukirenge Ufumu wa Chiuta uwo ukwiza ndiposo umoyo wamuyirayira uwo uli kunthazi. (Heb. 12:2) Pakuti ndise ŵasambiri ŵa Khristu, tili na mwaŵi wa kufiska uchimi wa Yesu wakuyowoya za “umaliro wa charu.” Uwo ukuti: “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.” (Mat. 24:3, 14) Para tikuŵikapo mtima pa ntchito iyi mu nyengo yaumaliro iyi, tizamusanga umoyo wamuyirayira mu charu chiphya icho Yehova watinozgera.