Ivyo Yesu Wakasambizga Vyakukhwaskana na Iyomwene

MULEMBI HERBERT LOCKYER wakati: ‘Yesu wakajimanyanga makora, wakamanyanga uko wakafuma, cifukwa ico wakizira pa caru, ndiposo ivyo vikaŵa munthazi mwake.’

PAMBERE tindazomerezge na kugomezga ivyo Yesu wakasambizga, tikwenera kumanya dankha vinthu vinyake vyakukhwaskana na iyo. Kasi Yesu wakaŵa njani comene? Kasi wakafumankhu? Kasi wakapukwaci? Ŵalembi ŵa Baibolo nga ni Mateyu, Mariko, Luka, na Yohane ŵangatovwira kusanga mazgoro cifukwa ŵali kulemba ndendende ivyo Yesu wakayowoya.

Wakaŵako kale pambere wandababike pano pasi Nyengo yinyake Yesu wakati: “Abrahamu wandaŵeko, ine niliko kale.” (Yohane 8:58) Abrahamu wakaŵako pafupifupi vilimika 2,000 pambere Yesu wandababike pano pasi. Kweni Yesu wakaŵako kale pambere munthu wacipulikano uyu wandababike. Ipo kasi Yesu wakakhalanga nkhu? Iyo wakati: “Nili kukhira kufuma kucanya.”—Yohane 6:38.

Mwana wa Ciuta Yehova wali na ŵana ŵanandi ŵauzimu. Kweni Yesu ngwapadera comene. Iyo wakajilongosora kuti ni “Mwana wapadera yekha wa Ciuta.” (Yohane 3:18) Mazgu agha ghakulongora kuti Yesu ni mwana yekha uyo wali kulengeka mwakudunjika na Ciuta. Mwana wapadera uyu ndiyo Ciuta wakamugwiliskira nchito pakulenga vinthu vinyake vyose.—Ŵakolose 1:16.

“Mwana wa munthu” Mazgu agha ndigho Yesu wakatemwanga comene kuyowoya para wakujilongosora. (Mateyu 8:20) Mazgu agha ghakulongora kuti wakaŵa muzguka yayi, kweni wakaŵa munthu wanadi. Na mzimu wake utuŵa, Ciuta wakasamuska umoyo wa Mwana wake kufuma kucanya kwiza mu nthumbo ya Mariya. Ici cikapangiska kuti Mariya, uyo wakaŵa mwali wambura kumanya mwanalume, waŵe na nthumbo. Antheura, Yesu wakababika wakufikapo, munthu wambura zakwananga.—Mateyu 1:18; Luka 1:35; Yohane 8:46.

Mesiya uyo wakalayizgika Mwanakazi Musamariya wakaphalira Yesu kuti: “Nkhumanya kuti Mesiya wakwiza.” Yesu wakazgora kuti: “Namweneine nkhuyowoya nawe ndine iyo.” (Yohane 4:25, 26) Lizgu lakuti “Mesiya” likuyana waka na lakuti “Khristu” ndipo ghose ghakung’anamura “Wakuphakazgika.” Yesu wakaŵa wakuphakazgika, panji kuti wakwimikika na Ciuta kuti wacite mulimo wapadera pakufiska malayizgo gha Ciuta.

Cifukwa cikuru ico wakizira Nyengo yinyake Yesu wakati: “Nkhwenera kupharazga makani ghawemi gha ufumu wa Ciuta, pakuti ndico nkhatumikira.” (Luka 4:43) Nangauli wakacitira ŵanthu ŵakusuzgika milimo yiwemi yinandi, kweni mulimo wake ukuru ukaŵa wa kupharazga Ufumu wa Ciuta. Ivyo wakasambizga vyakukhwaskana na Ufumu uwu viyowoyekenge kunthazi.

Nchakuwonekerathu kuti Yesu wakaŵa munthu bweka yayi.a Nga umo tiwonerenge, cifukwa cinyake ico mazgu gha Yesu ghakaŵira ghankhongono comene nchakuti pakwamba wakaŵa kucanya. Nchakuzizika yayi kuti uthenga uwo wakapharazga ukukhwaska ŵanthu ŵanandi pa caru cose capasi.

[Mazgu ghamusi]