Kasi Mpingo wa Ŵakaboni ŵa Yehova Ukwenda Wuli?

Yehova ni Chiuta wa ndondomeko. (1 Ŵakorinte 14:33) Ntheura ŵanthu ŵake nawo ŵakwenera kuchita vinthu mwandondomeko. Kasi mpingo wa Chikhristu ukwenda wuli? Kasi tingawovwira wuli kuti vinthu vilutilire kwenda makora?

1. Kasi mutu wa mpingo ni njani?

‘Khristu ndiyo ni mutu wa mpingo.’ (Ŵaefeso 5:23) Nangauli wali kuchanya kweni ndiyo wakulongozga ŵanthu ŵa Chiuta pa charu chapasi. Yesu wali kwimika “muzga wakugomezgeka na wavinjeru,” gulu lichoko waka la ŵabali ŵalara ŵakukhwima mwauzimu awo ŵakumanyikwaso kuti Wupu Wakulongozga. (Ŵazgani Mateyu 24:45-47.) Nga umo vikaŵira na ŵapositole kweniso ŵalara ŵa ku Yerusalemu, mazuŵa ghano napo Wupu Wakulongozga ndiwo ukupeleka ulongozgi mu mpingo pa charu chose chapasi. (Milimo 15:2) Kweni ivi vikung’anamura kuti ndiwo mbalongozgi ŵa mpingo yayi. Iwo ŵakuthemba chomene Yehova kweniso Mazgu ghake kuti ŵamanye umo ŵangalongozgera ŵanthu ŵa Chiuta, ndipo ŵakujilambika kwa Yesu.

2. Kasi ŵalara mbanjani ndipo ŵali na udindo wuli?

Ŵalara mbanalume ŵakukhwima mwauzimu awo ŵakusambizga ŵanthu ŵa Chiuta fundo za mu Baibolo na kuŵawovwira kuti ŵalutilire kukura mwauzimu. Iwo ŵakupokera ndalama yayi. Ŵakuteŵetera ‘mwakukhumbisiska pamaso pa Chiuta. Ndipo ŵakusanga chandulo munthowa yauryarya yayi, kweni ŵakuteŵetera na mtima wose.’ (1 Petrosi 5:1, 2) Ŵateŵeti ŵakovwira ndiwo ŵakovwira chomene ŵalara, ndipo para pajumpha nyengo nawo ŵakwimikika kuŵa ŵalara.

Wupu Wakulongozga ukwimika ŵalara ŵanyake kuti ŵalaŵilirenge madera. Ŵakwendera mipingo yakupambanapambana kuti ŵayikhozgenge na kuyipa ulongozgi. Iwo ŵakwimika ŵalara na ŵateŵeti ŵakovwira awo ŵakufiska ivyo Baibolo likuyowoya.—1 Timote 3:1-10, 12; Tito 1:5-9.

3. Kasi Kaboni wa Yehova waliyose wali na udindo wuli mu mpingo?

Waliyose mu mpingo wali na udindo ‘wakulumba zina la Yehova,’ ndipo wakuchita ivi para wakusangika pa maungano na kupharazga makani ghawemi kuyana na mpata uwo wali nawo.—Ŵazgani Salimo 148:12, 13.

MANYANI VINANDI

4. Yesu ni mulongozgi walusungu

Yesu wakutipempha chinthu chakuzirwa chomene. Ŵazgani Mateyu 11:28-30, kufuma apo dumbiskanani fumbo ili:

• Kasi Yesu wakulongozga wuli mpingo, ndipo wakukhumba kuti tijipulikenge wuli?

VIDIYO: Ŵalara Ŵakawovwira Ŵabali na Ŵadumbu mu Nyengo ya Chindindindi ku Nepal (4:56)

Baibolo likuyowoya mwakupulikikwa makora chomene umo ŵalara ŵakwenera kuchitira mulimo wawo.

Ŵazgani Yesaya 32:2 na 1 Petrosi 5:1-3, kufuma apo dumbiskanani mafumbo agha:

• Kasi mukujipulika wuli kumanya kuti ŵalara nawo ŵakulongora ŵanthu lusungu nga umo wakuchitira Yesu?

• Kasi ni nthowa wuli zinyake izo zikulongora kuti ŵalara ŵakuyezga Yesu?

5. Ŵalara ŵakulongora chiyelezgero chiwemi

VIDIYO: Ŵalara Ndiwo Ŵakudangilira! (7:39)

Yesu wali kuŵika fundo izo ŵalara ŵakwenera kulondezga. Ŵazgani Mateyu 23:8-12, kufuma apo dumbiskanani fumbo ili:

• Kasi ntchivichi chikumukondweskani para mukuwona mphambano ya umo ŵalara ŵakulondezgera fundo za mu Baibolo na umo ŵalongozgi ŵa visopa ŵakuchitira?

1. Ŵalara ŵakovwira mbumba zawo umo zingakhozgera ubwezi na Yehova

2. Ŵalara wakovwira waliyose mu mpingo

3. Ŵalara ŵakupharazga nyengo zose

4. Ŵalara mbasambizgi, kweniso nawo ŵakunozga mu Nyumba ya Ufumu

6. Tikwenera kukolerana na ŵalara

Baibolo likutiphalira chifukwa icho tikwenera kukolerana na ŵalara. Ŵazgani Ŵahebere 13:17, kufuma apo dumbiskanani mafumbo agha:

• Chifukwa wuli Baibolo likuti tikwenera kupulikira na kujilambika ku awo ŵakulongozga? Kasi imwe mukuwona kuti ntchakuzirwa kuchita nthena?

Ŵazgani Luka 16:10, kufuma apo dumbiskanani fumbo ili:

• Chifukwa wuli ntchakuzirwa kupulikira ŵalara, nanga ni mu vinthu vichoko?

MWAKUDUMURA

Yesu ndiyo ni mutu wa mpingo. Ntheura tikukondwa kukolerana na ŵalara awo ŵali pasi pa iyo chifukwa ŵakutikhozga na kutisambizga kwizira mu ivyo ŵakuchita.

Kuweleramo

• Kasi mutu wa mpingo ni njani?

• Kasi ŵalara ŵakovwira wuli mpingo?

• Kasi Kaboni wa Yehova waliyose wali na udindo wuli?

SANGANI FUNDO ZAKUSAZGIKIRA

Wonani ukaboni uwo ukulongora kuti Wupu Wakulongozga kweniso ŵalara ŵakufipira mtima chomene mpingo mazuŵa ghano.

Kukhozga Ŵabali Ŵithu Awo Ŵakukanizgika Kusopa Pakweru (4:22)

Manyani ntchito iyo ŵalaŵiliri ŵa dera ŵali nayo.

Umoyo wa Ŵalaŵiliri ŵa Dera (4:51)

Wonani udindo uwo ŵanakazi ŵali nawo mu mpingo.

“Kasi Ŵanakazi Awo Mbakaboni ŵa Yehova Ŵakupharazga?” (Gongwe la Mulinda, Seputembala 1, 2012)

Wonani umo ŵalara ŵakuchitira kuti ŵakhozge Ŵakhristu ŵanyawo.

“Ŵalara ‘Mbantchito Ŵanyithu Kuti Tiŵe Ŵachimwemwe’” (Gongwe la Mulinda, Janyuwale 15, 2013)