Ŵakaŵa Ŵakukolerana Cifukwa ca Citemwa—Lipoti la Ungano wa pa Cilimika

ŴANTHU awo ŵakaŵa mu Nyumba ya Maungano Ghakuru ya Ŵakaboni ŵa Yehova, mu msumba wa Jersey, ku New Jersey, U.S.A ŵakaŵa ŵakukondwa. Pa Okutobala 3, 2009, ŵanthu ŵakujumpha 5,000 ŵakaŵa pa ungano wa pa cilimika wa nambara 125 wa Watchtower Bible and Tract Society of Pennsyvania. Ŵanyakeso ŵanandi ŵakawungana mu malo ghatatu gha Beteli ya ku United States, kweniso ya ku Canada ndipo ŵakawonelera na kutegherezga ungano uwu pa TV. Wose pamoza ŵakakwana 13,235, ndipo ŵakaŵa ŵakukolerana cifukwa ca kutemwa Yehova, ŵakategherezga ungano uwu kwa maora ghatatu.

Geoffrey Jackson, uyo wali mu Wupu Wakulongozga ndiyo wakaŵa ceyamani pa ungano uwu. Pakwamba ungano uwu wakacema kwaya kuti yimbe sumu kufuma mu buku liphya la sumu. Ŵabali ŵa mu kwaya iyi ŵakaŵa ŵa pa Beteli. David Splane, uyo nayo wali mu Wupu Wakulongozga, ndiyo wakalongozganga kwaya iyi, ndipo mwakudumura wakalongosora kuzirwa kwa sumu pa kusopa kwaunenesko. Ŵanthu awo ŵakiza pa ungano uwu, ŵakimba sumu zitatu kufuma mu buku liphya. Pakwimba, ŵakwaya ndiwo ŵakadangiliranga mwa kwimbako dankha pacoko, ndipo pamasinda wose ŵakimbiranga lumoza. Manyani kuti nchakuzomerezgeka yayi kuŵa na kwaya pa maungano gha mpingo, gha dera, na gha cigaŵa. Kwaya iyi yikaŵa ya ungano uwu pera.

Malipoti Ghakufuma ku Minthavi

Ŵa mu Makomiti gha Minthavi yinkhondi awo ŵakiza pa ungano uwu ŵakayowoya malipoti ghakufuma ku minthavi yawo. Kenneth Little wakati munthavi wa Canada sonosono wambenge kusindikizga magazini ghanandi gha ku United States na Canada, ico cipangiskenge kuti munthavi uwu uŵe na mulimo ukuru. Kuti ivi vicitike, mashini ghaphya ghakusindikizgira ghagwirenge nchito kwa maora 16 zuŵa lililose.

Reiner Thompson wakalongosora umo mulimo wa Ufumu ukwendera ku Dominican Republic, ndipo Albert Olih wakalongosora umo mulimo ukwendera ku Nigeria. Emile Kritzinger, uyo wakafuma ku Mozambique, wakati mu 1992 Ŵakaboni ŵa Yehova mu caru ici ŵali kulembeska ku boma, pamasinda pa kutambuzgika kwa vilimika vinandi. Ŵapharazgi ŵasazgikirako comene, mu vyaru vyose vitatu ivi. Viv Mouritz, uyo wakafuma ku munthavi wa ku Australia wakayowoya za umo mulimo ukwendera ku East Timor, cigaŵa ico cikulaŵilirika na ŵabali ŵa ku Australia.

Makomiti gha Wupu Wakulongozga

Kwambira mu 1976, milimo yose ya Ŵakaboni ŵa Yehova yikulaŵilirika na makomiti 6 gha Wupu Wakulongozga. Nyengo yikati yajumphapo, ŵa mberere zinyake ŵakasoleka kuti ŵawovwire mu makomiti agha. Pasono ŵabali aŵa ŵalipo 23. Ŵankhondi na yumoza mwa iwo ŵakafumbika mafumbo pa ungano uwu. Vilimika vyawo vyose ivyo ŵakhalira mu uteŵeti wanyengozose, para vyasazgika pamoza vikukwana 341, ico cikung’anamura kuti waliyose wacita uteŵeti wanyengozose pafupifupi vilimika 57.

Don Adams, uyo wateŵetera pa Beteli kufuma mu 1943, wakati mu Komiti Yakulongozga muli ŵabali awo ŵakulongozga makomiti ghankhondi, ndipo yikuwoneseska kuti makomiti ghose ghankhondi ghakucita milimo yawo mwakukolerana. Komiti iyi yikovwira para kwacitika vinthu vyamabuci nga ni nthambuzgo, milandu ya ku khoti, masoka ghacilengiwa, na vinthu vinyake ivyo vikuwira Ŵakaboni ŵa Yehova pa caru cose.

Dan Molchan Wakalongosora za mulimo wa Komiti ya Nchito. Komiti iyi yikulaŵilira umoyo wauzimu na wakuthupi wa ŵabali ŵa pa Beteli pa caru cose, awo ŵakukwana 19,851. David Sinclair wakalongosora za Komiti ya Kusindikizga, iyo yikulaŵilira mulimo wa kugura vinthu ivyo vikukhumbikwa mu maofesi gha minthavi. Robert Wallen, uyo wateŵetera pa Beteli pafupifupi vilimika 60, wakalongosora za Komiti ya Uteŵeti, iyo yikulaŵilira mulimo wa m’munda wa ŵanthu ŵa Yehova ndiposo mu mipingo. William Malenfant wakalongosora za Komiti Yakusambizga, iyo yikutokatoka kunozga nkhani za maungano gha cigaŵa. Paumaliro, John Wischuk wakalongosora za Komiti Yakulemba, iyo yikulaŵilira mulimo wa kunozga ndiposo kulemba mabuku ghithu.a

Lemba la Cilimika ca 2010 Likuyowoya za Citemwa

Nkhani zitatu zakulondezgapo zikayowoyeka na ŵabali ŵa mu Wupu Wakulongozga. Pakwamba nkhani yake, Gerrit Lösch wakafumba kuti: “Kasi mukukhumba kuti ŵanyinu ŵamutemwaninge?” Iyo wakati citemwa nchimoza ca vinthu ivyo vikukhumbikwa pa umoyo wa munthu, ndipo tose tikucita makora vinthu para ŵanji ŵakutitemwa. Tose tiliko cifukwa ca citemwa, cifukwa Yehova cikamutuma nchitemwa kuti watilenge. Cifukwa cikuru ico tikupharazgira ndiposo kusambizga ŵanthu unenesko nchakuti tikutemwa Yehova.

Tikulongora citemwa ku ŵazengezgani ŵithu pera yayi, kweniso ku ŵalwani ŵithu. (Mat. 5:43-45) Wose pa ungano uwu ŵakakhuŵilizgika kuti ŵaghanaghanirepo umo Yesu wakasuzgikira, kuthyapulika, kuhoyeka, kuthunyirika mata, ndiposo kulasika cifukwa ca ise. Kweni wakalombera ŵasilikari awo ŵakamupayika. Kasi ivi vikutikhuŵilizga yayi kuti timutemwenge comene? Pamasinda, Mbali Lösch wakapharazga kuti lemba la 1 Ŵakorinte 13:7, 8 ndilo liŵenge la cilimika ca 2010, ndipo likuti, ‘Citemwa cikuzizipizga vinthu vyose. Citemwa cikutondeka cara.’ Tikulindilira kuzakakhala kwamuyirayira pera yayi, kweniso kuzakatemwa ŵanyithu ndiposo kutemweka.

Kasi Mukwenda na Tumafuta Tucoko?

Samuel Herd wakamba nkhani yake mwa kuyowoya ciyelezgero. Wakati yelezgerani kuti munyinu wamutorani kuti mwende ulendo wa makilomita 50 pa galimoto. Mwati mwendapo pacoko, mukuwona kuti mu galimoto muli tumafuta tucoko waka. Mukumuphalira kuti mafuta ghali pafupi kumara. Iyo wakuti mungenjerwanga yayi, cifukwa mu thanki ghacalimo pacoko. Mwati mwendapo pacoko waka, mbwenu mafuta ghakuti namalira pano. Kasi cingaŵa camahara kwenda na tumafuta tucoko waka, uku mukumanya kuti pa nthowa mwamusuzgika? Ipo cingaŵa camahara kuwoneseska kuti galimoto iyo mukwendera yili na mafuta ghakukwana! Ndimo vikwenera kuŵiraso mwauzimu, tikwenera kuŵa na thanki lakuzura na mafuta, uwo mbunenesko wakuyowoya za Yehova.

Nyengo na nyengo tikwenera kuthiramo mafuta ghakukwana mu thanki. Pali nthowa zinayi izo zingatovwira. Nthowa yakwamba nkhusambira patekha. Tiŵazgenge Baibolo zuŵa lililose, mwakuti tilimanye makora. M’malo mwa kuŵazga waka, tikwenera kuyezgayezga kupulikiska ivyo tikuŵazga. Yaciŵiri njakuti tikwenera kuwoneseska kuti tikusanga candulo na Nyengo Yakusopera ya Mbumba. Kasi sabata yiliyose tikuthiramo mafuta ghakukwana mu thanki lithu lauzimu, panji tikuthiramo tucoko waka? Nthowa yacitatu nkhusangika pa maungano gha mpingo. Yacinayi nkhulanguruka pa nthowa za Yehova. Salmo 143:5 likuti: “Nkhukumbuka mazuŵa gha mwaka; nkhulanguruka na ivyo vyose mwavicita.”

“Ŵarunji Ŵazamuŵala Ngwee”

John Barr wakayowoya nkhani yacitatu, iyo yikaŵa yaumaliro, ndipo yikalongosora ntharika ya Yesu ya tirigu na duru. (Mat. 13:24-30, 38, 43) Ntharika iyi yikuyowoya za “nyengo ya vuna.” Mu nyengo iyi, ‘ŵana ŵa ufumu’ ŵakulongeka mu nthamba, ndipo duru likupatulika kuti locheke.

Mbali Barr wakalongosora makora kuti nyengo iyi yilutilirenge yayi. Wakazunura lemba la Mateyu 24:34, ilo likuti: “Muwiro uwu umalenge cara mpaka vinthu vyose ivi vicitike.” Kaŵiri kose, wakaŵazga mazgu ghakuti: “Yesu wakwenera kuti wakayowoyanga za ŵakuphakazgika awo ŵakaŵako apo cimanyikwiro cikamba kuwoneka mu 1914 kuti ni muwiro umoza na ŵakuphakazgika awo ŵazamuwona jando la suzgo yikuru.” Tikumanya yayi kuti “muwiro uwu” uŵengepo kwa utali wuli, kweni ukuyowoya za magulu ghaŵiri agha, agho ghali na ŵanthu ŵa misinkhu yakupambanapambana. Nangauli ŵakuphakazgika ŵakupambana misinkhu, kweni wose ŵakupanga muwiro uwu, ndipo ŵakukhala mu mazuŵa ghaumaliro. Ipo nchakukhozga comene kumanya kuti ŵakuphakazgika awo ŵali na vilimika vicoko, awo ŵakukhala mu nyengo yakuyanako waka na ŵakuphakazgika awo ŵakawona cimanyikwiro mu 1914 ŵafwenge wose yayi mpaka apo suzgo yikuru yambirenge.

‘Ŵana ŵa ufumu’ ŵakulindilira njombe yawo yakucanya, kweni tose tikwenera kulutilira kuŵa ŵakugomezgeka ndiposo kuŵala ngwee mpaka apo umaliro wizirenge. Mu nyengo yithu iyi, tili na mwaŵi ukuru comene cifukwa tikuwona “tirigu” wakuvunika.

Sumu yaumaliro yikati yimbika, Theodore Jaracz, uyo nayo ngwa mu Wupu Wakulongozga wakajara na lurombo. Ungano wa pa cilimika uwu ukaŵa wakukhozga nadi!

[Mazgu ghamusi]

[Bokosi pa peji 5]

SUKULU YA ŴALARA

Pa ungano wa pa cilimika uwu, Anthony Morris, wa mu Wupu Wakulongozga wakapharazga kuti sukulu ya ŵalara ŵa mpingo yilutilirenge kucitika. Sukulu iyi yikambira ku United States mu 2008, ku likuru la masambiro, ku Patterson mu msumba wa New York. Kilasi la nambara 72 lamara sonosono, ndipo ŵalara 6,720 ŵasanga candulo na sukulu iyi. Kweni nchito yicalipo. Ku United States pera kuli ŵalara ŵakujumpha 86,000. Lekani Wupu Wakulongozga uli kuzomerezga kuti kwamba pa Disembala 7, 2009 ku Brooklyn, mu msumba wa New York, kucitikirengeso sukulu iyi.

Kwa myezi yiŵiri, ŵalaŵiliri ŵakwendakwenda ŵanayi ŵakakasambizgika ku Patterson. Pamanyuma pa kusambizgika ŵakatumika ku Brooklyn kuti ŵakasambizge ŵalara, ndipo ŵanyakeso ŵanayi ŵakasambizgikaso. Awo ŵakasambizgika kaciŵiri ŵakatumika ku Brooklyn, ndipo ŵakwamba ŵara ŵali kutumika kuti ŵakasambizgenge ŵalara mu Malo gha Ungano na Nyumba za Ufumu. Ŵalaŵiliri ŵakwendakwenda ŵakukwana 12 ŵali kusambizgika, mwakuti sabata yiliyose ŵakusambizga magulu ghankhondi na limoza gha ŵalara ŵa mu United States, mu ciyowoyero ca Cingelezi. Pamasinda ŵalaŵiliri ŵakwendakwenda ŵanyake ŵanayi ŵakasambizgika kuti ŵakasambizgenge mu ciyowoyero ca ku Spain. Sukulu iyi kuti yanjira m’malo mwa Sukulu ya Uteŵeti wa Ufumu yayi, kweni cilato cake nkhovwira ŵalara kuti ŵalutilire kukura mwauzimu. Minthavi pa caru cose yambenge kucitiska sukulu iyi mu cilimika ca uteŵeti ca 2011, ndipo yamucitikiranga mu Malo gha Ungano na Nyumba za Ufumu.

[Vithuzithuzi pa peji 4]

Pa ungano wa pa cilimika uwu, ŵakimba sumu za mu buku liphya la “Yimbirani Yehova”