Kasi Ŵakaboni ŵa Yehova Mbakhristu Ŵaunenesko?

Taŵakaboni ŵa Yehova tikugomezga kuti ndise Ŵakhristu ŵaunenesko. Chifukwa wuli? Chifukwa cha ivyo tikugomezga, zina ilo tikumanyikwa nalo, kweniso chitemwa icho tikulongorana.

1. Kasi ivyo Ŵakaboni ŵa Yehova ŵakugomezga vikujintha mpha?

Yesu wakayowoya kuti: “Mazgu [gha Chiuta] mbunenesko.” (Yohane 17:17) Nga ni Yesu, nyengo zose ivyo Ŵakaboni ŵa Yehova ŵakugomezga vikujintha mu Mazgu gha Chiuta. Wonani chiyelezgero ichi. M’ma 1870 kagulu ka ŵasambiri ŵa Baibolo kakamba kusanda Baibolo mwakupwelelera kuti kamanye makora ivyo likusambizga. Iwo ŵakagomezganga chomene ivyo Baibolo likusambizga nanga vipambane na ivyo matchalitchi ghanyake ghakagomezganga. Ŵakamba kuphalirako ŵanyake unenesko wa mu Baibolo.a

2. Chifukwa wuli tikuchemeka kuti Ŵakaboni ŵa Yehova?

Yehova wakutichema Ŵakaboni ŵake chifukwa tikuphalirako ŵanthu unenesko wakukhwaskana na iyo. (Ŵahebere 11:4–12:1) Mwachiyelezgero, kale chomene Yehova wakaphalira ŵanthu ŵake kuti: “Ndimwe ŵakaboni ŵane.” (Ŵazgani Yesaya 43:10.) Yesu nayo wakuchemeka kuti “Kaboni Wakugomezgeka.” (Chivumbuzi 1:5) Lekani mu 1931 tikamba kumanyikwa na zina lakuti Ŵakaboni ŵa Yehova. Tikukondwa chomene kuti tikumanyikwa na zina ili.

3. Kasi Ŵakaboni ŵa Yehova ŵakumuyezga wuli Yesu pa nkhani ya chitemwa?

Yesu wakaŵatemwanga chomene ŵasambiri ŵake, ndipo wakaŵatoranga nga mbabali ŵake ŵanyumba yimoza. (Ŵazgani Mariko 3:35.) Mwakuyana waka, Ŵakaboni ŵa Yehova ni mbumba yakukolerana chomene pa charu chose. Lekani tikuchemana kuti ŵabali na ŵadumbu. (Filimoni 1, 2) Tikupulikiraso dango lakuti: “Mutemwenge ŵabali wose.” (1 Petrosi 2:17) Ŵakaboni ŵa Yehova ŵakulongora chitemwa mu nthowa zinandi, nga kovwira Ŵakhristu ŵanyawo para ŵasangana na masuzgo.

MANYANI VINANDI

4. Ivyo tikugomezga vikujintha mu Baibolo

Yehova wakayowoyerathu kuti unenesko wa mu Baibolo uzamuvumbukwa. Ŵazgani Daniyeli 12:4 na mazgu ghamusi, kufuma apo dumbiskanani fumbo ili:

• Kasi ntchivichi chikalutilira ‘kwandana’ apo ŵanthu ŵa Chiuta ŵakasandanga Baibolo?

Wonani ivyo ŵakachita ŵanthu awo ŵakasambiranga Mazgu gha Chiuta kusazgapo Charles Russell. Wonelerani VIDIYO, kufuma apo dumbiskanani fumbo ili.

VIDIYO: Ŵakawusangaso Unenesko wa mu Baibolo (7:45)

• Kuyana na ivyo mwawona mu vidiyo, kasi Charles Russell na ŵanyake ŵakachitanga wuli pakusambira Baibolo?

Kasi mukumanya?

Nyengo zinyake tikusintha umo tikupulikiskira vinthu. Chifukwa wuli? Nga umo ungweru wa zuŵa ukovwilira kuti tiwonenge makora charu, Chiuta nayo wakovwiraso ŵanthu ŵake kuti ŵalutilire kuwupulikiska makora unenesko. (Ŵazgani Zintharika 4:18.) Nangauli Baibolo likusintha yayi, kweni ise para tapulikiska makora fundo yinyake ya mu Baibolo tikusintha vinthu vinyake ivyo tagomezganga.

5. Tikuchita vinthu kuyana na zina lithu

VIDIYO: Zina Ilo Tikumanyikwa Nalo (2:40)

• Chifukwa wuli zina lakuti Ŵakaboni ŵa Yehova ndakwenelera?

Chifukwa wuli Yehova wasankha ŵanthu kuti ŵaŵe ŵakaboni ŵake? Chifukwa ŵakovwira ŵanthu kumanya kuti iyo ni Chiuta waunenesko, pakuti ŵanthu ŵakumuyowoyera mautesi ghanandi. Wonani mautesi ghaŵiri agha.

Ŵalongozgi ŵanyake ŵa matchalitchi ŵakusambizga ŵanthu ŵawo kuti ŵagwiliskirenge ntchito vikozgo pakusopa. Ŵazgani Levitiko 26:1, kufuma apo dumbiskanani mafumbo agha:

• Kasi unenesko ngwakuti wuli? Kasi Yehova wakuviwona wuli vikozgo?

Ŵalongozgi ŵa matchalitchi ŵakusambizga ŵanthu kuti Yesu ni Chiuta. Ŵazgani Yohane 20:17, kufuma apo dumbiskanani mafumbo agha:

• Kasi unenesko ngwakuti wuli? Kasi Yesu na Chiuta ni munthu yumoza?

• Kasi imwe mukujipulika wuli kumanya kuti Yehova wali kutuma Ŵakaboni ŵake kuti ŵapharazgenge vya iyo na Mwana wake Yesu?

6. Tikutemwana

Baibolo likuti Ŵakhristu ŵakuyana na viŵaro vya thupi. Ŵazgani 1 Ŵakorinte 12:25, 26, kufuma apo dumbiskanani mafumbo agha:

• Kasi Ŵakhristu ŵaunenesko ŵakuchita wuli para ŵanyawo ŵakusuzgika?

• Kasi Ŵakaboni ŵa Yehova ŵakulongora wuli kuti ŵakutemwana?

Para ku chigaŵa chinyake Ŵakaboni ŵa Yehova ŵasangana na suzgo, Ŵakaboni ŵa Yehova pa charu chose chapasi ŵakuchitapo kanthu mwaluŵiro. Wonani ukaboni pa nkhani iyi. Wonelerani VIDIYO, kufuma apo dumbiskanani fumbo ili.

VIDIYO: Ŵabali Withu Ŵakazizipizga Chimphepo cha Hurricane Matthew ku Haiti (5:29)

• Kasi ntchito yakovwira para kwachitika soka yikulongora wuli kuti Ŵakaboni ŵa Yehova ŵakutemwana?

MWAKUDUMURA

Ŵakaboni ŵa Yehova Mbakhristu ŵaunenesko. Ndise mbumba ya pa charu chose, ivyo tikugomezga vikujintha mu Baibolo, ndipo tikuphalirako ŵanthu unenesko wakukhwaskana na Yehova.

Kuweleramo

• Chifukwa wuli tikasankha kuti tichemekenge Ŵakaboni ŵa Yehova?

• Kasi tikuchita wuli vinthu na ŵanyithu?

• Kasi mukuwona kuti Ŵakaboni ŵa Yehova Mbakhristu ŵaunenesko?

SANGANI FUNDO ZAKUSAZGIKIRA

Manyani vinandi vya mbiri yithu.

Ŵakaboni ŵa Yehova Ŵakalongora Chipulikano, Chigaŵa 1: Kufuma mu Mdima (1:00:53)

Wonani umo Ŵakaboni ŵa Yehova ŵavumbulira visambizgo vyautesi.

Ŵanthu ŵa Chiuta Ŵakuchindika Zina Lake (7:08)

Sangani mazgoro gha mafumbo agho muli nagho ghakukhwaskana na Ŵakaboni ŵa Yehova.

“Ivyo Ŵanthu Ŵakutemwa Kufumba vya Ŵakaboni ŵa Yehova” (peji la pa webusayiti)

Stephen wakatinkhanga chomene ŵanthu ŵa mtundu unyake ndipo wakaŵachitiranga nkhaza. Wonani ivyo vikamovwira kuti wasinthe wati wawona umo Ŵakaboni ŵa Yehova ŵakuchitira vinthu.

“Umoyo Wane Ukafika Paheni Chomene” (Gongwe la Mulinda, Julayi 1, 2015)