Umo Ŵanthu Ŵakukhwaskikira na Uthenga wa Yesu Khristu

MULEMBI GREGG EASTERBROOK wakati: ‘Munthu wavinjeru wa ku Kaperenaumu wakayowoya uthenga wakuzirwa comene uwo ucali kucontha mitima ya ŵanthu.’a

MAZGU ghali na nkhongono. Mazgu agho ghayowoyeka mwavinjeru ghakucontha mitima, ghakukhozga, ndiposo ghakusintha umoyo wa ŵanthu. Palije munthu uyo wali kuyowoyapo mazgu ghankhongono comene kuluska Yesu Khristu. Munthu munyake uyo wakaŵapo apo Yesu wakapharazganga pa Lupiri, wali kulemba kuti: “Yesu wakati wamara mazgu agha, ico cikacitika nchakuti mizinda yikazizikika na kasambizgiro kake.”—Mateyu 7:28.

Mazuŵa ghano, ivyo Yesu wakayowoya vikumanyikwa comene ku ŵanthu pa caru cose. Wonani vinthu vinyake vyakuzirwa ivyo wakayowoya.

“Mungateŵetera nga mbazga ŵa Ciuta na Usambazi pa nyengo yimoza cara.”—Mateyu 6:24.

“Ntheura, vinthu vyose ivyo mukukhumba kuti ŵanthu ŵamucitirani, namwe mukwenera kucita mwakuyana waka kwa iwo.”—Mateyu 7:12.

“Wezgerani vinthu vya Kesare kwa Kesare, kweni vinthu vya Ciuta kwa Ciuta.”—Mateyu 22:21.

“Muli kukondwa kukuru mu kupeleka kuluska mu kupokera.”—Milimo 20:35.

Kweni Yesu wakacita vinandi padera pa kuyowoya mazgu ghambura kuluwika. Uthenga uwo wakapharazga ukaŵa wankhongono cifukwa wakayowoyanga unenesko wakukhwaskana na Ciuta, wakasambizganga ŵanthu umo ŵangaŵira na umoyo wakukhorweska, ndiposo wakalongora makora kuti Ufumu wa Ciuta ndiwo uzamumazga masuzgo ghose pa caru capasi. Apo tikusanda uthenga uwu mu mapeji ghakulondezgapo, tiwonenge cifukwa ico uthenga wa Yesu ‘ukuconthera mitima ya ŵanthu ŵanandi.’

[Mazgu ghamusi]